家裏有成千上萬對鞋，返工著的，去街著的，好靚的，普通的，得個擺字的。。。
以前我係香港就係咁樣架。
有好多好多對鞋，但仍是成日買鞋，還是常常覺得仍欠某一場合的鞋。
我阿媽成日話，腳就得兩隻，著得幾多對？？？
第一次著高踭鞋，應該係入讀酒店系第一年，要去career tour，阿Miss要我地個個著套裝加高踭鞋去。之後開始係酒店實習，都係日日高踭鞋返工的。
後嚟返工就更加日日高踭，來美國前最尾幾年仲要興番幼踭尖頭，著到腳變形，腳指有枕，過咗嚟之後肥鬼就要我介咗著高踭鞋囉，成四年幾，個的枕先退得七七八八，變番正常的腳。
當時我的鞋collection，九成都係高踭，其他有的涼鞋，有的配便服的，無乜波鞋。
返工鞋當中，要搵高踭又可以著得舒服又靚嘅，真係好難，再加上我係超級大腳八，著尖頭高踭要著到成13號先覺得舒服，真係好難搵。所以搵到有舖頭賣咁大的鞋，我就要成日去睇，等佢減價時就有13號的都買了（通常都無啦，最大最細的都是最快斷碼的）
著得舒服的就梗係成日著啦，成日著就梗係好快殘喇。最慘個問題係個的幼踭，好快丁蓋，又要去換踭，成日就係隻鞋面未係好殘但鞋踭無得整，咁又要放棄對鞋，其他的大多數都係個款舊了就換第款囉。
要想想，上一次真的是因為對鞋爛了而要買新的。。。都不知幾耐之前了？
來這邊的頭一年，因未有工作，一年365日都是踢拖就可以了。應該是美國傳染我的第一個習慣吧。開始工作之後，上半生和波鞋無緣的我，現在來了180度轉變。
我去買波鞋的方法是什樣的呢？
1。走去舖頭
2。走去鞋部
3。走去清貨區(clearance section)
4。走去男裝8號半或女裝10號的架
5。從最平的開始試，舒服的就可以了。
一分錢一分貨是真的，但我從不相信一對鞋真的值成百蚊美金（阿媽話：著咗會飛？？？）。
通常用我的方法廿蚊至三十蚊以內都會找到合適的，最平十幾蚊的都試過搵到。
下面呢對係ASICS TN626 US8，係運動用品公司找到的，著了兩年，平均一星期著五日，每日八小時，同我以前的高踭有得fight呀！終於比我著到穿loan！好開心呀！！！好似有的變態，但真係好開心，好耐未試過著一對鞋著得咁舒服直到著爛了。還沒有捐出去係因為還未找到另一對和這個一樣舒服的。
現在工作是全天企／行的，很快便知道對鞋得唔得。
好的鞋工作一天之後，正常雙腳疲勞是有啦，但唔好的鞋，半日隻腳板就會痛，有時腳踭都會痛（踏地時），更嚴重時膝蓋也痛（以前膝蓋撞傷過）
以我自己試鞋的經驗，不知怎的，很多大牌子的鞋都不舒服。有好幾次我特登逐個牌子試晒佢，最後都係無乜幾對特別舒服。
有時是試鞋的時侯OK，但到開工一兩日就唔OK。
好似呢對，有同事話好舒服。
佢特別講話係鞋底的膠粒好舒服。但我著來著去就係唔舒服，會腳板痛就係呢對。
直到上星期我在行超市的時侯，又去睇有鞋減價沒有。。。
給我找到這個ASICS TN138 US8 Gel Kanbarra 6 清貨價25蚊點講呢，就係好似新鞋，又好似唔係新鞋，第一日就可以著足全日八個鐘無問題。其他不太舒服的係要中間回家午飯時換鞋架。
兩次都著到ASICS覺得最舒服，以為係咁啱唶，點知無意中睇到有跑步朋友的分析報告話ASICS Gel的鞋是比較適合亞洲人的腳形架。。。啊！
題外話：試鞋的時候，我會試好幾次才買。好似上面唔太啱個對，我會返半日工個時著或平時行街散步著咗佢。著咗成個月仲拎去退，我真係做唔出。
上星期，有人退一對鞋返嚟，理由係鞋邊外圍的膠開始爛。個對鞋當時的情況係污漕邋遢，溶溶爛爛，去到一個地埗，無人敢掂要搵個膠袋套住對鞋。好彩我唔係個CS，唔係真係好想講：阿姐，對鞋唔係鐡做架，著得耐，梗係爛啦。佢針對90日退錢的例，著足89日嚟退。
所以我覺得呢個世界的人是一樣的，是沒有亞洲或歐美英加之分喇。
