缺德的表表者 (2007 09 28)

今天晚上，在6-8pm給魔鬼教練的一輪地獄式羽毛球訓練下，我帶著斷了的雙腳及廢了的下肢，去會合"狄凡妮"與"吹時"兩位太太，一同共襄善舉???

什麼善舉??? 就是"芒果小姐"將會在國慶日結婚了(吖!!!!就剩下我了!!!)!!! 當日除了香港750萬的人口，會在慶祝國慶日同時，順便慶祝埋"芒果小姐+阿歪仁"的大好日子外，我地幾個["金"苦與共]的姊妹(s)，梗係要為新郎哥"阿歪仁"，諗啲大方得體時我地又可以"掠"利是嘅遊戲啦!!!!!務求令到"芒果小姐+阿歪仁"都會有畢生難忘的一日...


就在我帶著一慷熱血，在回家的地鐵裏，因經不起斷了的雙腳的苦苦哀求
，在旺角站有好多人下車時便坐下來了（兩旁都是"吉"位），然後立刻打開我的精神食糧兼投入那花花世界去了，可惜，誰知惡夢現在才開始呢？！？！？！


話說，在我坐下不久，在下一站埋站時，一名婦人便以迅雷不及掩耳的腳法先衝到我右邊的坐位．．．複又轉身彈起到我左邊的坐位，其實在晚上十一二時出現搶位情況實無可口非，因大多數可能是剛下班的飲食業員工，辛苦的站了一整天然後想找個位置休息休息到返家也不是問題，奇就奇在這女士一路都是提著手機但又唔出聲，當我正覺好奇時，這女士便高八度的開始說話了，她的聲量就像是在喉嚨裏內置了surround sound立體聲揚聲喇叭一樣，而且她一開口就是駡人，主旨是電話裏頭的人，一共八次沒有接她的電話，一共八次，我想她實在是燥熱得很，因為好她一共重複了那句不下８０次．．．在她用嘹亮的聲量駡人的同時我也猜到了一點點端倪，實情是她遲了下班，害怕家人白等，便欲先通知家人可遲點出門．．．

就在我以為事情告一段落之際，原來在我不為意時，已有人坐在我右邊的吉位了，正當我再次打開精精神食糧的時候，"碧力啪啦"的聲音就在我右邊始起彼落，不望由自可，一望之下，驚見這女士（又係女士）正用一把兩吋長的指甲剪在剪指甲，當你以為這是十級驚嚇程度的時候，就好似halloween已經嚟咗一樣，驚嚇一浪接一浪，因為就在我打算投入書本中自我麻醉的時候，一件外星來的物料，用高飛曲敘的方式飛墮到我的書本上，初時還未意會，細看之下．．．嚇得我連書都跌了落地．．．實再忍受不了，我唯有　－　搬！！！！

去隔離兩個位．．．



說時遲，那時快，剛才那人肉喇叭女士就快要下車了，所以又用那雄渾的聲量打俾屋企人說可以來接人了，就在此時，對面那位一直都沒出聲的男子竟然在用力拍打玻璃數下，繼而與那人肉喇叭女士怒目而視．．．就在那女士下車後，這位人肉喇叭男士，用同等的聲量不停的在電話中與友人在駡那女士，當中夾雜了無窮無盡的粗口，估不到"一山還有一山高"是可以這樣理解的．．．


後記

在動物比賽公司裏，在我們三樓那一層，是開放式坐位的設計的， 一望無際，只有高級的行政人員才會有版間房的．而正正在我背脊就是一間版間房了，不是太高（我只要企直少少便可"裝"到裏面了），每天一早或是午飯後，總是傳來櫃桶取物的聲音，然後就是那"碧力啪啦"的聲音抑揚頓挫、繞樑三日、無日無之

咁聰明、咁漂亮、咁賢淑的公主們 (2007 09 28)

下面呢班公主同埋士衛，係我讀酒店的時候的同學，


最初的我們，是一共六個的，叫『六公主』。本來，是沒有我的份兒，後來"高智慧公主"因調班及其他種種原因而疏遠了，再認真的數下，便發覺只係得番5個人係吖，因為另一個"些倫公主"在早幾年前，因為一個很可惜的原因，而決定同我地不相往還了(下次再講詳情)，所以最終變成了現在的組合．

我地六個公主，做姊妹團可是很專業的，早在讀書時期，便被聘請去做姊妹團了，無睇錯呀！係聘請吖！事原當年"些倫公主"的男友的姊姊(現在已是'大姑奶'了)，因沒有合適的姊妹朋友團，但又想有一個熱鬧而又難忘的一天，所以透過"些倫公主"找我們作姊妹團，最後我地梗係義不容辭、大功告成、功德無量兼功成身退啦！！(仲食餐飽)

自此，經我們一番自吹自擂(睇網誌標題就知啦)之後，在酒店系裏我們漸漸聲名大噪，到最後我們都一起出動好幾次，就連男同學的婚禮也不放過我們！只是，

近年，因"港組公主"有咗小公主的關係，最近的幾次出動，都係下面我地四個的傑作．．．




宜家先嚟睇睇我地落足心機，為吹時公主的準夫婿設計的娶老婆難關，請留意及記住，係"設計的娶老婆難關"，因為我地係會非常專業咁，根據新娘的形容、要求、姻世伯伯母可接受的尺度．．及我們對新郎私認識／熟悉程度去設計難關（通常結果都係：普通熟悉－＞好難玩；好熟悉－＞好鬼難玩！！）
811 Game List
1) 長長九狗 - 用九秒，飲九支無氣室溫可樂
2) 一網打盡 - 用絲襪網住呼拉圈，要兄弟們"鍾"個頭出去吹熄對頭之心心蠟燭(電視絲襪王game)
3) 一索得男 - 準備大面盆，放好多冰，再放十隻麻雀入去冰入面（要包括一隻"索子"及一隻"南"），要兄弟們除鞋除襪，申隻腳去夾隻"索子"及隻"南"
4) 甜甜蜜蜜 - 在室內對角拉起一條繩(or紅絲帶)，用衣夾，夾住兄弟們頭先剛剛除下的臭襪及蛇仔糖在繩上吊著(糖要同襪一起夾住)，要兄弟們不準用手咁食咗啲糖
5) 婉君知多少 - 問下面的問答題
6) 一擲千"君" - 用十多條紅絲帶由Tracy房，經門頂申出房外，絲帶在房中的一頭分別連著茶壺/"吉"利事封(但有標明銀碼)等物品（只得最後一條連著Tracy），Michael要在房外選擇紅絲帶抽Tracy出來
芒果公主tailor made的詩：
X X 君 X X 君
米高對你係真心 今天專誠來提親　帶了鮮花和現金 包你見到都話"lum"
君妹樣子真迷人 身材平均夠碧真　琴棋書畫樣樣能 心地善良不變心
家務我做荼我"針" 掃地吸塵做阿賓　老火例湯由我"鄧" 煮飯靚"送"由我"蚊"
對你絕冇"Sa" "Sa"滾 天天愛你"訓"晒身　花紅雙糧由你分 米高體貼冇激親
阿里Lu Ya要謝神 賜我良緣要感恩　外母大人請放心 我會做足100分
今晚快些趕做人 三年抱兩冇疑問　兒孫滿堂好震撼 白頭到老好開心
姊妹價錢有得"針" 莫把大門閂到撼　9999 no problem 過來收取拿拿林

 我地次次的分工都非常完善：最主要就係有 a)芒果公主做文人，佢次次tailor made的開門誓詞都非常抵死到肉；b) 我就係專門負責做道具同美食；c) 吹時公主就係負責惗難關，最後，我地成功嘅原因好簡單，因為我地有著一個非常清楚兼明確的目標－就係屈利是，所以，咁緊要嘅呢part，我地就搵狄凡妮太太出場及最後負責分贓囉，可惜次次我地都係分贓唔勻．．．原因，咪就係因為狄凡妮太太最懶惰，攪到我地三個鬼咁多野做．．哈！！！哈！！！哈！！！

答錯罰利是 答對獎(甜孫苦辣的食物)

1. 第一次約會何年何月何日何時何分 (考記性)
2. 第一次o鍚o鍚在何年何月何日 (考記性)
3. "吹時"喜歡咩色? (答案:鑽飾）（捉字失題）
4. "吹時"左手還是右手掌有墨? (答案：左右手都冇,在手掌的那顆只是"柚")
5. "吹時"共有多少個耳孔(考細心)
6. "吹時"穿多少號鞋(考細心)
7. 說出新郎自己其中三個缺點,並即場立志要改過

(因"吹時"曾投訴新郎一些缺點,所以籍此叫新郎改善)
8. 說出"吹時"其中三個優點 (D條送o既)
9. 叫新郎 3秒內作一首詩(即一步成詩)來讚美"吹時"(可選擇用利是向姊妹取Tips)

(呢條要屈多D利是)

心底裏，能為姊妹的人生一大日子，帶俾佢地開心快樂嘅回憶，實在係我能送給她們的，最珍貴的一份禮物．．．還望笑納！

但願人長久 (2007 09 21)

昨晚剛收到一個最新消息（內容日後公佈），開心了好一陣子之後，我突然間發覺，我要急起直追我的中文及中史知識了，因為我好想我的小朋友，第日都識中文（最好係廣東話+普通話）同埋中國五千年的文化，最重要係點樣成為一個『有用的人』。我覺得西方的教育，要教授知識、培育文明的人是絕對無問題的。但是內在一點的，例如：何為有用的人、做人處世的道理、家庭觀念等等，還是中國的好一點．．．再加上中國的詩詞歌賦，實在意境深遠，能在片言隻字間表達很多的情感，所以近來在返工袋裏，都長備一兩本相關書籍，而且，是絕對的善用公司時間去閱讀，所以枱頭都是論語、資治通鑑、孟子、孔子、儒家學說、唐詩三百首、李白、李清照等等等等

今天剛好看明報的時候看見以下文章，是講蘇軾的詩《水調歌頭》。

《水調歌頭》是蘇軾在中秋時懷念弟弟蘇轍而作。蘇軾與弟弟蘇轍雖在不同的地方當官，不是能常見面，但兩人的感情要好。蘇軾的仕途並不如意，他在月下飲酒時想起弟弟，也思索起人生。他明白到人始終有悲歡離合，但願家人能健康、長壽，即使分隔千里，也能共同欣賞月色。

《水調歌頭》 蘇軾　（丙辰中秋，歡飲達旦，大醉，作此篇，兼懷子由）

明月幾時有？把酒問青天。
不知天上宮闕，今夕是何年？
我欲乘風歸去，又恐瓊樓玉宇，高處不勝寒。
起舞弄清影，何似在人間。
轉朱閣，低綺戶，照無眠。
不應有恨，何事長向別時圓？
人有悲歡離合，月有陰晴圓缺，此事古難全。
但願人長久，千里共嬋娟。

看完此文章，突然覺得世界上有好多事情真的非常巧合，因為就在早前，我在星期日返教會後的回家路途上，竟給我"撞"到我的一個中學同學"麵包糠"，她可是我十年前的同學呢。其實，我們只是一同上課了一個多月（在中六的上學期，我只上了個多月便轉去修讀酒店課程了），但我和她卻是非常要好的同學，她是一個非常文靜的女孩子，但和我在一起時，通常都給我的"獨特見解"+"低能笑話"攪得大笑不停，"撞"見當日，仍是老遠一見便能相認（工作了多年，我的小學老師仍說我的樣子從來無變過），"麵包糠"現在係一個社工，另外都會在油尖旺地區，外展式的輔導不同種族的小朋友（e.g.喬寶寶的小朋友同鄉），實在很難想像當年講說話蚊螆咁細聲嘅女仔依家會係條街到追住啲細路同佢地傾計．．．

再早多一陣，我又係做facial嗰度"撞"番我係酒店做trainee嘅時候嘅同事"肥瘦孖寶"，當年因為我係中五之後就走咗去讀酒店課程，所以我係酒店training嘅時候，都只不過係十幾歲，同佢兩隻野一樣，所以都係好close嘅朋友，所以嗰日一見番面，即刻就雞啄唔斷咁傾咗成個下晝．．．

Thanks God，俾我係宜家撞番咁多好好的舊朋友，我覺得，呢啲都係緣份的安排．．．

濶太的一天 (2007 09 19)

我成日都覺得, 係動物比賽公司呢度做, 真係幾攪笑嘅
... 點解???? 我想話呢, 今日我返咗一日工, 只係做咗"一件事"咁大把... 係乜事????
就係做"濶太的一天"????即係乜?????

咪就係用千幾蚊出去shopping咗套西裝返嚟囉
shop足一日.... 仲要有跟班




話說, 上星期一我地部門剛收到通知 - 我地公司終於打入台灣市場了...

所以, 在上星期二, 喺我地過氣阿姐"千年女皇"的帶領下, 已經總動員成team人去為大老闆們攪咗個celebration party了..."千年女皇"出名攪得嘅, 唔係'大龍鳳', 都一定唔會係'細吔嘢'... 再加上, 有名你叫, 過氣阿姐其實已經過咗檔架喇, 佢唔再跟我地個啲Users (i.e. dept) 嘅, 而我地新阿姐都on-board咗好耐啦喎(搶風頭都唔會唔盡吖????), 咁所以, 我地個個都以為事情已經告一段落....

點知, 真係估佢唔到
, 佢真係夠胆係上星期三臨放工, 話今晚要再攪個dinner party仲要請埋新舊CEO ->咁即係又要攪場'大大大龍鳳'....

係出面D公司, 我惗CEO 只係= Chief Executive Officer, 但係動物比賽公司, 我惗CEO = "皇帝"咁樣.... 得番個幾日, 又要有台灣feel, 又要台灣decor, 又要山地女仔dress code, 又要台灣小禮物... 仲要有full rundown, production house做backdrop, matching theme video & music, MC... ...總之, 佢惗到嘅, 你都要變到出嚟.... 仲要明明有AV... marketing... 部門唔用, 係都要用番我地呢啲"無呢啦更"的HR人,咁先顯得佢犀利?!?!?!

我地team同事就係係D咁樣嘅特訓走出嚟嘅, 所以即刻搵晒所有可以利用嘅做airline/travel嘅friend即刻空運啲野返嚟, 總算無驚無險, 捱到今朝以為好快捱完, 點知我今朝一早返嚟無耐, 就聽到有人話, 唔記得通知MC個dress code係著乜咁大鑊未算....最大鑊的係正當我想搵地方"lay"埋嘅時候就已經聽到阿千年女皇係個電話度話叫我去攪拈佢....(我次次聽到我個名就頭痛)其實我已經出咗去做野好幾日, 枱面啲工作量已經山咁高... 一聽到呢個惡耗, 就令我今日都無晒心機做野....

所以我就係一朝早10:30am帶埋個試身同事去咗shopping, 咁啱啲shop未開晒喎, 咁就食個早餐再去shopping.... 到12:30pm就帶埋啲戰利品返去, 食lunch兼俾MC試身, 食lunch到3pm再出去改衫, 到5pm先返去, 再check下... 執下... 扮下做野一陣, 就走咗去lu....

最主要係, 呢套成HK$1500嘅西裝, 只係著個2個多鐘頭... 之後就無用啦....真係wastage....