月黑風高

點解？？？
臨別倒數的日子了，仲要整個午夜演唱？？？

已經唔係第一次架喇，好奇怪，呢到係每逢星期四就有演唱會，因為對面酒店頂樓有個露天 bar...

但係呢到圍住全部係服務式住宅，唔洗瞓嘅咩？

就算係酒店定期 function 10點就好收檔喇？？
佢係唱到11點呀。。。

大解放

嚟咗呢到幾個月，週圍都見到呢個甜點嘅舖頭。
講真，係好吸引人嘅，真係好靚！！！

不過自從我知道咗糖 同 醣 係人類毒藥之後，就謝絕了所有呢的食物。

肥鬼梗係做唔到啦！不過唔代表佢無努力。

佢好叻叻呀，真係咁多個月嚟次次行過都忍到，見有人難得一年一度大日子，就大解放，買幾個比佢同同事分食啦。。。哈哈哈
即係擺明有毒藥就一齊食囉，哈哈！

伴奏

呢兩星期， Mr Leo 都部我嚟練琴，日日兩個鐘，因為快要返歸，已經約好老師返去第二星期就回復正常的一星期兩課，所以要努力追番過去幾個禮拜掛住週圍玩嘅日子。

好低能嘅我，唔知道可以同職員講想book 同一間房，之前次次嚟都日日唔同房 (即係日日都要練唔同嘅琴，有的好明顯無 tune 好耐咁，我咁新手都聽得出有一兩個琴鍵的音怪怪的)  後嚟先知可以盡量book 同一間房吖，咁就可以一入去就跟尋日咁樣繼續練。。。

我諗返去之後，真係會好懷念呢個琴，我有成三個禮拜，日日係到坐兩個鐘架，真係彈出感情來了！

真嘅琴同電子琴鍵係好大分別架，剛剛先叫做學識大細聲，輕手，彈跳音，又要返去彈無乜分別嘅電子琴鍵，不過，曾經有呢個經驗都係好嘅，如果自己真係有恆心學，可能比自己去到5級嘅話就買個真琴鍵嘅琴喇！！

永遠都係咁架，去到最後，時間倒數開始，又會有不捨嘅感覺。由酒店行出嚟練琴呢到，係琴室外望嘅呢個風景，由我未嚟之前係 "菇高 map" 嗰到睇到嘅一模一樣，到真人嚟到日日睇住，好似只係昨日的事，想不到其實快要離開了。

未必會再嚟 lu... 世界咁大，仲有好多地方想去呀，而且，四個月時間比咗好珍貴嘅機會比我地倆個深深咁體會吓歐洲生活其實係點嘅，真係可以話係好夠了。

能夠帶住咁多回憶返屋企，非常心滿意足！！

All good things (must) come to an end

簡單釋就係 "天下無不散之筵席"

進入倒數的日子，混亂的心情開始浮現了。
雖然每日去上班的那個不是我 (我係嚟旅行架！)
但係差不多日日一齊食飯，放假一齊去玩，就算係屋企，只要裝個頭出窗向樓上哎 "喂！落去食飯喇" 樓上那位就會申個頭出嚟應機；
朝早有人唔知醒就會去拍門；
有人唔記得買午餐，就帶個兜上樓上煮野食好叻嗰個屋企到裝。
好似去返學堂嘅日子。

最初嚟嗰時，係帶住好多興奮咁嚟嘅，(貪心的) 以為可以乘機去歐遊，點知一嚟到就係無窮無盡嘅OT 心情直落谷底。

好不容易捱到一半，晴天霹靂，話要延長多幾個月 (最後講價一個月，不過其中一個會做晒六個月)  中間大家各自有屋企人嚟旅行，無見一輪，真係會掛住大家，的屋企人走晒之後我地嘅飯局就如常運作。

絕對唔懷念呢到嘅工作，但係呢個機會，肥鬼識到3個好夾嘅同事，真！堅夾！係處事作風，勤力程度，做事速度，全部夾到好似做咗幾十年嘅同事咁。

仲要係4個月嘅朝見口晚見面，大家都可以晚晚食飯唔覺悶，有好多話題，傾極都有。

呢個先係今次嘅真正收獲！

落錯單。

係外國咁多年，好少去中餐館。
如果你係住係呢邊嘅人你就會知，佢地全部都不思進取，由門面裝修到食物水準到服務質素，全部都只係停留係 五六十年代嘅 chinese takeaway 咁樣，所以，基本上我係沒有期望的了，只係留番返香港時先會食"真"中菜。。。

係 Dublin 呢到，我成日去練琴時就會行經一間中餐廳。行過咗好多好多次架喇，因為無期望，所以次次都掂行掂過，然後前幾日行過，見到門口大大隻繁體字，寫住白切雞同燒鵝！！！

即刻兩眼發光停低望清楚，餐牌上面好多餸菜嘅相都係好鬼"香港"之餘，仲要全個餐牌係正宗繁體字，仲要的餸菜名都係非常香港嘅。

今日即刻捉咗肥鬼嚟試吓。

肥鬼睇住個點心餐牌係咁篤，跟住即刻上枱嘅叉燒酥，相都未影就比佢掃咗貨了，好在我手快，都食到一舊。果然一試便知龍與鳳，非常好味。

跟住就係我叫嘅椒絲腐乳通菜

係加拿大，菜心同白菜仔都開始容易揾到，

係通菜 / 豆苗仲係少見，所以如果我去得"真"中餐

有的話都會食呢個菜。

肥鬼前面嗰碟係炒麵。

肥鬼每次去中餐館，都叫炒麵或炒飯，

依家佢跟我食過的堅好味嘅地道香港菜，

普通嘅炒飯炒麵昆佢唔到架，

佢話呢碟炒麵係堅野，

所以叫多一個炒麵打包做聽日午餐。

實在好耐無食過燒味，叫一個三拼。

燒肉，燒鵝，叉燒

勁好味。

小籠包

好味，的汁鎖晒係入面，正！

肥鬼唔識食，篤穿咗佢，的汁流晒出嚟。

鍋貼

蝦餃，非常好味，只欠了辣椒油。

同肥鬼前面嘅馬拉糕

其實一入嚟嗰陣，有個女侍應即刻上前來招呼，佢很條件反應的同我講普通話，但係後嚟落單時又轉咗台同我講廣東話，好奇之下問吓佢，原來係馬來西亞來學英文嘅女仔。

食食吓，聽到老闆娘問個員工有無落錯單呀，因為佢地講廣東話，所以我又樹起耳仔聽佢地講乜啦，跟住聽到老闆娘話"佢地得兩個人點食得咁多野呀？" 哈哈哈哈，好明顯講緊我地。

點知肥鬼跟住仲要再叫侍應生，佢好肯定話佢叫咗流沙包未嚟，其實我已經好飽了，問佢係咪記錯呀？佢好肯定咁話"我第一樣就係叫流沙包架，我全餐都係到等呢個包嚟呀！"...

唔洗問，最後嚟到唔夠幾秒就清枱了。

同侍應傾咗一陣，個大廚係香港請過嚟架！！！

大滿足！

尾聲

今日第一位同事返歸了。

下一批就到我地喇。

有一個挺長了兩個月，肥鬼就宜得即刻走！

因為人人都要返工，

就交由我晨早起來同佢去機場。

兩個人 4 件大行李，行去搭巴士，轉頭就到。

同佢傾偈講開，

發覺好像就是前幾日才到埗似的。

誰不知一貶眼就4個月了。

左鄰右里一齊住，一齊返工，一齊晚飯，

一齊旅行，好在係非常夾得來的人，

肥鬼有緣遇到三個可以做好朋友的同事，

真係萬幸。

隔離酒店

嚟咗咁耐先第一次去幫襯格仔酒店地面個餐廳。

佢地頂樓有間天台露台 bar & 餐廳，但係 book 位都要幾個月後先有囉。。。佢一嚟唔係近海 (無海景) 二嚟的海鷗多到係你旁邊飛嚟飛去大叫 或 企係你旁邊睇你食，所以我地都無想過去。

仲有就係我地其中一個同事都係住頂樓，我地上去 party 見到對面就係呢間 bar 呀，仲洗乜去。

我今晚 order 咗 海鮮湯，牛扒配炒菜。

海鮮湯非常 creamy 也非常真材實料，

牛扒乾了一點 (可能是等炸魚而係熱燈位擺耐咗)

Peppercorn sauce (胡椒汁)

係香港最記得以前去花園餐廳鋸扒，

配黑椒汁/蘑菇汁/洋蔥汁，

呢到呢，就係胡椒汁 同 蒜頭牛油汁，

食過好多間餐廳，呢到嘅蒜頭牛油汁超好味，可惜呢間淨係得胡椒汁，係真材實料的胡椒汁，

即係勁重口味，所以唔係好啱我。

呢到係用 peppercorn (中文都係叫 胡椒) 

但係總之就係同胡椒粉係唔同味嘅，

同胡椒豬肚湯都係唔同味嘅 

(我飲胡椒豬肚湯係可以飲好重味的)  

但係用真的原粒 peppercorn 就硬係怪怪的。

肥鬼嘅炸魚薯條同佢杯士多啤梨薄荷茶，

我飲咗啖，真係幾好味。。。

因為同事返歸，佢地連續五晚，晚晚去食飯飲野，

今晚飲番的正常嘅。。。哈哈哈

另：今早(8月17日) 起身返工覺得怪怪的，好想叩門叫佢喂！起身返工喇。。。哈哈哈。

"不是"夜歸人

題目是來自許美靜的 "都是夜歸人" 唱歌很好聽的歌手，據傳是同唱片公司不合，好快就消失了。

發現自己有成10年無出過夜街(??!!)
果然真係完全變咗老人家的生活。
部份原因係工作生活作息的改變，另一個原因係自己揸車的問題。

即係個人問題，總之我揸車就係好蛇呱 (quare) 咁嘅，揸好多次揸熟一條路之後就費事諗永遠都揸嗰條路，仲有明明日光日白就認得路到咗夜晚又唔認得，哈哈，所以費事害人真係無夜晚出去 wet 好耐 lu...

不過依家係 Dublin 呢到，又比番我住香港嘅城市生活味道。可以搭巴士打的，就算行路都大街大巷好多人嘅。

今晚去咗聽一場音樂會，7:30pm 開始 9:30收工。先前以為入夜了可能要打的返屋企，點知出嚟天都未黑齊。

加上 Dublin 有千幾間 bar 密度係三幾步又有一間，而去 bar 飲野嘅人 9:30pm 都只係啱啱開波嘅時段，可以講話全程行返屋企都仲週街都係人。

今晚個音樂會，係 愛爾蘭國家管弦樂團 同 三名很出名的愛爾蘭傳統音樂家的 crossover 很攪笑的用了三人姓氏的英文字母 "KGB" 作音樂會名稱。

幾位表演嘉賓同管弦樂團入面有的樂手都係老人家，但就睇佢地咁多年嘅經驗，同嗰樂器好似"打通"咗咁樣去演奏，真係出神入化。

進入演奏廳嘅第一個感覺係 "其實英國政府對香港真係好好，起咗個同其他國家有得揮嘅演奏廳"。 因為我係尖沙咀文化中心表演過，更加有感情，覺得同呢個愛爾蘭國家音樂廳真係有得揮。

愛爾蘭國家音樂廳 National Concert Hall (NCH) 位處市中心 St Steven Green 聖史提芬公園旁邊，係 1865 年起的，本來係國際美術與製造展覽廳，係1908年轉為都柏林大學主樓，後嚟係1960年代大學開始搬去另一地方，最後係1981年重新開幕成為國家音樂廳。

所有將舊有建築物番新循環再用嘅好處，當然係保留咗建築物外面的原貌，但唯一的限制就係不能隨意變大縮小，所以呢個"國家"音樂廳個主廳只能坐1200人 (文化中心 2019 座位 中環的香港大會堂都有 1434 座位)

所以就比咗我一個錯誤嘅感覺：外面睇好宏偉，入到去就好細。而且個台好細，今晚坐咗兩行的小提琴，加後面兩個低音大提琴加個鼓係後面就已經企滿2/3嗰台，右邊就係比4個表嘉賓同座鋼琴。

不過，音樂廳宏偉不宏偉其實唔應該係重點。

今晚呢個音樂會，雖然嗰廳唔係好多位，但係都好滿，而且見到係有老人家，有一家大細，有職業人士，全部都打扮得好齊整咁樣嚟聽音樂會。可見呢到一般人嘅藝術文化程度都好高。

總好過你有個偉大嘅音樂廳但成日都吉場。或者政府根本無意培育文化修養。。。

坐係我地後面嘅，係一行的弱能人士 (一個好舊嘅名稱) 我唔鐘意依家越整越多所謂"無歧視"的名稱，越叫越煩，其實根本好多人都無歧視，也只不過係一個稱謂。

同鄰坐太太同佢地傾偈，應該係佢地嘅復康中心定期有免費飛/特價飛，佢地係要搭成2個鐘巴士嚟市中心聽呢個音樂會，然後返到屋企都半夜咁樣，但係佢地個個都執到正咁嚟嘅，能夠簡單的對答，係慢少少同思想簡單，不能傾複雜嘅題目，我想咁樣先係真正的共容。

同鄰坐的太太傾偈，佢話佢同先生成日嚟聽音樂會，圖入面呢位滿頭白髮嘅管樂手老先生，佢聽咗佢表演40年喇！！！

包場

如果見到有鬼影唔好話我知呀！哈哈哈。

我真係好耐都無入過戲院囉，肯定，最少有5年。

發現咗附近呢間行路20分鐘就到嘅戲院，

加上今日有姐姐嚟打掃，

就先出來了。

去睇個10點場，

一個人都無。

其實話有熱浪，最好就係係戲院浪費光陰呀！

仲要原來聽日星期三係 €6 渣。。。

聽日再去過！！

肥鬼話我嘥錢，因為我淨係鐘意睇卡通片，哈哈！

尼泊爾 kathmandu 菜式

肥鬼叫的拼盆

肥鬼同我一向都好鐘意食中東菜 / 地中海菜式，用很多香料醃嘅肉，配飯或包或沙律，很簡單，不過就係好好味。 不能不配服中東 / 印度用香料真係出神入化。

嚟呢到見到有尼泊爾 加德滿都餐館，一定要試吓。今日同休息的同事一齊嚟食。同事係多明尼加共和國人，很攪笑的人，以前讀 fine art 揸畫筆，中途轉咗去讀醫兩年，又覺得無興趣，最後做咗肥鬼同事，有緣一齊嚟出差。
因為係加勒比海的島國人，同南美的飲食差不多，乜都食嘅，唔會好似其他美國同事去到邊都係叫雞肉沙律(!!)

呢個係我嘅芝士naan bread (印度酥餅)

好耐無食過麵包，但係點咗咖喱無包點得架！

(太興奮了，手震！) 

我嘅雜豆湯

點解可以淨係豆都煮得咁好味！

其實呢到尼泊爾餐館有好幾間，之前試過大街嗰間，無後街呢間咁好味 (不過有可能係我地唔識野，亂叫一餐，今次order 番的正統野，勁好味)

P.S. 今日8月7號行過，成間舖吉咗，大裝修咁樣！

一年一度食餐勁

如果唔係有出差津貼，我諗都係喺屋企煮就算，見有津貼，就出去食餐貴野。

呢間野講到明係食海鮮的 fine dining , 話時話，我醒起好似係人生第一之嚟食 fine dining...

有乜特別又唔係，不過呢，幾位侍應生都係上了年紀的對食物介紹很有認識，打晒 bow 呔 白手襪 右手會有tea towel 每道菜都換熱碟咁樣囉，最後埋單當然就係價錢非常配合服務水準喇(!!)

生蠔 真係比較細 (係屋企附近嗰間大隻番的)

開蠔的同事手勢唔係好得，已經細隻仲分屍咗

不過中間個汁，就係我地點蟹嘅汁，紅醋+洋蔥

蟹鉗

嗰汁勁好味

就好似我地去飲嗰個鮑汁依麵嗰汁

肥鬼唔好魚的，但係嚟到海鮮 fine din8ng 都唔食就玩野，叫咗 Halibut 比目魚， 同 cod 銀雪魚好似， 煎得剛剛好。

我的龍蝦半隻，幾隻蝦仔同一塊龍利 dover sole

侍應推咗嗰甜品車，叫咗兩個甜品，叫做試食過就帶番屋企比肥鬼聽日食。。。

號外 2

今日肥鬼終於休息，落街整個早餐。

Egg benedict

French toast

因為早餐食完都中午12點 就叫埋嗰甜品啦

Rum panna cotta 好好味呀！

咦，同場加映，晨早又試一街都係人。。。

問吓侍應生。。。

啊！今日嚟嘅係利物浦呀！！

果然真係要睇足球就要去歐洲呀。。。

號外

落樓下晚飯，見到咁樣樣。。。

唔知攪乜鬼

問吓同事

啊！車路士對阿先奴呀！今晚呀！就係呢到隔離個場呀！

啱啱聽到一陣嘅 ve ve wa wa 之後就警車聲跟住走晒lu...

我唔係球咪，肥鬼更加唔係呢隻球咪。。。嘥氣！

清晨

2018/8/1 4:30am (街左邊) 

朝早起身，窗外景色因季節轉變越嚟越黑。

我在想，回家之後最懷念的，

會是房入面那個月亮景？

還是廳這邊的街景。

看著這個平常的街景，很奇怪，

我有久違了的很熟識的感覺。

街景(右) 

(相入面的鬼影係有人騎單車飛快衝過) 

細個時，住係葵涌新區。

就係荃灣同葵興中間的一個小山上面的屋邨。

係網上很多的群組都有很多舊屋邨相的分享。

(網上群組相片。就係嗰的舊街坊的回憶群組，

係屋企床下底掘番的舊相 post 出嚟分享嘅)

上面呢張相等別在於，佢影到我屋企呀！

的人睇番的車嘅款式，

推算呢張相係60年代或70年代的。

嗰時我地就係住係右邊第二行，

上面數落嚟第二間。

八層高嘅廉租屋，我地住七樓，

無 lift 搭，日日行上行落。

左面白色嗰間就係我讀嘅中學。

係右邊寫住 10 / 11 (座數) 嗰到，

係呢兩座嘅中間樓梯，

係左邊嘅走廊尾就係共用的厠所同巷尾樓梯。

嗰時我成日爛瞓，唔到最後一秒都唔起身返學，

一彈起身就直奔走廊尾，衝落七層樓梯，

過條馬路，就返到學校喇！

呢張影到萬方紅茶樓，

就係正我屋企樓下，

呢到就係 10 / 11 座嘅中間樓梯口。

每日午飯時間，都係呢個景象，

泊滿了的士，因為的司機全都幫襯茶樓午飯。

細個時，就係呢條街圍住我屋企嘅，

同依家呢到一樣，

所以車聲實在唔會影響我瞓覺。

阿爸以前揸小巴嘅，早更，要3am 起身開工，

我地邊有咁早起身，

係到咗中五要會考，讀書讀通頂，

感覺個天開始光，

然後你以為聽到雀仔叫？

咁就錯喇。

(呢張嚟自 公共屋邨圖表集 

好多謝呢位人兄，因為佢影屋邨嘅興趣，

係98年佢嚟到我住呢到，

影低呢張對我嚟講好珍貴的相。

佢嘅興趣亦都發展到出埋書，好勁)

因為樓下有茶樓，清晨時份，

就會開始聽到阿姐係到開枱，拉枱，安排碗碟，

冰令唪唥咁樣嗰的聲，然後就有厨房佬對話，

講話今日要煮的乜野嘢，然後就開始聞到香味。

呢個就係我對細個住嘅地方五官記憶。

搬咗去美加之後，就脫離咗城市屋邨生活，

現在又可以回味一吓。

最懷念的，係因為肥鬼幾個一齊過嚟公幹嘅同事，

都一齊住係呢一座樓，做咗樓上樓下鄰居。

有日我係窗口等肥鬼返，

突然上面有人講 "你係到監視佢呀？" 轉頭一望，就係樓上的同事今日休息係屋企，得閒無事望街，哈哈哈哈。

佢地一齊咁上下時間返工放工，

有時會就咁係窗口大叫，問係咪一齊食飯呀，

定係去邊到食呀咁樣。

我想起細個，阿媽申個頭出去晾衫，晾咗好鬼耐，原來隔離嗰師奶又晾衫，

佢兩個就咁係窗口打牙骹。。。

呢的可能就係屋邨情懷，

係住獨立屋的外國人唔會明嘅。