愛爾蘭 無聊睇電視 (一)

<<理智 與 感情 / 人性黑暗面>>
好似好深嘅題目，其實每人每日做嘅所有決定都係同呢幾樣嘢有關。

係嗰邊日日 4am 起身整早餐都會開住個電視，有的聲聽吓，醒醒神咁樣。而係呢的揾鬼睇嘅時段，電視台梗係播的陳年舊野啦。

佢嗰邊曾經有這樣的一個遊戲節目。
識睇英文可以睇呢個介紹：
Golden_Balls

我搜尋過一的資料，呢個遊戲節目係 2007 年開始，玩咗6季到 2009 就停了。

呢個遊戲點玩嘅呢？
一個金庫(大滾桶) ，入面有100個金波。每個波係不同銀碼的錢，由最少 10蚊 到最大 75000蚊。

撈均晒之後就開始 look 出嚟，第一輪有四個玩家，滾桶會 look 出 12個銀碼波。

同一時間，主持人嘅助手會放 4個"殺手"波，混入去 12個銀碼波入面，共16個波撈均之後每人會有四個波。

每個玩家的四個波，分前排兩個同後排兩個，前排兩個係要開出嚟比大家睇嘅，後排兩個就係玩家自己睇嘅。

每個玩家都睇過自己嘅波波之後，主持人會比時間大家互相問問題，呢個時候，玩家們可以講大話或講真話，去令其他人相信自己手上嘅全都係好嘢(大銀碼) ，因為遊戲嘅第一輪最後，大家要用投票決定方式，嚟淘汰其中一個玩家，得三人可以進入第二輪。

三位進入第二輪嘅玩家，佢地嘅波波(錢同殺手) 都會一同帶落嚟，同時滾桶會再放出2個銀碼波，另外助手又會加一個殺手波，共15個波三個玩家每人5個，兩個前排，三個後排。

同第一輪一樣，大家要費盡唇舌去令其他人相信自己的波波係好嘢，以進入最後一輪的二人對決。

最後一輪二人對決，就係佢地各自帶落嚟嘅波，另加一個殺手波，撈均之後共11個波放係枱面。
佢地兩人要輪流，每人抽兩個波，第一個要掉咗佢，第二個就放入最後獎金列 (主持人面前嗰5個位)

要留意，玩家係無得揀嘅。主持人話現在係抽"掉咗佢"嘅波，你抽到大銀碼，都要掉咗佢。
相反，你抽到"殺手波"可以掉咗佢，就係你好彩。

係整個遊戲入面，"殺手"波嘅作用係最後呢一輪先顯示出來。如果玩家抽到"殺手"進入最後獎金列，咁之前抽到嘅錢，就會減去九成，得番一成。
(例如第一個抽到的'最後獎金'銀碼係一萬，點知第二個波抽到係'殺手' 咁個獎金會減去9千，淨番1千蚊) 每一個殺手波都會直接影響最後獎金銀碼，所以係呢個遊戲入面，其實最重要係盡量減少"殺手"波去到最後。好多玩家都放錯重心係對手是否會"均分"或"全偷" ，睇過有一集帶咗5個"殺手"波嚟最後一輪，最後得番幾百蚊。

係呢一輪兩個玩家要好團結，期望可以將最後獎金推高。

最最後，兩位玩家，每人面前會有兩個波，一個係"均分" 一個係"全偷" 主持人會比時間佢地傾，如果兩位都揀"均分" 就可以均分全份獎金。
但係如果一個"均分" 另一個 "全偷" 咁全偷嗰個會贏晒的錢；另一位全完無錢。
如果兩個都係 "全偷" 就兩人都空手而回。

花咗好多時間，終於叫做解釋咗呢個遊戲。
(都係唔明就自己去揾嚟睇吓啦！)

依家可以講吓點解我對呢個節目有特別感受。

首先，我想講話，係美國，係無乜需要用腦嘅遊戲節目。美國好多遊戲節目都係標榜好容易就可以贏到獎金獎品嗰類嘅。簡單嚟講即係無乜深度 (一般迷思覺得美國人膚淺，係不無道理的。)

而呢個遊戲節目給我留下深刻印象嘅原因，係佢比你睇到人性黑暗一面。好多集嘅玩家，係去到最後一輪，比對面嗰個玩家"擘大眼講大話" (英文係 lie to your face) 咁樣呃咗。
我覺得依家一般人係太天真了，完全唔記得咗對人要有介心呢樣嘢。

認真咁樣去玩呢個遊戲，係需要適當時候講大話，要記住牌面無得呃但係人會，要每一輪都留意對手有無講大話，同佢最後開嘅牌面是否相付，最重要係，唔可以太早就因為對家講大話就決定了佢係壞人。

呢個世界太多披著羊皮的狼，同一時間，也有人樣衰但誠實。好記得有一集個男人，全程好有禮貌，唔嘈吵，唔哎交，好誠實的樣子，好誠懇咁講話會"均分"，去到最尾選了"全偷"

仲有就係，的人(特別係第一二輪入面) 將太多感情放入去個遊戲到，用感覺去決定邊個玩家留低，而唔係睇牌面去決定。
睇過好多集，的人有兩個殺手波都可以留低(!!!) ，而另一個有大銀碼的比人淘汰了，只因佢"實牙實齒"話會"均分"

其實係第一輪入面，好多時係用腦加少少理智，已經可以大慨估到邊個講大話。而第一輪嘅目的，除咗要入圍之外，最重要係減小"殺手"(同最後獎金有直接關係)

而且係第一輪入面，對手想均分或全偷根本無關重要，好多人係到最後一刻見到個最後獎金嘅銀碼好大而突然間心裏決定要全偷。

講咗咁多人的黑暗一面，想講其中一集，有位人兄佢表現係好 spiritual 咁樣嘅，佢順利去到最後一關，枱面11個波，未開始抽之前，佢同個對手話 : '如果你信我的第六感，我嘅預感係外圍六個波係錢，入面四個波係殺手' 最後開晒的波，真係如佢預言，有好幾萬蚊獎金，佢感覺係對家會"全偷" 所以佢都選全偷，佢一睇到對家選了"均分" 嗰陣，雖然佢贏咗錢，但佢真係後悔到流出眼淚。係對自己失望，睇錯人嘅眼淚。

亦都有好幾集，見到有人誤判，以為對家會"全偷" 所以自己都出 "全偷" 然後一開結果佢不停講對唔住，個主持即刻話，你唔須要對唔住，你無做錯，個遊戲規則係咁樣，佢好清楚每一步嘅結果。

主持人每集去到最後嘅結語，會講 "well,  they have been themselves" 意即每個人都係做緊"人"會做嘅野。

有時，人心係最難睇清嘅一樣嘢，係去到最後，你都唔會睇得清。

一秒

今朝好忙因為整咗野食比肥鬼拎返工和同事分享

(其實係清雪櫃，哈哈哈！)

就係忙之中，苗一苗出面見到呢個景，

立該用手機影兩張。

之後著件外套拎部大機出露台，的雲已經走晒位。

個月亮都暗咗 lu...

所以每朝晨早個景

每一秒都係非常 mesmerizing

老咗？ 奄尖？

外國人同中國人一樣，都係好鐘意乜野事都"做禮" 正所謂"禮多人不怪"係呢個世界上絕對係真嘅。

不過，外國人唔係咁興"現金"送禮亦都係真。即係我地嘅'利事' -- 我地係任何喜慶事，都可以好懶咁封個紅包，攪掂！佢地最懶嘅情況係買 gift card (預付現金咭) 即係BB 出世，就會送 BB 用品店嘅預付現金咭，或小朋友生日就送玩具店預付現金咭。現金封紅包對佢地嚟講，係好奇怪嘅一件事 (點解無緣無故我要比錢你？)

唯一一個情況我見過送現金，就係年輕人中學畢業派對。因為通常係呢個時候，年輕人會儲錢買架二手 (或三四手) 車，開始去兼職揾錢讀大學，所以多數人都係會送現金，當幫補一吓架車或油錢。

另外，佢地多數係事出有因咁樣送禮嘅，例如生日或過時過節；另外就係有的事情得到別人幫忙，都會準備少少禮物比人以表謝意，原因是佢地奉行"呢個世界上無免費午餐"嘅宗旨，所以不會期望別人無賞的幫忙，大家都係出於心意去幫人。

題外：同肥鬼一齊出差嗰幾個同事，有一個早兩星期回家，嗰朝我送佢去機場 (人人都返工 & 一個人點拖四個喼？) 佢係非常之唔好意思打攪我，單刀直入問我 do you want some money? (你要唔要的錢？)

西方人做嘅禮，可以係一張 thank you 咭或小小象徵式禮物。好多時係為咗表示謝意而特登去買的嘢，多數就係無謂嘢啦！

肥鬼媽係老式人，梗係樣樣都做到足。

上面呢個小包包同絲巾係今年生日禮物。
想講話，其實我唔會用，過往好多年嘅禮物都係無用過的，發現自己係擺咗幾年，以為自己有一日會用，點知都係唔會，現在決定鐵了心腸，大刀闊斧咁拎晒去捐，自己無用/唔用，就快快手比其他人用。現在老了，好想自己間屋入面所有存在的物件都係有用先至存在的物件，無用的全都捐了。

可能呢件物品係世上對另一個人有用，咁樣至少呢件被製造出嚟嘅物件，用了地球上有限嘅資源，來到世上呢一轉都叫做有貢獻過，而唔係直入堆田區。

所以，我依家嘅做法係請人食餐晏。大家聚吓傾吓偈，食咗落肚無嘥，最好。

朝霞

今天早上紅紅的朝霞。

很喜愛這樣一層一層發射出來的光線。

這邊也有海鷗，但係就無 Dublin 那邊的嘈。

很寧靜的早上。

Pot of Gold

今日同鄰居出食 lunch 因為係屋企大清潔而忘了時間直到佢嚟拍門！！！
佢話係呢邊成個暑假熱到死，就係我地返嚟呢星期先涼番。
成個暑假就係焗打風咁樣，無次打得出。
天文台話今日下晝會打風，但係我地食 lunch 嗰陣仲係藍天白雲。

到旁晚六點嘩啦嘩啦咁落出了，不過只係幾分鍾貨仔，幸好都驅走了很多熱氣。

呢個係最後一星期 (8/24) 係 Dublin 晚飯後行返屋企，又係雨，又係風，又係太陽，又係彩虹！！！還有係街角的國旗，好像是給我們的這倘旅程畫上完美的句號。

我"叉卵住"你

返嚟好多日了，仍然覺得好虛幻。
就是半夜醒來迷迷糊糊之間唔知自己係邊，係呢到？仲係嗰到？夢裏又見到嗰邊嘅街景，自己係街上遊蕩的情景，好真實嘅，所以以為又去咗嗰邊！

突然間想起呢首詩：

《浪淘沙 • 懷舊》 南唐 • 李煜

簾外雨潺潺，
春意闌珊。
羅衾不耐五更寒，
夢裡不知身是客，
一晌貪歡。

獨自莫憑欄，
無限江山。
别時容易見時難，
流水落花春去也，
天上人間。

屋企四兄弟姊妹得我一個怪胎讀文科 (其餘個個都有科學頭腦讀理科) 吟詩作對我唔識，不過讀讀埋埋的詩詞，自己覺得有特別感受嘅就會記得耐的咁囉！！

如果要知首詩嘅解讀就自己去 search 吓喇，費事教錯人，我都係搜尋嗰時睇番先醒起李煜曾經係皇帝，所以"夢裏不知身是客"不是單單指去旅行去得太多太密唔知自己係邊，哈哈哈哈。

(就是一貫中國人嘅特色：講野有骨嘅。表面咁講同入面咁解嘅可以係兩回事！真係，做人簡單的唔得嘅！)

Anyway 要叉卵住嘅嗰個唔係我。
係愛爾蘭，日日同其他同事出街食飯，返嚟嗰陣，肥鬼嗰同事都會 "叉卵住" 肥鬼去跳河！！！

整個暑假，日日都見到好多細路係河到學獨木舟，上完堂就不停上上落落係到玩跳水，玩得好開心架。

"叉卵住" 你，即係 英文 challenge 意即挑戰你去做一件事，亦都可以用 dare 中文再口語的就係 "大"你呀。。。

最後一天晚飯後行 harp bridge 返屋企

點解突然間講"叉卵住"人呢？

因為睇到呢篇文章：點火的老師文章

入面講嘅愛爾蘭詩人 William B. Yeats，我啱啱都去過係 national library 入面睇咗關於佢嘅展覽。

好記得有一晚同肥鬼同事食飯，講'屋企電話'呢樣恐龍世紀嘅物體，同事話佢阿爸死都唔肯 cut 咗嗰電話佢，因為佢係教師，做咗三十幾四十年，每個學生都有呢個電話號碼，佢唔知的學生幾時有需要揾佢，亦唔想學生要揾佢嘅時候揾唔到，所以有生之年都唔會 cut 呢個電話。

佢仲講咗一個佢阿爸嘅事。

有個學生好頑皮，但讀書有天份，所以佢阿爸 challenge 佢"將來無乜機會做醫生"云云。。。

多年後，呢個學生做咗腦神經外科手術醫生，返嚟多謝老師當年"叉卵住"佢，所以佢有今日嘅成就。

Ok 講完故，返去洗碗打掃，四個幾月的野全部積晒塵，睇見就想死。

回歸平淡

返嚟好幾日了，因為肥鬼第二日就要上班去，所以生活日常要盡快重回正軌，方法就係我的行李全都靠邊站，先攪點佢的一日三餐，到佢返咗工先嚟慢慢攪我嗰的。。。

今朝又可以沖個咖啡坐番係到睇日出。

好似發完一場夢咁呀！！！

另一個同肥鬼同一時段出差嘅同事 (不同地方) 佢真係勁，因為佢係剛調過嚟，就係出差前幾日先搬入去間屋到，連箱都未打開，又執行李去出差，一出就四個月，仲要佢個到只得酒店，沒有服務式住宅，所以佢兩個係由上年11月到今年8月，住足10個月酒店。

終於可以返屋企坐係張 sofa 到深深的嘆口氣，原來人嘅希望就係咁簡單呀。

By the way,  成4個月返嚟之後，屋企所有碗碗碟碟擺係邊都唔記得晒，好似去咗人地間屋咁鬼樣。。。