日照時間 (2008.05.29)

嚟咗呢度咁耐，我覺得有一樣野幾好（幾特别） － 就係呢度嘅日照時間。。。

Today 今日

Sunrise 日出 > 0559hrs, Sunset 日落 > 2102hrs,

Dawn 黎明 > 0525hrs, Dusk 黃昏 > 2136hrs






我係二月尾嚟到嘅時候，夜晚八點幾個天先叫黑齊。到現在，隔咗三個月倒，日落嘅時間就已經推遲到夜晚九點幾。我好鍾意陽光充沛嘅感覺，會覺得個人好精神，會好有安全感，覺得好似多咗好多時間用咁。






以前係公司做野，四面都係玻璃窗，冬天日短夜長嘅時候，六點鐘收工，個天梗係已經黑晒啦 ； 但夏天日長夜短嘅時候，諗住快的做完野可以仲有日光嘅時候走，但最後都係成日OT到睇住個天黑晒先有得走。。。






宜家係呢到，如果六點鍾收工嘅話，都仲有兩個幾鐘先至開始黃昏。。。嘩！正呀。。。仲可以行街睇戲食飯。。。哈哈哈

阿肥鬼宜家返工個更係1400－2200，佢話遲的可能有得俾大家入紙轉更（如果你想轉的話），佢話會申請轉番以前個更1200－2000，咁就算係OT多4個鐘，都係midnight唶。。。但如果唔洗OT，咁佢返到嚟都只係2100點唶，仲可以日光日白食燭光晚餐。。哈哈

佢仲話暑假嘅時候，仲會遲的，差不多要成夜晚10點先會黑。。。最攪笑係佢細個嘅時候，放學後去咗同學仔屋企度玩，玩到唔知時候，直到佢阿媽打電話搵仔，叫佢返屋企瞓覺，佢仲應佢阿媽話"吓？出面仲係天光喎！！"再望吓個鐘，先知已經10點幾！！！

Snake (2008.05.26)

今朝一早，當肥鬼如常出門去上班的時候，就係佢腳踏在門口的地毯上的時候，還沒有戴上眼鏡的我，好像看到他正踏著一些東西喔～

定睛一看！！！！媽呀！！！！






（當然就唔係呢條喇！！）

好在！我就正在前一兩天，一口氣看了三集的奪寶奇兵，看了無數次的，大大小小的蛇，而今早見面的，應該是一條小蛇，因為當我一轉身，想攞番個DC給它拍個寫真的時候，肥鬼竟然話俾佢走甩咗！！！！

呢度果然係一個野生動物園！！！！

整肉丸

因為仲有蒜蓉包淨咗，就整的有汁可以點包食嘅野啦！

其實，因為我依家都未有出街的自由，所以，都係打開個雪櫃睇吓有乜材料，再去諗煮的乜野食！

今日雪櫃有碎牛肉（Ground Beef）所以，就試吓整肉丸啦。。。

放的調味落的牛肉度，再差成一粒粒，煎一陣，放入煲罐頭湯到煮吓佢，攪點，有得食。。。哈哈

薯仔雞

唔記得咗點煮，最後係網上面搵番的食譜嚟睇睇，以為OK啦，點知煮極都無乜味，而且的薯仔好鬼快就煮到溶咗。。。。（因為我成日以為要入味的，就要煮耐的，咁我咪走去炆咁成半個鐘囉。。。）

最後，都後都係打比阿媽求救。。。同埋攪到我要煮到尾個時，切多一個薯仔放入去扮野，依家見到嘅一舊舊的薯仔係後加架。。。哈哈

煮到個薯仔雞咁"潔"，最好就係搭蒜蓉飽啦。。。

哈哈，又一餐！

街邊一架車

係呢度，一到咗夏天，就會見到好多人揸架開蓬車出嚟。。。

今日去咗銀行，就係門口見到泊咗呢架咁型嘅車。。。

行近的睇，有時真係不得不讚吓呢度的人，佢地嘅團隊精神真係無得頂。。。連架車都濆埋咁樣。。。

呢個應該係某球隊標誌嘅顏色同圖案，但係我唔敢行咁近影（容乜易一陣個防盗以為我係偷車賊係度瓜瓜叫）。。。但其實，車嘅裏面都好型。。。

牛肉串標

之前幾晚，我煮過的洋葱，發現呢便的洋葱真係好鬼甜，今日再買咗一的返嚟，又買咗長牙簽，登籠椒，就試吓整呢個牛肉串標

其實我都唔知點解呢樣野會叫做申標嘅，但係我以前做野個會所入面，係個餐牌上呢個食物真係叫串標喎（我以前成日要做餐牌較對等等工作）

吉埋一齊啱啱放落去個陣，就覺得好大串。。。





點知煎完出嚟就宿晒水。。。不過都幾好味，我餣的肉好求其架，總之就係乜都放的落去囉。。。哈哈，食唔死就得喇

貓與細路

貓與細路，佢地嘅共通點係乜呢？

我發覺 － 就係佢地唔稀罕你買幾鬼貴嘅玩具比佢，佢地其實淨係想你同佢玩。。。

我以前係香港，都有養貓的朋友，佢地成日話的貓好鍾意玩繩 －＞

之但係，我見阿肥鬼掛係週圍的繩，佢地都唔係成日玩嘅。。。

佢地又話的貓好鍾意玩紙箱啦。。。
咁我又用紙皮整個箱比佢地玩啦，佢地竟然就係咁行埋去嗅嗅，跟住就行開咗喇。。。。
最終，
我都係要拿住的繩同佢地玩，佢地一聽到聲，就已經飛奔過嚟喇。。。

玩到我都無氣喇，我就會咁樣將的繩放係佢地背瘠。。。咁佢地就會周圍跑。。。高速自轉。。。嘗試整番條繩落嚟，係超級攪笑嘅項目

如果個日，我有同佢地玩（仲要玩得夠耐）呢，係夜晚，佢地就會好乖咁瞓覺，平時無同佢地玩呢，佢地就唔會係我地夜晚入房瞓之後，不停抓我地度門。。。我諗係因為玩到佢地都無晒氣。。。哈哈

有時，如果佢覺得未玩夠，佢地會咬住條繩，追住我或者跟實我週圍走。。。

或者企係我旁邊望住我喵喵叫，或者係用個頭不停撞我隻手。。。。 叫我同佢玩。。。

Drive-thur

我之前嚟咗咁多次，成日都以為只有餐廳先有drive-thru （因為我淨係見過餐廳drive-thru之麻），係今日先知連提款機都有得drive-thru。





其實除咗餐廳之外，我仲見過配藥都可以drive-thru，即係揸車放低藥樽（但攞藥就一定要入去）。。。

Drive-thru係字典個度係咁解嘅：

a takeaway restaurant, bank, etc designed so that customers can use it without leaving their cars

（餐廳或銀行等等的設施，使客人光顧時可不用下車）

我覺得其實要咁樣"烏"個身出去攞的錢都係幾麻煩嘅，而且揸架車入去個陣，又要好考技術咁，盡量要將架車扭近個提款機，講真，係時間上，我真係唔覺得同放低架車行兩步會差好遠，而且就係咁樣呢度兩步，個度兩步，就攪到呢邊的人越行越少。。。

與其要係跑步機上"硬掘"每日個幾鍾，我都係鍾意係出面行吓好過。。。

Deer (2008.05.16)

淨係睇圖畫，大家都會覺得 － "鹿" 呢種動物係好純良，好溫柔嘅！！（我都以為係！！）。。。

宜家的我，有時都會係黃昏嘅時候，係門口出面籬芭外見到有的鹿，幾隻幾隻咁一齊行過。。。初嚟報到嘅我，梗係覺得佢地好得意，好kawaii，成日都好想影低佢，好可惜佢地嘅警覺性都好高，次次我都唔夠佢快就俾佢走甩咗。。。

但係5月16日之後，我唔係咁諗囉！！！

16號個日，因為肥鬼收早，我地5點幾就去咗"媽呀"個度補給一個禮拜的糧响，就係我地啱啱行到入去，攞咗手推車，準備開始shopping嘅時候，係我地背面，存放手推車度門個度，傳來一陣轟然巨响。。。

我轉頭一望，見到幾隻"人咁高"嘅動物，跳吓跳吓咁，向停車場方向奔跑，因為的手推車阻住咗我嘅視線，我淨係見到佢地嘅背影，仲要淨係睇得個頭。。。

我跟住就問阿肥鬼："哈！點解呢度會有袋鼠嘅？乜唔係淨係澳洲至有袋鼠嘅咩？？"

然後個死肥鬼笑到收唔到聲。。。佢仲笑完一大餐先話我知 － 個的係"鹿"呀！！！






但係笑完之後，我地都係度諗，點解的鹿會日光日白走出嚟呢？？？阿肥鬼仲話我地都幾好彩，事關我地行慢兩步，的鹿就會撞低我地囉。。。

。。。吓？乜的鹿唔係好驚人類嘅咩？？？跟住阿肥鬼話："呢度的鹿，大隻又強壯，如果俾一般私家車撞到，都可以起番身，跳吓跳吓行得走得咁走咗去呀！！！

Night Visitor (2008.05.08)

上回講到，因為的雀仔糧擺咗係門口，夜晚又唔記得收糠，攪到連遭突襲，散到門口一地都係，執都執唔番咁多。

由監證科人員(即係阿肥鬼囉！呵呵！)跟據現場環境嘅推斷，同埋係日間有可疑兇手出沒，大家一路都將焦點，放咗係日間嚟食方便餐的花栗鼠身上。。。

點知，就在當晚11時許，大胆狂徒終於現身 － 就係同中小型狗隻一樣身型嘅浣熊(raccoon)一隻，我即刻飛撲去攞相機影低佢嘅罪證：

先打一個正面招呼 －











但係佢不停係咁係度掛住食。。。完全無理我嘅感受！！











之後可能因為出面太黑，我部相機嘅閃光燈引起咗佢嘅注意，佢仲走埋嚟我個玻璃門度抓吓抓吓！！

跟住我先發覺，我屋企個兩隻唔會出街見吓世面嘅肥仔&瘦妹，一早已經驚到一溜煙咁走咗上樓上床下面。。。











最後呢隻大胆狂徒，係飲飽食醉之後自行溜走了。。。





















後記：

可憐我個包US＄9嘅雀仔糧，經過兩次打劫，已經所剩無幾，所以我多數都係逐少逐少咁加入去個餵食器個度。。。

點知有一朝早，我發現唔見咗包雀仔糧，搵勻全屋都唔見喎，而個朝係阿肥鬼早過我起身（因為佢要去朋友屋企打機＋通常都係佢出街時負責掉垃圾的）。。。最後，佢話我個包雀仔糧因經歷重重打劫，俾我包咗幾個超市膠袋係外面，佢以為係垃圾。。。掉鬼咗！！！！！！

咁"大晒"嘅事，我梗係唔會俾佢發生啦！我叫阿肥鬼夜晚返嚟個陣，記得係出面個户外人咁高垃圾筒執番包雀仔糧返嚟。。。

個晚，佢兩手空空咁返入嚟，我明明提咗佢架，肥鬼話佢記得，但係當佢打開個垃圾筒蓋嘅時候，就係隻大胆狂徒同佢四目交投嘅一刻，佢驚到即刻放手，閂埋個垃圾筒蓋，跟住以九秒九嘅速度走返嚟。。。

可能就係咁樣嚇親阿肥鬼。。。第二晚，個隻大胆狂徒又嚟我地屋企門口搵食，阿肥鬼即刻問我使唔使佢出去開鎗射瓜佢？！？！？！咁誇？係囉，就係咁誇張，你話吖，點會唔發生鎗戰吖。。。。