心裏發毛 頭皮發麻

萬聖節都過咗咁耐，仲有乜好驚？

唔知大家鐘唔鐘意睇鬼片？我就無睇好耐lu

大家鐘意睇鬼片嘅人，覺得邊樣緊要的
 -> 情節？配樂？

年青嗰時我都仲有睇鬼片嘅 (依家心血少，唔嚇得 哈哈哈) ，但係一定要全屋開晒燈咁睇，仲要準備定 cushion (攬枕) 係旁邊，除時可以匿埋(遮住對眼) 等過咗嗰驚嘅位再睇。

最攪笑係，因為阿媽係一的都唔驚鬼片嘅，所以最多係同阿媽一齊係廳睇鬼片，每次一到驚恐的情節，除咗遮住唔睇，另一個方法我係會捂實耳仔，因為我覺得的鬼片，係嗰的配樂令到我心裏面發毛，捂實耳仔聽唔到，就會無咁驚架喇。

但係後嚟比阿媽發現我係咁樣睇鬼片嘅，佢就話咁不如唔好睇。。。因為我會不停問佢過唔的恐怖位未。。。哈哈

突然間講鬼片，係因為近日我部 mp3 碌咗呢首歌出嚟，其實都隨機碌過好多次，但係每次我都過唔到 intro 就要飛走佢。。。

係呢首
張國榮 迷路

呢首歌係 1983年 電視劇 老洞 嘅主題曲
老洞

其實套戲詳細內容係點我都已經無印象，對於嗰時仲好細個嘅我，總之就係恐怖片，而且就係有好深刻的"驚"嘅印象，所以好記得。

驚嘅感覺，就係嚟自呢首歌嘅 intro 嗰個 high pitch 嘅音，高音得嚟，又未高到去刀刮嗰種刺耳，但就係每次一聽到呢嗰 intro 我就會心入面發麻，陰深嘅感覺出晒嚟，我試過日光日白聽到呢首歌都會發毛要飛咗佢。。。

呢首歌對於我嚟講，係仲恐怖過鬼故電台，我覺得嗰個年代香港樂壇真係勁堅！！！

雄心壯志。。。

返嚟之後，發覺有少少改變。
之前我倆好少出街同同事聯誼，不是應酬的問題，大多數同事都好好人，好傾又玩得埋，不過係日常生活習慣上，我倆都係好"瞓"得嘅人，但同事們全都係夜鬼，好玩得，可以晚飯飲酒到10pm 然後 3am 起身返工。。。

係愛爾蘭嗰幾個月，發現人人都係聚散有時，唔可以永遠都淨係過後先話"早知多的出嚟敘吓！"

咁啱返嚟之後，其中一個好傾的同事，突然間又話要提早走，所以現在差唔多每星期都會敘會一次。

而我，唔知點解，突然間想做好多野，以前我一向係 procrastinating 的人 (好深的一個字！我過嚟之後先學識架！就係乜都拖得就拖的人。哈哈哈哈)

所以，我係一個月之內，去了3次學整番梘 (即係依家叫嘅手工打皂)

呢個係冷凍造型 (cold press)

綠色混白色/松樹香味

其實發現呢個工作室係上年嘅事 (所以講真已經拖咗一段日子) 本來係諗住同住 downtown 的同事太太一齊去，但諗諗吓又要約日子，又要接佢再去工作室 (之前未去過) 係在係太多野要應付，所以決定自己去上一次先。

10月頭上第一堂，就係整最普通的冷凍造型手工肥皂。臨近聖誕，所有香味或顏色都用聖誕做主題，因為呢堆就係今年親友的聖誕禮物了。

實在係太好玩，即日就約好日子，去學埋其他方法同產品。

呢個係第二堂 - 熱造型 (hot press)

紅白間色 / 肉桂香味

第三堂 bath bomb 曲奇香味

第三堂 熱溶番梘

薑餅人香味同松樹香味

老實說，呢的手作仔，依家自己上網睇錄影片段都可以摸索得到。但係如果你完全未造過，咁比錢去上堂嘅好處唔單止係佢一手一腳逐個步驟教你，佢仲會提供埋材料，呢樣先最緊要。

完全唔識呢一個行業嘅野，要自己去揾材料已經有難度，仲要唔知材料比例 (買一大樽返嚟淨係玩一次就唔想再整點算？) 有的材料只可以同水混合，有的用油，唔造過唔會知。

最主要係我識到番梘老師 (竟然同鋼琴老師同名！) 佢只係比我大一年，但因為佢媽媽本身都係開時裝店的人，所以佢有企業家嘅 dna 佢自己本來係做軍人，服役十多年之後出來了，又唔想同人打工，就攪吓整番梘喇。佢呢個工作室，係教埋你點樣可以造番梘去賣架，我好配服佢呀，因為我之前都係好多農夫市場買過手工番梘，都問過有無人會教班，佢地全部都話唔想教咗人就無人幫襯所以無人教。。。其實你地知唔知以前的人，整番梘呢樣嘢係阿媽做架(!!!) 係一家大細一齊整足夠用一年嘅番梘。。。

佢話本來都無諗過會有人嚟學架 (?)  第一個月無客到，點知第二個月竟然有5個。。。我去上第三堂嗰日，有一對母女一齊嚟學，佢地要揸車兩個鐘過嚟架。。。

係上面點解我話新手揾材料好難，你會以為依家乜都可以網上落單呀(!!)  番梘老師話佢都好出奇係有人揸好遠車嚟呢到向佢買材料架。

我都唔知自己會唔會有一日開檔嚟做，不過我已經約咗下星期又嚟幫佢手做浸溶炸蛋，臨近聖誕佢要做定好多貨，我又可以整多的熟手的，唔錯！

藝術家脾氣

我梗係無啦。。。
邊有咁高級。。。

只係處於篤鋼琴嘅階段，每次老師示範彈比我聽嘅時候，都會覺得 :
"咦？同一首歌嚟架？" (我彈的完全不是那回事)
"我係咪彈錯咗第二首歌呀？"
" 嘩！嘩！嘩！乜首歌咁好聽嘅，點解我彈極都唔似架？"哈哈哈

之後就覺得老師真係好有氣量，每次上堂聽我係到篤嚟篤去，真心覺得佢對耳仔好受罪。
因為我以前係喺合唱團唱歌嘅，不過嗰時唔識睇五線譜，只靠一雙靈敏的耳朵，鋼琴彈一次就識唱，咁樣學唱歌就係靠耳仔對每粒音的靈敏度，高半度低半度都會聽得出，但換嚟嘅就係每次聽到隔離嘅大嬸走音就好哽耳。。。好似的人聽到磨刀聲咁哽耳。。。

又有的人話學音樂的路上都係孤單寂寞的。。。
我未有諗得咁負面 (又唔係要做到貝多芬咁嘅級數) 不過就好深刻的，自己一個對住個琴奮戰嘅感覺，係無人可以做任何野幫到你嘅，就係自己一個重覆又重覆的去練，唔想虐待其他人嘅耳仔，所以就係自己一個係屋企，出於自己嘅心，想學識彈呢一首歌。

上星期因為有一日要去學第樣野 (下次講係乜，返嚟之後心入面團火好勁，好多野想學，仲要自己的起心肝去實行) ，同埋撞着肥鬼放假要去超市，無練兩日，即刻彈到一 pat 屎咁樣自己都慘不忍睹。。。

依家終於明白，以前聽的人講，因為學琴，都唔多會去旅行或其他活動，嗰時聽到我心就諗"有無咁誇呀？" 依家知點解喇，因為每日係到篤篤篤之後，等第二日，比的時間個腦同對手 sync 吓，跟住又會暢順咗，好多時自己都好驚訝 "咦，明明尋日呢到都仲 kick 住 kick 住咁架喎，點知今日隻手突然間又彈到佢出嚟喎"

仲有的人話學音樂會對數學有幫助 (!!??) 我從來都係數學白痴，依家都仲係，所以唔肯定，不過(!)  學音樂會可以訓練一心二用係真架(!)  我學咗咁耐，仲未係好識數拍子，就咁 1 - 2 - 3 - 4 你以為好易，但係當你隻眼又要睇住嗰的豆豉，個心又要即刻將豆豉變做琴鍵，然後又要睇住的手指位，我個腦真係無能力再同一時間去數 1 - 2 - 3 - 4

老師以為我係心入面數唔掂，叫我一路彈一路數出聲嚟，跟住我就"表演"比佢睇，條件反射咁 1 - 2 - 3 - 4 - 5 - 6 - 7 - 8 咁樣數落去，完全係腦，心，手，眼，耳，口，鼻不協調症狀。之後我兩個係度大笑。。。

跟住我要揾番第一本書最簡短嗰首，不停係到彈同時間數拍子，練咗只少200次。。。

諗起依家的細路被迫學好多野，真係好慘，我咁大個人，出於自己興趣，自願的，唔使考級，都覺得每日真係要花好多時間心力去彈，對一個小朋友嚟講真係好大壓力。

老師話我知，佢依家有好多小朋友跟佢學，其中有11個都係亞洲人。。。完全無白人嚟學(!!) 我無見過其他學生，希望佢地全部都係自己想學而來的。。。

低 b 的大滿足

的人話"女人心 海底針" 真係啱呀，因為好多時連我自己都唔知自己想點架。。。哈哈哈

不過今次咁啱得咁轎，比我一次揾到兩樣嘢！

係愛爾蘭的幾個月，將我最後幾滴的香水用晒。
我係 cheap 精嚟嘅，係嗰邊行街見有 €1/一支 嘅方便裝香水，買咗兩支，諗住無死吖。。。

我本身係用開綠茶味，係一個超普通牌字嘅香水，好淡的花味嗰類 (不能用濃的，會頭痛) 咁嗰兩支香水一支係玫瑰味，同另一支係橙+紫穌(九層塔 英文 basil)  應該都無問題吖。。。

點知返嚟噴過，嘔血！係超級南美 / 中東 好濃好衝鼻的香味。。。依家諗番起，嗰日趕時間，只係打開個蓋就咁聞吓，無噴少少落手試真的，見咁平就求其決定了。。。

現在要去揾我用開嘅嗰支啦。

點知係呢邊貴到飛起，我係美國超市成日都見到係十幾廿蚊就有交易嘅，係呢到要40蚊細支裝！！！
諗住放棄返歸喇 (可能等下次返美國經過 duty free 先買) 同店員傾兩句問吓香水幾時會唔會特價，佢都話好少做特價，不過轉角嘅貨架有的賣淨蔗，全部20蚊支。

我都不寄厚望咁行去睇吓啦 (本身就係貪平而中招，唔通仲未領教到？) 就咁睇好多都係不知明牌字或係男士運動形的香水，再睇真啲係後面比我揾到一支好熟口面嘅。。。

"華沙池" 係我好後生嗰時用過一支，好甜嘅香味，係我未變老女人轉花味之前嘅 taste
而且仲係名牌字，因為最後一支特價20蚊，比我執到寶，依家每日擦呢個香水，聞到的香味仲可以令我回想起以前讀大學係酒店實習嘅時光。。。

<<< >>>

我本來都唔係姿整嘅人，可以算係勁懶，好多女仔朝早返工返學要早起成個幾兩個鐘裝扮，我係無呢回事嘅。一路都係長直髮只因易打理。

不過，曾經我好鐘意去髮型屋洗頭，然後叫髮型師幫我吹大卷髮。因為係超級大肥妹，所以唔會成個頭電髮，會變超級爆炸頭，睇落就梗加大份，所以會淨係叫佢幫我吹到髮尾的幾吋做卷髮。

覺得自己咁樣最好睇。

所以過嚟之後，就買咗個卷髮器。
係最原始的，要夾住一執頭髮然後自己手擰個卷再等佢幾十秒嗰款，但係自己笨手笨腳，成日辣到自己，好快又放棄了。

直到上兩星期見到呢到都有一個電髮器係識得自己卷入去嘅，仲要清貨半價30蚊。。。

依家日日都好唔得閒，好好玩呀！！！
肥鬼係到笑我，話無諗到我會為呢兩樣無聊嘢咁開心。
人嘅生活，要開心真係好簡單。

放大

真係仲細過粒芝麻。。梗係唔敢喺度晒命啦！！！

曾經肥到帶唔落，依家又帶得番 <- 呢個先係重點，哈哈哈哈

((( 大家當睇唔到我的手指毛吧，做家務的手就費是嘥錢脱毛了。)))

有無諗過的鑽介廣告相，究竟係放大咗幾多萬倍先見到粒石嘅呢？？？

得閒無事又去清理吓的無用嘅野，見番呢隻介子。
細細粒，但係堅野嚟嘅，意義大過價值好多好多。

阿媽係我初出嚟做野嗰陣，用私己錢送比我架！等我有的出得大場面嘅手飾充撐一吓！

隻介子留到依家，我覺得係比嫁妝嗰的金還要有意義。我嗰時去咗跑馬地嗰間動物比賽公司做野，老一輩人嘅思想係覺得我會見好多"達官貴人" / "上流社會" 所以都要裝備一下，至少行出嚟唔輸蝕架，是有點老土的思想。

但係人大了就更覺珍貴。

我記得除咗呢隻介子，嗰陣因為要返沙田馬場，冬天凍到飛起 (天氣報告都話新界再低兩度咁樣) ，但老細係變態的，唔比人著褲，一定要行政look 套裙，阿媽二話不說同我去買咗件長褸，成千蚊，好有印象因為從來未買過咁貴嘅野。

阿媽係奉行 "應使則使" 嘅天條，半時慳到爆，但係須要時係好肯使錢的。以前細個梗係唔明啦，大花筒，呢的係人大咗先明嘅道理。

我無小朋友，所以諗住到姪女16歲生日 (sweet sixteen) 時送比佢。希望佢明白 "人貴自重" 佢阿婆嘅一番心思。

收音機

咁啱發現到香港電台有 "廣播道開咪" 呢個節目，揾嚟睇吓，可以回憶番細個聽收音機嘅生活片斷。

其實之前都講過，依家的聽歌 app 成日標榜唔洗聽廣告之餘，就係佢只會播你鐘意嘅歌比你聽。

同聽收音機唔同，以前係DJ播乜你就聽乜，咁樣可以聽到好多新歌，可以認識好多唔同類型嘅音樂。

仲有就係以前可以 "點歌" 依家完全無呢回事了。其實，一隻碟入面，總會有的歌你"漏"咗，可能係每次未過 intro 你已經唔鐘意就飛過咗佢，其實佢係好聽嘅，直有人點歌，你先重新發現佢。

<<< >>>

其實對於收音機，想講嘅係下面呢個故事。

以前係香港最大的動物比賽公司嗰到做野。
係全香港繼政府之後最大的公司，當然有好多唔同部門呀，除咗沙田同跑馬地最主要兩個地點，還有其他會所。

我當時只係其中一間會所嗰到返工。

因工作包括製作宣傳單張，所以成日要同印刷部同事電話聯絡。印刷部的這位男同事係好出名的(!)  係電話入面帶有磁性的聲線，很有禮貌，很温柔，完全就是暖男的型格。又很親切的除了工作以外乜都可以傾得兩咀架。。。

年多之後，有一次，終於比我揾到藉口去印刷部走一轉。

只可以說，那次之後就將印刷工作交給新同事了。
哈哈哈哈。

Timing 對的時間

朋友係九月的最後一星期來了旅行。
諗住應該較啱晒時間，睇到色彩繽紛嘅秋葉吖。
點知揸車週圍走都仲係綠油油，係得最後一日回程嗰時睇到少少。。。

朋友走咗之後緊接住就係肥鬼阿爸過嚟一星期。

但係佢邊到都唔去嘅 (!!!)  淨係痴住張 sofa 我地睇足一星期嘅警匪片 / 謀殺案。。。

就係呢一星期，晚上凍到得番幾度，的樹葉即刻大變身！

10/2

10/8

呢到只係平時開車去超市嗰條路。

 今日行路去銀行，行經呢邊火車橋底，配藍天白雲嘅背景，真係好靚！

除咗紅葉，其實黃葉都好靚，

太陽晒落嚟金光閃閃咁樣。

呢到係上面 10/2 同 10/8 嗰兩張相同一棵樹

今日的葉已經無晒啦

睇秋色真係得短短幾日時間，好睇有無緣份。

遠足

意外地見到一個睇秋色嘅遠足團，再 check 吓天氣報告，話會好天，就即刻決定上網報名參加。

發覺我其實都幾鐘意自己一個週圍走。時間上可以很隨意的，又唔使等呢個等嗰個。今次係星期五見到報星期日的團。

肥鬼其中一個同事嘅太太，都同我幾傾得埋，本嚟可以約埋同佢去嘅，但係佢住係城入面 (downtown) 約埋佢嘅話我就要去接佢，我對自己手車都唔係好信得過，而且入城的路成日變 (改路 / 封路 / 單程) 仲要泊街邊，所以都係盡量少見面。。。

今次要一早揸車去碼頭，泊好車就去登記上船，遠足地點係船程約30分鐘外的一個小島 McNabs Island

島的歷史
McNabs_Island

離遠見到島上面的燈塔

 遠看因為凍咗好幾日，的樹都開始變光禿禿了

連 Mr Leo 都話真係好荒蕪的一個島，最多就係松樹。。。好香。。。

 Mike 解釋話呢棵樹係有病菌，所以中間穿晒隆。

呢棵都係有病，好似人生腫瘤咁樣，

唔同嘅係樹嘅腫瘤好值錢，

呢棵樹如果比人鋸落嚟攞去起屋，會賣得好貴。

相入呢位就係 Mike 

落船上咗島上面，工作人員就介紹，

其實佢地有好幾團嘅遠足，全部有唔同嘅主題，

Mike 本身係生物學家，

跟佢行就會介紹島上的動植物。

另外有一團係講歷史，又有一團係講軍事歷史，

下年暑假我應該至少可以再嚟兩三次。

呢個島曾經被用作軍事用途，所以起咗 Fort Ives 呢的就係大炮，據講有個芝加哥的人想買咗呢批大炮，山長水遠嚟到睇貨傾好價錢，再問點樣運比佢，先知道係一手一腳要佢自己諗掂佢嘅，所以呢批大炮到依家都仲擺係到，可能未諗掂，哈哈哈。

成個島都係得呢的小路

對面就係 Point Pleasant Park 

佢地話的鹿係會游水過嚟呢邊揾食架

真係世界難撈呀。。。

攪呢個旅行團嘅全部都係義工，每人$25的旅費，全部用係個島上面，好係呢個碼頭都係用籌到嘅錢起嘅。

呢棵唔記得個名嘅草，經過 Mike 嘅講解之後，令我覺得地球又再去番冰河時期都係好事嚟架。

呢棵草嘅種子，可以進入睡眠狀態200年之後再發芽生長。
小小一粒微小又普通到不得了嘅種子，就咁落地係唔會發芽嘅，造物者創造佢嘅時候，放咗 4 個內置程式入去，佢首先要比動物食咗，經過動物嘅胃酸將種子外面包實嘅一層薄膜消化去了，經過腸同動物的屎一齊跌落地面，然後佢就係等。
等乜呢？就係等世界未日。
世界未日對粒草嘅種子嚟講係點樣嘅一回事呢？ 就係好似人類要開發一片土地，第一樣做嘅就係將呢塊地嘅全部草同樹鏟到一樣不留，咁呢的草同樹會係地面開始腐化，呢個時候粒草嘅種子係地下面又點知地面發生乜事呢，原來當植物腐化時會發出一樣化學物，呢粒種子嘅內置程式，能夠感應到空氣入面有好多呢樣化學份子，然後，仲要等，等氣温暖了，最後，佢先會發芽！

呢堆只不過係普通的 pine cone

Mike 解釋有一種 叫 black pine cone

係由松樹演變出嚟嘅松樹，好多代之前有松樹被燒過，所以 black pine cone 係黑色，仲有層蠟係面嘅，要經過火燒，將層蠟溶咗，佢先會發芽。

呢的紅色小花 (其實細到得半粒米咁上下)

同荒島上好多其他植物一樣，

係一般荒島第一批會見到嘅植物，

因為佢地真係能夠"食風大" "食空氣大"

佢地能夠係空氣中攝取某樣化學物

再將佢轉化成營養，

呢批植物唔單止可以爪實的泥土，

仲可以為泥土提供養分，

第二批的植物種子，

由動物或鳥類帶嚟之後就可以發芽成長。

愛爾蘭 - 無聊睇電視 (二) 之 唱歌

試問邊會有人唔鐘意唱 卡拉ok 架？？？

所以有一晚同肥鬼睇到呢個 game show 就覺得好正！！！

又係舊野嚟嘅，2008 玩咗兩季就停咗lu
(都唔知電視台呢個行業點玩架？所有我地覺得好嘅戲同節目都 cut 晒？？？)

遊戲好簡單，就係 random 咁比的歌你，初時係有字幕比埋歌詞你嘅，然後就突然間無咗的字，參賽者就要唱正確歌詞出嚟贏錢。

頭幾首梗會係 hit 的嘅歌，同埋只係無咗幾隻字的。後面獎金越高嘅歌，就會越嚟越多字無咗，什至成句無咗。

好多時都係你明明識哼的音出嚟架，但就係有一兩個字唔肯定，咁就衰咗。。。哈哈哈

睇呢個節目全完感覺自己好老餅，因為我熟嘅歌，已經係 80's 或 90's 哈哈哈哈

<<<< >>>>
返嚟搜尋嗰時發覺呢個係美國 game show 嚟架，曾經由我最鐘意嘅 Wayne Brady 做主持嘅。
佢係非常之 talented 嘅 comedian 有著多方面嘅天份，上面呢兩個字我都唔識點樣釋做中文，因為嗰的唔單只係天份，梗加係材藝，又識唱歌，又識音樂，又識演戲，又識配音，腦筋超快，所以唔可以單單釋做"攪笑藝人"

佢依家做緊 Let's make a deal 嘅主持 (一個好簡單嘅遊戲節目)  入面佢有個拍檔 Jonathan Mangum 又係個腦轉得超快嘅人。
以為'偽人'都係香港嗰的不學無術，讀書唔成嘅人？Mangum 係大學讀心理學畢業架。

認識 comedian 呢個行業，係睇 Who's line is it anyway 大家得閒都揾嚟睇吓，簡單講，點解以前細個係小學成日會有"天才表演"呢個環節？就係比呢的人表演囉，可以成粒鐘不停諗好多橋出嚟引你笑，知唔知有幾難？

一頭問號

依家睇香港的新聞，真係睇到你一頭問號 (???)

"賣" 什麼 黑已？？

Michael 就 米高 啦！！

讀嚟讀去都讀唔到三個音出嚟。

之前都講過，現今世界大同，睇任何的世界新聞，少不免都會有英文字係入面，最好嘅，就梗係直接去學英文啦 (幾時都係學多一種語言好啦！)
再唔係，就學一兩隻字都好呀。。。

明明廣東話嘅音釋係最接近個英文字嘅讀音，你硬係要釋到一 pat 屎咁樣，有無睇通勝架 ??? 通勝釋得好過你呀！！
(註：以前通勝後面有教英文嘅，
one - 温 four - 科 seven - 舍焚 ten - 吞 )

睇番颱風名字，就算外國人唔識你山竹牛肉係乜東東，佢地都當學生字咁樣用 mangkhut (呢個串法係泰文名，本身山竹英文名係 mangosteen)

"山竹" 係亞洲就係人都知係水果，但係呢邊，仲未係人人識芒果同木瓜嘅時候，真係好多人唔知係乜嚟。

愛爾蘭 無聊睇電視 (一)

<<理智 與 感情 / 人性黑暗面>>
好似好深嘅題目，其實每人每日做嘅所有決定都係同呢幾樣嘢有關。

係嗰邊日日 4am 起身整早餐都會開住個電視，有的聲聽吓，醒醒神咁樣。而係呢的揾鬼睇嘅時段，電視台梗係播的陳年舊野啦。

佢嗰邊曾經有這樣的一個遊戲節目。
識睇英文可以睇呢個介紹：
Golden_Balls

我搜尋過一的資料，呢個遊戲節目係 2007 年開始，玩咗6季到 2009 就停了。

呢個遊戲點玩嘅呢？
一個金庫(大滾桶) ，入面有100個金波。每個波係不同銀碼的錢，由最少 10蚊 到最大 75000蚊。

撈均晒之後就開始 look 出嚟，第一輪有四個玩家，滾桶會 look 出 12個銀碼波。

同一時間，主持人嘅助手會放 4個"殺手"波，混入去 12個銀碼波入面，共16個波撈均之後每人會有四個波。

每個玩家的四個波，分前排兩個同後排兩個，前排兩個係要開出嚟比大家睇嘅，後排兩個就係玩家自己睇嘅。

每個玩家都睇過自己嘅波波之後，主持人會比時間大家互相問問題，呢個時候，玩家們可以講大話或講真話，去令其他人相信自己手上嘅全都係好嘢(大銀碼) ，因為遊戲嘅第一輪最後，大家要用投票決定方式，嚟淘汰其中一個玩家，得三人可以進入第二輪。

三位進入第二輪嘅玩家，佢地嘅波波(錢同殺手) 都會一同帶落嚟，同時滾桶會再放出2個銀碼波，另外助手又會加一個殺手波，共15個波三個玩家每人5個，兩個前排，三個後排。

同第一輪一樣，大家要費盡唇舌去令其他人相信自己的波波係好嘢，以進入最後一輪的二人對決。

最後一輪二人對決，就係佢地各自帶落嚟嘅波，另加一個殺手波，撈均之後共11個波放係枱面。
佢地兩人要輪流，每人抽兩個波，第一個要掉咗佢，第二個就放入最後獎金列 (主持人面前嗰5個位)

要留意，玩家係無得揀嘅。主持人話現在係抽"掉咗佢"嘅波，你抽到大銀碼，都要掉咗佢。
相反，你抽到"殺手波"可以掉咗佢，就係你好彩。

係整個遊戲入面，"殺手"波嘅作用係最後呢一輪先顯示出來。如果玩家抽到"殺手"進入最後獎金列，咁之前抽到嘅錢，就會減去九成，得番一成。
(例如第一個抽到的'最後獎金'銀碼係一萬，點知第二個波抽到係'殺手' 咁個獎金會減去9千，淨番1千蚊) 每一個殺手波都會直接影響最後獎金銀碼，所以係呢個遊戲入面，其實最重要係盡量減少"殺手"波去到最後。好多玩家都放錯重心係對手是否會"均分"或"全偷" ，睇過有一集帶咗5個"殺手"波嚟最後一輪，最後得番幾百蚊。

係呢一輪兩個玩家要好團結，期望可以將最後獎金推高。

最最後，兩位玩家，每人面前會有兩個波，一個係"均分" 一個係"全偷" 主持人會比時間佢地傾，如果兩位都揀"均分" 就可以均分全份獎金。
但係如果一個"均分" 另一個 "全偷" 咁全偷嗰個會贏晒的錢；另一位全完無錢。
如果兩個都係 "全偷" 就兩人都空手而回。

花咗好多時間，終於叫做解釋咗呢個遊戲。
(都係唔明就自己去揾嚟睇吓啦！)

依家可以講吓點解我對呢個節目有特別感受。

首先，我想講話，係美國，係無乜需要用腦嘅遊戲節目。美國好多遊戲節目都係標榜好容易就可以贏到獎金獎品嗰類嘅。簡單嚟講即係無乜深度 (一般迷思覺得美國人膚淺，係不無道理的。)

而呢個遊戲節目給我留下深刻印象嘅原因，係佢比你睇到人性黑暗一面。好多集嘅玩家，係去到最後一輪，比對面嗰個玩家"擘大眼講大話" (英文係 lie to your face) 咁樣呃咗。
我覺得依家一般人係太天真了，完全唔記得咗對人要有介心呢樣嘢。

認真咁樣去玩呢個遊戲，係需要適當時候講大話，要記住牌面無得呃但係人會，要每一輪都留意對手有無講大話，同佢最後開嘅牌面是否相付，最重要係，唔可以太早就因為對家講大話就決定了佢係壞人。

呢個世界太多披著羊皮的狼，同一時間，也有人樣衰但誠實。好記得有一集個男人，全程好有禮貌，唔嘈吵，唔哎交，好誠實的樣子，好誠懇咁講話會"均分"，去到最尾選了"全偷"

仲有就係，的人(特別係第一二輪入面) 將太多感情放入去個遊戲到，用感覺去決定邊個玩家留低，而唔係睇牌面去決定。
睇過好多集，的人有兩個殺手波都可以留低(!!!) ，而另一個有大銀碼的比人淘汰了，只因佢"實牙實齒"話會"均分"

其實係第一輪入面，好多時係用腦加少少理智，已經可以大慨估到邊個講大話。而第一輪嘅目的，除咗要入圍之外，最重要係減小"殺手"(同最後獎金有直接關係)

而且係第一輪入面，對手想均分或全偷根本無關重要，好多人係到最後一刻見到個最後獎金嘅銀碼好大而突然間心裏決定要全偷。

講咗咁多人的黑暗一面，想講其中一集，有位人兄佢表現係好 spiritual 咁樣嘅，佢順利去到最後一關，枱面11個波，未開始抽之前，佢同個對手話 : '如果你信我的第六感，我嘅預感係外圍六個波係錢，入面四個波係殺手' 最後開晒的波，真係如佢預言，有好幾萬蚊獎金，佢感覺係對家會"全偷" 所以佢都選全偷，佢一睇到對家選了"均分" 嗰陣，雖然佢贏咗錢，但佢真係後悔到流出眼淚。係對自己失望，睇錯人嘅眼淚。

亦都有好幾集，見到有人誤判，以為對家會"全偷" 所以自己都出 "全偷" 然後一開結果佢不停講對唔住，個主持即刻話，你唔須要對唔住，你無做錯，個遊戲規則係咁樣，佢好清楚每一步嘅結果。

主持人每集去到最後嘅結語，會講 "well,  they have been themselves" 意即每個人都係做緊"人"會做嘅野。

有時，人心係最難睇清嘅一樣嘢，係去到最後，你都唔會睇得清。