蛋卷 Swiss Roll

第一次整。

成功卷到無爆口。

用咗4蛋基本蛋糕食譜 + 1 cup 鮮忌廉 + 波蘿jam

可能真係好好味

有人返嚟食吓一件，食吓一件，食咗1/3條

仲問我今日係咪出過街

(佢以為我買架！！！！) 

我今次塗了一層波蘿jam,  先塗一層忌廉。

下次要試吓將的jam 撈埋的忌廉，

咁樣應該可以落少的糖。

O - O - O

I hear owl this morning for almost half hour....
Is that mean spring is around the corner???

包禮物

看到呢個post 想起以前係香港返工，曾經係"包禮物部門嘅 Creative Director"

我以前係香港，係喺嗰間賽馬公司到做架。

畢業前係嗰度實習，之後兼職，到畢業出嚟就入咗去，一做十年⚠

做過幾個部門，最後係人事部，咁同creative director 關乜事呢❓

我自己對於做手工嘅野，不嬲都有的天份。曾經對日式包禮物方法好有興趣。

咁同事生日，通常會夾份買禮物，次次都係我做包禮物嘅，

久而久之就出晒名，成層樓嘅同事，有須要都會叫我幫佢地包禮物。

嗰時，我地部門嗰老細，係一個乜野狗屎垃圾project都鍾意攬上身嘅人。

其他部門高層退休，要攪cocktail party 我地攪。

公司攞到足球牌照，要慶祝，又係我地攪。

一百圍馬場老人宴，又攪。(明明有charity dept) 

公司第一次世界杯開盤，又攪。

攪到一個地步，係真係停止recruitment 嘅運作去攪event

點解唔比第二層樓的marketing 做❔開正佢地嗰範喎❗

仲成日要我地外行人(人事部)  做人地專業野(AV - audio & visual 音響錄影)

我地公司係有呢個部門架。。。

咁嗰時，呢啲event 梗有送禮物啦，全部由我操刀包禮物。

公司位於跑馬地，好近銅鑼灣時代廣場，以前時代廣場地庫嗰層係日式超市，

其中一角係文具部，賣好多好靚嘅和式花紙同埋包禮物配件。

講真，好在呢個老細都好好人，好識做，雖然成日要我地成team 人做咁多無謂project

但佢成日請食飯，因為攪project 而比我地蛇咗出去，佢都隻眼開隻眼閉

所以先會咁落力去攪。。。

嗰時因為成日同佢包禮物，可以開公數去買supply, 係時代廣場嗰間文具店，

試過有一次買咗成$1000 大嗱嗱成千蚊呀！！！就嚟貴過的禮物囉！

不過就係咁樣，我就儲埋的用剩嘅，成日幫的同事包的私伙野。。。

仲記得有一次，有個event, 臨last minute 要揾一位高層幫拖做MC (主持)

嗰個event 係有記者到嘅，所以，嗰日晨早流流返到公司，

阿姐就叫我上去睇睇嗰個高層係咩嘅身形，

然後攞住佢一件西裝褸，叫我出去shopping, 幫佢買套老西比佢event 嗰陣著！！！

依家諗吓，有咩工可以返工公費去shopping�

唔係講笑

星期一 2/13 落咗足足成日雪，去到星期二 2/14 朝早成10點先叫真正停咗。
尋日星期三出去行過吓，好來地方都無鏟到雪，實在係太多雪呀，的工作人員淨係鏟主要道路都唔得掂，最主要係呢的小鎮，根本無位擺的雪，係路旁嘅雪仲高過我。。。

天文台真唔係講笑，話星期四今日又會再落。

真係舊嘅未去，新嘅又嚟。。。

睇吓今次又落幾耐！！！

出面的雪好密呀，睇唔睇到橙色衫個人呀，的雪有佢咁高囉

冬天鏟雪，夏天剪草

你揀邊樣

唯一的亞洲超級市場

係外國住嘅香港人，都會有呢個感覺，就係有一間好嘅亞洲超級市場係好緊要架。
所以未嚟呢到之前，已經上網揾定，呢度唯一一間亞洲超級市場。

因為大陸嘅食品安全問題，我係美國，都只係去日本超市，韓國超市同台灣的，就算真係去中式超市，每樣攞上手嘅我都碌大對眼睇清楚原產地，好多時無得揀嘅情形下，我係寧願唔買嘅。。。

嗰日肥鬼放工返嚟話去超級市場，原來係帶我去呢間呀。
網上的人嘅意見，全部都話呢間野好細，但係所有的基本必須品係好齊全嘅，入去睇過，係連越南，馬來西亞，泰國等第地方嘅野都有，真係啱晒我。

嗰日揾到最開心嘅係呢個。。。

住加州嗰邊的香港人唔會明架，我以前係Michigan 嗰間中式超市，係無的咁地道野架，

我有8年無飲過維他奶。

如果佢地有玻璃樽就好囉，好懷念細個係學校，冬天時買暖嘅維他奶，係特別好飲呀。

不過依家有紙盒裝，我都好心滿意足架喇。

愛拼才會贏

愛拼才會贏

唔知點解

依家成日對住個海

會想起呢首歌

見到的鏟雪嘅人

就會諗

哇，幾時先鏟得完？

呢頭鏟完，佢聽日又嚟過。

唯有聽到呢首歌，

就會有"頂著頭皮上喇"！！呢種感覺

Storm Surge Warning 2.0

好啦。係時候報告吓最新情況。

由 2/13 (一) 零晨5am 開始掛起嘅風暴警告，維持15小時，

但係其實昨晚係無停過落雪架，不過的風就細咗的的，同埋陣風就無咁密嘅。

呢到係2/14 9am 天文台話的雪大約7am 會停，其實去到9am, 10am 先叫停晒。

下面住地面嘅鄰居，的窗都蓋滿雪了。

其實唔係真係落咗好多雪，不過係風吹到的雪咁高(wind drifting) 同埋鏟雪的人根本無其他地方可以放的雪，所以越積越高。

呢張呢，就睇到個海，昨日海面上嘅冰，全部溶晒呀，

係相入面呢兩舊浮冰，唔使一分鐘就由左邊漂到去右邊，

其實因為仲係好大風，所以漂得咁快。

我地兩條友，初嚟報到，終於見識了海洋性氣候雪暴，真係非同凡響，尋日同今日所有學校都停課，尋日就成個鎮都停頓了，今日都只係一部份下晏先開番。

天文台仲話星期四，另一個風又嚟緊囉。。。

呢張係比你睇吓對面，佢地比的風吹到正，連露台都裝晒雪。

Bunny 從哪裏來？

還未到四月。

不是可愛的復活兔。

係下面呢的。

Dust bunny

天呀！究竟"塵"是哪裏來的呀！！！(哲學mode)

唔通住building 同住 獨立屋真係咁大分別？

定係因為依家住係小鎮嘅大路附近？

但係依家冬天，嚟咁耐，一隻窗都無開過都攪到咁，夏天我咪死梗？

以前係美國間屋，好幾日先掃地一次都無咁誇，依家一日追劇懶的，

肥鬼就會立即發覺，連我自己都頂唔住呀。。。

仲有就係，邊個話住海邊會好濕架？

我地嚟咗咁耐，乾燥到不得了，要兩個放濕器(humidifier) 係房，

唔係呢，一係瞓得唔好，一係就瞓醒個鼻涕有血絲。。。

個的靜電誇張到我地兩個互相過電不突止，仲要掂親乜野都電幾野。。。

又乾又多塵，咁我掃地嗰陣就飛嚟飛去。

係呀，我仲係好old school 咁掃地然後先開吸塵機吸晒佢。。。

話時話，有無人用過吸塵機係唔嘈架？

我唔鍾意用吸塵機就係佢地全。部。都。好。嘈。

係一撻着就算飛虎隊撞門入嚟都聽唔到。

而且，最主要係，我係長髮的，

所有我試過的吸塵機，因為都係 roll up 滾桶頭，全部都比我的頭髮扎實咗

所以我用吸塵機，從來都只係掃完地就用嗰支長管，直接吸走晒的垃圾。

究竟其他家庭主婦有無呢個問題架？

唔通淨係得我有呢個問題？

我睇好多吸塵機廣告，揾好多主婦去真身試用的吸塵機，

佢地淨係 focus 係唔洗移動的傢俬就吸到下面的塵，

或者係可以吸地氈同木地板。

但係對我嚟講，

一個吸到長頭髮，而唔洗我成日反轉個吸頭，去剪斷的頭髮嘅吸塵機先係最有用。

Storm Surge Warning 1.0

風暴警告由 5am 掛起，我就因為肥鬼返工，早就起咗身。

聽到出面的風，吹到 "feng feng 聲" 同埋係感覺到個窗係到震。。。

呢到睇到，最高陣風係去到70km/h (43m/h) 

呢張係晨早7:30 的風同雪最勁個陣。

8:30am 今日第一次鏟雪，的雪仲高過佢部鏟雪機

仲要我見到其中一部比較舊，要好大力佢先推得郁，個噴咀都有的問題，

的雪唔能夠噴得遠，變咗只係喺咁依噴係隔離，佢一行過就有一半跌番落嚟咁樣。。。

因為温度唔係咁凍，出面個海係半溶狀態。。

係度做落雪記錄。7:30 半把間尺咁高

10:30am 就已經同間尺咁上下了。

之後就無理個風暴喇。

點解？

因為有人 5am 返工，9am 就開門返嚟喇！！！

哈哈哈哈

好似做番學生咁呀。

原來成個機場的機都取消晒呀。

肥鬼希望聽日都有"打風假"

我就覺得做人唔好咁貪心。。。

We'll see. 

Storm surge warning

今早起身就聽到出面的風吹到胡胡聲。
是天文台講的雪暴要來了。

這個Storm Surge Warning 剛在一小時前(5am) 掛起，約會維持15小時。

肥鬼叫我今日唔好出去行喇，要就跑跑步機，但跑步機真係好悶，心諗晏的睇吓點先算，但都上網check 埋其他天氣詳情，發現原來今次預計會落 70cm (27吋 / 兩呎多)  的雪，風速現在係 32km/h (19 m/h)  但陣風速度去到 47km/h (29m/h)

唔怪之得我不停聽到的雪打落個窗嗰度嘅聲音。。。好似撇雨咁樣

成15 個鐘，咁攪法，唔通今日真係會全城休息？？？

肥鬼仲話佢有諗過必要時，佢係機場隔離酒店住一晚。。。

希望無咁誇張吧

呢張係7am

反潮流

人人都追韓劇。我曾經都追過一排。

好快就發覺其實都幾千篇一律。

都係愛情啦，富家女+窮小子(或相反) ，相愛太遲 (絕症類) 。

耐唔使係有的特別嘅，而我自己係鍾意攪笑愛情類就更少，所以很快便斷癮了。

然後係上次返香港，半夜睇到重播<孖仔孖心肝>，睇得幾集就返嚟喇，睇到到喉唔到肺，

返嚟之後好彩有朋友forward 個網站比我，可以睇番晒成套劇。

之後就上癮了。

好想睇番以前細個睇嘅劇，其實一講就等如自爆年紀。

無耐人總係情有獨鍾，對自己細個睇過的，係感覺唔同的嘅。

就好似，我淨係鍾意黃日華同翁美玲做嘅「射鵰英雄傳」，

仲有劉德華同陳玉蓮嘅「神鵰俠侶」。

啱啱過嚟頭一個月住酒店嗰陣，煲咗套射鵰英雄傳。

之後煲咗套時裝劇北斗雙雄。然後發現都係鍾意笑片，就煲咗蓋世豪俠。

跟住又搬屋，執屋，攪吓攪吓，一月先開始煲神鵰俠侶，

睇完要平息的感情，就睇番他來自江湖。

睇睇吓他來自江湖嘅時候，又有人forward 番天師執位嗰首 主題曲 誰可改變，

又走去揾嚟睇。

係揾番嚟睇，先記得係呢套戲，翁美玲原來係搭檔苗橋偉嘅。

(我完全唔記得男主角係邊個！！) 對於呢套戲嘅印象，就係翁美玲同首歌，

可想而知，主題曲對一套戲係幾咁重要。

套戲主線係講張天師(劉丹) 與邪教魔頭宣慈(石堅) 的鬥法，

張天師打輸咗比宣慈，受了重傷，要走佬。

咁啱係鎮上面，嚟咗個朝廷派嚟嘅人，

管理呢個鎮嘅文官林浩然同武官司徒鎮業，佢兩個貪錢，驚朝廷派呢個人嚟捉佢地，

佢兩個為咗唔想比對方出賣自己，就安排自己個仔'司徒文武'女'林楚燕'結婚。

初時就係司徒文武唔鍾意林楚燕，之後就係林楚燕捨身救佢，

轉頭就司徒文武中劇毒就死，之後林楚燕個靈魂比宣慈捉咗，

然後司徒文武為咗救佢練功走火入魔，又輪到林楚燕去救佢。

套戲入面二線男角就係朝廷派嚟嘅謝忠良(郭鋒)，係劇入面佢鍾意林楚燕鐘意到痴咗線。

二線女角就係冬兒(黃造時)  佢鐘意司徒文武想佢留低，信埋的神棍，錯誤比神棍藥佢食另佢中劇毒。

咁多年之後睇番呢的舊片，先發現1984年嘅呢套戲，

吳啟華，劉青雲，吳鎮宇，陶大宇，吳君如，吳嘉麗，佢地全部都係做路人甲乙丙。

現在對睇電視有要求了，就會發覺以前點解可以只係兩集，

林楚燕(翁美玲)就會由完全唔鍾意司徒文武(苗橋偉), 改變為好鍾意佢，一定要嫁比佢。  

元宵佳節

我呢到嘅昨晚 (2/10 星期五晚) 

就已經係香港時間嘅元宵佳節

食食吓晚飯

明明已經係入黑嘅時份

點解仲係咁光呢？

就係呢個大大大月亮呀

下面呢張

係懶

無走出去露台到影

左邊好清嗰個

係窗的反影

右邊的那個就係相機爆光嘅真月亮

之後對住個咁靚嘅月亮

唔抵得

又走出去影

不過唔係講笑 -10C呀

要著好多好多件衫先可以企定定

唔手震　等相機focus

你見我影兩張就收工了

然後到今早

肥鬼去返工嗰時係-14°C

我諗住等多陣日光出嚟會好的啦

(因為我多數一出太陽就出去行) 

等到成8:30am 都仲係 -12°C

天氣報告預計要到下午三點 先可能升到 -8°C

所以我決定唔好懶

係9:30am 照出 希望仲有日光會感覺温的

出奇地

因為無風

好舒服呀

係凍嘅 

但無的風不停打係你面 真係差。好。遠。

手作

嚟咗呢到之後，都無再返工。
肥鬼就成日問我做乜唔同其他同事太太去聯誼一下。。。

其實我係屋企有九萬幾樣 project 想整。
依家先叫做，終於可以攤晒出嚟慢慢摸。。。

呢個就係我依家做手作嘅戰場。。。

下面係其中一個製成品。
我同好多其他人一樣，好鐘意大溪地珍珠。
好耐之前，一次去旅行，買咗一粒不是完美的，就自己整咗做一個鍊咀。
之後，偶爾係一間網店，見到店主織手繩方法穿粒珠做手鍊，我又手痕想整，料都買咗，就係無時間，今日終於整了。

由一個project,  引申到另一project 。

我係揾番粒珍珠出嚟嗰陣，就一不做二不休，將自己所有飾物都審視一次。

人大了，以前覺得靚嘅，依家唔覺。

以前鍾意嘅，依家唔鍾意。

只有真的珍貴的，才可留低。

無機會用嘅朱以醒，全都拎去goodwill, 等第二個啱用的人攞去。

就咁樣又用多一日都清理。

之後呢，又發現有一的，只要自己攪攪佢改頭換面，變成另一樣自己鐘意嘅。

好似呢條，係一條長頸鍊嗰到 cut 出嚟，的珠就係一條無用手鍊到 cut 出嚟。

突然間，零感到。

失陪一陣。

~ Byb ~

鴨，全部都係鴨

近來每天出嚟行

最令我感興趣的

就係佢地呀

睇住佢地係的冰水到游來游去

好得意嘅同時

我個人係到打冷震

哈哈哈哈

下面呢張

係 sackville river  流去 bedford basin 係一個激流段

但係的鴨個的摩打脚好勁呀

向上游　向下游

仲成日潛入水搵食

好攪笑

另加

一隻孤獨的海鷗

Icy flower 老冰花？

今日又出去行路。

尋日出去行嗰時落緊ice rain,

因為凍，所以無溶，一粒粒咁跌落嚟，

行到半路開始變落雨

但實在係太凍喇

我對脚已經凍到無晒感覺

直至我頂帽同手套都開始濕，先快步返屋企。

Ice rain 變落雨，即刻温度上升，

咁前幾日係地面積落嘅雪就會開始溶

所以今日唔可以一早出去行

因為半夜温度降低

一早出去係成條路都有一層冰係面

要等到成10點，太陽照咗兩個幾鐘

溶咁的冰先行得

呢的係路邊溶得一半的

唔單止係雪花

冰都有花架