光滿天

題目喺嚟至陳百強嘅歌 -⏩

日出，光滿天。。。

你想話又影日出，你唔厭嘅咩。。。

又真係唔厭架喎

日日都唔同，有時有蛋黃，有時得雲霞，有時乜都睇唔到。

要起身，落去等，先知今日開大定開細。

由12月搬入嚟，每日想影日出，就要落樓。

因為個太陽係我棟大廈嘅右邊呀，

淨係行出露台都裝唔到架。

直到前幾日，有一天準備出去晨運，

突然發覺點解間屋咁光嘅，

去望望，噫！個太陽對到正一正呀。

發覺唔同咗角度呢！！！

乜唔係太陽由東面出來，係西面落去咩？

點解會走位架？

因為。

唔好唔記得，地球係斜架，不是垂直的。

地球的自轉軸平面傾斜係23.5度

(from wikipedia) 

由於呢個原因，長期在固定地點看日出的，就會發現，

係夏天，太陽會係正東面嘅北少少出來，係西面嘅北少少日落；

係冬天，日出方位會係正東的南少少，日落方位會係西面的南少少。

所以，應用係我呢個情況，就係之前12月到2月，冬天嘅時候，

嗰太陽係棟大廈嘅右邊出嚟，

依家開始季節轉變，日出角度就向左邊走。

日出角度最大差別可以去到47度。

不過，有兩日係例外嘅。

一年入面有兩日，太陽真係喺正正東面出來，係正正西面落山，

呢兩日就係三月廿一日(春分點)  同 九月廿一日(秋分點)

亦即係英文嘅 two equinoxes

(想要睇吓你個指南針有無壞，就係呢兩日喇！哈哈)

而西方嘅月曆一般都以春分日為春天開始，同埋秋分日作為秋天開始。

"Equinox" 呢個字係嚟自拉丁文嘅 aequi nox 意思係日夜等分。

不過，天文科學家已經確定，係分點呢兩日所謂嘅日夜等分，其實只係大概，不是真的。

因為地球嘅弧度同埋大氣層導致的光線折射，所以就算係呢兩日，

都係日光時間長過夜晚嘅。

而係上面講嘅23.5度地球傾斜度，

令到北半球係6月21號 (夏至 summer solstice)  達到最大傾斜度(最近太陽) ，

所以就係北半球夏天嘅開始，日光最長嘅一日；

相反，12月21日 (冬至 winter solstice) 就係南半球達到最大傾斜度(最近太陽) ，

係北半球就會係冬天嘅開始，日光最短嘅一日。

========

好喇，講完日出角度，又講吓日出時間。

上星期，日出時間越推越早。

由12月開始，通常都係7點多開始日出，到8點先一天都光晒。

到上星期，係6:50am 什至 6:40am 就開始日出，

我試過7:30am 就光晒可以落樓去晨運。

然後到咗3月第二個星期日(2017.3.12) ，就係daylight saving, 我地要較快一個鐘。

又變番7點多先開始日出。

Daylight saving 日光節約時間 或者又叫 Summer time 夏令時間

(from wikipedia) 

據稱，Benjamin Franklin 當年駐法國嘅時候，

發覺當地的法國人係夏天"瞓走咗半日陽光"，

所以係1784年，佢寫信去"巴黎雜誌" 講笑的叫人唔好浪費日光，要好似佢咁早睡早起

(佢係美國係過農村生活), 利用夏天越嚟越早出來的太陽光，咁樣可以慳番好多蠟燭。

呢個其實只可以講話係所謂的原本概念。

因為當時實際係無乜"時間"呢樣野嘅觀念，未有工業，未有交通，

人人都係日出就出去，天黑就返歸。

然後去到1895年，紐西蘭的昆蟲學家George Hudson, 佢係返輪班工作嘅，但係佢又想係夏天收工後仲有陽光比佢去捉昆蟲，所以係1898年佢入紙提出咗兩小時的時間改制。

再去到1905年，英國人William Willett 本身鍾意打golf 嘅佢，

又係唔鍾意夏天收工後咁快天黑，打18洞變9洞就要返歸，

所以佢又草議要夏天更改時制。

以上兩人都係唔成功嘅。

最後係點先令到呢的大國設立夏令時間？

哈！

係1916 第一次世界大戰嗰時，德國為咗慳煤，就開始咗夏令時間，

英美穌聯等等，為咗唔好執輸，係兩年內，都紛紛開始咗夏令時間(日光節約時制)

其實係戰後，佢地全部都回復原狀，

係去到1970年代，發生了能源危機，大部份國家先真正落實使用日光節約時制。

==========

有科學家話當年要採用夏令時間，係為咗慳夜晚要開燈嘅電量，

但係依家慳唔到幾多電不突止，仲用多咗冷氣的電量。

簡單的，

不如大家一齊做番原始人啦。好麻？