Ice rain 雪雨

嚟咗個幾月，肥鬼成日問我今日有無出街？
佢係想我自己都揸車出去遊蕩吓，咪日日都屈係度咁悶咁啦！
其實我都唔知幾happy, 覺得可以放個long vacation....

不過今日佢叫我咪出去
問佢點解
佢話今日會有ice rain
但係晏晝又話會暖，然後又凍
就會攪到成地冰。。。

係冰上面揸車真係好難攪
連佢都話今日會遲返
就睇吓平時30分鐘嘅車程
今日玩溜冰要幾耐先？

只係一陣間嘅時間

就一地都係鹽

高掙鞋

今日睇到呢篇嘢

想起自己那雙脚。。。(唔放相嚇人了) 

不過你都有著過高跟鞋，可以自己想像。

如果你同我以前一樣，要日日著的話，肯定唔會好似相入面嗰雙脚咁白滑囉。

我直至到中學畢業為止，都只係著返學黑皮鞋同波鞋啫。

中學畢業之後，直接去咗讀高級文憑的酒店管理課程，

係要每星期返學加實習一齊進行的。

就係咁，我的命運同高跟鞋聯繫上了。

第一對，係M&S 最老土但又最四平八隱的那款。

(photo from marks and spencer)

嗰時鐘意佢有wide feet 啱我呢個大脚八。

一開始就要全日10個鐘，著高跟鞋係酒店coffee shop (咖啡室) 做侍應實習。
唔使等到返屋企，淨係係更衣室換下制服嗰時，唔坐番陣都行唔到。

嗰時啱啱開始時興去酒店食buffet(自助餐), 晚餐時段非常忙，而我地呢的實習生，係無咁容易就比你做埋枱寫order (落單) 的，Captain (侍應領班) 驚你落錯 order 上錯食物，所以有很長一段時間，淨係比我做runner (跑腿), 淨係負責係廚房拎食物出嚟，同埋拎杯盆碗碟番入去。

如果去酒店食飯有留意的話，侍應係有兩種tray(盤子) 用嘅，圓形的用單手托的那個，係埋枱上菜時用的，而我呢的跑腿用嘅，係長方形好大的一個盤，一次過可以拎成六碟菜出嚟。

拎菜出嚟還好，因為的餸菜係不能疊起嘅，最多行多幾次，但係拎番入去洗嘅就恐怖喇，因為餐廳趕住番枱做下一枱生意，所以做埋枱嗰的侍應，多數係有咁多就執咁多，有咁高就疊咁高，最好一tray就清晒所有野，咁佢就可以set枱招呼下一枱客。

而我呢的跑腿，就要用最高速度將呢盤野拎入去廚房(所以又叫飛垃圾) 。當時我係九龍一間五星酒店度實習，拎大tray, 係要上膊的，依家諗番，嗰時未試過成tray跌落地，其實都幾高道行。

就係咁，水泡呢樣嘢同我對脚就有了不解之緣。。。

畢業之後無再做侍應，但都係酒店行業，所以都係日日高跟鞋，係香港返工嘅人，又有邊個未試過著高跟鞋追巴士地鐵？？？

仲有邊個女仔唔愛靚？ 
所以的鞋越著越高，越高又越尖，個鞋爭又越嚟越細。。。

(呢對係唔捨得掉嘅遺物)

對脚生水泡多就變生枕(繭), 攪到自己都無眼睇，後嚟興返去深圳按摩，
會揾師父批脚皮，但好快又打回原形。

直到識咗肥鬼，問我做乜咁樣折磨自己對脚，所以同佢去街淨係比著波鞋。
睇見好靚高掙鞋會問我買嚟做乜。所以嚟咗呢邊之後都無著過高跟鞋lu...

以前著高掙鞋，除咗可以令到條腿睇落好靚之外，我好鐘意著高掙鞋行路嗰的角角聲。

但係依家有一個人，比你自己還要愛惜你對脚，
咁就唯有放棄愛靚唔愛命嘅天性，同埋可愛的角角聲囉。

texture wallpaper

could you believe this is the water surface this morning?

when i look at it, it just feel like wallpaper

你可會相信下面呢幅係今朝水面嘅照相？

靚到，就好似一張牆紙咁樣。。。

like some stucco texture wallpaper
依家有的牆紙係表面有手感的
即係用原本牆表面的厚漿牆灰泥
係牆紙表面畫的形狀出嚟

this one can almost be my computer wallpaper
下面呢張直頭可以做電腦牆紙

here shows you the water on the left was not moving because it's towards the basin

and the right side goes towards the ocean 

and the cold midnight temp try to freeze the water 

thus made the line in the middle that "divide" the water
下面呢張睇到左邊的水，因為係靠近岸所以無乜流動
右邊出去就係大海嗰邊
尋晚晚上的凍空氣開始令到的水結冰
不過就只係左邊的無乜流動嘅水結冰，中間條線就係分界開，右邊有流動的水

下面呢張都係有"質地"嘅牆紙

下面呢張就直頭係"水印"牆紙

我就覺得我嗰張都幾有"水"準。。。哈哈哈哈

隨身聽

又執野。

執到呢樣野。

Panasonic SJ-MJ30

原來呢部MD 機

係1998年9月9日發布

同年10月1日上市

就快廿年嘅野

下面呢部係Panasonic SJ-MJ50 係2001年出嘅

成部機都係made in japan 嘅

手痕

去差差舊電

竟然仲work! ! ! 

係強國大力慶祝 

終於成功製造原子筆頭嘅時候

我卻很羨慕日本人

可以這樣proud of 自己國家

Beef wellington

以前曾經係馬記實習。

係跑馬地廂房做侍應。

最深刻印象就係呢道菜。

每次見到菜單有呢道菜，我就希望嗰日有客人no show (無出席)

咁我地就可以打貓！！！

(打貓，行內術語 - 偷食的意思)

今日終於決定自己整。 

都唔係想像中咁難，不過好多步驟就真。

最緊要呢，都係揾兩塊靚牛扒。

我呢個食譜，我自己做咗的調教，同網上揾到嘅或者喺地獄廚神嗰個唔同架，請留意。

1. 兩塊牛扒兩邊用鹽同胡椒粉醃醃

2. 菇菇同cilantro 莞茜打碎晒變醬，放落鑊細火烤烤，等水份蒸發變乾身少少

3. 預備批皮 pie crust (不是酥皮puff pastry) 因無咁易碎

4. 全都準備好之後就中火熱油，煎牛扒兩面，每面2-3分鐘

5. 之後牛扒攤凍少少，兩面塗上菇菇莞茜醬，再用批皮包住塊牛扒

6. 放焗爐350°F 焗20-30分鐘

好味！！！

肥鬼話我，結婚9年，終於第一次煮好野佢食⚠

小病是褔

咳。咳。咳。

Cut!!! 唔係拍戲個的。

咳，真係小病入面最令人頭痛的一種。

2017年，我嘅褔s, 已經嚟咗，仲要一嚟10日，多謝晒。
一開始，係感冒：頭痛，頸梗膊痛，骨痛，流鼻水，鼻塞，齊晒。
食呢邊的感冒藥啦，沒有抗生素的，只是舒緩病徵，諗住瞓佢兩日ok 啦！

點知過兩日感冒徵狀好了少少，突然覺得熱熱哋嘅，喉嚨痛到吞口水都痛，感冒變了喉嚨發炎，又再等兩日，喉嚨無咁痛，但係點解右耳好似塞塞地，好似無清潔耳仔咁，之後變耳仔入面發炎，呢吓最難攪，又痛，又痕，又係耳仔入面好深入嘅地方，除咗忍，就係忍。

個名叫上呼吸道感染，其實不如叫"口腔深處喉嚨叮耳仔鼻哥交匯處發炎".

而最最最難頂嘅，係由頭咳到尾。
又唔可以伸隻手入去抓痕，但係喉嚨入面的纖毛又好鬼敏感，即係"會厭" 嗰度 epiglottis ( a flap of cartilage that covers the windpipe while swallowing ) 痕到死，一痕就要咳，咳到痛(因為痛嘅感覺會蓋過痕嘅感覺). 試過咳的高峰期，覺得咳到嗰 windpipe (嗓門) 都走位了，所以要咳的更勁嚟咳番正佢。。。

喉嚨發炎，用嗽口水早午晚嗽口，個的清涼薄荷都可以止痕一陣咁多，但係嗽口水都去唔到耳仔入面，所以耳炎嗰幾晚真係又痕又咳又瞓唔到。好彩日頭都係得我一個，叫咗肥鬼去食自己(買外賣 & 自己攪點晚餐) 我就去眠一眠。。。什至眠佢幾日幾夜。。。

盡量不吃抗生素的我，現在係食呢的嘅。。。

我會即係切薑片煲水 落幾滴紫錐花 (echinacea) 加蜜糖飲 

紫錐花 即係 black-eyed susan 上面呢支唔係油，係濃縮花同根嘅汁，

即係全天然山草藥，我加埋係的茶度飲

(題外話：鹿係好鐘意食呢種花嘅，我以前後花園都有呢個花，成日都比的鹿食晒，你可以話只係咁啱啫，但你問我，我點都選擇食天然山草藥而唔食chemical 西藥，好散咁嘅，好似食咗懵仔丸咁樣) 

整羹枇杷膏

唔好講笑，枇杷膏入面嘅薄荷腦 menthol 

因為佢係漿狀，係唯一可以係喉嚨叮入面coat 住一陣先慢慢吞

有一刻清涼舒坦感覺。。。

之後呢，我就用蜂膠

左面係滴入水或茶到飲，右面係噴嘅

都有效但係就算係噴嘅，都好難真係噴到入去喉嚨叮入面。

咁多日嚟，都係靠龍角散喉糖 或 蜂膠喉糖

係咳得好勁個時就㗳吓，係可以幫助到口腔入面舒緩清涼感覺

最後個幾日，開始覺得仲係咁咳就要睇醫生喇

同一時間，見到呢個野嘅廣告

佢個句廣告口號係 -

It taste awful but it work

(佢好難哽但佢使得)

你知啦，我地古語有云 苦口良藥，

而美國呢，就鐘意sugar coat 所有野

所以，呢支野係美國無的，係加拿大呢邊仲係好英式先有，

所以我決定去整支嚟試試。

你細個傷風感冒咳嗽睇醫生，記唔記得，佢實幾樣嘢比你。

一粒黃色藥丸(等你瞓餐好嘅) 

一支粉紅色藥水 加 一支啡黑色藥水(阿媽叫馬尿水)

個兩支藥水都係臭到死 又難飲到死嘅

呢支buckley 就係個兩支藥水嘅混合體

再加埋佢有超勁量menthol 就好似食咗一匙羹薄荷膏( vicks ) 咁樣

之後就開始好喎

================

咳真係非常考驗自制能力

因為咁多日嚟，我真係全飲熱水，無食生果，全食粥或麥皮

務求對個喉嚨零刺激

唔係的話，肯定仲有排咳

BTW 

咳 個時 真係唔想出街

因為隨時隨地會狂咳，雖然有晒口罩 大披肩 咁樣掩蓋住嚟咳

但都係覺得自己好似walking dead 咁樣

很難想像以前係變態嘅香港

就算死人冧樓都要你返工

傷風感冒但攞足4日病假 就想炒人魷魚

我今次係咳足10日 無。出。街。

風雲變色

今日又嚟落雪。

 

係呢到，一個唔覺意就會比個天玩。

試過明明見到太陽出來了，出去行吓，行唔夠兩步就變烏雲密怖。

 

今朝呢，明明開始嘅時侯係好天架。

 

隔咗一陣

就變成

左邊好天　右邊烏雲 

 

 

　

Wake

今日又講吓啲奇怪野。

今次題目嘅 wake
唔係"醒喇/醒咗"或者"起身喇" 嘅 awake / wake up 。
呢個 wake 係同葬禮 funeral 有關嘅。

係香港，由細到大，父母係傳統中國人嘅思想，(我諗同好多人一樣？) 係無乜去葬禮嘅經驗。講緊嘅係傳統道家嗰種葬禮，通常即係去紅磡嘅世界殯儀舘 / 萬國殯儀舘 (新界人，亦無追星記錄，所以無乜去過北角嘅香港殯儀舘)。

仲要通常係至親親屬去世，阿媽先叫我地出動，唔係的話，佢都會話殯儀館係污糟邋遢嘅地方(意即有鬼 或 時運唔好就好容易招惹鬼怪) 你地唔洗去喇，做帛金喇，阿媽阿爸做代表去葬禮。

曾經去過的葬禮，印象中，首先就係煙霧離漫，由落咗車行去殯儀舘個條街，就開始驚，因為同所有港產鬼片一樣，就係左右兩邊都燒緊衣紙，慢鏡pan過去，就係棺材舖，花牌楝晒出嚟，人形咁大嘅衣紙僕人，再加上的煙，其實可能唔係鬼嚟嘅，但係喺咁比的煙攻眼，睇唔清楚，阿媽又叫你咁好八掛周圍望 ( 因為港產鬼片話，望多眼人地墓碑張相，隻鬼都會跟埋嚟 ) 所以就急急腳咁行啦。

入到殯儀舘，當然啲煙仲要勁的，加埋的五鑿佬，同埋'南磨佬'嗰的阿叔著住道具，呀唔係，係道袍係到行嚟行去，背景音樂就係喊聲哭聲，吹啲打阿叔嘅音樂，南磨佬念經聲音，好嘈雜咁行經過其他靈堂，好少全院滿座嘅，多數係冷冷清清咁，(有港產片話可能你行過見到人山人海，點知個friend 行過話無人嘅，跟住你就一額汗呀。。。) ，去到自己親友嘅靈堂，終於坐低了，(少不了的一個環節，同去紅事(喜事) 一樣，都係要比入場費，紅事叫比人情，白事要比帛金) ，之後阿媽問我去唔去後面睇睇，我仲問佢睇乜野，佢就話親友嘅軀殼 corpse (死屍) 就係後面，可以去睇。我都唔記得用乜理由回答阿媽，總之係香港咁大個人無睇過死屍。

我細個嘅年代，都未興基督教葬禮，係大咗出嚟做野之後，有同事/朋友係教徒，所象中都只係去過一兩次所謂西式的葬禮，有去過嘅都知同道教的係好大分別，我都係嚟咗呢邊之後先發現，其實嗰兩次係"港式spin的西式葬禮"...

以上就係我係香港嘅時候嘅死亡筆記。。。

==============

直到2005年，嗰年啱啱識肥鬼，第一次過嚟探佢，有一日佢接到嗰電話，之後個日我地就多咗個節目 - 就係去佢阿嫲個妹嘅葬禮！！！！佢話會一次過見到好多(所有) 親人喎，又可以介紹我比佢所有親人識，yeah,  thanks Aunt Evy 我加入呢個家庭嘅第一次就係葬禮。

首先，外國啲葬禮通常係Funeral Home 舉行嘅，有係教堂嘅葬禮，但通常係好多好多人會嚟嘅先係教堂攪，普通淨係屋企人出席嘅多數係殯儀舘攪。
係外面睇 Funeral Home會係好大間純白或黑白色嘅屋(素色) ，係接待處會有一個油畫架咁樣嘅嘢，或者係牆上面有嗰的換字母嘅告示板，上面會例出今日邊個廳/禮堂係邊位人兄嘅葬禮。

入到嗰禮堂，係好多親戚係到聚首一堂，傾計寒暄一番，就好似family reunion 咁樣，因為好多分散外面住或工作的親人都會番嚟出席。最基本係著黑色衫喇，但係見過都有親人著有顏色衫。總之要打扮整齊。係禮堂最前面正中間就係個coffin 棺木，有的係全部打開嘅，有的係打開一半嘅。係棺木左右兩邊，會係好多海報咁大嘅相架，屋企人會揾好多去世者嘅舊相，貼晒上去，仲會寫佢幾時做過的乜攪笑野，有紀念性嘅事情，或物件都會擺晒出嚟，大家親戚會去睇，去傾，一同去回想呢個親人留下的美好回憶，去懷念呢個親人。

葬禮正式開始時大家就坐低，殯儀舘主持人會介紹親友輪流出去講幾句，有的會讀一段經文，有的分享記憶，完結時主持人會講一陣間靈車會去邊度下葬，大約路線，(靈車有小小顏色或數字旗仔方便大家識認，因為親友嘅車隊會跟住靈車開去墓地) ，之後由第一排人開始離開，會行經過個棺木同去世者最後道別。

出去大堂之後，等齊人，包括棺木上埋靈車，車隊由靈車帶領開去墓地。途中，如果遇上左轉右轉，其他車係會讓晒比成條車隊過晒先到佢地，打斷靈車車隊係非常不禮貌的事。

去到墓地，已經掘開咗泥土，係旁邊有個賣物會嗰的帳蓬，好幾排坐位，準備好就會讀經，放棺木落去，呢個時候親友可以掉一支花落去或者灑泥作為最後道別。
之後就是整個葬禮真正的完結。

其實一般葬禮，無論係中式西式，都開始簡化。中式的瞻仰遺容，守夜(等回魂) 上山，通常係三日，西式的瞻仰遺容 (viewing/wake)  , 以前都係早一日做的，加上葬禮一日同落葬一日，所以西式白事假都係三日的。但係依家邊有可能下下都攞到三日假，所以親戚多數只係嚟葬禮，所以西式同中式一樣，好多時棺木都同一時間擺埋係靈堂。

講咁長篇大論嘅葬禮，究竟同題目wake有乜關係呀？

>>>>>>>>>>>>>>

就係上面講到，係道家葬禮，遺體就擺係靈堂後面，係西式葬禮，遺體就擺係全開/半開嘅棺木放係靈堂前，大家都會上前去望下，呢個動作，我地叫"瞻仰遺容"呢樣嘢，英文叫做viewing 又叫做 wake... 點解叫做 wake 呢?

>>>>>>>>>>>>>>>

話說大約1800以前的人，洋人係無煲水飲呢個習慣嘅。應該話係，無煲水殺菌變成安全可飲用水呢個概念嘅。

有人問，洋人有飲茶嘅習慣，點會無煲水呢？
查過一本書*，入面講歐洲由1600年開始入口茶葉，但係要去到1675-1700先開始入口較多的份量。例如英國1669年只係入口了222lb 茶葉，要直至去到100年後，1760年茶葉入口先上升到6199609lb 仲要當時比得起錢飲茶的，都係貴族，普遍的人應該仲未咁有米。

以前人人住係鄉村郊外，飲河水井水溪水，又無工業化，又未城市化，未有人口聚集，要飲水就去打水，天然無污染，唔使煲就咁飲都無乜問題。
但係以前，要揾水源都唔係容易，揾得到水源要成日都擔水又麻煩。冬天又會結冰。

所以，好似肉類咁樣要大量長期保全，就造出了醃肉，泡菜，要長期有野飲，佢地就整distill wine (酒)  所以嗰時的人係飲酒多過飲水，因為提煉或蒸餾過的，一定安全無菌，最緊要係擺等耐，你睇吓的酒廣告，吓吓都話上百年佳釀就知。

好喇，飲得酒多會點呢？會醉啦，仲會係爛醉，而且仲要係爛醉得好緊要，幾日幾夜都唔醒嗰隻。發生乜事呢，就係有人以為爛醉的人死咗，將佢落葬，仲要唔止一次，係發生好多次，過後掘番出嚟至發現，落葬時個人未死架⚠❕❗因為掘番出嚟嗰時發現，好多時隻手同上身，係申咗出嚟，隻手有血跡，同埋棺木入面有爪痕。。。

所以點呢，成日葬錯死人，呢個時候，就係wake 嘅出現喇。擺條"未知係咪鹹魚"嘅人係度幾日，大家一齊等佢醒啦，擺咗幾日喇，人人都睇過晒喇，佢無wake 🆙 呀，咁即係真係瓜咗喇，咁先可以葬。呢個就係瞻仰遺容 viewing / wake 呢個字嘅由來喇。

之後未完喎，因為太多葬錯人嘅事件(更加可證明當時的人飲酒嘅程度), 就係嗰個時期，發明咗一樣嘢。- Safety Coffin
係乜嚟呢？係一個可以㩒鐘嘅棺木。係18世紀同19世紀，好多人發明及登記"安全棺木"嘅專利權(patented) 第一個有記錄嘅安全棺材，係1792年製造的。

基本上係棺材入面有個手拉制，個制係地面連住一個鈴，如果你係未死嘅，就拉制整響個鈴，等人聽到鈴聲嚟掘番你出嚟。所以，當時係有員工半夜三更守住墓地，一聽到鈴聲就要去掘人，而呢個亦都係"graveyard shift" (夜更) 呢個字嘅由來。

後話：
有人推算係1854年倫敦霍亂爆發London Cholera Outbreak 之後先真正開始煲水飲，而霍亂爆發，同城市化有很大關係。係1750年，英國只有兩個城市多過5萬人，London 倫敦與 Edinburgh 愛丁堡，到1801年增至8個城市，以及1851年增長到29個城市。
城市化就係好多人住係同一個地方，人口密度高咗，又用街喉水喉接駁，細菌就係咁樣高速傳出去。

* - 清代的國際貿易：白銀流入，貨幣危機和晚清工業化(作者：李隆生) 

Performance （表演）

假假地，我都唱過幾年合唱團。
係收錢賣飛架，雖然係業餘的，但係都有去過外國表演同比賽架。

所以我對自己的表現都有要求嘅，準時，背譜，努力練好的歌。
呢的都係基本。

我地呢地無錢收嘅，都有咁低水準嘅要求啦。

你呢的明收咗錢嘅（仲要好多），都攪成咁，＂唔專業＂都不足以形容囉。
簡直係羞家呀。

我就點都唔會信，係大會無同你夾過要唱呢首歌。

就算係乜野原因都好，上得台，你都要攪點佢，呢個係你作為藝人的職責，還有咁多愛戴你的歌迷對你多年支持的一點回饋。講真，唱嗰１５分鐘都攪到咁，真係可以收皮。

Mariah Carey Caught Lip-Syncing New Year

同場相比，雖然我自己唔係瘋狂的Adele fan屎，但佢嘅唱功係無得彈嘅，呢的先叫專業呀。

Adele runs into sound system failure