後園農場

今日，我地去咗肥鬼嘅舅父 Uncle John 屋企，主要嘅目的 － 係收割佢地係後園個小型農場種嘅農作物，順便拎的返屋企食，哈哈！
肥鬼嘅舅父 Uncle John 同舅母 Aunt Pam 屋企有游泳池，仲有一個大花園，肥鬼家族(Phelps' Family) 成日攪家庭聚會，每次都會係呢度攪，就係貪佢夠大囉！
講開又講，佢地一攪家庭聚會，閒閒地都會有40-50人嚟架，因為多數，肥鬼嘅另一個舅父 Uncle Lerry 嘅太太 － 舅母 Aunt Karen 嘅家族都會嚟晒，點解？因為 Aunt Karen 嘅家族 (Essiambres' Family) 細個時已經同 Phelps Family 係左鄰右里，所以兩個家族都好 friend 架，咁後來 Uncle Larry 同 Aunt Karen 結埋婚之後就更 friend 啦，所以一攪家庭聚會就次次都好大堆頭。。。
而呢間咁大嘅屋嘅上一手業主，咪就係 Uncle Lerry 同 Aunt Karen 囉，不過佢地住住吓，都係覺得唔夠大，就買咗另一間新屋，呢間就賣比Uncle John。嗰間屋我去過兩次咁多，真係好鬼大，仲起緊個大游泳池加後花園，等整好之後，家族聚會就會搬去個便囉。。。
好！睇番 Uncle John 嘅小型農場先。。。

有蕃茄（近鏡）

Uncle John好好心機整的籬芭比的蕃茄，所以佢地全部都生長得好健康，好大個架！

有燈籠椒 （近鏡）

燈籠椒 （遠觀）－ 原來係要咁樣整，等的燈籠椒可以沿住的鐵線向上生

登！登！重有最主要嘅 － 南瓜！成地都係呀！

的南瓜好大個架！Aunt Pam 話南瓜好容易種架喎，而且US$3就有一棵幼苗，所以佢年年都種架。。。

呢的大過我個頭嘅南瓜，唔係要嚟食架，要嚟做乜？下次講。。。

另加 － Aunt Pam 好好心機種嘅花。。。

呢的就係我今日嘅戰利品，哈哈！

當年今日

啱啱執開野，發現我自己嘅一張相，自己見到都會大笑。。。

呢張相，應該係3歲到啦，讀緊幼稚園，我拿比阿肥鬼睇，佢沉默咗成分鐘（無聲出？？），，，攪咗好耐，先至好努力咁係到忍住笑咁嚟問我：『點解咁似男仔嘅？？』
係呀！我細個係似男仔喎！！慘得過我就係因為似男仔，所以我阿爺好錫我架！！其實據聞係因為大家中空寶 － 一路都以為會係生仔？！點知就生咗我出嚟，但係我又幾似仔喎，咁個時的人話呢個似仔，下一個就會生仔架？！？！所以阿爺好鬼好鬼錫我架。。。
阿爺錫我錫到係點呢？？係我幾歲嘅時候（好似話仲係手抱嘅時代），佢就請我飲杯竹葉青喇，最後飲到阿媽抱咗我入急症室，仲比醫生鬧，因為阿媽個時好似抱住一隻燒豬去醫院咁樣。。。哈哈
肥鬼笑完我，我又比張相大家評吓理：

呢個咁女仔樣嘅3歲細路，咪就係佢囉。。。哈哈。。係張相入面，其實佢係度玩緊玩具車架。。。唔係架玩具車，都無人估佢係男仔啦。。。哈哈

幾十年前的今日

幾十年前的今日。。。

在一個陽光燦爛的夏天。。。

早上七時許。。。

係荃灣港安醫院（記住，呢間係一間私家醫院）



我的老媽子，唔知係好辛苦（定好輕鬆）咁生咗我出嚟？！因為我已經係第三名喇！

而且，據稱當時老媽子有著充足的運動量（之咪係湊我地囉），又據稱，我老媽子，唔知係生我地四條化骨龍 － 嘅 － 唔知邊一條嘅時候，係以迅雷不及掩耳嘅速度 － 快到 "掙的的" - 就係車上生了，最後，只係在陣痛的房入面，連接生的醫生都未到見就生了。。。真係唔抵，因為最終都係要比阿醫生的手術費錢。。。





要標明我係荃灣港安醫院呢間私家醫院度出世，唔係要炫耀一點什麼東西，而係，我肥爹一世人揸小巴養大我地四條化骨龍，佢最驕傲的就是唔會吝嗇洗錢係我地身上唔只供書教學啦，就係出世呀都節衣宿食嚟儲錢比我地用。。。唔係話當時的政府醫院唔好，但以當時嚟講，私家醫院嘅設備，點都好的啦（佢地嘅形容詞係矜貴的啦）。。。所以，據稱當時我地四條化骨龍，淨係出世都每人$500大洋。。。






我去現在的港安醫院網頁睇過，依家淨係嬰兒床的一日房租都要$500元喇，可想而知，當時應該真係好鬼好鬼好鬼貴。。。





多謝肥爹同媽子！
。。。我愛你。。。



＝＝＝＝＝＝

喂喂，你地晨吉咁早成8。30打嚟個電話，

我係11:30起身個時"見"到喇，多謝晒。。。

哈哈！！

突襲！！！（2008.08.02）

我家門口外面左右兩邊，種著很多美麗的玉簪花(Hosta)。







但因為我家門口唔係對著正東面，門外又有好多大樹，阻了好多陽光，所以的玉簪花一路都生長得好慢，過晒春天後，先逐漸生葉，係入咗夏天後，太陽多了，最近先開了很多花。。。

呢幅係生得靚嘅時候影嘅。。。






近來，我地發現，我地的玉簪花受到襲擊！！！下面呢幅係一半受襲。。。






呢幅就直頭係完全受襲。。。乜都無晒。。。哈哈






今日，我見瘦妹係看門口時，突然間好有警覺咁樣定晒形望住出面。。。咁我又走去望吓，終於比我發現個凶手。。。











登！登！登！登！好瘦嘅野兔一隻是也！！！！






嘩，佢"集""集""集""集"咁樣，好快就食咗一大塊樹葉呀！！！






仲要啤住我添。。。






又去搵的幼嫩嘅葉。。。






再週圍啤啤。。。






發現咗我？？？？






唔理咁多，食多幾塊先。。。






＝＝＝＝＝

夜晚，肥鬼放工打俾我，

我（得戚地）：我搵到個凶手喇！！

肥鬼：係乜嚟呀？

我：你返嚟睇吓咪知囉。。。

肥鬼：你槍斃咗佢吖？？（跟住我就大笑，咁佢先知我係影咗相。。）

最後，佢返咗嚟一睇的相，真係問我做乜唔趕走隻瘦野兔或槍斃咗佢。。。我即刻係到呱呱叫話佢係咪無人性架，個隻野兔咁瘦，請佢食的葉有乜所謂喎！！橫掂一到冬天個的花就會瓜架啦。。。肥鬼聽到我呢個咁有同情心嘅答案，即刻啤一聲，佢話的野兔會食埋的根，咁的花出年就唔會再生出嚟喇，之後佢仲話聽日請隻兔仔食紅蘿蔔！！！！

Woodchuck 土撥鼠

今日，茵占記動物園又有新動物。。。
登！登！登！登！係Woodchuck 土撥鼠，其實好多日之前，我係見過呢名人仕嘅。當日，係我掃完一輪樹葉之後，再走去丟垃圾，行返屋企個陣，離遠見到，“咦！點解花圃附近多咗一舊木頭呢？”就係我行近的睇睇嘅時候，“佢”突然間彈起身跑走咗，嚇到我都差的彈起。。。
隔咗幾日之後，可能佢深深不憤，佢竟然係光天化日之下走出嚟。。。
望實我個門口

之後又擰轉頭，兩頭望。。。

後來，瘦妹首先發現敵人嘅蹤影。。。

之後肥仔又嚟八埋一份。。。

近鏡：大家都應該睇到佢的手指腳指。。。

最後：速逃！