扒牆

係呢個外牆。
最高都係14樓啫。。。
我睇住佢咁樣吊落嚟，每次佢放繩sir 落的嗰刻，我個心都跌出嚟呀。。。

今日出去行吓晒太陽，

就見到呢幾位壁虎功嘅門徒就咁吊住落嚟

清洗外牆

係美加，好似已經無呢回事 lu

全部都係用雲梯咁樣嘅野，

係雲梯盡頭有個鐵籠咁樣將個人升上去洗。

咁樣用攀山裝備嚟洗外牆，唔洗問，

係美國梗係又太危險喇。。。

同之前去參觀個古堡一樣 case

個古堡有雀仔不停飛出飛入同係入面起巢，

連嗰同事都話係美國實比人捉走晒

一係就話的雀屎會帶有禽流感病毒唔比人入去囉

布旬

嚟咗咁囉仲未試過出去食早餐。

但係睇過的餐牌，係早餐餐牌見過 black pudding 同 white pudding (???) 乜架科？

原來係腸。

Black pudding 係用豬血做的，

要揾日出去試吓。

炎夏！

又無香港咁誇！
呢到最多都係 20℃ 咁上下
不過今日晨早出去同陽光玩遊戲，攪成咁：

兩隻手同塊面變咗黑人咁款。

不過都好，我帶嚟嘅短袖衫終於有得出場！

我真係以為佢地無機會著架喇，日日起身都係得7℃ 8℃咁樣，係要等出太陽先暖番的，落雨嗰日又會變番好涼爽！！

今日學曉搭巴士，唔洗30分鐘，嚟到呢個叫 40 foot (40呎)  嘅地方，你睇真的，的人係個海到游緊水。我仲要著外套！！！

呢到係愛爾蘭人夏天游泳熱點，係白屋對出嗰舊石頭最高點有40呎高，所以又叫 40 foot, 左邊嗰面有個小小沙灘，今日已經逼滿大人細路，我再帶肥鬼嚟嗰時要帶條毛巾係草地攤吓好了！

今日好天連狗仔都出晒嚟玩！

Dun Laoghaire
搭7a 巴士出到嚟呢到，落車嗰位就叫 People's Park 繼續向前行20分鐘就到 40 foot 行番過嚟 Dun Laoghaire 呢邊有個海事博物館，呢到係一個超大嘅泊遊艇嘅碼頭，碼頭有兩邊 (東碼頭，西碼頭) 盡頭處有燈塔，係好闊落嘅遊人散步嘅路。

我係呢到識咗個新朋友

Daisy 落去游水？

同佢主人傾咗陣，原來Daisy 落去捉海鷗嚟食呀！

東碼頭

我都有黃色外套，不過無帶。

佢件衫同個天嘅藍色真係好襯！

牛！

愛爾蘭呢到非常之有自給自足嘅感覺，所有野都非常撐本土出品，可以說是少有的，未受世界貿易影響很多的地方！

其中一樣撐本土嘅係 - 牛！！！
週圍的餐廳全都大大個招牌寫住 "愛爾蘭牛肉"

另一樣就係雞蛋，好耐無見過，的蛋黃係鮮橙紅色嘅，有蛋味，拷開蛋殼時完全感覺到充足嘅鈣質(有時的雞蛋當你拷開時感覺到嗰殼好薄，我自己覺得係隻雞沒有足夠營養)

仲有就唔使講都知嘅 健力士啦！

今晚近近地，係附近呢間酒店附屬嘅餐廳食晚飯。

Grand Canal Hotel
4 Grand Canal Street Upper

上星期我作為探子，四出明查暗訪附近有乜好野食，已經睇到呢個牛扒餐，兩人餐 €45 抵呀，有雞翼做前菜，每人 8oz 牛扒，仲有兩杯 (pint) 啤酒 (可轉紅酒白酒 - 但係愛爾蘭呢到唔飲啤酒真係嘥！) 牛扒可選配薯條或薯角。

我一向都係食 medium (半熟) 嘅，肥鬼就食 medium well (七成熟) 係美國佢成日投訴無人煮得啱，成日都變柴皮。係呢到，竟然煮得啱啱好，仲要你睇真的，佢唔係美國嗰的成吋厚嘅牛扒，呢塊係約半吋厚，係堅要睇實時間嚟煮，因為薄，熟得快，時間要好準確，兩塊牛扒同時上菜但係都能夠跟據要求煮得啱啱好。

還有一個驚喜。
牛扒旁邊有幾個小型的洋蔥圈。
超。好。味。

係美國我地已經無叫洋蔥圈了，因為次次都係炸得唔好，好多油滴緊出嚟，入面嗰條洋蔥，一係太闊，一係太幼。

今次呢個啱啱好！！！
好大機會再嚟 encore!!!!

教堂遊

好耐之前傳短訊給一位朋友，無迴音，以為無睇到 (佢一向都是有一句無一句的)...
今日浦頭了，佢話係因為去咗公幹所以夜晚先有時間同我傾吓(??) 現在香港的工作媽媽真係非人生活似的。

Anyway 同佢講開呢到，真係一條街8間 9間教堂，睇了兩星期，開始有平平無奇的感覺。

Saint Patrick Cathedral 建於1911

今早又比嗰一線陽光欺騙了。
以為好天，又陰天，又落毛毛雨，去到下午仲落埋大雨！！！

8am 出咗嚟就一口氣由地圖右邊(住緊呢邊) 行到去地圖左邊，大約3小時。
星期日的早上，無行人，到中午開始多人嗰時我已經係返歸的路上了。

Saint Nicholas of Myra,  Francis street

今日發現了原來教堂係用大小分成四類的，
Chapel 祈禱室 / 小教堂 (最多就係醫院入面的)
Church 教堂 (由牧師clergyman/神父priest帶領)
Basilica (界乎於教堂與大教堂之中，有時只是教宗覺得某間教堂比較重要就"升呢"佢做呢個級別)
Cathedral 大教堂 (由主教 bishop 帶領)

星期日去教堂遊，街上係無人，因為的人入晒去麻，所以睇唔到入面，揾日再嚟過。
返到嚟，腳都斷了。

走後門

今日睇錯咗，晨咁早9am 走去練琴，

點知開10am, 就係附近行吓。

Carmelite community centre

如果我屋企附近有咁靚嘅社區中心，

仲唔日日 落去 hea!! 

Dublin Unitarian Church

 Royal college surgeons in Ireland

練琴對面嗰到有個好似黃金商場 / 旺角中心 咁樣水準嘅地方，我最鐘意行呢的本地人行嘅地方，穿過呢個商場由後門出就係呢間大大的購物中心，好趕時間(要開始行返去，因為得一串鎖匙係我到，唔返去肥鬼無得入屋) 只係入去兜個圈望吓就出番嚟。

The Powerscourt Centre

係一座舊建築改裝做購物中心

Mercer Medical Centre

Steven street lower

咁樣嘅一座建築改裝咗做醫院。

St Ann Church of Ireland

18 Dawson St. 

St Steven Green Shopping Centre

St Steven Green 入口
今日練完琴太趕無時間行。

隨遇而安 (長氣文)

今日講的平時唔會講嘅野。

嚟到呢一刻 愛爾蘭嘅墮胎公投 已經有初步結果

就係大約 70%支持放寬墮胎限制 30%反對

係世界嘅呢邊有人好想有墮胎的權利
同一時間 係世界另一邊有人就算"死"都要生

>>>>>>>

我想起自己呢篇好耐之前打嘅blog
嗰時係2017年12月，最後諗諗吓又好似唔係咁想講呢的咁私人嘅野就無出呢篇，依家因着突然間的因緣際會，自己係呢個時刻，能親身嚟到愛爾蘭感受/目擊呢個公投，不禁令我再深思一下 "生"  / "唔生" 呢個問題。

>>>>>>>>>>>>

呢個題目，平時都係收埋自己心底，
偶爾想吓就算。
但係，睇到呢個，好有感慨。

呢個訪問，係講喺印度，呢的60歲70歲嘅阿婆，用 IVF (試管嬰兒) 去生仔。

我只係放張 cap 圖落嚟，

有興趣你可以自己 search 個 page 

去睇佢地的短篇記錄片。  

佢地係 youtube 都有頻道有晒佢地的片。

唔放 link 好坦白講就係我對中東文字的網頁

都係有介心 (驚有 bug 有 spyware) ，

我個個星期都係 飛時book block 嗰的

三唔識七嘅 following 嘅人，大把係中東文，

大家都係提高警覺好的。

我唔會 subscribe 又唔 follow, 

淨係得閒去睇吓的片，而且就算你唔 follow,  

你睇過的website， 飛時book 都係會成日彈出嚟(又證明到佢真係儲你的溜覽記錄同資料) 。

仲有就係其實唔淨係中東文，

係依家網上嘅所有野都要好警覺，

實在係太多五毛類物體係網上操控言論。

=======

我認識呢個 page 係由一個訪問開始，

個訪問係逃到南韓的北韓人紀錄片，

問的不單是一般生活上的分別或八掛野，

而係會深入的問到當時人對南北韓統一的想法。

(咁啱今日新聞又話北韓同美國會面告吹 

真係世事嘅野 點係我呢的凡人可以睇得通

只可憐嗰的係北韓入面捱命的人

就比呢的國家元首咁玩法)

我自己覺得，同東西德一樣，有了民主自由的一方多數係比較思想簡單的，不同於受到極權統治的人，佢地多數仲係對所以事情抱有介心，也不會容易相信統一了就所有野都會變好。

睇過之後覺得佢地嘅紀錄片之後覺得

佢地係好認真同深入的探討事情。

============

今次呢段紀錄片係講印度嘅

 IVF (試管嬰兒) 工業。

係呀，用到工業嚟形容喇。

之前睇 VICE 都睇過一集講類似嘅題目。

VICE 嗰集係講外國人有乜野渠道同方法

去印度比錢請代母產子，

都係發展到龐大的一條龍服務，

由診所，揾女人，包食宿，到住院生個b 出嚟。

因為佢地係包埋提供食宿比個代母懷孕時

嗰10個月會住係個 camp 到，

好多窮女人就帶住自己的細路去不停幫人生仔。

(要知道，母體懷孕的情緒，

非常影響 bb 將來有無情緒病，

情況就如同懷孕時吸毒食煙飲酒一樣，

而呢的窮困的印度女人，係名符其實的生仔機器，訪問入面佢地大多數

只係為錢而非常不開心的生活) 

========

我自己到依家都未有小朋友。

現在，我嘅立場就係 "隨遇而安"。

有就有，無就無。

唔好好似我阿爸阿媽咁，每次見面都問，

解釋過比佢知，事情不控制在我手呀，

佢又會再問我有無去睇醫生。

我想講話，我自己都用咗一段時間

叫自己接受呢個想法，你就不要再問好嗎？

現在越知道得多呢個世界發生緊嘅野，

就越向"唔生"嗰面諗。

(其實根本就無，講到我好努力避孕咁！) 

==========

好，由頭開始講。

初初結婚，未係好認真諗，到結咗幾年之後，

開始認真諗 (的人話認真便輸了係啱架)  

揾咗最普通嘅方法啦，

話係排卵期嗰一星期做愛3次！

你知唔知要咁認真咁樣計晒時間去做已經好無癮，

仲有如果佢有時放工返嚟好累就更加無可能

試過咁樣攪到夜晚自己係房喊 或 嘈交

跟住會問自己為乜攪成咁呢？

之後就去身體檢查啦

我就一切正常

佢就精子數量低 同埋 不是很健康的精子

(一句講晒，西醫說就是無得醫，

也不是食個十全大補酒，明天就可以打死老虎，

中醫都只能調理，沒人敢寫包單，

寫的那個肯定是騙徒(這是常識吧！) 

btw, 就算身體表面係打死老虎，

都可以係無精子架 (這都是常識，好吧) 

不過，一句講晒，

要製造一個 bb 你只須一粒精子同一粒卵子呀

咁係咪無機會呀？個醫生只能答你機會率低的囉！

因為呢個世界係無人能答得準呀！

>>>>>>>>>>

好啦，之後也有去過生仔診所，

詳細的問過 IVF 係點實行嘅呢？

先講男士，很簡單，就係用人工方法，

喺顯微鏡下面，從幾百萬粒精子入面，

揀的健康活躍的出嚟。

女士方面就煩囉，計算好經期之後要打排卵針，

等佢可以一次過出幾粒卵子，

再較啱時間去攞的卵子出嚟，

再用人工的方法幫佢地放埋一齊去受孕，

之後將受精卵再放番入女士身體，

身體接受無問題的話，

就可以算係成功了。

為了成功機會大的，

多數會同一時間放2-3粒受精卵，

所以你見好多做 IVF 嘅生孖胎。

(可以大膽的話，

所有上了年紀生孖胎的女明星都是做IVF的) 

咁點樣收費呢，你預 美金$10,000 喇

無保險，全自費。

呢個價錢同香港差唔多，我有朋友係香港做IVF

都係差唔多港幣 $80,000 - $100,000

你要知道呢個只係預計，

"生仔不似預期"

因為受精卵放咗入去，身體係可能不接受的，

(即不能成功着床) ，會係月經排番晒出嚟，

而 IVF 係每次計錢的，今次唔成功，

下個月再試就要全部重新嚟過，

每次咁樣又幾千蚊美金。

我地都有朋友係咁樣，試過一次唔得之後，

會好傷心，因為就好似小產咗一樣咁，

然後會更加想再試，

懷著更大的希望去想下一次成功，

點知就係一次又一次失望。

仲有，打排卵針都係有副作用的，

睇見佢身體不停又肥又漲又瘦，

然後再加心情上上落落的，可以說是折磨。

還有，除非你係護士唔驚同自己打針，

咁你打排卵針就要日日較啱時間去醫生個到，

如果係家庭主婦還好少少，

在職婦女(例如我另一同事)

就要朝早扒出去或午飯蛇出去。

=========

好喇，講到呢到，要了解的都知得很清楚了。

咁係咪做唔到呢？又唔係。

係咪好想做呢？ 又唔係喎。

係咪唔想做呢？ 都唔係。

即係咁，要努力揾呢筆錢返嚟得唔得？ 係得嘅！

但係無人可以 guarantee (保證)

你比咗錢就一定得，

亦都唔保證一次就得，

咁即係只係用人為干預，令機會率大的，

但講到尾都係要聽天由命。

咁同順其自然的聽天由命有乜分別？

=============

其中一個令我諗咗好耐嘅原因，

係那位做了IVF 的朋友，

佢大我一年，又咁上下時間結婚，好好朋友，

佢話我知受孕之後，

因為係高齡產婦要驗糖尿同唐氏綜合症，

第一次結果係唐氏綜合症 +ve

要再去驗多一次，好在最後結果係 -ve

我當然替佢開心喇！

但又係到諗 (佢話自己係虔誠基督徒) 

咁如果出嚟結果係唐氏症 bb 佢會點？

"落" 定 "唔落"?

"落" 的話 -

依家的人 "美其名" 唔想個B 嚟受苦而終止懷孕，

其實都只是給自己好安慰的一個藉口吧，

個 b 都係一個生命呀，

人生是苦與否都係睇你自己的呀！

上面講的愛爾蘭墮胎公投，其中一個宣揚投反對票的理據就是超過8成墮胎是唐氏綜合症 BB

只因父母不想一生的負累而將 bb 殺掉。

"唔落" 的話 - 

我自己不敢想像朋友等報告的兩星期係點過。

我淨係諗，如果呢個真係唐氏症 BB 

不單止佢嘅人生前路每多崎嶇，

而且我會很自責，

是因為我貪心想有 bb 而用人為嘅方法

帶佢嚟呢個世界受苦的。

如果是天然的方法有了 BB 還好，

我可以甘之如飴的接受這是上天給我的禮物，

就聽天由命的生活下去好了。

==========

對我自己嚟講，係上面呢個考量使我想得最多。

不過咁啱同時間，我看到兩個新聞，

都對我的思考有沖擊。

第一個新聞

一位意大利的女士，做IVF懷孕，

臨生前做 DNA 測試，發現個 BB 唔係佢嘅。

就是實驗室攪亂了，放錯另一個受精卵入去佢到。

第二個新聞

三位女同性戀者結婚 (三人婚姻)

然後三個都用 IVF+捐精 懷上了 BB

之後就係睇到上面的關於印度老婆婆懷孕短片，

因為文化信仰家族期望無後為大等等等等原因，

係自己都一隻腳入了棺材的時候，

還要去做 IVF ，到生個 b 出嚟之後，

自己隨時都要死了，點樣可以負責任的，

照顧佢養育佢直到長大成人呢？

我只可以話，看完咁多嘅資料和新聞之後，

無論係 "墮胎" 或 "生仔"，

我嘅結論就是，

人類放入太多 "我想點" 嘅人為干擾，

入去呢個本來就應該係"純天然"發生嘅事情。

全部的煩惱就係來自 

沒有的很想有 或 

擁有的很想無

睇到呢到，或者你會說，

我跟本就不是母愛泛濫型的人所以咁猶疑。

我承認呀！

好似我那位做IVF的朋友，

佢係因為母親在佢年輕時就去世了，

所以咁堅定的執著於一定要有小朋友。

試問呢個世上有幾多係因為母愛泛濫咁想有bb

定係大多只是煮到嚟就食嘅心態咁樣有 bb?

我絕對相信有小朋友係開心的事；

但同時都知道事實係佢會帶來好多限制，

例如：如果我同肥鬼有小朋友，

基本上就係無乜可能會嚟呢到公幹幾個月。

(佢個幾個同事的妻兒，

都因為仲返緊學而只能暑假來旅遊兩星期)

嗰的一家人一齊做背包客的，

只是萬中無一嘅例子，

更多更多的就是因為有了小朋友，

而一生都在為了糊口養家幹活。

要形容的話，就是現在的我，

聽到親戚朋友懷孕了，會為他們開心，

不過有時也會流淚，不是不開心，

只是唔知自己嘅人生之中，仲有無咁嘅機會。

現實的講，人生都快要到半百了，

精子同卵子都唔係高峰時期咁好質素，

BB 係好大機率會有 缺陷 / 疾病，

而且現在有 bb 的話，

會將所有退休的安排都打亂了。

I guess,  we will see what life bring us. 

出遊

同肥鬼同意咁啱同一日日一齊放假

問我地想唔想一齊去玩

即刻話好呀

朝早出發時係咁鬼樣

之後太陽又出番嚟

呢的就係 canola oil 芥花子油嘅花

好靚

個黃色真係好搶眼

係美國都大把草地呀

好似一模一樣

又好似一的都唔一樣

就係高速公路旁的古堡

呢條街就係好歐洲的感覺

唔係講笑真係好很多牛

比起美國 唔知點解就係覺得佢地好 relax 咁

呢個係真花 不是膠花呀

很古老的橋

今日第一個窖堡

DUBLIN 另一個名black pool