真事 20260522

 

我嚟美國嗰年，出咗一套蝙蝠俠 The Dark Knight，肥鬼同我同肥鬼媽三個人一齊去戲院睇。

肥鬼坐中間，我同肥鬼媽一左一右。

我初嚟報到，聽唔晒啲對話，又無字幕，所以不停問肥鬼佢講乜嘢？？

肥鬼媽老眼昏花+尊注力薄弱，不停問佢係到做乜，頭先發生乜事？？

。

。

。

。

。

。

。

嗰日之後肥鬼，沒有再同我地去睇戲。

完。

打大風 20260522

18號星期一返早，放工之後返到屋企即刻橫風橫兩一整下午。

到19號星期二，同肥鬼媽食lunch之後，急急腳上車各自歸家，因為係停車場已經見到好大一舊黑雲，來勢凶凶的吹緊過嚟。

當晚收到公園的緊急訊息，整個公園星期三關閉，所有當值取消，進行清理工作。

以為好快攪掂啦？因為係效野公園冧樹係森林入面無乜野要做。

呢的連根拔起的，很多都是過廿年的大樹😭😭😭

今日同的園林同時傾開，佢話連根拔起的樹約50棵，然後其他中間劈開／斷支／冧落路徑的大大小小約170棵🙄🙄🙄🙄

所以攪咗整整兩日（公園星期三星期四關閉）到了星期五都只可以開放哥爾乎球場的前9洞，後面 9洞仲要攪多兩日。

最大問題係今個周末係“記念日”周末，係正式春夏天來臨的第一個大節日。我見佢地好多都只係可以，將冧樹先拖埋一邊，開番的主要路，或者係清理咗的球道（fairway)先，然後今日仲有好多重型工具車，係的打golf嘅人旁邊出出入入，將的切開咗仍然好大舊既樹幹搬走。

住 20260518

係美國呢邊，房屋係有好多種類的。

未嚟之前，見識少，無出去見過世面，淨係識香港的高樓大廈，第一次嚟旅行之後，就認識了最基本的獨立屋，佢地英文叫做single-family home。

之後曾經一度，對睇樓好有興趣，就成日去啲賣屋網站睇樓，又比我發現咗啲嘢。

你睇吓！萬五蚊就買到間屋！點解我地仲租屋住？？

呢的屋，肥鬼以前有個朋友都住過，我地都去過佢屋企食晚飯玩啤派，佢嗰間屋嗰時住一家五口，三房兩厠有廳有厨房，好似都同一間獨立屋無乜分別。

嗰時我同肥鬼住嗰間‘真’獨立屋，因為金融海嘯而變咗蟹貨，我都會諗點解我地唔買呢款嘅？嗰時樓價低啲，一架車嘅價錢（萬幾/幾萬）就已經可以買到一間呢的屋。我地‘真’嗰間屋由十幾萬跌到八萬幾，又賣唔出，又要每月供嗰‘蒸發’咗嘅十幾萬，都苦惱咗好一段日子。

咁呢的其實係乜野屋呢？

呢的係叫 Trailer home 貨櫃車屋，有分 single 同 double-wide，即係一個櫃咁闊同兩個櫃泊埋一齊咁闊。

裹面可以講話同普通屋無乜分別，間隔就係一般屋咁樣，兩房一厠+廳廚 或 三房兩廁+廳廚，如果你鍾意四四方方嘅樓，咁呢啲一定好過香港的鑽石形樓，呢的好明顯清一色長方型，入門就係廳+廚房，睡房就擺晒另一邊。

好喇，咁呢啲咁平嘅屋同真嗰啲究竟有乜分别呢？

呢啲 trailer home 貨櫃車屋，你俾嗰個入門價錢，係真係只係買個貨櫃屋only，就算你現金full paid間屋，你係要每月交租（lot rent) 俾 trailer park 園區的地主，即係你每個月要交租，去‘泊’你呢個貨櫃係度。當然水電冷暖氣都要自己負責。

呢的租金$600-$800不等，有的園區好啲（貴的），會有健身室同泳池，但更多的係只提供非常一般的維修（什至無維修！）

===============

幾年前，我記得睇過新聞，唔記得邊個州，有個園區地主決定賣地比發展商不再經營，然後一大堆‘苦主’就出嚟話流離失所，無人道，要求賠償。

實情係呢的園區白紙黑字寫明，你只係租嗰泊位，一年簽約一次，你不是永久的擁有塊地，人地也没有義務為你去永久經營，只不過係你一厢情願以為可以住過世。

============

係上面的圖，你可以見到呢的園區，密度勁高。

呢個先係肥鬼從來無考慮住呢種屋嘅原因。

我嚟咗咁耐，睇過上百次真實罪案片，呢的trailer park很多時就係罪惡温床，三教九流之地，隨時隔離屋就係毒品交易中心；仲有一個指標，就係trailer park集中嘅地區，一定好近有一間walmxxt（相反嘅就係中產地區／治安好啲嘅區份，係會面高級的嘅trader xxx / kroxxx / meixxx 等等超市）。

噴 20260508

 一早起身，噴到一横橫，攪到今年5月中仲係凍到死。

好天 20260506

 呢位朋友不停係到喙的玻璃🤣🤣🤣

世道 20260504

Well 咁啱係今日

================

冬天無聊的時候（落大雪好少出街），看很多無聊片。

曾經其中一類係韓國的食嘢片［吃播］，相信大家都知我講緊乜東東。

係我印象中，這個潮流的開始，喺嚟自2013年的韓劇［一起吃飯吧！］嗰時我都有追過呢套韓劇，劇情係講三個獨居的人，雖然住係同一座大廈，但互不相識。

其中一個獨居的李水京小姐，因為現代左鄰右里的隔莫，加上韓國餐廳不多歡迎獨自一人的食客，所以佢成日係屋企‘’睇電視送飯‘’。

睇嘅咁啱就係成個食家咁款嘅大英對食物的介紹，大英的正職係保險經紀，而且都係住係呢座大廈，後來仲成為朋友。

片中好多好多片段，就係大英同朋友食飯時，佢會對食物有非常詳盡的介紹，然後就係不停近鏡 + 大特寫佢地進食的過程，各人食得津津有味的樣子。

============

不知是諷刺，還是寫實，網絡世界興起了，與之同來的是人與人之間的關係疏離了，更多了隔莫。的人寧願宅係家中，睇住片中人，當係大家一齊食飯，都唔會出去同真人搭枱食飯。

久而久之，就係呢類吃播片的興起。

的人預備了很多食物，撻着個錄影機，就咁係鏡頭前面開始食嘢。有的係會講嘢嘅，介紹吓的食物，品評一吓的味道；有的係默劇咁樣全程唔講嘢嘅；有的將食物的製作過程也包含在吃播片中，慢慢的，錄播演變成直播（播出時可以與觀眾對話，呢個其實可以叫做線上一齊食飯）繼而再演變出現時很多的大胃王吃播。

佢地嘅特式就係‘好擦得’，唔一定要快亦唔洗限時食完，就咁慢慢食，但總之就係食好多好多嘢，食飯食麵幾十碗起跳，食肉食海鮮以十幾公斤計，食壽司過百碟，飲品幾十杯。

＞＞＞＞＞＞＞＞＞＞＞＞

睇完一輪吃播片之後，令我想起千與千尋其中一個隱喻，大概係講人類被‘食慾’完全侵佔了腦袋，就是行屍走肉一般的在食食食。

不要誤會，我絕對配服吃播主持，他們驚人的胃消化能力，絕對係能人所不能🙄 驚人的天賦，他們能賺到嘅錢絕對係應得嘅。

我只是覺得，不停的這樣鯨吞咁多食物，我就當你頭一個鐘都喺到好好品賞啲食物，但係日復一日的重复又重复，就算你每次都好似食家咁樣係度形容的食物係點樣點樣好味，但最終，都只係將的食物倒晒入口再灌飲料沖晒入肚，我不禁在想，“究竟前世做了幾多次餓鬼，先導致今世有呢個能力？”

如果你都相信身心靈的邏輯（精神心靈問題會係肉身浮現出嚟），你會唔會好似我咁猜想，佢地心靈究竟有幾空虛？要日日咁樣填滿嗰gut 🥲🥲

================

呢的主播同美國痴肥的人係有啲分别嘅。

美國呢邊的人，係比食品工業+醫療集團害到佢地痴肥，食好多好多糖/醣+精製加工食物，頭痛醫頭治標不治本的醫療（止痛藥胰島素）摧毀晒佢地啲內臟功能，同埋攪到佢地食物上隱，不能自控的不停地食嘢。

痴肥的人同吃播主持的分別就在於自控能力，可是我覺得佢地靈性層面的問題都是一樣，就是入面的空虚，食極都唔覺飽🙄🙄 內心有個好大嘅窿填不滿。

無語 20260501

寫在五月一日，佛誕。

我也不是什麼虔誠的佛教徒，只是近年發現自己愛上了‘禁語’。

沒有去到禪修冥想的程度，只係咁啱，依家係做花王工作，打理花草樹木，無需要同人類對話（不過個腦不停係度同棵樹傾偈🤣🤣）。如果咁啱撞上嗰日肥鬼要返工，我返工佢未起身，我返嚟佢未放工，都試過一整日無講過嘢。

久而久之，你會發現好多說話是無必要的。

所以係網上寫嘅嘢都越嚟越少

（大部份原因梗係懶喇🤣）

真係想記錄特別事情、想法、感受，我反而會用真的紙筆墨硯去寫低。

係網上發表的東西，曾經一度係想叫醒其他人，但想深一層，佢都唔想醒，你講再多都係暰氣。

又曾經一度以為自己係到幫手傳揚真相（好天真！）咪講笑喇，自己認為係真相，人地話你發噏瘋（更多話你陰謀論）。

久而久之，就係打完一輪，儲存咗，過一排就覺得講多無謂，慳番啖氣暖肚算啦。去到後期，發現自己post 的，很多只是 rant (發牢騷）咁更加無必要講喇！

最尾，現在發生的大事，香港的，全世界的，第一感覺係無語，想深一層，都係無語，就是轉載「疣痔吸㷫」貼文，都可以判案情非常嚴座即時監禁兩個月，咁仲可以講的乜呢？仲可以比咩嘢反應呢？真係好似尋秦記咁樣，眨吓眼就返咗去以言入罪嘅年代！

人一世，叫醒人不是我的責任，我沒有妙筆生花的寫作能力，也沒有唐伯虎的辯論技巧，活好我自己的生活就是我的責任，我還是focus番做好呢份工算吧喇。。。

======

肥鬼家裏有熱愛美共民煮党要的親戚，以往每次見面都會‘教化’我們一大輪，最近一次見面，語氣開始有的改變嘅跡象，什至“真心”的問 “究竟你地睇的乜野渠道嘅news/info？” 我都差啲啲落踏，想答佢可以睇邊啲website/podcast，不過好在時運高（反應慢）因為諗深一層，依家全個internet都係資訊，你真係有心想知非主流新聞資訊，要揾一定揾到，唔使問我！

你問我睇緊的乜？即係你仲係睇緊主流的大公文匯而沒有一點點的疑心。你有疑心，就會自己去揾資料喇。依家嘅internet，嗰啲algorithm勁到你打一隻字都會掉海量資料比你。你係要睇党的宣傳機器而沒有一絲疑心，全部照單全收，咁就算我forward的資訊比你，你都係唔會信。