講 嫁去好遠

今朝又再 6.30 出發，無人的街道，

好似新鮮空氣都比我一個人吸晒，哈哈哈哈。

講開嫁去好遠的故事。

同阿媽傾開計，佢就會講當年佢仲係做女嗰陣，曾經同一個"嫁去外國"嘅機會好接近。

當年阿婆帶住一班細路，由大陸走難嚟咗香港，阿媽同阿姨好細個就要去做工廠妹幫手養家，阿婆同阿公係文革前本來都係大富人家嚟嘅，所以阿婆仲係有舊式思想，成日同阿媽講話 "捱多陣啦！遲啲環境好番的，同你揾主好人家嫁咗就唔洗再愁喇！"

嗰時阿媽係工廠識到有個姊妹朋友，有同鄉親戚移民咗嚟加拿大嘅，所以呢位姊妹最後都嫁咗去加拿大。(初時仲同阿媽有書信來往架，後嚟就梗係失聯啦。。。係時間洪流入面，有幾多可以繼續吖。。。)

佢未走嗰時，呢個朋友都話有人介紹比阿媽，可以嫁去外國架，都唔知係阿媽唔捨得屋企人？定係阿婆唔捨得嗰咁幫到手嘅大女？所以阿婆都係用同一句 "遲的揾個有錢人家比你"就咁樣交待阿媽就算了(嗰時好明顯仲係 "結婚呢的人生大事，係由阿媽話事嘅") ，所以阿媽就繼續係香港生活。

嗰時應該係 60 年代，有邊嗰到會諗到 50年之後嘅第二代 (即係我) ，就會做咗佢無做到嘅？

世事嘅野真係講唔埋嘅，或者當年阿媽嫁咗過嚟，會可以做"超級市場夫人" 都唔定 (嗰個年代嘅好多都係開餐館或超市)

而且我都幾肯定嚟咗外國的話，可以比屋企嘅接濟一定比起係香港做工廠多。
不過，機會係留比大膽嘅人，所以你見要發達就要狠心 或 忍心，係不無道理的。

(呢張仲睇到月半彎) 

故事還有下半段。

同阿媽一樣細個就要做工廠妹的那個阿姨，好大年紀都未結婚(以嗰個年代計) 。後來，阿姨係工廠識到個合眼緣的人，想拍拖結婚，帶番嚟比阿婆睇，之後，阿婆經阿媽轉達意見，就係話呢個人太花靚仔，係浪子類型，唔可靠，即係 No 啦！！！

阿媽同阿姨落去公園傾計，阿姨聽到阿婆意見後，哭著對阿媽說 "都就嚟30啦(唔肯定！總之就係年紀大喇) 呢個又唔啱，等到幾時？"

之後係阿媽返去同阿婆求情說 "佢咁大個人，浪子唔浪子，都係佢自己揀嘅，你唔比佢結，第日揾唔到個伴，怨你一世呀！"

阿姨就係這樣結的婚。

其實很多謝我的父母很開明。

你以為10年前我嚟嗰陣時代已經很開明？嗰陣仲係 yahoo blog 嘅年代，仲可以睇到好多 blogger 嘅際遇，仍然係有好多家長很守舊的。。。係不能致信嘅守舊程度。

阿姨仲係同姨丈一齊呀。一仔一女，不是有錢，也是要辛苦工作生活呀，但這世道上有邊嗰唔係呢？