雙重"享受" (2008.06.17)

踏入六月之後，氣溫開始漸漸熱了，由之前的50F開始攀升至80F什至90F。。。

還未有什麼機會出街的我，只是每天在後園淋花嘅時候，感受一下熱力；或是在散步到湖邊的時候，淺嘗一下這邊夏日的威力。。。

在感受著熱力的同時，在這裏，每日更會有另類的雙重"享受"，是什麼呢？

＝＝＝＝＝＝

我住的地方，這邊叫做"sub-urban"的地帶，意思等如比較郊外的地方，我覺得最大的特色，就是我在這裏不是用水喉水的。。。

登！登！登！我是用井水的！！！









哈哈哈！當然唔係上面個的日日要去打水個種啦！（係我就唔嚟囉～）我呢度係用電井，好處係 － 唔洗交水費囉！唔好嘅就係 － 停電嘅話就會停埋水。。。

＝＝＝＝＝＝

咁點解要介紹個井呢？？？

因為就係佢，係地底唔知邊度好深嘅地方抽的水出嚟，令到每日要洗碗嘅我 － 係身體受緊焰熱嘅夏日煎熬的同時。。。。雙手就會"享受"著冰冷刺心嘅水。。。

原先以為，以前係香港嘅冬天用凍水，已經夠凍啦！！點知係呢度，唔洗等冬天，的水都可以凍到隻手"尺晒"！！！如果你要想像的水有幾凍，你就諗吓，我可以開咗個水喉一陣，個水龍頭自己本身會有"倒汗水"出嘅，所有用凍水洗嘅野，洗完，都係出晒倒汗水嘅！！！

所以，我嚟咗咁耐，都係飲唔到呢度的室溫水，次次都係要加的滾水入去溝暖，先飲得，唔係就會好清楚咁感覺到的凍水冲入個喉嚨到，途經心口條大氣管直達胃部！！！然後就係夜晚瞓覺個陣咳到死咗。。。

一格的氣溫差距 (2008.06.01)

我大佬問我呢邊乜野天氣，仲有無落雪？落雪就梗無啦，都無咁誇張嘅。。。但呢度嘅天氣，同香港都真係有好大差距。。。

我宜家屋企有個地球儀，正確嚟講，係幾個，有大有細，因為阿肥鬼好鍾意睇地圖，睇吓世界各地嘅位置。之後，有一日，我睇吓睇吓，就發覺，原來香港同呢度，距離赤道都只係一個格仔嘅分別！！！但係點解呢度會 － 咁乾燥架！！！！






我以前係香港，係唔會"查"雪花膏嘅（最多係做facial之後咪會囉！）但係呢度，一唔查呢，唔只塊面，仲有手啦，腳啦，即刻龜裂，變到好似蛇皮咁！！感覺痕癢，所以，宜家間屋四周圍，都係lotion，務求"梗有一支係左近"。。。

仲有，以前我係屋企整壽司食，有一個好好嘅理由俾我食埋的用剩嘅紫菜 － 就係因為香港天氣潮濕，的紫菜擺多日都會林晒嘅，但係呢度，意外地俾我發現咗，呢度的天氣係乾到，個包紫菜擺咗成五日，都係脆嘅。。。

有一日，我整多咗一塊多士，因為擺得太近廚房個窗口，最後，我發現個塊多士，已經變咗一塊"石頭多"。。。











呢度嘅天氣，除咗乾之外，就係大上大落。。。日頭出猛太陽，之後一個鐘頭內轉陰天，再加落大大大雨，又行雷，又閃電已經見慣。。。。但好似啱啱個星期一，係下晝嘅時候，我地去咗佢朋友屋企，佢地係屋入面都熱到出晒汗，因為個時有成80幾F。。。但係夜晚我地開始返屋企時已經跌到50幾F。。。到我地瞓個陣，只係得30幾F。。。最後要蓋兩張被先覺得暧。。。哈哈