另一細藝
2021年6月15日星期二
之前攪完一輪數字填色之後，轉個頭又試吓另一樣 -> 鑽石畫，貪佢唔會因為擺得耐顏料乾咗無得玩。(上網揾解決辦法時，發現好多人話一收到貨即刻開嚟玩，都已經有顏料乾咗，即係貨品質素本身就係差！)
又係 MIC 野!!!!! 就算係去美國手工藝品用具零售店 Michaels 揾正價貨 (CAD$40-60不等) 真係無何奈何，全部都係 MIC ，連越南出產嘅都無 (我有朋友係越南做廠，佢話嗰邊九成工廠都係大陸人開嘅，無分別！但係至少盡我個人能力去堅持。比錢越南工人都好過比大陸。)
因為未玩過，唔知自己有無耐性完成一幅 16x20吋 咁大嘅，揾的cheap 野試吓先，中途放棄都無咁肉赤嘛！係 fxxxbxxk 二手交易嗰到，其實有好多人賣嘢。係我附近有個女士，入咗好多山寨貨，係 8x10吋 細細幅的，賣8元一幅，就試吓水温。
我點知佢係山寨野？去舖頭嗰的貨就會有原裝盒美侖美奐咁嘅，佢呢的係就咁一塊帆布 + 一袋袋嘅珠仔捲埋裝係超市膠袋入面用橡筋箍住就算。
訂購網頁的圖
完成品
訂購網頁的圖
完成品一分錢一分貨係永恆定律。
我淨係鐘意街景或動物的畫。試吓水温呢個目的是達到了。
結論：
好處係 1) 幾好玩，我都幾鍾意玩呢個手工藝，2) 真係可以令自己一日有幾個鐘，不理世事，不玩手機，開住音樂，腦關閉咁樣專注係到痴珠仔。
都有壞處：1) 因為我係開始咗就好心急要見完成品的人，所以，會迷頭迷腦咁樣不停係到痴珠仔直到完成為止。
2) 因為係山寨野，佢縮到幅畫咁細 (賣得平囉！) 快完成，但係你睇到上面的相啦，出嚟會變咗抽象畫，要由街頭行到去街尾再豆雞眼咁樣，先會睇到幅畫。
我最後只係買咗一段幅大畫，整完就算，唔會再玩。
因為玩鑽石畫嘅時候，我發覺一個大問題。
呢的新潮手工藝嗜好 (數字油畫/鑽石畫) ，全部都係一套一套咁賣，即係每一套都會有埋工具比你，數字油畫就比晒很多小膠盒的顏料同埋一套畫筆；鑽石畫就係有個膠盤，有個鐵鉗，有個點珠筆，有塊軟膠 (點珠筆嘅筆頭要反復點軟膠以保持黏性) 仲有就係一袋一袋嘅珠仔，全部都係膠。膠。膠。膠。膠。
因為依家住呢到好近海，每日係海邊行路，睇到無數係海上漂流嘅垃圾
令我對人類每日製造嘅垃圾數量很感慨。
特別係呢的咁細粒嘅膠珠。
就算循環再造或回收做得幾好，始終都係有好多會沉入海，比魚食咗，轉化，就變成人類都吸入越嚟越多微細膠粒。
淨係呢幾套數字油畫同鑽石畫，我已經有好幾套用完一次就無用嘅畫筆，鑽石畫嘅工具都係一樣，佢每一套都附上工具比你，變相係越積越多無用的用具。畫筆還可以畫畫用 (可以捐去救世軍，不過MIC 嘅野，你知有幾好質素啦！) 鑽石畫的工具，除非你再玩另一幅鑽石畫，唔係嘅話佢地就變咗豪無用處的廢物。
特別係鑽石畫嘅珠仔，佢一定會比多你，所以每一幅完成的畫，就有好多好多珠仔淨番，完全無用。只可以掉入垃圾筒。
我訂購咗幾套指甲貼紙，每套都有竹簽，指甲挫，膠紙包住指甲挫，說明書，清潔指甲濕紙巾。。。
呢的市場包裝，真係浪費地球資源去造，同時又殘害地球去吸收番呢的垃圾。
你話佢無用，又唔係；好有用嗎？又唔係。
基本上會搽指甲油嘅人，佢屋企都會有齊呢野，但係第一次玩指甲貼紙的人，訂購呢的套裝，又真係好方便咁樣，同埋，係市場學角度，就係睇相好似有好多"貼心的附件"吸引你買呢個。
我有時會諗自己係咪矯枉過正，諗完一輪，我嘅結論係：如果呢個唔係必須品，咁我就唔會再買。
所以，我決定下個手工藝，會係將自己的舊衫改裝。依家係 yxxtuxx 有好多教車衣的短片，想起我中學時，家政課的睡袍功課，全件野係阿媽車架，我淨係學識嗰架衣車點上個線碌，依家要重頭學過！
