2015/16 冬天

今年又是反常的一年。

第一次有雪毛係10月。

 

２０１５。１０。１７　小毛毛雪



2015.11.09 紅霞



２０１５。１１。０９　紅霞

在Thanksgiving來了一個兩日的大雪暴。

 

２０１５。１１。２１　大雪

 

２０１５。１１。２１　大雪

之後都只有零星的小雪，聖誕日還有40F，在街上仲見到有人著短褲跑步，真係痴線了。

肥鬼可開心了。只係咁意摌雪了一次咁多。

到聖誕前夕的前夕（12月23日），括起大風來了，當日我是要上班的，一整天都聽到風吹，到晚上十時收工揸車回家時，還想著風好像靜下來了，因我趕著回家，要整4個批加小食（12月24日帶去肥鬼爸屋企同25日帶去肥鬼媽屋企）。。。

一回家便開始忙過不停，點知整整下突然黑晒。。。
停電了。。。
但我的大工程還未完呀。。。

最後要點臘蠋來完成。

一停電個時肥鬼就走咗去瞓，乜都無息，咁啱係聖誕，家家都好多聖誕燈飾，係電力將要回來時，因肥鬼乜都無關制，攪到成屋的電器係咁係到跳，閃呀著吓，好似拍鬼片咁樣。。。

到第二日先知，原來昨晚的大風，風力去到龍捲風的程度，好在路過的是Canton區，不近這邊。

到了1月3號及4號，終於落了一日雨雪。

２０１６。１。３　雪花

 

２０１６。１。４　一夜之後　湖面全蓋了一層雪

1月10號，有雪，不太嚴重，但超大風，
去了接肥鬼爸機，好幾次大大風的，吹到我們的車要不停轉線。。。

1月12號，星期三，一整日都係落下停下的雪。

 

 

 

 

２０１６。１。１３　好大的一片雪花

見到雪花以外的都是一層薄冰，因為係落雨雪呀

雨雪就是好像下雨一樣，形成的原因係雲層上面的氣溫未夠凍，所以當濕氣脫離雲層時，係水珠狀（即係落雨），但係脫離雲層後，係雲層下面的空氣已經凍過了凍點，所以水珠係趺落地面時，係一粒粒的，好似鹽咁樣，打落窗時會有的的的的咁嘅聲音。

佢地落吓停吓，有時夠凍有時唔夠，所以有時係一落咗嚟就溶咗之後結埋冰，揸車要特别小心。。。

之後我地就返咗香港，以為二月返嚟可以免役。。。點知

２０１６。２。２５　又嚟料

 

 

 

跟住的三月，終於靜下來了。

 

三月尾　Anthony　過嚟玩，係湖面還有一層薄冰，佢不停的想走去踏碎的冰。

 

２０１６。３。２０　破冰

 

四月，終於見到春天的影子了。

跑步機上

踏入2015，承著新一年又老一年的感慨還活躍的時侯，

叫自已要再次努力身體健康，所以又開始了每日運動時段。

上一次認真的有決心運動，係2013年8月，因著年尾要返香港（不可以太過嚇人嘛！）

所以要自己減肥，就跳鄭多燕，一跳跳了5個月，直到係香港返美國後，

一鬆懈了，沒有了動力再加上聖誕，就全軍覆沒了。。。

今次運動心旺盛，由1月到依家，每日行／快行／跑 共90分鍾，直到今日還未斷過。

 

我係行漸進式的，即係90分鍾入面的速度係1 - 1.5 - 2 - 1.5 - 1

（這是第一星期的速度，依家已經加快去到 2 - 2.5 - 3 - 2.5 - 2)

再加上斜度6-4-6，平均每日3里。

 

希望自己可以堅持，至少長過上一次的5個月。

 

 

又再一次運動，少不了就係MP3入面要有大量好歌。

 

嚟呢邊之後少咗聽收音機，我已經變到 out date 到不得了。

係MP3入面搵嚟搵去，都係得個幾首快歌，但我明明記得以前讀酒店系上晨早8:30的堂，

朝朝7點由荃灣搭地鐡去柴灣，係一大堆快歌嚟pump up自已，去晒邊？

 

落去地壚搵搵

比我搵番

你唔會信我以前係聽呢的架！！！哈哈！！！

 

 

 

即刻將佢地倒入去MP3 （我相信淨係呢樣已經超老土，仲有人咁做嘅咩？）

唔好講笑，將部MP3插入去跑步機出聲，都仲嚴的聲音太遠，一定要用headphone將的聲直接pump入腦，你會發覺自己對腳會不自覺地越行越快，好想跟首歌個bit去。。。

 

副作用

跑完好耐之後，你個腦仲係好似聽到boom-gi-boom-gi-boom-gi嘅節奏。

哈哈哈哈

中國來的西瓜

係Wally World呢到返工，激氣到想殺人的事日日都有。
今晚呢單特別O咀。

我係服裝部的員工，主要工作就係摺衫（一日閒閒地摺過千件衫或褲，所以唔好問我，點解係屋企房的衫咁亂，做乜唔摺！）服裝部係有試身室的，如果試身室的同事行開行埋，我都要去頂佢個位。

同樣係試身室範圍，有個櫃位／櫃枱，上面有個電話，日日响個不停。
原因？
原來Wally World每間分店的電話總機，就係係試身室的呢部電話。

唔好問我，點解佢地個設計會咁騎呢？
每一個打嚟問野的人，都理所當然的以為接電話的係客戶服務部！

而我，都係返咗工好一段日子，才意會到原來我係要做埋接線生的！

完全唔make sense（無邏輯）去到老遠的地方摺衫，當電話响要跑返來接電話。
而客戶服務部長期有至少一個人企係度，都唔聽電話。
久而久之，我決定聽到就聽啦，聽唔到都幫唔到咁多。

而且，電話入面的人，有著千奇八怪的問題（仲要好多係廢的）
係呢到，先講一個第一年聖誕發生的。

＝＝＝＝＝＝＝＝＝＝＝

日期：2010年12月24日 晚上7點
個晚實在係太忙了（聖誕前的購物高峰）其他人接咗呢個電話，再轉過嚟服裝部。

我：服裝部。

電話中人：喂！喂喂！係咪服裝部呀？

我：係呀！有乜貴幹？（咪講咗係服裝部囉，仲問！）

電話中人：呀！我想要兩條男童嘅褲呀！

我：你想要搵兩條男童嘅褲，係乜野牌子架？乜國顏色？

電話中人：吖，我唔知咩野牌子喎。

我：阿姐，無牌子好難係電話到咁樣幫你搵兩條褲架喎！咁知唔知大約幾錢架？仲有你係要乜野碼架？

電話中人：乜野碼我唔知喎，大約一個8嵗，一個6嵗咁啦。

我：阿姐，你講嵗數無用架喎，佢係8嵗大肥仔的話，係著唔落普通8號褲架。（心入面同腦入面己經爆粗兼想收佢線九世）

電話中人：啊！唔係呀，咁呀，我想你去幫我搵兩條男童嘅褲，然後你轉駁我去客戶服務部，我比我個信用咭號碼過佢嚟charge我，然後，我叫我個住係Michigan(密芝根州)個女聽日嚟攞呢兩條褲比我兩個孫做聖誕禮物呀，我係Kansas(堪薩斯州)呢邊呀！

我：％＊︿＆＊︿％＄（轉駁咗佢去客戶服務部。

好明顯，呢個阿姐完全當咗呢到係電視直銷台。
但，電視直銷台都做唔到第二日到啦，仲要係聖誕呀！

＝＝＝＝＝＝＝＝＝＝＝

而今晚呢個，仲堅。

我：多謝打嚟wally world！須要接駁邊個部門？

電話中之靚仔：喂喂！係咪wally world？？

我：係。有乜貴幹（咪講咗係wally world囉，聾嘅就唔好用電話啦！）

電話中之靚仔：啊！咁呀，我早前去咗中國旅行，係個到wally world買咗個西瓜番嚟（美國）依家啱啱切開有好多蜘蛛走出嚟呀，我想睇下有無得賠或者換番一個呀？

我：收咗佢線。

真係無時間同你玩囉，死仔。
係玩prank（整蠱電話）都諗個好的嘅屎橋啦。
知唔知阿姐我就係香港嚟架？知唔知呢邊冬天唔食西瓜架？
仲有，係中國買嘅野係咁上下啦，淨得蜘蛛已經算你好彩架喇。

真係想話佢知，wally world個電話係可以追番你個電話號碼架！

仲有，我仲可以去海關舉報你非法偷運生果入境添呀！
好易架渣，因為我屋企就有個海關人係度，比你個電話佢就得喇！

唔識死。

算你好彩，今次我趕收工，下次記得早的打嚟呀，睇下我會唔會同你死過。

終於有今日！！！

唔係咒我自己啦！

 

只不過搬咗嚟呢度，足足一年半了。

 

享受這麼久自成一閣的日子終於來到尾昇了。

 

我們現在的單位，是位處第一期的最尾尾角落，看著前面的屋，起呀一間起呀一間，還是覺得很遠似的。

 

很愛這種遠離其他人的感覺。

 

以前在香港，住在城市裏，係唔覺的，原來空間感這樣東西，一攪大了便不能返轉頭的。

 

來美之後的那間屋（舊屋），因為是在小路的盡頭，私穩度（privacy）很高，基本上如果有不請自來的人，一駛入我們的小路便會發覺了。但幸好多數只是行錯，用我們的小路嚟倒車出返去咁樣囉。

 

亦都係嚟咗先識Trespassing呢樣野（未經許可進入私人宅地﹐擅自進入）。初時會諗，乜呢度的人咁誇，前面後面咁大幅草地，間唔時有人行過有乜所謂？係過來美國耐咗之後先了解，有人真係唔鍾意別人的突然造訪。而且好似我咁樣，以前係香港，仲有鐵閘呢樣野，但係呢邊都唔興呢樣野嘅，每次有人嚟按門鐘，一開門就’肉’帛相見架喎。係香港住大廈入面，做下樣都叫有個保安係樓下（雖然大多常常小睡中）同埋係有個要密碼的閘（雖然都係常常的保安會開埋比人啦）但相對白撞嚟按門鍾的人係好少囉。而呢邊又真係仲會有按門鍾sell野嘅人架喎。所以基本上呢邊的人，係唔鍾意係不知情的情形之下突然有人按門鐘的。

 

anyway講到咁遠，係因為今日，建築的兄弟們終於把左邊的大樹切走了。

 

其實早在2013年7月建築公司大規模摌樹（第二期的地點）之時，就知道’獨居’倒數開始了。

 

也是在摌樹同一日知道左邊這個單位，是很好的價錢賣出的。建築公司的經紀還恭喜我們呢，因為左邊賣得好價錢，即代表我們的屋，帳面上已有上漲啦。可是我看著他們摌樹，的屋越起越近，就心裏期望你賣唔出仲好。

 

呢棵樹就係我地屋左面嘅，2013年7月建築公司摌樹個陣無摌到呢棵，仲以為佢可為逃出生天啦，點知只係建築公司為我們好，到最後一刻先切，咁佢地起左邊其他屋時可以隔嘈音好的咁囉。

 

 

可以見到相入面已經起到二樓個間係我地屋的左邊第二間。

 

面呢棵樹的位置，應該明天就會掘個大洞出來了。

 

 

心裏其實都很敬佩這些做建築的兄弟，今朝雖然有陽光，但加上風，就只有－5度的感覺，佢地就係出面食住風的切樹起屋。

 

 

先要將圍住大樹的小樹都鋸走

 

 

然後給大樹繫上鐵鏈，鐵鏈另一頭係推泥機

 

 

 因為呢棵樹太近我們旁邊呢兩間屋，就咁鋸佢就會跌落是但一邊都唔得，所以繫上推泥機（推泥機係入後波嘅）

 

 

咁一個係呢邊鋸，另一個係推泥機個邊拉，鋸完之後棵樹就向個邊瞓底。。

 

 

呢棵樹，都好大年紀啦。中間小的那個圈約10年，係呢到見到外圍差不多係中圈的一倍，即係呢棵樹係差唔多20年。

 

 

最後得番狐令令的一椂木。

 

 

唔親眼睇，真係唔知起一間咁嘅屋，只係需要98日，由掘地到交吉，天氣好的話可以三個月就得。

 

 

見到呢度起的咁多屋，每次目睹整個過程，我都覺得好神奇。

下次搵的相講下起的過程。

紅霞

常常晚上開車回家時，都看到五顏六色的天空，肥鬼都會對我講呢句：

 

"Red sky at night, sailor's delight.

Red sky in morning, sailor's warning"

 

 

佢成日都講呢句，但又解唔到背後詳盡嘅道理。

 

 

其實，呢句野係點解呢？

http://www.loc.gov/rr/scitech/mysteries/weather-sailor.html

 

 

通常，地球的氣流，因為西風帶的帶動，係由西吹向東的。

所以，有強的氣流（風暴）一般都係西面過來的。

 

 

而我地肉眼見到的天空上的顏色，係由太陽射出的光線，經過天空入面的水氣啦塵啦等等粒子折射出嚟的顏免。而水氣同埋塵粒子嘅分量，其實就係好好好的天氣預測。

仲有，水氣同埋塵粒子嘅分量，都決定了我地會見到乜野顏色。

 

 

係日出同日落時，太陽都係非常之接近水平線，也即是太陽光要經過天空最厚的地方，

才去到地面。紅色的天空，代表空氣裏充滿了水氣同塵粒子。

我地肉眼見到紅色，係因為紅色，係係咁多顏色之中，波長是最長的，能投放到最遠。

其他顏色，例如藍色，波長很短，未來到地面，都比空氣裏面的水氣同塵粒子打散了。

 

 

 

Red sky at night, sailors delight.

晚上有紅色的天空，水手們就開心了。

當我們晚上見到紅的天空，即係正在落山的太陽所射出的光線，係經過好多好多的高密度塵粒子先至到達地面。也都表示高氣壓同穩定嘅氣流，正由西面過來。就表示明日天晴。

 

 

Red sky in morning, sailor’s warning.

早上有紅色的天空，水手們要留心了。

 

而紅色的日出，就表示大量的水份同塵粒子剛剛由西面過來了。

如果早上有一個火紅的天空，即係空氣入面有很多水份，就表示快要下雨了。

 

 

 

 

 

2013 / 2014 冬

好啦！又講下今年美國的冬天。

 

大家已知的是，今年出奇的凍，係因為係北極的凍旋渦（polar vortex)，唔知乜野原因，

被打散了到下面來了（下面即係加拿大／美國啦）

 

詳細解釋：

http://en.wikipedia.org/wiki/Early_2014_North_American_cold_wave

 

 

很多報道話對上一次咁凍已經係1970年代的事了。

 

就係我地密芝根底特律呢到，1月6號晚係－14F（－26C）

連肥鬼都話佢咁大個人係記憶中都未試過咁凍呀！！！

 

好多時，呢的温度報告，都會講埋風速。

道理好簡單， 0 °F (0 °C), 就咁企係出面，無風時係可以唔凍嘅，

但係一加咗陣風將的凍氣吹打到你身上，係可以變到超凍的。

 

而我地密芝根呢到，3面都係湖，又沒有高樓大廈，刮的風更勁。

係香港，8號颱風係63－117kmph（39－72mph)

而呢到的風，叫陣風（wind gust），下下都講緊30－50mph。

即係同8號風球差不多囉。

 

咁有凍嘅氣温，又有風，就出咗wind chill，

即係凍氣温加上陣風，係個人企出去真正感覺的温度。

例如係1983年芝加哥氣温係−23 °F，陣風係23mph，

出嚟嘅真正溫度係 −82 °F (−63 °C)。

其實今年都應該破了呢個紀錄，但近年天文台轉了測風的程式，

所以就沒有這個數據的比較了。

 

 

一凍呢，就帶來了雪。

係1月的三場大雪暴之後，都仲有好多零零星星的，在晚上或晨早落一陣陣綿綿的雪。

歷史最高紀錄係98吋雪，而呢到今年到今日（2014年2月20日）為止

就已經落了70吋，會破紀錄嗎？

 

有雪，又有風，唔單只有wind chill，仲有wind drifting。係乜呢？

即係已經落咗好多雪，你不停的向路兩旁摌，越摌越疊得高，但係的風不停的將的雪吹到周圍都係，可以係越吹越高，或者係吹番出路面上，仲有，的風係咁吹的雪個陣，你係睇唔到路嘅。的風吹完之後係點嘅呢？

 

試過打忌廉沒有？發起蛋白呢？就係咁樣囉！

 

 

係好平嘅雪面起咗的紋！！！

而屋頂呢？

的風係可以將的雪吹到推起咗變咗小小雪山丘

 

就快可以封咗我個窗呀！！！

 

＝＝＝＝＝＝

 

溜冰很多人都試過，但平衡零分的我就未試過。

摌個冰場出嚟，你試過未？ 我。試。過。

 

昨日突然間有44°F的熱浪，乜都開始溶

 

 

我本來只是想出去切走池塘中間的水草

（池塘中間一定要等結咗冰先入到去）切切下發咗神經不停的摌呀摌。。。

 

 

左邊又摌的，右邊又摌的。。。

 

 

用咗我5個鐘，覺得今日運動量超班，可以不用跳多燕！！！

 

以為今日都仲係熱浪，點知

10:30am 一起身就係咁鬼樣

 

 

煮咗一陣早餐，到11:15am就連路都不見了。

 

 

天文台話應該係落雨嘅，但氣溫一凍，就變雪囉。

睇到麻？好綿的。的雪係好大好大片的。