祝大家 新春大吉 心想事成 萬事如意 身體健康！！！
眨吓眼嚟咗呢邊十幾年了，唔似啱啱過英國嘅香港人，我已經無乜特別懷念蘿蔔糕年糕等等賀年食物，早幾年都仲有花功夫自己整蘿蔔糕，然後發覺得我自己一個食 (肥鬼唔啱口味) 整整吓就連蘿蔔糕都懶整。
反而係每個農曆新年都會買新鮮花插吓。
我上星期就較啱日子買咗橙色配紫呢束，(呢邊超市鮮花部門有啲係星期一返貨，有啲係星期四返貨) 因為無去過呢間買，想要確定吓佢啲花會開吖
經過成星期仲開得好靚，合格！！！
所以星期四再去買束大的，紫色黃色一向係我最鍾意嘅鮮花配色，仲搭咗兩小束snap dragon (金魚草) 好靚呀！！！
祝大家 花開富貴！！！
進入新一年就只係短短幾日。日出日落，歲月靜好。
然後到今日，晨早有人㩒門鐘。去窗口裝吓乜水。
哇，唔識車嘅我，都知呢架 T 係大名鼎鼎嘅 "突師奶" , 身為地球極低層奴隸嘅我地，屋企無人揸貴嘢架喎。
大家估吓係乜頭乜路？？
肥鬼不情不願的去開門。
聽唔到出面嗰人講乜，淨係聽到肥鬼答佢話 "我由細個開始，阿嫲就同我一齊由頭到尾睇咗本聖經3次" 跟住就 bye bye 關門。
原來係"見證人" johovah witness 嚟嘅。
佢地依家醒咗呀，無著制服，以前佢地全部白恤衫黑色西褲，可能呢個打扮揚咗喇，連開門嘅機會都無晒，所以依家要好似臥底咁樣著便服上門呀。
其實我好想反轉訪問吓佢地，架車係咪教會產物？你地係咪全部收入上繳晒比教會架？架車係用教會捐款買架？？點解揀呢架車？？你相信 ice age 嗎？你相信global warming 嗎？你相信climate change 嗎？你相信神創造宇宙嗎？你個教會咁有米可以比你地揸名車去傳道，點解唔用的錢解救露宿者，流浪漢？？
再想一想，今日只是今年第一個星期六。
都係慳番啖氣，放過自己。唔好同自己過唔去。
今年還很長。仲有360日要過，揾第樣嘢玩算啦。
我自己2017年搬去加拿大 Nova Scotia 省，我住的沿海小鎮好清靜。
這份安靜在2021年打破了，一日七次的白車聲，去到我以為自己有幻聽，直到鄰居都問我有無留意到，先確定不是我的幻聽。後期再認真留意吓，試過早上7點幾就比白車經過嘈醒，然後夜晚10點幾臨瞓覺又聽到經過，最多好似試過一日13次。
