Oh my "word"

無聊睇吓娛樂新聞，睇咗呢篇野。

第一眼 "立" 落去無問題，之後覺唔對路，登大對眼再睇。

哈哈，寫錯別字成日都有，不過係覺得依家真係無乜人proof-read 咁囉。

我仲好記得我以前係會所做文職，成日要打 menu (約一年轉一次餐牌另加季節性餐牌) 好幾本字典又中又英擺係枱頭成日揭，仲要個 menu 係睇到，真係 order 去 print 嗰陣我曉背架喇。

跟住要出會員月刊，又係金晴火眼咁樣去proof-read 因為比老闆發現睇漏咗錯別字係好大鑊的。

其實講真，有幾大鑊我真係唔知，因為touch wood 未試過。但壓力係自己比自己嘅責任感，唔想print 出去比人睇嘅野有錯。

無聊

無聊的星期早上。

你會做啲咩？

仲未到冬天

(不過都近架喇！)

實情係有時無聊

我會走去衣櫃入面，每件衫都著吓佢。

一嚟睇吓有邊件唔再鐘意就捐出去

二嚟會"發現" "新"貨

其實只係太耐之前買嘅，

耐無著掛掛吓掛咗去暗角

(好似暗角七警打人咁樣 抦埋一邊)

之後就唔記得咗有件咁嘅嘢

然後三嚟就係我又試減肥

得閒試吓的衫

睇吓邊件仲塞得落

或者係發現 咦！呢件舊野竟然依家著得落

真係好滾動呀！！可以開心好一陣子

仲可以更有恆心去繼續減

無聊時咁樣當自己衣櫃係試身室呢

仲可以幫到唔會買新衫

依家係手機或平板

玩 非book 或其他social media

佢地的跟蹤功能真係好恐怖

例如我搜尋過一張機票

跟住嗰晚佢即刻彈好多嗰個地點旅遊嘅廣告出嚟

更多就係你打咭過嘅地點 

例如舖頭食肆 佢跟住就勁出有關嘅廣告

你search過一件衫 佢就係咁出嗰的衫嘅ad

女人見到衫真係好易落疊

但係咁樣去試身室一轉

就發覺好多款自己都有囉

同埋我依家咁得閒

就會同自己的衫玩二次創作

我有一件外套 cardigan

係無鈕無拉鍊 又無袋嘅

買嗰時興呢的麻

著著吓先發覺其實自己唔係咁鐘意的衫咁嘅

由其係呢到冬天超凍嗰時

我鐘意的衫包到實 仲要有袋比我插埋雙手嘅

所以我買兩粒超大嘅鈕

整到佢好似漁夫褸嗰種鈕扣

再揾舊毛巾剪兩個橢圓形

車係左右兩邊做袋

哈哈哈 咁樣又玩咗成日

揸車

要講今日最大單嘅新聞，梗係呢單。

長沙灣交通意外

首先想講，好多人 forward 出嚟嘅都係生果報同方向報嘅報道，我係要特登去揾香港電台嘅呢一段 cap 出嚟。
點解唔就咁 cap 方向報同生果報嘅報道？
有睇過嘅你，唔知會唔會和我有同感：
洗唔洗真係血淋淋咁樣，將嗰幾個死傷者嘅相都照登出嚟？
我講緊係喺車頭比巴士壓住嗰幾個傷者嗰張。佢仲要 zoom 近男傷者嗰張都照放。

其實之前嗰單"油麻地豪宅 御金 • 國峯公務員夫婦墮樓命案", 都已經夠晒變態，又係近鏡去影兩個死者屍首。有一篇的報道就話係有怪風將帳幕吹走而影到。Anyway, 
我都知依家揾食艱難，作為記者跑到新聞我都登你開心。
紙媒能夠繼續落去亦都係我嘅希望。
但真係，希望大家都比番少少道德/責任/同理心做野啦。
定係依家個社會已經變到係，唔殘忍就生存唔到嘅地步？

對睇新聞嘅人嚟講，呢幾幅相絕對係慘不忍睹，係應該要打隔仔或抽起唔出。
重要嘅係，對死者嘅家人嚟講，呢個可能就係以後一諗起死者嘅一幅景像！！
有家人因橫禍而死已經夠慘架喇，仲要那屋企人"逝世的樣子"就係咁樣變成大家見到的最後一面，彷彿世上已經再無同情心呢回事。

跟住我想講嘅，係司機。
唔係意外入面呢兩位司機。

肥鬼有一個，到依家我都未見過面嘅舅父。佢住係第二個州，縱使佢所有兄弟姊妹都住係呢邊，佢無返過嚟探親，也不是太遠，揸車十個鐘就返到。

肥鬼話因為一次意外之後，佢再無揸過車。
意外詳情已經不再重要了。
重點反而係喺意外之前，肥鬼舅父一路都係小心揸車的人，為了馬路安全，佢從來都係揸大型貨車嘅 (truck) (類似下圖) ，佢有句口頭憚話："如果遇上意外，我唔想係死去的那個"。

點知，意外來了。係雙線雙程行車，兩車迎頭相撞。
迎面而來的是一個醉酒司機，揸一架細車，揸咗過嚟肥鬼舅父嘅行車線上，肥鬼舅父受傷無事，那醉酒司機死了。
但肥鬼舅父亦從始有著陰影，不能再揸車了。

我想講，除非係前面有個人企定定係到，你都開行車照鏟埋去。
基本上，無人想揸車撞死人。
係，世上真係有好多唔小心嘅司機，但如果係職業司機的話，呢個係佢嘅生計，出咗意外佢會連份工都無埋，基本上我都係相信佢地唔會蓄意撞車。

以前係香港，我唔識揸車，對交通意外嘅新聞一般都係同情死傷者，現在的我，更加會同情司機，由其係職業司機，佢地真係都好慘。

以我自己嘅睇法，呢個意外，係有可能嗰架的士見黃燈就 dup 停，但係後面呢架巴士就 dup 唔切，又唔想撞到的士，一扭軚就引致呢個意外。試問咁樣又點可以怪晒佢？

係呢邊，我見過有一樣行車輔助設施好有用。
如果前面10米有燈位，咁係燈位前10米嘅呢度，路嘅兩邊都有盞黃燈，當前面燈位將要轉燈時(約10秒前) ，呢盞黃燈就會開始斬，你見到呢盞黃燈斬緊，就知道要收油了，因為前面燈位將要轉紅色。呢樣設施對大車特別有用，因為大車由收油到停係要用較多時間嘅，而黃燈到燈位嗰段路就係要肯定比足夠路程比架車停低。

現在自己都有揸車，就發覺有時個問題係，你唔會知佢幾時轉黃，你唔會次次都咁好彩老遠就見到睇住佢轉黃然後大把時間同空間比你去停低架車，好多時係你差不多已經係燈位前面佢就轉燈，然後你即刻要諗我應該 dup 停 定係過埋佢。有時意外就係你估佢前面架車係過埋佢，點知最後一秒佢 dup 停，咁樣就拎野喇。

今日仲有一樣想講嘅。

唔該呢的公司PR 回應意外嘅時候，唔好再話 "車長有權決定拒絕OT" 呢的真係咁涼薄嘅說話囉。

依家香港咁嘅時勢，我真係唔會信，"車長真係有決拒絕OT" 而公司/上司唔會報仇囉。

真人真事。
我係第一身嘅真人真事。
係美國呢邊講到嘅勞工福利咁好嘅地方都會發生嘅事，你地自己諗吓係香港呢個出名欺壓勞工嘅地方會點！

我係 Wxxmart 超市做咗足5年。
佢的舖頭係長期請唔夠人嘅，一個人要係本身間舖入面分身幾個部門已經係等閒事。

同其他零售業一樣，佢嘅舖年年都要做盆點 (inventory) 。
即係成間舖出面入面都要執整齊佢，然後指定日子另一間獨立審計公司嘅人，會嚟同你點吓的貨物總值，睇吓係咪同帳面盆數係夾嘅。

每次做盆點，都要動用好多人力，好多時間去執靚間舖，務求盆點有好嘅成積。
所以，年年嗰幾個月，佢都會不停揾人去其他舖幫手執貨。
初嚟報道嘅我，因為只係有信心揸車去熟路嘅地方，所以我直頭大大聲話佢知我唔識去，所以唔會去其他舖幫手。初時嗰個經理都同我幾 friend 無留難我。

直到有一次，佢又話好需要人幫喇，又話有同事都去可以carpool (即係坐佢車) 咁我見拒絕咗佢咁多次就幫佢一次啦。

其實成件事係好低能嘅。
嗰間舖同我地間舖嘅距離，揸車需時30分鐘。佢叫我地出發去幫手嗰時，係下午放工繁忙時段，所以要預一粒鐘揸車過去，我地兩個收9點，預番時間返嚟自己舖打咭收工，實際係嗰到幫手做野最多兩三個鐘頂盡。

Anyway, 同事揸車過去嗰時，因為係繁忙時段，的車行吓停吓，就係前面架車行吓然後 dup 停，而同事架車就 dup 唔切就咁撞咗。係小撞嚟嘅，所有人都無事，但係同事呢架係老齡車，所以的transmission fluid 定 radiator fluid 就流走晒，架車要total loss.

同事60幾歲，係到做咗8年，突然間要揾畢錢去買番架車有難度。
無車返唔到工即係手停口停。問公司有無野可以幫到手，有無野可以claim, 同埋點睇呢個都係同公司有關嘅意外，點知個經理答 "nothing they can do,  it's your decision to go help" (意即：公司無野幫到，因為係你自己個人同意決定去其他舖幫手) 呢的咁冷血嘅答案我真係親耳聽過，我淨係爭在無錄低佢呢個冷血嘅答案，亦都好彩我地兩個唔係咩野嚴重交通意外，講得衰的，即係我地瓜咗佢地都唔會理。自始之後佢地再揾人去其他舖幫手我全部拒絕。

我可以拒絕嘅原因，其實只不過因為我唔志在呢份工，我只係兼職，肥鬼都唔等我呢份糧嚟開飯。其他同事就唔可以拒絕，兼職嘅同事唔幫手佢就 cut 你工時，全職嗰的同事就講到明人人每星期要去幫手兩日，但係自己舖呢度的野仍然做到你死。講到尾，全職嘅同事要拒絕都唔係唔得，我都問過拒絕去其他舖幫手佢地係唔可以放入年檢成積表入面嘅 (年檢同年度加薪有關) 但係打工嘅人都知啦，佢要玩你真係大把方法啦，例如：你揾到同事調更佢都唔批！

就係呢件事令我每次睇到上面的新聞，即刻火滾，更加想勸大家 "Don't LOVE your job" 唔好咁低能好似十幾二十年前咁為老闆賣命，呢的係呃人嘅儒家思想嚟架。

以前，係好耐好耐嘅以前，都仲可能有好人嘅老主顧，請個馬姐返屋企，打一世工然後佢會包你生養死葬，但係依家無囉，你無利用價值佢將你一脚踢開呀。

釋名

之前都有講過，我自己打嘅 blog 依家係盡量唔會釋地名人名，即係全部打番英文。
因為我一路都覺得，與其學個釋音名，大家不餘直頭去學嗰個字好過喇。

另一個原因，係依家網上好多染紅媒體，係用大陸釋音名，真係睇到你眼突。

好似呢篇野咁樣，我依家住係呢邊，都要諗諗究竟講緊邊到。
佢唔會好似以前香港同鬼佬諗釋名，會同你諗個跟音又有意思嘅名，佢呢的大陸網真係就咁同你釋音就算，仲要係成日作多幾個音出嚟。

佢上面講緊嘅其實係 New Brunswick 我讀嚟讀去 Brunswick 都只係得3個音，仲要我讀嚟讀去都唔知佢點樣可以釋出嗰堆字，以我咁差嘅中文，都容易地諗到可以釋做 "新賓士域 / 紐賓士域。

補充：我以前係香港嗰間動物比賽公司做，有好多高層係鬼佬，佢地入職嗰時要同佢印咭片，HR 會彈個英文名去 PR / Publication 同好幾個部門的高人睇過，用嚟幫佢決定點樣釋個好名比佢架。

幸福的感覺

我有時諗
若果你問每一個人幸福的感覺係點樣嘅
人人個答案都會唔同

乜嘢係幸福嘅感覺？
對於我就係有啲嘢會令我個心突然間覺得好甜
同埋會係心入面偷偷地笑咁樣囉

我之前都講過
發現我自己原來真係好鬼小女人

因為我係朝早擦牙嘅，所以唔係晚晚都擦牙

但係肥鬼就係夜晚擦牙嘅，

通常仲會好勤力咁"提我"今晚擦牙未呀？

呢幾晚加料，倒埋mouth wash比我

有的人話另一伴時不時都會留的love note

我肥鬼好肯定無咁 羅曼蒂克 啦

但係呢的就係我倆嘅love note 囉。。。

(我嘅擦牙習慣同佢地沖涼習慣就啱啱相反，

佢地係朝早沖，我就夜晚沖。。。) 

➺➺➺➺➺
星期日懶洋洋的，本來想揾另一套港產舊片睇，
不過淨係揾到國語版，誤打誤撞之下，睇咗煙脂扣。
入面講如花由16歲開始出嚟做，每到初一十五都去拜神求簽，求咗足足二百幾支簽，都唔夠一開始嗰時，十二少為如花燒炮仗打開嘅對聯咁準：
如夢如幻月
若即若離花