係我大學畢業嗰個年代，已經開始有個迷思(習慣) ，就係畢業之後揾野做之前，人人都話要去歐洲流浪(旅行) 一吓。
嗰陣時去旅行仲未普及到依家咁樣，同埋嗰時工作還算係你肯捱就會有前途，所以有一種想法 ↪ 開咗工之後短期內都唔會有機會放自己一個長嘅假，所以要係未做野之前就去見吓世面。
我無去過。當時也不覺得好'恨'去歐洲，身邊當然有同學朋友去咗啦，返嚟之後咪又係人一個，也不見得真的多了很多見識。
到另一次真的有機會去，又擦身而過。
係合唱團去維也納表演，順道會旅遊德國同法國，很難得嘅一個機會 (係世界合唱節，可以同 Vienna Boys Choir 一同表演，表演地方係維也納金色大廳 Wiener Musikverein 同埋 薩爾茨堡莫扎特音樂廳 Salzburg Mozarteum) ，但係撞啱嗰時就係我同肥鬼結婚的時段，同一時間，要攪香港屋企人的午餐宴會，之後嚟美國又攪一個屋企人嘅午餐宴會，結婚 + 飛來飛去的洗了一大畢積蓄，就沒有參加呢個表演。
是有點可惜，但當時新婚的甜蜜也就蓋過了一切，所有野都唔多覺咁樣，哈哈。。。
嗰時合唱團朋友返嚟的意見就是
1) 好貴。一個無野食嘅早餐都HK$130
2) 酒店又殘又舊，因為全都係古建築改建麻
3) 酒店 "零"設備提供而且房間的床唔舒服
講緊嘅係2008年嘅事，以亞洲旅行酒店水準嚟講，總之就係唔合格，成個旅程除咗表演嗰部份係畢生難忘之外，其餘都唔好題吧了。
直到現在，我自己有機會嚟歐洲(最西邊的愛爾蘭) 住幾個月。。。
Hmm... 其實只係住咗21日，我同肥鬼嘅結論係：我諗我地都係唔識合做歐洲人。
今日淨係講我地對於呢邊的厠所覺得怪嘅地方。
就咁睇呢個厠所真係無械可擊呀！
就是歐洲的簡約風，連佢酒店網頁的形容都係簡約的一句
- Stylish en-suite bathrooms with floor to ceiling marble walls and underfloor heating
我地之前住在兩個禮拜嘅嗰間，都係咁樣靚靚仔仔架。
其實我之前講過，住酒店，個厠所我淨係要求乾淨。佢絕對合格。
再加上之前住嗰間嘅經驗，我地只係想可以舒服沖個涼就已經柯呢吉帝了。。。
所以我絕對唔係投訴呢間有乜嘢唔好，我只係覺得怪(總之就係唔一樣喇！) 。
首先睇上面嗰洗手盆，細唔係問題，依家香港酒店大把厠所越整越細，但係你睇吓個水龍頭，通常的水龍頭係喺正中間對住嗰去水位嘅，佢就新穎的設計將佢放側左面，仲要係申咗出嚟一節，我唔知你係點樣洗面的，但係我朝朝洗面嗰時，就成日額頭撞到個水龍頭。。。
然後又因為個洗手盆面積不是對準水龍頭，洗面時要靠向右邊，的水就好多會潑咗落地，洗完面會地下濕晒。如果你靠左邊洗面，的水就會整濕晒卷厠紙。
好喇，都只係洗面擦牙，一日兩次啫，算。
到沖涼。
呢個沖涼都係正嘅，水壓ok 就是有樣怪的，你有無睇到真係由地下，上到天花都係光滑的雲石？
就是沒有地方放番梘呀。。。
這邊的人都唔沖涼架？
我以為係牆個到有個窿放沖涼液等等東西係厠所的基本。。。
我想 you just cant win it all
Btw 今日只係講係呢到覺得厠所的怪，其他的第日講。
