熱。汗。

嚟咗呢到成三個禮拜，有一樣很出奇的，就是遇上好天的日子很多呀！人人都話呢度一年得10日出太陽，so far 我地嚟咗咁耐，數得出落大雨的只係得兩日，其餘都是超級藍天白雲。

River Liffey

我留意到嘅係，多數早上陰天/多雲/有霧氣/毛毛雨，要到九點十點先開始出太陽同熱，中午去行街就有成 18℃ 或 20℃ 到夜晚至半夜又會跌番去6℃ 或7℃

所以，我呢的晨早出門的人，因為晨早流流仲有寒氣，要著厚外套，但係行到中午又熱死。 (我同肥鬼一樣 5am 起身，佢 6am 返工，我跟住就出去影相，成條街任影，人都無隻！之後舖頭開門就行街。)

因為呢到長期都唔熱嘅天氣 (之前搜尋過係話呢度到八月暑期高峰都唔過 20℃) 又吹行海風，所以呢到可以講話無冷氣機架，商場都唔會有開行冷氣呢回事，風扇都唔見，喺房就咁開晒的窗就好通風好涼爽，但係問題來了。

依家住呢到係城市中心的住宅區，好似香港的屋邨咁，一座座，密密的，樓下小朋友玩球/汽車聲/醉酒佬的聲音，係樓宇間不停反彈好應聲，你關窗了的隔音設備好好，但係無通風又變得局促

一個嘈，一個焗，肥鬼最怕，所以佢瞓唔到覺，最後我竟然要去買呢個。

人地去旅行買 fendi (名牌包包)
我就買 fan... 的 (淚奔！)
唔知幾時開始，我嘅人生竟然走上師奶 shopping這邊的一條路呀，哈哈哈。
好啦！咁都未算攪笑。

又唔知係咪因為呢到地理位置長期唔熱，攪到呢到的人好似唔興用止汗劑呢樣野。

我地嚟嗰陣，以為呢的咁普通料，週圍都有呀！帶咗一兩支嚟，諗住用完再買啦！又唔係去第三世界，係咪？
錯。錯。錯。

佢地外國人非常注重儀容，特別肥鬼無時無刻都好著重自己身體有無發出異味，所以佢唔用 deodorant (除臭濟) 佢一定要用 anti-perspirant (止汗劑)

佢話 deodorant 呢的"只係令你的汗香啲"嘅野，對佢呢的大男人勁汗臭無用，我同佢講好多研究話止汗劑會致癌喎！佢答我零願生癌死，都唔要 sweat like an animal and stinky 好似動物咁大汗叠細汗又臭 (反眼 但又偷笑！我想這就是文明人的最好例子！)

好啦，出發去揾止汗劑。

呢到因為係城市，唔似美國，沒有 superstore (超級大的超市乜都有齊) 全部都係香港細細間的惠康咁上下，而且呢到同日本一樣，係將超市同藥莊店分開的，我地行咗差唔多成10間超市+藥莊店，都只係揾到左邊呢支細細的。好多都只係得 deodorant (除臭濟)

買咗兩支，承惠€10!!!!
係呢到，買兩塊牛扒都只係€6!!!!

好在我死心不息，日日出去行街見到超市又入去睇 (師奶心態！) 終於比我揾到右面佢用開呢個，€2/支，唔係講笑，即刻買咗4支。

大汗的朋友，自己帶定多的嚟呀！