睇電視

嘩！想講呢個題目，想咗不下幾百次。
其實，draft 都好多次了，但係次次都衰貪心，有好多野想cover, 最後不是太長篇，就是不了了之。。。

今日見到呢篇報道
美劇是如何練成的

又燃起我想分享吓係呢邊睇電視嘅點滴。

你會話，睇電視啫，有無咁認真呀。

我想話，當你見到呢邊的演員，簽咗個戲之後，一季一季咁做，佢唔會做其他嘢架喇，有時好運(套戲好睇有高收視率) 短嘅就一做幾年，長嘅一做十幾年都有。
不其然，你都會尊敬佢地嘅專業演出。
就算個劇終於要完喇，好多都唔會即刻又接第二個角色立刻又嚟過，會隔好幾年先可能再睇到。真係唔會6:30,7:30,8:30都係個幾個樣行嚟行去架。

例子：
Monk (以前明珠台叫 神探阿蒙)  (2002-2009)
我嚟美國之前都有睇開，真係好好睇。呢套戲入面個神探 Adrian Monk (原名 Tony Shalhoub) 由呢套戲2002年開始，做到2009年。做完之後，佢都有上其他節目，或者喺其他劇做side-kick(過戲角色) , 但更多嘅係走番去做舞台劇(theater / stage actor)  什或係番去做broadway show.

係呀。呢度好多戲入面，就算係閒角，好多時你去search 吓，就會發覺好多都係堅料嚟嘅。首先好大可能係堅讀演藝啦，再唔係就係真係唱家班嘅(即係一係讀聲樂/讀music 會真係識好多種唔同嘅音樂)  什至係識跳舞。真係周身刀，張張利。
唔似香港，大多係選美出身，得個樣。或者係識講野就叫識唱歌。。。

仲有就係，係美國，唔同地方，仲係有好重口音(accent) 由其係以南北兩邊分別較大，其他仲有波士頓口音，new jersey 口音等等，呢度的演員，就算唔係個到地方嚟嘅，但係佢地都可以學(模仿到) 出神入化。。。另一種我睇過嘅，就係演員本身嚟自英國或澳洲，但嚟咗呢到演戲，完全無晒佢本地口音，我係好奇search 吓，先知道佢本身唔係美國人。

例子：
House  (2004 - 2012)
套戲入面個醫生 Dr Gregory House (原名 Hugh Laurie)
佢本身係來自Oxford,  England, 睇套戲個陣，我以為佢係地道美國人，search 吓之後發現唔係，仲係唔信，直至完咗個劇之後，佢上去一個訪問，係訪問時，睇到佢係極重英倫口音的。。。

好喇。
講番上面篇文。
入面提到嘅The Americans (冷戰碟夢)  都係我地依家追緊嘅。
套戲由2013 開始，講兩個KGB 年輕時被派到嚟，係美國住，係度做間碟工作，國家安排佢地結婚，"做"一對美國夫婦。
一開始講佢地搬去一間新屋住，原來隔離個鄰居係FBI,佢地要同佢做friend.
呢個FBI 第一晚就潛入佢地車房睇吓佢地係咪堅正當家庭，同一晚，其實佢兩個都匿埋係車房入面，必要時要殺咗個FBI.

咁啱係現實裏，我地又真係啱啱搬去一間有車房嘅屋囉。
仲要個地產經紀話我地知，係我地同一個屋苑，有警察，有消防，又有FBI...
我地兩條友真係淨係呢個笑話都笑咗好鬼耐，成日係度諗究竟我地搬入嚟嗰陣有無fbi
嚟check 吓我地間屋呢。

番正題，呢套戲好睇嘅地方，唔單止係戲情好刺激，更加係戲情對歷史時序的吻合，仲有所有佈置，服裝，全部都配合到你以為自己睇緊嘅唔係一套戲，係真嘅一樣。

係呢套戲入面，兩個間碟有一個接頭人，睇佢個劇，一個師奶咁款。可她是攞了三次Emmy Award 嘅演員。

總括一句，垃圾戲一定有，但認真製作，係呢度電視好睇嘅主要原因。

12/25 小魔怪

聖誕快樂！！！

從來未試過。

聖誕日可以靜靜的係屋企睇電視。

晏晝等埋肥鬼返嚟先出去同事屋企。

而我

竟然可以係度睇呢套1984年嘅戲

小。魔。怪

Gremlins

舊片真好睇。

知唔知，去到最尾，那老人嚟接番小魔怪，係同佢講廣。東。話。架

有留意片中，唔係叫佢做monster, 係叫佢做"mogwai" 係廣東話直釋

我成日覺得，睇呢邊的戲，聽到入面有人講廣東話而唔係煲東瓜，真係好開心。

BTW, 套戲係講，小魔怪係一個奇怪物種，平時無事無野好cute, 但係有三樣嘢

"強光，水，12點後唔可以食野"

做咗上面是但一樣，佢就會變成恐怖嘅魔怪。。。

而係戲入面，小魔怪嘅主人雖然無用強光照佢，但係比佢日日係屋企睇電視，

最後尾唐人街阿叔嚟接番小魔怪嗰時話佢睇得電視多，學壞晒。。。

Anyway,  佢講個三樣嘢，係咪即係叫人唔好做couch potato???

如果唔係，就會變怪物(肥)??? 

送比大家

2016　聖誕日的晨光

7:30am

 

我無懶呀

今日都出嚟行

好靜

人影都無隻

 

不能想像北歐的地方

冬天23小時都無日光的日子

 

見到太陽

覺得溫入心

聖誕快樂！！！

祝大家聖誕快樂！！！

好似係 (或者唔係)  

第一年得我倆自己過聖誕。

以前係香港同屋企人朋友過。

嚟咗美國就同肥鬼屋企人過。

過去8年，因為肥鬼係做野個度已經係老鬼，

所以年年都 bit 到聖誕放假。

今年呢到新嚟新豬肉，要返工，

不過好在係晨早5am, 晏晝3點就返。

會去同事屋企過。

很老實講，都幾 enjoy 清靜的12月。

過往8年，每年的12月做零售的工已經好忙，

仲加上"諗"禮物，買禮物，包禮物，去兩邊屋企，

Oh 仲有就係見好多成年無見嘅親戚，

又要寒喧一番，成晚流流長要揾野講，

對我嚟講，仲係有難度。

還有要整野食去兩邊屋企，約時間。。。

等等等等

每年一過咗聖誕，我都有透一大啖氣嘅感覺

今年5號先搬到入屋，係好趕，但係做少好多野，屋企裝飾嗰啲都係自己想攪而做，

唔係覺得需要整的壓力而做，

可以坐係度靜靜的感受節日真好。

英聯邦

由美帝嘅地方，返番嚟曾經一度係英聯邦嘅地方。。。

最明顯，就係揸車喇。
係美國，好stubborn咁，用miles嘅。
係呢度，用番香港咁樣，係kilometers嘅。

其次，氣温啦。
美國係華氏 (°F) 嘅
係呢度，用番香港嘅 攝氏 (°C)

係美國，住嘅係一座座獨立的屋 (single family house) 最近的鄰居都有一定距離，開大聲的收音機都無問題。
係呢度呢，又住番一棟棟嘅樓宇，有樓上樓下，又變番講大聲電話都驚嘈到人。

仲有，係美國全都係車出車入，係架車度就clip 住個garage opener (控制車房閘門開關) 所以，住咗4年，我係無大門鎖匙架。仲要習慣了唔鎖門。
依家呢，唔單只自己屋度門，仲有下面大閘度門，我已經試過唔記得帶鎖匙出街。好在肥鬼係屋企。

另一樣係地址
係美國，係好簡單嘅 : 12345 random street,  county,  state,  zip code 攪點
係呢度，好uk 呀，有flat 呀， unit 呀，仲有A1B 2C3 咁樣嘅 postal code. ..

除咗以上呢的。。。
仲有下面呢的

聖誕交換禮物 成日見到呢個朱古力 

係Michigan 未見過

新年實有親戚買嚟 花街朱古力

呢的 的的骰骰嘅cake 

係Michigan 唔會有，美國嗰啲全都係大大舊，好多icing 

M&S gummy 係美國又係無

美錄，唔知點解，美國又無，

柯華田佢有，但的味唔係好似

收音機

依家仲有無人知收音機係乜野嚟架？

我依家屋企嗰個係咁樣架。。。

係呀，後面嗰條天線唔攪吓佢會沙沙聲架。。。

我諗依家的細路唔會知囉。。。

曾經係walkman 同 discman 時期，會用呢兩個收音機，仲記得個陣搭48x返沙田馬場，係巴士度聽，途經城門隧道，就會沙沙聲直到出番嚟。

呢款好明顯人人細個嗰陣，都會用呢部野嚟錄收音機，放餅cassette 帶入去，較啱電台，等到一首好歌就即刻㩒rec. ..

想講話呢，我地上個月搬嚟呢到嗰陣，

我地個收音機無入倉架，係跟身過嚟架

(可見係重要的財產20大之內) ，

因為肥鬼每天早上指定動作呢，

係好嘈嘅鬧鐘大響，然後走入厠所，

開著收音機，坐係馬桶等自己真的醒喇，

然後沖涼，然後熄收音機，出嚟。

(除咗去旅行啦，去旅行佢要帶雜誌，

每次坐馬桶都係睇雜誌) 

仲有佢揸長途車，都係鐘意聽收音機多過聽CD 或 MP3, 佢話可以聽吓每到地方的人播的乜野歌，但係佢會好無耐性，一唔啱聽就不停轉台，轉到個制就甩咁。。。

突然間講開收音機，係因為呢單新聞

FM 電台失勢？ 挪威率先停播

其實，我見到呢單新聞，真係百感交集。
因為，我係數碼廣播的受惠者。
曾經，我覺得呢個係世界上最偉大嘅發明。

大膽講，每個離開屋企住係好遠地方嘅人，都會鐘意數碼廣播。如果你好似我咁，休息日係屋企，係會聽903 嘅深宵節目，你會聽到係世界各地好多香港人係聽緊仲會留言點歌。

我自己早就對cctbb 的劇無晒興趣，同埋，係呢邊要揾亞洲的電視channel, 好多都係大陸台，一係就好貴，仲有就係大把劇可以上網揾嚟睇，所以根本就無意慾去裝電視，反而係有時好想聽到廣東話，好想聽廣東歌，所以，係電話或者tablet 裝個app 咁就可以聽到903, 我係超開心呀。

但係，係咪有需要完全cut 咗 FM 收音機呢樣野呢？

我地搬嚟個陣，有兩個搬運的同事，前一日嚟我屋企pack 晒全屋嘅野，不約而同，佢兩個都係帶架收音機嚟架，一嚟到，問清楚，乜野pack, 乜野唔pack, 跟手就開著架收音機就開始pack 足成日。

我自己中五個年，做暑期工，係葵涌的工廠區，一間膠咭壓字嘅廠，得我一脚踢嘅，又係收音機陪我開工架。

依家做工廠，都要將人 變做機械人咁看待。
知唔知有得聽收音機，日子過得快好多，開心好多架。

真嘅收音機同係手機download 個 app 咁樣聽，係唔同架，手機無signal 無 data 就無得聽，一個超舊嘅收音機，總之有天線有電芯，去到邊都聽到，仲會減少滑手機的引誘。

很同意嗰位挪威電台人講，你由得佢自然死咪算囉，何必要特登伸佢一脚整死佢？

Home

以前係美國，肥鬼媽好緊張(很在意) 我地有無聖誕裝飾。

剛嚟美國頭幾年，間屋細，而且又有養貓，肥鬼話佢地好百厭會扒上樹同整跌棵樹，再加上我地要去兩邊屋企(肥鬼爸同肥鬼媽好耐之前分開了，所以年年都係24號去肥鬼爸屋企，25號去肥鬼媽屋企) 有好多禮物要包要準備之餘，仲要準備食物，真係好多野做，更加唔會有心機攪裝飾。

後嚟開始返工，每年年尾10-12月零售旺季，更加周身唔得閒，淨係覺得好大工程，拎晒的野出嚟擺得嗰一陣又要收番埋，真係咪攪我。

仲有就係因為肥鬼媽有棵好大的聖誕樹，所以每年我同肥鬼都要11月尾揾日去佢屋企同佢set up, 如果我自己都攪就即刻做兩次。。。

仲仲有就係我唔鐘意假樹，覺得擺假樹不如擺真樹，但係擺真樹我又覺得自己好殘忍，好好地一棵樹走去鋸咗佢，擺佢係屋企吊命，最後掉咗去。。。

講到尾，咁多年嚟，係搬新屋嗰年，因為侄仔Anthony 嚟過第一個聖誕，所以先做全足全套。。。

講真，係好温暖嘅，黑漆漆凍冰冰嘅夜晚，開住火爐，飲熱朱古打，睇住著咗燈嘅聖誕樹，真係正，不過都只係嗰一年only. ..

但係，今年嚟咗呢度，唔知係因為呢刻我無做野？ 定係睇咗成個月嘅聖誕片馬拉松嘅影響？ 定係因為呢刻得番我同肥鬼兩個，連佢地屋企人都係遠方？ 總之，我好想擺棵聖誕樹。。。

呢套屋仔，仲有一套聖誕象，仲有好多聖誕樹掛飾，都係搬新屋嗰年肥鬼媽比我架，依家睇住的屋仔都覺得嗰心好暖。。。

又係麥當當

知唔知，呢邊麥記，唔簡止淨用加拿大牛，no 荷爾蒙，無 antibiotic.... 佢地仲有

1) 包，2) 配菜，3) 汁，4) 肉，5) 芝士

全自選！！！

揾日去試吓，整個完美漢堡飽，睇吓要幾銀。

===========

另外，有天去等肥鬼，見到呢樣

呢度好多餐廳都有呢的準備，即係張餐紙係填色遊戲紙，比細佬玩，係美國嗰啲多數係核核突突的公仔。。。但係比亞洲人影響了的加拿大，就有kerokerokeroppe 布甸狗。。。

其實，要細路唔玩ipad 都係有方法的，不過，

全都要大人的心力同時間付出。

自動化

最近，係網上出咗兩個新聞，都係講新科技係服務業嘅影響。

而係美國，的人仲爭辯緊快餐店員工應否有US$15/一個鐘的同時，

係加拿大呢到，係2016年5月，每間分店都裝了呢的自助落order 機。

我地都有用過，當你前面個人，仲係個counter 到，諗緊魚柳包走魚柳，定係乜餐唔要薯條換茄汁得唔得嘅時候，我地好快咁督幾野就order 咗我地嘅早餐

(兩個豬柳漢堡，兩個薯餅，到依家都唔明的人，係麥記都食得咁複雜，

想點呀，係就企埋一邊諗完諗點先死出嚟啦) 

Anyway 所有呢的電腦program 都有盲點，你要好有common sense去估(或是學) 佢個grouping logic, 即係，係左手邊係一列食品種類，想買個包，就㩒包類個制，佢就彈所有包個list 出嚟你自己揾再order 幾多 等等，亦即刻，你個人都係要好有logic 的，或者過目不忘，唔係你都會係部機玩好耐。。。

但係我個日去到，佢地啱啱出咗冬天嘅salted caramel latte, 我地揾咗好耐，

又唔係熱飲類，又唔係咖啡類，最後放棄了。。。

所以呢的機嘅出現，我會話，只係幫到部份生意，始終都係有人唔鐘意或唔識用機器，都係會走番去排隊。

第一次大雪

今日要去"交換曲奇", 係肥鬼同事啲太太們攪的一個節目，其實主要都係大家係過時過節聚吓，傾吓偈，佢地嗰嗰都好好人呀，不過係我有的孤獨症候群，要我成日出席真係驚驚呀。。。

佢地已經講緊聖誕節嗰日又聚，然後29號就去畫畫，一月出街食飯，二月呢，就係slow cooker meal. ...我諗我都係老實話比佢地知，我係孤獨精，唔會次次出囉，定係到時至算。。。

係呢度，大家都知大家嘅返工更表，想話"肥鬼放假我地有事唔出嚟" 呢個藉口真係唔work架。。。

因為我初嚟報到，所以同事M太太嚟車埋我，但係今早7點就開始落雪，好蓉吓，又密，又大風，最後係M 先生車我地兩個。。。

呢個係朝早9點落嚟等車，仲叫做見到個地下架。

到咗我2點返嚟嗰時。。。

噴水池已經滿晒喇

條路的雪都蓋過鞋面

對面海都睇唔到喇，因為的風雪就係呢面吹緊嚟

返上樓就見有人嚟鏟雪

但係一個鐘之後就同未鏟無分別了

機場一日遊

落大雪的一日。
肥鬼放假嘅，但落大雪，邊到都唔想去。
就去食機場喇。

機場得呢間餐廳，其他都係快餐。
叫咗呢個加拿大"特產" poutine 即係薯條加汁(gravy) 係面，今日呢個加埋煙肉碎，好味。
不過我地都係鐘意order gravy 另上，因為唔鐘的薯條索晒的汁變咗淋晒。。。

食完係個機場行吓，呢到因為特產係龍蝦(不是689個隻呀) 真憑實料，因為呢到海水温度比緬因州(maine) 仲凍，據報的龍蝦仲好味過佢地吖。。。所以機場都有得賣，生的熟的都有，買番隻上機食都得呀。。。

呢度 Nova Scotia,  即係 New Scotland, 所以龍蝦都著咗代表穌格蘭嘅格仔pattern

即係著住穌格蘭裙？？？

超大雪，隻機係跑道de-ice 準備飛

咁嘅日子飛，真係驚驚呀

天空白芒芒，究竟點起飛架？

大發現。。。2

很簡單
我畢生的做人宗旨。

從來都不用腦。。。

留番老咗嗰時要記得有無帶假牙出街呀
哈哈哈哈

大發現。。。

又到執野嘅時候喇。
每次都有大發現。。。哈哈

好多朋友都問過我，點識肥鬼架？

每次都答：其實最最開始，就係有關一篇報紙訪問。係呀，報紙呀，依家絕跡咗囉，但以前我日日都睇架。。。睇報紙，原來真係有用架，嘻！

今日竟然比我揾到。

呢篇嘢，對我人生嚟講，真係影響好大呀。

再睇吓日期，2004年5月1日呀，成個世紀咁耐囉。

當時我睇完篇嘢，就想揾個外國人嚟拍吓拖啦，真架，想拍吓拖架喳，覺得要去到咁遠生活，點會得呀，點知一轉眼就2016lu

仲有，佢講到咁浪漫，點知我最後就係揾咗個anything but 浪漫囉，鬼整！

新地方的第一個晨早

好很攰呀。

有排執。

執完先再去認真的影。

咪講笑，晨早7點樓下就有人跑步。

箱，一屋都係箱

有名你叫 square head 真係蠢到加零一。

所有傢俬同你擺晒係最意想不到的地方。

然後旋風式走晒。

終於要離開

Goodbye!

喺到住咗1個月零8日的H 字頭酒店。
想想東京的日本人屋企都係咁上下size, 很好一個機會比我去downsize 我的生活。

最後一個呢度的日出，如果你又嚟，三樓後樓梯個窗對到正。

揸車去屋嗰到，7:45am 太陽剛出來。
以後肥鬼返7點的日子，經過唔到，都可以睇住日出景致咁去返工。

日出 + 大雪

今日又一早起咗身。
其實係發咗個超怪嘅夢，醒咗，瞓唔番。
有時發的超怪嘅夢，係因為瞓之前睇咗的連環殺手記錄片，或者係捉的超級殺人犯的警拖片。
但係尋晚乜怪野都無睇，因為眼瞓，早就瞓咗囉。不過都仲係發埋的怪夢。有時真係好想知人嘅腦電波究竟係點work 架。

我尋晚個夢，唔知點解係入面，我係一個乘客嚟嘅，係架車入面，無啦啦同個司機傾吓偈(傾乜唔記得了) ，而個司機係我一個好多年前的一個無啦無lang 同事，然後唔知點樣，突然間要換第二架車，又同個司機傾吓偈，點知點解突然感覺呢個係罪犯嚟嘅，突然間迎面衝緊嚟一架警車，響晒燈，而呢架警車突然間u-turn 開倒後車，我地架車突然間都係倒後開，然後後面嚟咗好多警車包圍，我架車停咗，的警察衝上嚟拉咗司機係地下，同佢帶手扣，將佢反反轉佢仲同我講無事架唔洗驚，跟住醒咗。

成日都發呢的無哩頭夢，唔係成日瞓得番，又唔係成日會記得劇情，但最主要係發呢的夢，好攰嘅，好似成晚無瞓過覺咁嘅。。。

所以今朝係坐係到等肥鬼起身。

等佢返咗工，望到窗外好清的，開始有日光，就走去試吓影日出啦。

我走出去嗰時係7:15, 網上話今日日出係 7:36

開始等到多的光

我成日話呢到沿海天氣變化好大同埋好快，今日就係好好嘅示範。

比你地睇吓，左邊的雲，唔洗10分鐘就吹咗過嚟

之後太陽開始出嚟

我發覺好似落雨，有一點一點的水滴係玻璃

到太陽真的出嚟，的雲就吹到去右邊喇

跟住我發覺的"雨"咁勁咁嘅

睇真的，係雪嚟架，再加上大風，變咗white out

 乜都遮實晒

再望吓都只係7:50

大約半個鐘嘅時間，由黑暗，到慢慢日出，有晨光，到大風大雪 white out, 之後又吹走晒，到最後我返房，日出清天，都只係8:12