Fortunate

我諗，將來老了，呢幾年住係呢度，會係一個美好的回憶。
至少現在每天早上都看著美美的日出，就已經乜都抵晒了。

今早日出7:19am
我由6am 已經坐係到等呀。
今早的紅霞，好靚呀。

7am

7:05am

7:10am

摺機

依家仲有無人知乜野係摺機？？？🙆

媽咪幫我清理仲留係香港嘅舊物。

發現一堆我以前用過嘅手提電話。

一睇就知係日系 / 韓風嘅人。

印象中第一部用嘅，係呢部愛立信Ericsson

仲記得當年要打一大串號碼去飛線

初時一係就懶得飛，

一係就返到屋企都唔記得個電話飛咗返公司。。。哈哈😂😁😃

之後我記得用過一部同呢個99%似嘅

牌字就唔記得lu

不過肯定就係咁樣銀白色

長薄嘅機身

咁肯定嘅原因係嗰時仲有得比你揀用 CDMA 電話

CDMA就係日本制式 同香港嘅制式係唔同嘅

但係我就係鐘意呢個電話好靚呀。。。

好明顯女人買電話

係唔理好唔好用，最緊要靚。。。

最鐘意嘅一部，就係呢個白色嘅摺機

都係唔記得乜牌字

不過佢開機關機收短訊個sound bite 係好cute 嘅水bubble 聲

即係"咕嚕" "咕嚕" 咁樣

女人真係奇怪。

好似我咁，只係為咗佢係白色好cute,  同埋鐘情佢個sound bite,

我係唔會理佢接收好唔好，用電量呀嗰的野

後尾好似係壞咗，再換嘅都係細細部嘅韓國機，

點解香港唔可以整的咁cute 嘅電話架

我記得嗰時身邊嘅朋友都係用nokia 非常襟用但係超級boring

全部都係銀灰色或黑色

或者係嗰個蕉型電話。。。

到後來發現自己其實唔鐘意比人揾到

同埋個電話成日掛係頸度好痛

就換咗呢部 0 function 好的骰嘅電話，淨係打出打入，

細到可以放係西裝褸袋都唔覺嘅

最最後係因為鐘意粉紅色

出咗下面右邊呢部

依家睇番

要用番呢的電話無問題

因為係屋企上網都係用tablet 或 notebook

出街唔係手機玩遊戲我都頂得住

反而係唔知點打短訊

要你唔用keyboard 用番 1abc 2def 3ghi 咁樣去打短訊真係想殺人

諗諗吓

由1997年開始做野，到2008年過嚟

10年用咗成6部電話咁多

我已經唔係追款嘅人都咁多

嗰的年年換機嘅人係乜野諗法嘅呢

我就好怕換機嘅，又要從新去學點用部機，仲要以前係無話幫你過的野去新機度架。。。

好在依家有肥鬼攪，哈哈

佢成日問我要個電話嚟做乜呢，你都唔聽電話。。。

Day after storm 風暴之後

Doug and Linda family think it's still not suitable for swim.

Doug 同 Linda 覺得佢地一家仲未係時候出去游水。。。

so as seagull 海鷗先生都係咁話

Doug saying "here it go my couch seat sinking under water"

Doug 話"無啦！無啦！我嗰沙發 (sofa) 位比水浸咗喇"

Doug is thinking "how am I going to get there?"

Doug 係到諗究竟"點樣可以埋位呢？"

Dirty Little Secret

we just had a big storm yesterday.

and a bunch of things wash up on the shore.

尋日啱啱有個狂風暴雨

有好多野比大浪打上岸

if you think these two rustic cans are bad, 

think again, and scroll down.

如果你以為呢兩個生鏽樽已經代表到人類對環境嘅破壞，你要再諗諗同睇落去。

the big waves yesterday breaking up all the ice and then push them up here

前幾日嘅凍天氣，令到海面結咗冰，

然後尋日的浪就先打碎晒的冰，

再推晒上嚟。

look at the road and you can see how far they came up last night

淨係睇條路就知尋晚的浪係上到嚟路面中間

拖鞋都有

people said the big ocean are holding a lot of secret,

that's why when we watch murder shows, they like to throw dead body into the water

有人話，個大海幫好多人守住的秘密

所以睇好多警察辦案節目都有講過，的人好鐘意將條屍丢落海

so many times, police would find them soon, but as a matter of fact, 

there are a lot more that got wash away and was never found

好多時，警察好快會揾得番條屍

但係都有好多case 係揾唔番，石沉大海

until a random big storm, 

the current bring up the things from the bottom and wash up the shore

直至一個偶然的大風暴

的大浪將海底嘅野都卷上來了

that's why some police say after a huge storm, 

people would report that they found bodies on shore.

所以又有警察話

係大風暴過後，好多時會有人報案見到死屍沖咗上岸

while here, mostly I saw are sports related thing because 

there is a playground by the waterfront walking path and on weekends, 

lots of family spend time here playing.

不過係呢到呢，死屍就未見過，垃圾就大把

好多係球類物件，因為就係岸邊呢到係公園

一到週未，好多一家大細嚟呢到玩

HOWEVER,

can you tell me why this?

不過

你可唔可以話我知點解會沖咗呢樣野上嚟？

hot tub time machine???

唔通真係浴缸時光機 (一套戲嘅戲名)

it is a real tub. and i walk here everyday, it was not here before the storm.

呢個 堅 係一個浴缸

我日日係到行路，尋日無呢個野係到架。

又嚟雪暴

好啦。
天文台話波士頓個風會打到嚟呢到喎。

係尋日下晝5點，終於見到開始落雪。

之後好快就變做落雨。

出面個海波濤洶湧，白色嗰的係薄冰，比的浪打碎晒，的風係向岸吹，

所以不停聽到的冰打上岸邊石頭嘅聲。好似攪拌機 crushing 嘅聲。

好啦，7點，無雪，即係場唔會取消航班，即係要返工，要去瞓啦。

無幾耐之後，

突然醒咗，覺得張床有的震！

昨晚陣風速度去到104呀。。。

唔怪得成晚嘈醒晒

奇怪的食物

唔係穿山甲呀
馬騮腦袋嗰的呀。。。

係呢邊嗰的呀！
係咁嘅，嚟咗美國住落之後，每次返香港，好靈驗，次次都會有腸胃炎，唔係好嚴重嗰隻，但係肚痛同柯餐勁嘅實走唔甩。
無可否認，唔多唔少都同食滯咗有關。但係我自己就覺得，係身體係到做自我調節 ↪
呢邊嘅食物單一化，而每次返香港，一日之內即刻變食物多樣化，所以身體就要開行turbo 去適應，最簡單方法，咪就係柯餐勁再reboot system 囉

乜野係食物單一化。
係呢邊，我同肥鬼日日都食一樣嘅早餐，差不多有四五年lu...
蛋一隻，煙肉一塊，炒青椒，一塊薄午餐肉(一罐開10塊), 一塊多士
有時多士換麥皮，有時放假多士換做pancake(熱香餅) ,有時炒青椒換做炒薯仔

但係喺香港呢，早餐可以係燒賣腸粉，可以係炒麵炒米煎蘿蔔糕，可以係粥+油炸鬼，可以係粢飯，可以係茶餐廳 ABC 餐，沙嗲牛麵+蛋治同腸仔火腿，雪菜肉絲米+奶油多，回鍋肉米+波蘿油，有時仲可以係飲茶，一隻糯米雞，排骨飯。。。the list goes on and on...
你睇到無� 呢到横跨鹽嘅甜嘅煎嘅炒嘅煮嘅炸嘅蒸嘅焗嘅中式西式麵包式
你 get 到我意思無？

仲有，由第一日嚟，我就覺得有樣野好怪。
佢地可以全日任何時間都食早餐野，即係 all day breakfast, 呢到好多餐廳係全日乜野時間入去都會比早餐餐牌比你嘅，就好似肥鬼成日講，佢細個嗰時，成日叫佢最愛嘅嫲嫲，係夜麻麻整 pancake 比佢食⚠但係佢地唔可以好似我地咁，係早餐時段食晚餐野，例如我咁，可以食公仔麵做早餐，食牛腩麵做早餐⚠

我諗咁樣解你地會明白多的，就係佢地好鬼fixed on fixed item at fixed time, 真係嚟嚟去去都係嗰的野。都唔知係話佢專一好呀，定點。。。

好喇。再係另一角度講吓食物單一化。
睇睇今日煮呢樣。

呢樣叫 Chili on baked potato

Chili 係乜野嚟呢？
其實就係碎牛 + 碎洋葱 + 蕃茄醬(可以係碎茄chopped tomato / diced tomato 但肥鬼唔食茄，所以我只用茄醬 tomato sauce / tomato puree)  + 香料煮埋嘅一鑊野。
好多食譜係有加豆係入面嘅，但係我地兩個都唔好豆，所以通常無落。

我真係頂唔住佢淨得碎牛加茄醬，通常我都會切的紅椒青椒西芹入去，可以的話，我仲會放的磨菇粟米紅蘿蔔，務求增加蔬菜量，但係就會比肥鬼話我亂攪fusion 而罷食 (或者揀番晒出嚟！)

好喇，點解講 chili 呢？ 同食物單一化有乜關係呢？

我想話，其實 chili 同你食肉醬意粉嗰一堆野無乜分別。
都係碎牛 + 洋葱 + 茄醬，不過就轉咗少少香料，係咁喇。

我地一齊嚟睇吓碎牛可以做的乜？
上面講咗 chili 同肉醬意粉。
轉一轉。
Chili 可以就咁食。
你去的餐廳，係餐牌入面，湯類嗰度有chili, 就係呢個喇，可能有時會落的雞肉入去，同埋可能會煮番稀少少嘅，但都係一樣嘅野。

{{{{ 題外話 }}}}
我地廣東人嘅湯係一碗碗流質嘅，好似水咁嘅，叫做湯水湯水，有時煲湯的渣(湯料) 我地會放落碟到當係其中一味菜，我地係叫'飲'湯喇！
佢地呢，湯，係其中一道食物，例如三道菜入面嘅頭盤係沙律或湯，然後係主菜同甜品。而佢地的湯，大部份都係杰湯 (thick soup) 例如我煲西蘭花忌廉湯 cream of broccoli ，佢係要將的西蘭花打碎晒變 puree 嘅，如果我切的西蘭花入去(想飽肚的，有野咬吓) 佢又會同你揀番晒出嚟，佢話咁樣係唔啱嘅，係好怪嘅，因為suppose 呢個湯入面的西蘭花係煮溶晒嘅。仲有佢地唔係叫人"飲湯"嘅，我初初嚟嗰陣，唔知佢地食野要攤到凍晒先食，我以為佢掛住睇電視，拎碗湯比佢得個擺字，就問佢 why dont you drink your soup yet?  佢就會糾正我 when am I going to "eat" my soup?  When it is not freaking hot and burn my face down


好喇，返嚟原先嘅題目，碎牛仲可以整乜？
咪就係漢堡包 hamburger 囉❕
將的碎牛鏈做一個肉球再㩒扁佢 (㩒扁咗一塊塊嘅牛肉漢堡係叫 patties) ，煎熟，夾生菜蕃茄就係漢堡包啦。

就咁將碎牛鏈做一個個肉丸，又係一味。

係呢到，將肉丸放係意粉上面加茄醬，就係肉丸意粉。

佢地肉丸三文治都得嘅。

好啦，另類漢堡包又係一味菜喎。
就係呢個 Sloppy joe ⇉

呢個三文治就係 sloppy joe，同上面咁多樣菜式一樣：碎牛洋葱茄醬煮埋一齊。
其實真係同肉醬意粉嗰堆一樣的，不過就係比個麵包比你，切開個包，放兩大羹肉醬係入面就咁食。佢地叫呢的做loose sandwich 。我自己係未食過呢一樣野嘅，最主要係食呢樣野嗰時，的肉醬係咁跌出嚟，變成天一半地一半咁，而且多數食完之後成手都係，所以我從來無掂過呢樣野！

{{{{題外話 2}}}}}}
(係呢個要講一樣怪野 ⇉ 雖然同樣都係兩塊包夾住塊肉，但係通常只有漢堡包係叫 hamburger 其他都叫三文治 sandwich 。你去餐廳睇吓個餐牌，兩塊包夾住一塊雞扒會叫 chicken sandwich 魚柳包同上面呢個 sloppy joe 佢地都叫做三文治而唔係burger

再轉一轉。

碎牛就咁炒熟，加的 taco seasoning, 就變 taco meat.
Taco 係墨西哥食物。呢邊的人好鐘意墨西哥食物。
Taco 有分硬殼同軟殼。上面黃色係硬殼(taco) ，白色係軟殼(burrito) 拎個殼，放的taco meat 放的生菜絲，加的碎芝士，碎茄，salsa sauce,  sour cream 食得。

另一款呢，

就叫 taco salad, 即係個殼變做一個大碗，放好多生菜絲入去，加碎牛碎芝士碎茄，可以落salsa sauce, 肥鬼鐘意落 catalina dressing (一種橙紅色嘅沙律醬)就咁樣當沙律食。

好喇。仲有。
肉醬千層麵 lasagne

又係一樣嘅醬，今次係一層肉醬一塊意粉，加的芝士然後去焗熟。

轉一轉。Cabbage roll 椰菜卷

都係碎牛係入面，有時會加的飯係入面，一樣的茄醬做汁，焗熟。
另一個變化就係唔使卷起佢，將椰菜切絲，一層肉醬一層椰菜絲落茄醬當汁咁樣焗熟佢。

再嚟另一變化。 Stuffed Peppers 釀青椒
又係碎牛加茄加飯，釀入去的青椒紅椒橙椒，焗熟。

最後，呢樣。Meat loaf 一舊肉。

呢味呢，通常係一磅碎牛加一磅碎豬(因為淨碎牛太乾喇) 將兩種肉撈埋，加調味，焗熟佢，出嚟切一塊塊咁食。

好喇。
其實上面講咁多碎牛肉食法，唔係想話佢悶(其實都有的，因為大部份美國人都鐘意食牛，你好有可能一星期七日都係食碎牛肉。)
主要問題係上面咁多樣都係主食(各自係一味餸) ，而外國人多數係一餐一味餸嘅。就算我整埋沙律，成餐飯都只係生菜同牛肉。
唔似得係香港，日日三餸一湯。入面多數會有雞，牛，豬，魚，菜心，白菜，瓜類，豆類，長年累月之後，就係我形容的食物單一化。
係香港的一餐飯入面食到嘅食物種類，係我係呢邊食一個月飯的總和。
咁有乜辦法唔腸胃炎⚠