呢的雀仔相係一月同二月個陣影架，之前都有一篇講過佢地，不過個陣淨係知佢地係黑色雀仔囉。咁啱尋日返工係員工休息室見到一本講雀仔同花嘅雜誌，入面咁啱講到佢地。
第一隻：Dark-Eyed Junco 暗眼燈草鵐
Dark-Eyed Junco，每年一開始落雪就會見到佢地出現，所以，又叫Snowbird（雪鳥）。
基本上係美國好多地方，都時常可以見到佢地一行10－30隻，係雀鳥餵食器下面跳來跳去(hopping)，食其他雀整跌落地的食物。
通常冬至春的最後一次下雪之後，佢地就打道會府生BB，即係加拿大，阿拉斯加或美國北面接壤加拿大的州份。
以前，有人說這一種的雀有好幾款（每一款為個別一類）。直至近來，有鳥類研究人員發現這一種的雀會係重疊的居住地方自由跨款交配(interbreed freely)，所以最後鎖定係得兩款 － 黑眼同黃眼。
黑眼一類的共通點，第一就係黑眼啦，身形同麻雀(sparrows，唔係打個的麻雀呀）咁上下大小，啄(bills)通常為淺粉紅色，打架時（或驚嚇時）便會抖動白色的外尾羽毛。
如圖中呢款黑背的是數量最多的，佢地多數會係東面的州份過冬。男的雀會有黑灰色的背，白色肚腩。女的雀就多數係近啡色的。
住係西面一帶的叫俄勒崗款(Oregon variety)。男的係黑色頭同黑啡色的背，兩邊係有少少令面的粉紅色。女的顏色比較暗啞，同埋個頭頂係灰色的。
俄勒崗款入面仲有一款，係兩邊的粉紅色會多的，而個頭殼頂係淺灰色的。
白翼的一款係體形最大的。常見於南達科他州(South Dakota) Black Hills 國家樹林入面的黃松樹上。佢嘅尾翼有最多的白色，同埋兩翼都各有一條大白間。
黃眼雀就常常出現係新墨西哥州或亞利桑那州，與墨西哥接壤邊境一帶，係唯一一個被介定為不同種的。
據康奈爾大學的鳥類學研究室的雀鳥餵食器觀察報告（一個每年的問卷調查，調查對象係美國及加拿大境內的家庭，佢地後花園入面的雀鳥餵食器的常見顧客）dark-eyed junco係最常見的雀，佢地嘅數目什至超越了Mourning Doves (哀鴿，下圖)，House finches (燕雀) and black-capped chickdadees （下面會講的雀）
想要dark-eyed junco光臨你的後園，只須要放一的普通的雀粟，栗米碎，太陽花子或小麥係一個小盆入面放近地面，或者係就咁灑落地面都得（佢地鍾意就咁係地面食）
夏天的時侯，佢地多數會食昆蟲，特別係毛毛蟲(caterpillars)，草猛(grasshoppers)，螞蟻 (ants)同埋蜘蛛 (spiders)。佢地都會食雜草／草的種子，仲會食一的野莓(wild berries)
Juncos具有高度社交能力，唯一不會聯群結隊的日子就係交配季節。
當男的雀飛到交配地之後，年紀大一點有經驗的便會立即霸起靚地盆作竇。
遲幾個星期女的雀抵埗之後，會根據三個條件嚟搵合適的雀爸爸。
三個條件係：1）樣；2）地盆靚唔靚，同埋3）唱歌的能力。
好喇，比武招親嘅過程呢，就係兩隻雀跳落地面，垂低雙翼，互相展開個白色外尾毛，然後呢，男雀就會跳上竇附近的小樹枝，不停好似求婚咁樣鞠躬，同一時間仲要係度唱情歌添。
Juncos會先起好一個隱蔽的好似杯咁樣嘅竇，雀媽媽每次會生4－5隻蛋，通常會有白色，淺藍色或紅啡色。 佢地兩個都會守住個巢，保持高度警覺性，防止掠奪者(predators)攻擊。雖然Juncos天性唔係好鬥的雀，但遇上掠奪者襲擊，佢地都會攻擊體形比佢地大的動物。
Juncos雀仔蛋兩星期就會孵化，同其他鳴禽／鳴鳥一樣，剛長羽毛的小鳥（fledglings）一離巢就要學飛架喇。到下一個冬天，就會去到你的後園開飯囉！
＝＝＝＝＝＝＝＝＝＝＝＝＝＝＝＝
好喇，第二類係我後園的雀 black-capped chickadee
Chickadee係好有活力同埋非常樂觀的雀。係呢邊咁凍嘅天氣，有時出去餵雀（補給個餵食器）會聽到佢地係到唱歌架。
佢地多數係5－10隻一鳥羣(flock)，而每一鳥羣會霸約20英畝的地方搵食。佢地會巡環的係霸咗嘅地盆範圍入面搵食，會去番一的成日有餸的地方（即有餵食器的後園），仲成日會同鄰居開片爭地盆。
而係chickadee鳥羣（flock）入面，係有一定的啄食先後次序。即係靚仔係要比首令食先架。
要維持身體體温係108ºF / 42ºC，佢地要全日不停咁食。佢地最鍾意太陽花子，不過都鍾意雀板栗(suets)。
通常，chickadee會啄起一粒太陽花子，飛上去樹幹個到（好似張相咁樣）用腳抓緊粒太陽花子，再用個啄係咁啄開粒太陽花子個殼。佢地仲會收埋粒粒太陽花子係的樹幹皮入面留番第日食。
佢地有時仲會倒樹蔥咁樣食野架。就好似上面呢張相咁樣。本來，我都唔係好肯定呢隻係唔係chickadee，但睇到呢，就肯定了。（呢隻唔係啄木鳥，我後園常見那隻啄木鳥係紅黑白色架）
好多雀都鍾意同chickadee一齊，第一因為佢地好好記性，記得上年邊到有野食。如果有新的餵食器，通常佢地都係第一個來光顧的。
第二就係佢地有好好的防衛術。當一隻chickadee發現了有敵人，就會立即响警號，其他chickadee就會停晒所有活動，原封不動直至敵人離開。
