嘩，尋晚真係忙到呢。。。
朋友晨早要拎架車去整，我陪佢去做接送，所以要較鬧鐘晨早7點早起。
但係夜晚嗰時係到玩手機玩夜咗，成點先去瞓。
一覺瞓到五點幾，起個身夜尿，跟住就係嗰個幾鐘入面“睇”咗個史詩式大製作嘅長劇。。。。
==============
個劇嘅故事，係話我同一個中學同學去睇演唱會嘅。我近來想起呢個同學，send咗個message 比佢，但未見佢覆，所以見到佢？
喺劇入面，一開始係肥鬼車我去，放低我同friend去睇演唱會，但係肥鬼係車入面係坐右邊喎？我地美國車嘅司機位係左邊，咁即係喺係香港車！肥鬼都無係香港揸過車！？
點解咁記得？因為個場景係右轉駛過去路邊放低我，係右轉時，我坐左邊望出車窗外，個鏡頭一路慢鏡pan過去，我同學已經企定定係路邊等我，佢係著住閃零零銀色連身珠片裙？？（攪乜呀？乜唔係去演唱會咩？去ball咁款！？）
跟住落車啦。唔知點解，個場景話我知呢到係葵芳？不過又唔係葵青劇院喎。
好啦，攪咁耐终於行到嚟lobby喇，個lobby好細嘅，黑漆漆咁，似戲院 lobby 多啲，好多人入場，然後突然間，我係 lobby 正中間擺張枱出嚟喺度擺賣 tee shirt？？？仲要成張枱得4件 tee 係到賣？？？
好多人嚟齋睇唔買，真係劇入面啲都是 cheap 人！跟住有人扮睇 tee shirt 款，埋嚟偷咗我個手袋？？跟住我開始手忙腳亂，嗰個人偷咗我個銀包同電話，我唔係趕緊走去報警，而係喺度諗“無咗電話，點樣通知肥鬼嚟接我？”？吓？吓？吓？
跟住我地係演唱會場館入面周圍行，上樓梯，落樓梯，周圍去揾電話，個意識係喺度揾 pay phone??? 呢個世界仲有入錢電話？？
又真係比我揾到，仲要我又有散銀，係到㩒電話號碼（係呀！係一粒粒正方形的數字按紐）真係估你唔到，我係到㩒8個字的香港電話號碼，仲電我以前個男朋友嘅手提電話號碼 91982151！！！
但係我明明係打緊比肥鬼嚟接我喎！真係8點檔的劇都寫唔出咁嘅劇本！！
最怪的劇情來了。
之後散場，走咗出嚟，人潮湧湧，走緊去一個地鐵站，馬路上迎面而來一架大旅遊巴，車身上貼有宣傳海報，係四大天王個頭，放大到成個窗咁大🤪🤪淨係見到其中一邊的車身，所以淨係得黎x，張x友，同郭x城，所以我係夢境入面仲同個friend講 “咦？無你鍾意嗰個劉xx喎？”
怪的情節係佢地四個個樣，係正常的七老八十咁嘅老人樣子，即係白頭髮好多鄒紋嗰啲老人樣，唔係依家嗰的打針樣。
最後係人潮中，我個鬧鐘就响喇。
劇終。
嘩，發個咁嘅夢真係好似成晚無瞓過咁🫠
有無識解夢的人可以研究吓。。。
