停電

嚟咗呢度成兩年幾，都試幾次停電，但都係好快就恢復個種，最長個次好似都只係一兩個鐘就回復正常或者係半夜停咗電但係瞓醒個陣已經回復正常。。。

係星期四同星期五翳焗咗成兩日，到星期五旁晚終於發出超級雷暴警告，但係望出街一路都無風無雨，仲以為個雷暴唔係打呢邊。。。夜晚９點幾出去超市，仲係一齊正常，點知一去到超市無耐，就聽到行雷 + 勁閃電 + 瘋狂大雨，到10:30揸車返屋企（車箱中載滿了一星期的新鮮食物），一轉入我地個條街就發現全條街都黑晒　－＞又停電了！

以為好似快會恢復供電，仲口癢癢問肥鬼試過停電最耐係幾個鐘？點知佢話試過停電幾日呀！！！從城市來的我，以為這個先進的國家係唔會發生的咁樣嘅事架！？！？

等咗兩個鐘（半夜12點）都未有電，諗住打比肥鬼阿媽，話佢知等多一陣都無電就去佢屋企瞓，點知佢屋企電話都無人聽，我地就知大鑊！！！打佢手提先知佢係未返到屋企，隔咗一陣佢打比我地　－　“係呀，我呢到都停電呀！”

住城市的人，係唔會明呢到點解停電係咁大煲架！！！因為係呢度，水係用電井抽水上嚟嘅，所以無電等如無水；厠所沖水係用電抽出去嘅，所以無電等如無厠所用；煮餸都係用電爐頭嘅，所以無電等如無飯開。。。

打去電力公司，電話錄音只係話維修中，未有確實恢復時間。。。。等到半夜兩點幾，落咗幾個鐘的大雨，再加刮得勁大的風，好在開晒的窗都幾涼爽，就走去瞓啦！諗住瞓醒都有啦掛。。。。

點知一早起來係比鄰居的發電機嘈醒，都知唔方好野，打去電力公司，仲係未有答案，為咗唔好浪癈啱啱買的一星期糧食，即刻出發去搵發電機啦！去咗兩間舖，都話發電機啱啱比人買晒了！？！？！？！唔係掛？？？開始覺得大事不妙，即刻試下打比肥鬼細佬，點知呢個風真係勁勁勁。。。

原來方圓２０－３０里嘅地方都停電呀。。。即係幾大地方？大約係由屋企向左或向右揸車20分鍾以內的地方都停電囉！咁都未算慘，再打比電力公司，佢地終於有答案喇，就係話要星期一先可以恢復電力呀！星期一！星期一！星期一！今日先至星期五渣喎。。。。到我地打比肥鬼細佬個陣，原來佢都正係度嘗試撻著個發電機呀。。。

經過兩個鐘的搜索，細的發電機係有，但係只夠供電比個雪櫃，大的價錢係細的三倍，但係可以供電比全間屋。。。諗過之後，我地決定去肥鬼舅父度借佢地部細的發電機解決咗今次停電先，但係要即刻安排儲錢買個部大的發電機。。。

買咗午餐返屋企食，準備執拾細遠去肥鬼阿媽度，返屋企仲聽到隔離屋個發電機嘅聲音，都係沒有寄望的了，點知開門入去之後第一眼，就係見到微波爐個時間係度眨下眨下

有電了，經過16個鐘頭的原始生活，我們又回到了城市人的世界了。。。。

大型發電機，等我呀！！！！

綠豆

今日係屋企嘅綠豆小朋友生日呀

綠豆，生日快樂

綠豆小朋友幾多歲？？？咪講咗囉！！

好掛住阿豆呀！！！即刻搵番呢張咁殘嘅紙出嚟。。。

呢張係乜？

係我上年３月返香港個陣，頭幾日未搵到筆記簿寫低約人食飯的booking時，

就求其搵張紙寫著先。

有一朝起身，就見到全張紙每一日都給綠豆小朋友填上她的booking了。

佢話要阿姨每日都同佢玩囉！

就係有一天我要去負離子個頭（係呀！呢的都留番一年返去一次做晒佢架喇），

佢都話要跟住嚟，仲要唔准出街同朋友食飯（一係就你即刻返嚟啦！）

為咗慶祝妳生日，我今日煲咗綠豆沙呀

希望下次阿姨返嚟，已經讀小學嘅你仲會想阿姨同妳玩喇！

麻鷹爪

係中國情人節的前夕，終於收到家姐寄給我的新年禮物：麻鷹爪同虎頭帽，趁仲有兩日新年就過喇，我梗係即刻就帶埋佢地出街啦！個虎頭帽真係好暖呀！但係點解個兩隻係叫做麻鷹爪呢？！？！因為佢地有聲架，阿肥鬼聽到個的爪聲就問我做乜係度麻鷹叫！！！哈哈哈！！！





呢兩日實在落咗好多雪，咁啱我近來有一項特別任務（時辰未到唔講得住！），所以我用咗兩／三日嚟整咗兩個雪人，一個係下圖我的左邊，係第一個實驗品，右邊的那個係第二個製成品，已經像樣多了，到今日下午返來以後又再手痕想再整多一個。





點解手痕想再整？好喇，又係時侯教教大家落雪的知識了。

（特別鳴謝肥鬼提供下面的落雪知識）

我第一年來的時侯，第一樣學的就是摌雪了，原來摌雪唔係我以為的一野一野咁摌架！咁樣摌法，摌到天黑都摌唔完，而你己經變咗網球手臂加猿猴二合一。原來摌雪係一摌摌到尾先至撥開的雪。其實叫做摌雪，實際上是推雪，因為佢地個做法係個driveway（車道）有咁長就由頭推到尾先撥開的雪，咁樣真係快好多又慳力（唔洗野野都真用臂力去摌）！而且，新雪係易摌好多架，的雪如果比架車碌過或人行過咗，咁係個底個的雪就會compact（壓實咗）仲會粘實係個地度，咁如果跟住個日又暖番變咗落雨，然後夜的又變番凍，咁就會結咗冰，“扇”到阿媽都唔認得架喇！呢個就係我舊年好鍾意摌雪嘅原因喇！

今年呢！又學第二樣野喇！其實上年我都有試過整雪人但唔成功，因為我帶咗普通手襪出去整雪人，雪人未整到，的雪水就凍冰咗隻手喇！同埋的雪壓極都壓唔到成圓形，我仲以為係自已無心經整所以放棄了。

但前兩日，因為那個特別任務要整個雪人，就出齊裝備再去挑戰一下。咦！又比我整到第一個實驗品喎。個陣都未明道理係邊，只係覺得的雪一撻上去就會粘住，唔會好似甘年咁撻番落嚟嘅。想再整第二個好樣的嘅，但整整下己經天黑，就收工等第日再整啦！橫點天文台話仲有幾日落呀！

點知第二日叫埋肥鬼一齊出嚟幫手（我個特別任務須要兩人）佢一出嚟摸摸的雪就話今日整唔到雪人？！？！咩話？我嘅"兩個雪人經驗"話係得個喎，你懶到出汁想入番去睇電視呀？？？佢話呢的落緊的雪太fluffy（蓬鬆的）粘唔埋架，噚日的雪落得嚟又暖番少少，係地下嘅時侯水份多番的，咁先可以壓得實，整到雪人架？！？！唔信邪的我死都要試，點知就將我噚日整的第二個雪人殺頭添！

最後唯有轉移視線，話我仲未去過行落個湖到，現在要去行下。。。

（好在，肥鬼的記憶力唔係太長，哈哈）

行到出去，我仲以為二仔底死跟實無衰啦！點知個步如果佢已經行咗，個的係面嘅雪就已經下降咗，我再行番同一步就變降下降。所以，我想聰明的人都不會在冰天雪地打刧的，除非你真的識得鐵掌水上飄！！！





雖然個湖係結咗冰，但始終都係好重濕氣係下面，所以，只有最面的三／四吋係雪，底部的都係思樂冰物體。





一步踏出去，如果行得快，係隻腳未去到思樂冰個層就抽腳行第二步，應該係會感覺好行一的嘅，但係講就易。。。你地嚟行下啦！好好玩架。





好喇！睇睇先頭部隊嘅相！





究竟點樣先知自己仲行緊係地呀！定係湖呢？我就刺激到淨係掛住係度行來行去囉！肥鬼就話睇到腳印下面結咗個層冰喎！！！我就話睇相比較最容易啦！

下面呢張暑假時我影相企個位係偏左邊嘅。不過我地就係係呢個灘行出去嘅。





而呢張就直頭係向同一方向影，不過夏天影相個陣我仲係只可以企係個灘到，只係zoom近去影，你地睇到佢背後個小島麻？










的雪其實去到膝頭架喇！





仲落緊雪，係咁飛埋嚟塊面度！！！





大家見到我那整雪人必備　－　黃色手套沒有？？





係咁冬嘅天氣，梗係要整番的冬天嘅餸啦啦啦啦！！！！！

呢盒栗子，我買咗耐到都唔記得幾耐囉！成日期望有朝一日肥鬼會變得識食，會食用我地方法煮嘅雞。。。。等咗咁耐，都係唔等喇！





買咗一隻冰鮮雞（真係平過新鮮菜呀，US$3.5渣，細隻的仲平）但係切開呢，好快就發現個雞胸真係不成正比地大件呀。。。唔理得咁多喇！我又唔鍾意雞胸肉嘅，就將的脾呀，翼呀，背脊呀，切晒比我做栗子炆雞。。。哈哈哈





雞胸就咁調味一下焗咗比佢做三文治食，一的都唔晒！的骨都比我攞埋去煲湯，呢個就係一整隻雞係我呢到通常用法。哈哈！





睇到我的意大利來的栗子嗎？食落咪又係咁嘅味！





自創的　－　椰菜花炒蕃薯，仲以為的專吸味嘅椰菜花配甜的蕃薯會ＯＫ啦，不過實在太淡，下次都係要比的野落去煮下，無乜味，但係肥鬼都食晒的蕃薯。係呀！淨係蕃薯，佢好挑剔架，激死人！！！

完美主義者

阿肥鬼成日係行超市個陣催到我氣都咳，好似間超市有鬼咁樣要雞咁腳走。就算上星期見到間超市清緊貨，半價再半價都無情講架。

但係咁啱嚟緊有小朋友生日會要去又有親戚就嚟生BB有Baby Shower要去，所以，上星期我趁佢返咗工，我就走去出面間“My吖”巡視下的業務，睇定晒的目標，到每星期例行公事個陣我就去照單執藥囉！
係呢到，都係個句　－　唔係特價唔好買！
下面呢四套BB衫一共只係US$20！！！原價係總值成US$80架！！！

其中兩套仲係一套七件，齊晒！

我仲特登由0/3MOS買到去6/9MOS加一件 one size 嘅，夠佢著成年吖。

小朋友的生日會，就買咗四套卡通片DVD，嘻嘻，我都好鍾意睇呢幾套卡通片架！US$5蚊一隻，唔係最新出嘅，不過我覺得越舊卡通片越好睇！

另外，再比我發現咗呢盒野，係你出去修甲時個修甲師用的一樣嘅工具，係咪好貴咁呢，成US$12.5喎。。。

不過，睇下呢個價錢牌！

仲平過一個指甲鉗。。。以後我地唔洗爭指甲鉗喇！

買咗返嚟之後，即刻用咗幾次，因為當我好想整靚的指甲個陣，就會好努力忍住唔咬手指（肥鬼成日捉我架）所以個題目係完美主義者！哈哈哈哈！

就係的指甲變番好樣的之後，就攞我的甲油出嚟塗下咁啦，不過我唔係真係好有興趣塗指甲油個的人，都係諗住塗幾日玩下，所以　－　我淨係塗咗左手唶（已經手軟喇，唔想玩喇），個日咁就收咗工喇！

個晚有人放工返嚟，好快就問我，你隻左手做乜野呀？

之後三日全程不停有人問我，做乜淨係塗一隻，唔塗一隻？好似我呢兩隻不同顏色的手甲攪到佢周身唔舒服咁囉！哈哈！

最後，我頂唔住完美主義者嘅“煩音”　－　我洗晒的甲油囉！

Long Lake (part 1)

前幾個月，在冬天未到又未開始落雪前，我都keep住每日出去行吓，運動吓，跑吓步咁囉！

行得多咗，對附近環境熟識多了，就越嚟越鍾意依家住緊嘅地區。

先介紹一下地理！

係我地出面，有一個湖，個名叫長湖(Long Lake)，有名你叫，個湖真係好長架，仲係長方形嘅！咁係呢度，有湖都唔係好出奇嘅，因為Michigan有另一個名叫 The Great Lakes State，即係週圍都係湖囉！

呢度係個湖近我地屋企嗰一邊。。。





湖嘅另一頭










呢個係湖中島，喺係長方形的另一邊嘅，通常係我屋企出發，行去到湖嘅另一邊，要大概35-45分鐘倒喇！通常我都係圍住個湖行兩個圈，要大約2個鐘。如果個日能的起心肝咁樣早的出去先行兩個鐘，就可以黃昏前再行1個鐘。其實，有時我都幾鍾意咁樣行下，因為我係會聽住MP3，一路行，一路唱歌。哈哈。信我，咁樣行係唔多覺時間過嘅，但係跑步機的時間就係過得好慢嘅。真。




















跟住要介紹吓嘅就係的屋！

呢面的人好鍾意係湖邊起屋（通常都係貴屋喇），隨時可以游水麻！咁係屋出面又可以有個私人（小型）碼頭。有錢囉～當然就會有埋船或者係快艇喇，隨時可以玩滑水吖！





係我地呢區的屋，最好嘅好處就係"唔密集"，因為好多都係大大大屋，哈哈！我初時唔覺呢個好處，覺得無乜分別，但住耐咗，多咗經過其他地區，覺得唔密集真係好開揚，每次行過都覺得身心舒暢，最大比較係肥鬼阿媽住嗰縣/郡(county)到，的屋係密到不得了！同埋的樹好似遮住晒的屋咁樣，攪到無乜陽光，覺得好暗咁樣，就算間屋唔舊，但係你都會覺得係舊區嘅感覺！！！

呢到係湖中間兩邊。。。










之後我又係散步時，影下呢頭呢屋。。。下次再報告。

Long Lake (part 2)

上次講咗屋企出面嘅地理環境，今次介紹一下附近的屋。

第一間：必要講的“百萬吉屋”。先來一個正面。




係咪好靚呢？此屋在我第一次（2005）來探肥鬼時還是豪不起眼的普通屋一間。到第二次來時（2007年4月）便已經在裝修中，話是裝修中，不如說是完全拆了重新再起來得正確一點。




（右側面）

這屋在最後我2008年2月正式搬來美國時才開始埋尾，我們每天出入都經過這間大大大屋，但整整一年過了，都不見一個人影。相中的白貨車是來除草的人的車。




（左側面）

這屋起時樓市還未開始跌，肥鬼話不用看內裏，只看地段及大小，起這屋最保守估計都要一佰萬美金。但這屋起了整整一年都只是坐在這裏，沒人出入，我們估是因為起好的時侯剛好是樓市跌的時侯吧！

沒人買便只好給我養眼養眼吧！每天散步經過也可以發下白日夢。有時揸車經過時都會同肥鬼講，無番十個八個工人都唔好住呢間屋囉！唔係真係一日24小時不停打掃都唔掂！

話時話，如果呢間屋真係賣一佰萬美金，其實都好鬼抵！你諗下，一佰萬美金＝八佰萬港幣，八佰萬港幣最多咪買到一千呎咁上下（最新一輪公屋都比人炒到500萬喇！），仲要睇下係香港邊度喎！而呢間屋最少無5000呎都有3000呎喇，後面重有lake access（即係有權可以用個湖）喎。個的帶住一喼喼現金嚟呢度入貨嘅big six同胞，入到呢間就發囉！




係我2009年9月學車個陣，個教車師傅就話呢間屋係比中國人買咗，仲話係做餐館嘅，講到似層層咁樣。我就唔多覺囉！都無人出入嘅！似係佢睇得新聞太多喇！哈哈！




你睇下，呢隻水上電單車係2009年5月個陣出現過幾日，然後又消失咗嘅物體。如果真係big six同胞買咗呢間屋，佢地都唔似會咁識享受生活。。。

第二間：“八十萬大屋”

呢間係正路口的屋，同上面間佰萬大屋隔咗3-4間屋左右。係2008年年頭曾經開價八十萬，但後來無市又收番個牌。

就咁睇正面好似唔多值。



但係你睇真的，係屋嘅右面個一大塊地（足夠起多一間屋）係包括在一齊的，你都會覺得好抵喇！咁大塊地你有心機嘅，可以種下野！而屋主佢地呢，夏天個陣就會起個網嚟打排球（塊地夠兩個場）加埋玩水上活動。










呢個屋主都幾好人架，我係夏天成日出去散步見得多（佢要成日剪草）都會傾下計，如果下年再熟的，我就可以同佢的細路打羽毛球！正呀！的細路我諗係佢的孫同的孫嘅朋友，因為平時唔見架，係暑假先見多的人架渣。

係介紹最後一間勁野之前，大家可以睇下幾間我覺得好靚的屋：

呢一間唔洗我講，都知我最鍾意就係佢個落地大玻璃嘅廳！！！而呢個廳就係對到正一正個湖長個一面，佢都有自己的lake access，仲要係正沙灘旁邊（我地個業主會起咗兩個沙灘係湖的兩邊，有野餐的設備，夏天有泳會係到教細路游水）夏天個陣日日水上活動加BBQ都得，正！




下面呢張相可能影得唔係咁清楚，但留心睇會見到，係石獅子入口入去個度，係有一個圍欄同石柱包圍住的前花園，有少少似我地中國人的四合院（中間無頂）咁樣，佢仲有個小型噴水池係個度。如果呢個花園大的，可以日日係度high tea，真係正！




下面呢間就係個前園好靚。我影個陣唔係盛夏，所以睇唔到個屋主好比心機種花同打理。係盛夏個陣，可頭圍住的地方都種咗色彩繽紛的花，真係好靚架。




下面呢間又係一間好大的屋，但係我唔明點解呢度的屋，梗係唔起得四四方方一點，例如完整的兩層？可能係因為我唔識建築學，真係唔識欣賞呢的唔同高低嘅屋頂。。。









而下面呢一間，就直頭好似住咗係森林入面咁樣，全靠係門口五棵大樹（我無用wide shot影唔晒左右）佢呢家屋主整到五棵大樹都有矮樹環／灌木叢（shrub/bushes）圍住棵樹，都好靚吖！




下面兩間都好有型，因為佢地都用一樣的色調：黑白紅。比起附近的屋全都用綠／啡係起眼好多，又時髦得多了。









好了！係時侯介紹最後一間，亦都係最勁的一間。附近的人叫呢間屋做“Candy Land House”或者係 “Cotton Candy House ”，點解？

來一個近境。




右遠境全景。




左遠境全景。




我諗淨係睇的相大家都估到點解呢間屋有呢個名喇！呢間好似兒童皇國嘅屋，絕對唔只得呢一座堡壘。係堡壘嘅左手邊，係仲有一個籃球場，一個排球／網球場，一個小馬場（好似沙圈咁上下大）係呀！遠望係見到有養馬架！仲未計係堡壘後面個一大塊地（唔知仲有的乜喇，都睇唔到咁多囉！）




同其他屋一樣，阿教車師傅都話呢間屋係有一個故仔嘅：男屋主用咗唔記得幾耐嘅時間去起呢間屋比的仔女，但係佢起好兩年後佢就癌病去世了。

當然啦！故仔真唔真無人知，除非等某日我行過同間屋的細路傾下計印證一下，不過可能性都幾低囉，因為同其他屋一樣，我都唔見有細路嘅，水靜河飛，同堡壘的可愛外表一的都唔襯呀！

鄰居的屋報告完畢。

下面棵樹係我去散步影相個日咁啱打完風無耐，呢棵咁粗嘅樹都被劈到得番一半。




下次比大家睇下我後園個棵，劈得仲勁！