片入面好多外國人嘅反應就係，想望但又怕無禮貌而忍住唔望，之後唯有快步出電梯，唯獨是兩對亞洲人，完全無反應。我希望佢地係見慣大場面吧！不過，更大可能是他們不在乎，係佢地眼中在公共地方放屁沒有問題。
我自己都係搬咗過嚟之後，先知呢邊的人放屁都要入去厠所架。好似之前有一篇講過，就係工作時唔覺意 "crop dusting" 一個同事 (即係行埋一邊靜靜哋放咗個屁 (以為ok 啦！) ，點知同事行咗入我嗰舊屁雲當中！好彩係一個好 friend 嘅同事，大家笑完一輪之後，就係佢話我知一般有公德心做法係要忍或去厠所解決。)
其實除咗放屁之外，呢邊對"身體異味" (body odor) 的控制都有高要求，簡單講其實係對自己身體衛生的高要求，要常留意自己係咪"狐狸先生小姐"，係就要常常擦止汗劑，勁大汗的人不是用普通的 deodorant (除味劑) 而係真的 anti-perspirant (止汗劑) 須要時常備有濕紙巾去厠所清潔胳肋底，更常見係常備一套衫褲替換。所以，係香港成日會係巴士地鐵，比其他乘客嘅"香味"攻陷嘅情形，係呢邊好少發生。
呢邊嘅人對異味嘅容忍度係好低的。
(講真，又有邊個會鍾意容忍臭味呢！)
除了身體異味，家居異味都係不能容忍的，所以呢邊嘅超市有一系列嘅家居香味產品。
噴的。。。
插電散發的。。。
就咁擺係到空氣散發的。。。
仲有好多香味蠟燭，香氛等等等等多不勝數。
初時我都好鍾意用架，就係插電散發嗰款，後嚟發覺有時聞到好頭痛 (覺得好攻鼻) ，原本以為係濃度太高，後嚟較到最細都係時不時有發生，想想，呢的香味劑其實全部都係化學製品，聞得多都唔係好野，後嚟就無用了。
不過，我仲係有一支噴的，擺係厠所，特別係客厠，點解？就係當客人去完厠所開大之後，攪到成個厠所充滿"香味"嗰陣，另一個客人又跟住去厠所，咁就好尷尬，所以厠所有支噴的係必須品。
而因為佢地對異味的不能容忍去到一個點，造就咗呢個發明 ->
Poop pourri
呢支油性香味劑，係比你開大之前噴落個厠所到，的油性香味劑會罩住的水，咁你開大之後沖水，將所有野都一齊沖走，油性香味劑嘅作用就係罩住的臭味唔比佢湧出嚟！
我無買過呢樣野呀，屋企唔係成日有客人，噴個支都未用完。同埋呢，上次去肥鬼媽屋企，發現咗解決呢個問題嘅最原始方法。
係肥鬼媽個厠所櫃桶入面有盒火柴架！
我問過佢 (佢係科學老師) 原來係有道理架。
每次開大之後，劃支火柴，揚兩揚，吹息佢。作用係火係燃燒空氣嘅，咁樣一部份臭嘅空氣會燃燒咗啦，然後你吹息個火柴之後，會有燃燒火藥嘅氣味停留係空氣中，火藥嘅氣味係蓋過其他臭味架 (就好似去睇放煙花，係海中心放但係岸邊都聞到火藥味) 係未有上面嗰的化學香味劑嘅出現之前，清除異味原來咁簡單！
送你一首歌，呢首歌出現第一日就喜愛上了，就係因為開始時那一吓劃火柴的聲音。
