名不虛傳

大自然果然係最驚奇嘅 model

今朝一早落到嚟，發現呢個火紅嘅日出

其實係好多好多嘅雲層遮住咗

但係的光線令到整個天空紅晒，好靚。

只係一霎眼就沒有了。

行行吓就落雪，好蓉

對面海白濛濛的

只係十分鐘就蓋上雪了

緊張

嗰心仆仆仆咁跳。
完全唔關肥鬼事
(too bad 佢已經不能令我心跳加速了 哈哈哈哈)

下星期三 就係我人生學鋼琴第一堂。

細個就想學，出嚟做野之後又想學，10 年前嚟呢邊嗰陣又想學，肥鬼媽聖誕禮物送埋個電子琴比我，林林總總的藉口，到依家都仲係自己係到聽嗰琴嘅的曲，自己係到玩玩吓自學。

直到新年嗰幾日同個朋友講電話，佢老婆揾個老師上過幾堂，就可以自已學習到一的曲目。

膽粗粗 search 吓呢頭有無老師先啦？有喎！
貴唔貴架？好貴就咪玩喇？20蚊堂 ok 可以玩吓喎
遠唔遠架，要過大海去上堂30分鐘就咪啦！
呢個老師屋企係呢頭附近揸車5分鐘，行路20分鐘。

我覺得簡直係我嘅人生，同埋學鋼琴機會最接近的一次。

其實 email 咗比佢之後，等咗幾日佢就覆email 話可以電話聯絡傾詳細問題，我驚咗成個禮拜先打比佢呀！其實都唔知驚乜架，就係好驚囉，驚自己隻手已經唔聽使，驚自己太低能，睇極唔識五線譜，唔理咁多，死就死，去到老師話我無得教先算喇！！！

燒雞翼♪♪♪我鐘意食♬♬♬

嘟！嘟！嘟！嘟！嘟！嘟！嘟！嘟！

特別新聞報道。

啱啱係網到見到一個朋友，係英國去餐廳食飯，

叫了一客十隻雞翼。

來了五隻，就如上圖的，只是切了雞翼尖。

朋友覺得揾笨！

其實我想講話都唔算係揾笨喇。

侍應嘅解釋係，如上圖的雞中翼同小雞搥，

佢地係當兩件頭計，

其實呢點同我係呢邊出街食一樣，

不過點解廚師唔斬開佢呢？

< 咁咪係做事低能囉，比位人地拗！>

再講講啦，

係美國同加拿大呢邊，出街食飯無雞全翼架。

要食雞全翼就買返屋企自己整啦。

係超市，都唔係成日有雞全翼架，

因為呢邊的人唔食雞翼尖嘅，

所以的雪藏雞翼好多時係一 pack pack

將雞中翼同雞搥，劈開排好晒嘅。

(佢地食嚟食去都係炸雞翼，點汁咁樣食)

好似上圖呢隻雞全翼，共分三部份。

雞翼尖 (wings ends)

雞中翼 (flats)

小雞搥 (drums)

其實雞翼呢個搥都叫 drums 架！

咁係呢邊出街食飯叫 wings 

通常係 6 / 12 / 18 隻咁樣計 

或者係 1磅 / 2磅 咁計

(以磅計的多數會寫每磅約8-12隻，視乎雞翼大小) 

係呢邊去餐廳叫雞。。。翼 (wings)

就會比上圖的雞中翼同小雞搥比你嘅

呢個小雞搥對佢地嚟講係雞翼嘅一部份

同我地亞洲人鐘意雞中翼多過小雞搥唔同，

佢地係相反嘅，

佢地鐘意呢個啖啖肉嘅小雞搥多過雞中翼，

有的餐廳好人的，

係可以同佢講話要全部 flats (雞中翼)

不過多數都唔理你，求其執夠咁多舊比你就算，

睇你好唔好彩。

好多人又以為雞脾嗰舊先叫搥 (drums)

錯喇！！！

大雞脾全隻

好似上面呢幅我地食開嘅大雞脾，

佢地係劈開佢，分 drums 同 thighs 嘅

Drums 大雞搥

Thighs 大雞脾肉

呢兩件因為 size 大，係當雞件逐件計咁樣賣嘅，

唔會好似我地去茶餐廳咁樣，

叫炸雞脾就真係比成隻脾你！！

成隻 legs 咁樣嘅大雞脾，都係嗰句，

買返屋企自己整啦！

我其實都係一個超級雞翼迷

都係嚟咗呢到好耐先分得清，

同埋知道佢地係咁樣 order 嘅。。。

剁手指

無賭癮，唔洗戒賭

但真係成日剁手指

皆因洗菜切菜成日好心急，攪到險象環生。

每次差的剁到手指，就想起 gel 甲的好。

上年屋企人嚟玩嗰陣，整咗一次 gel 甲，

再對上一次係10幾年前仲係香港做緊野嗰陣，

不過嗰時好唔鐘意的 gel 甲整到我打字好慢，

好唔方便我呢的做事"唔洗急最緊要快"嘅人，

玩咗幾次無玩 lu

上年再整 gel 甲嗰陣，就發現了一個好處！？

就係切菜時的手甲有層厚 gel 保護吓，

幾次跣手都因為的 gel 甲，

最後 keep 得住我的手指！！！

呢個係期望復活節(春天) 快的嚟，

整咗個 pastel colour theme

呢的係假嘅，成塊痴上去，

令到的指甲睇落有厚度，係幾靚嘅，

繼 gel 甲之後就呢樣算最靚，不過，

我成日用手指梳頭髮，的頭髮就咁虢住係假甲同真甲中間層膠紙嗰到，整甩好多頭髮。

呢個係比人燒到嘅結果。

無意間見到 乾燥玫瑰 呢個色，就週圍去揾

最後覺得呢個叫 espresso 嘅色都幾近。

嗰的雜誌介紹嘅，係大牌字野，要成 30, 40 或 50 蚊一支指甲油，我呢的特價 $5 / 2支

自己覺得靚就 ok 啦

仲要成日有心機攪先得，唔係都係得個擺字。

呃咗 + 重操固業

尋日講話今日會有細雨加下晝暖番，現實變咗咁：

又比的雀仔叫呃咗啦，仲以為會開始好天架喇。。。
好彩我尋日醒目，無係屋企懶hea，唔係今日就中招啦！

肥鬼話尋晚10點柯夜尿，已經見到落緊大雪 + 超大風，我尋日真係太攰喇，瞓到死咗咁乜事都唔知，但係今朝落嚟，噴水池的冰係溶晒架，大風又落雨。

超大霧

溶晒冰喇

今朝的天氣咁 crappy (爛 / 壞天氣)  成條街淨係見到除咗我之外得一個晨運客，所以呢隻鷺都好悠然自得咁係到洗身

梳吓的毛先

我覺得佢地踩水可以咁樣企起身好勁

展開對翼 fing 走的水

肥鬼催咗我好多日整呢個蛋糕比佢同的同事，令我想起早前執野，見到我係 2002年7月22日去學整蛋糕第一堂，其實我整蛋糕都好得吓，不過自從知道咗糖同醣嘅壞處，就無整過無食過。

椰汁芒果 mousse 蛋糕

我拖咗咁多日先整係因為之前試咗太多次失敗。

每次心急同埋想追劇，想一心二用一路睇電視一路整，都係會失敗嘅，所以今次堅係煲完先慢慢攪，好在技術無生疏，大功告成，可以瞓囉。

跛

今日星期日，為咗唔好同人迫，晨早出嚟。

出門口行路嗰時 7am 都未到，一路行一路諗今日出去超市定係聽日先去，有張八折優惠券聽日到期，但係我又好想慳錢，想睇吓可唔可以捱多幾日到3月先再出去超市。

諗諗吓肥鬼就傳來短訊，又係問我剛剛諗緊的問題 (因為有野要我去買麻！)
佢話 check 過天氣報告，話聽日早上會落細雨不過下晝就會暖番，我諗諗吓，一嚟見今日咁好天，我又唔鐘意落雨絲濕出街，而且今日係星期日，街上的車會少好多，之後就即刻壯志鴻圖咁樣快步走返屋企，諗住 9am 準時出發，用半日到 1pm 乜都應該攪掂啦掛？ (好有壯志只因為想快的返嚟煲埋金科長最後幾集！)

唔係講笑呀去超市渣喎？要成半日 4 個鐘？ 唔怕話你知，寫呢篇嘢嗰陣，係返嚟之後安頓好晒所有野嘅事，今日係 4:30pm 先返到嚟。

其他太太們成日話呢到沒有好的地方 shopping 佢地係指服裝呀，大牌子呀，或者係大嘅 mall 好似 JC Pexxy / Mxxy 咁樣嗰的一間入面乜都有嘅。
但係對於我呢個唔多 shopping 嘅人嚟講，呢到的日常用品同食物嘅購買，都真係非常煩人嘅。

由 9:30am 正式出發 (本身真係諗住晨運完返嚟即刻出發架，點知 hea 咗陣，換過的臭衫又嘥咗成半個鐘)  到4:30pm 踏入屋企，我總共係去咗12間唔同嘅舖頭。
呢到的舖頭唔係香港嗰的咁細嘅，而且佢地唔集中，所以係要不停開車，泊車，入去，出嚟，又開車，如此這般直到紙條上面寫低嘅每樣物品都畫去了先為之功得完滿。

依家明我點解好想捱到3月啦！
錢都係其次，係咁樣嘅走嚟走去，我覺得一個月做一次已經好夠了。
點解要咁樣走嚟走去呢？例子一：
肥鬼好鐘意食一樣叫 corn beef hash 嘅野，同我地係茶餐廳食嘅罐頭鹹牛肉咁上下 (鹹牛肉三文治) ，不過佢呢個入面仲有的好鬼細粒嘅薯仔 (所以麥當當嘅薯餅係叫 hash brown) 呢罐野係呢到唔係到到都有得賣，從來未見過特價，同一間超市集團，係屋企右邊嘅分店賣3.99 而係屋企左邊分店就賣4.99 呢兩間分店揸車要30分鐘的距離。

例子二：
肥鬼會飲一種幫助鬆弛嘅飲品，呢個仲衰，唔係間間分店有得賣。

而我講緊嘅例子一同例子二，係不同的超市集團，點解就係唔可以一間入面有齊所有野？

所以我今日咁樣走嚟走去，係每間買幾樣，又走番出嚟，然後再去下一間。
12間入面有五間已經係喺埋一齊架喇，但係呢到嘅地理環境，因為係沿海地方，同埋係有一定歷史嘅市鎮 (唔同新市鎮可以整個城市設計好先起出嚟)  呢到所有野都係東一拂西一拂咁樣嘅，就算我唔怕行，想泊一次車行晒 5間都唔得，最少點都要泊3次車。

然後又講番我嗰張八折優惠券。
因為呢到沿海地區，濕度重，嗰地下成日都黐笠笠，用過好多款唔同嘅地拖，又試過加料落去拖地 (洗潔精 / 醋 / 漂白水) 結果都係一樣，所以趁有張優惠券想話買個 steam mop 蒸氣地拖試吓。

我想互聯網最偉大的地方就係可以比我睇到好多用家意見。所有產品嘅意見都係一半半，所以我嘅預算係100蚊樓下買一部嚟試吓 (八折之後約80蚊) ，我覺得對比起5蚊個地拖呢個預算係好闊綽架喇，但係呢間舖頭只係陳例貴價嗰的(150蚊以上？) ，其他一律要網上買？？！！

咁我行到入嚟，又有張八折優惠券，比著係以前嘅我，一定會 (為咗唔好嘥呢個八折)  買的野。
但係我行入去，一支箭咁走去睇我目標嘅蒸氣地拖，見無行之後(唔想花200蚊買個嚟試吓) ，行咗間舖一個圈，由廚具，床舖被蓆，厠所用品，杯杯碟碟，整蛋糕嗰的五花八門嘅小玩意都睇埋，都係空手而回。

現在想想，要20歲嘅自己明白呢個道理？
嗰時嘅我，已經開始有信用咭欠債，曾經一個地步係阿媽問我有乜嘢咁多野要買！
道理其實係一樣啦。
就係分"想"要 同 "需"要之麻。
但係明唔明 同 做唔做到就係兩回事囉。

係呢到依家成日落雨，好想買件雨褸，發覺呢到的舖頭的款式真係老土，行到入去好似80年代行入去國貨公司咁樣架！
呢到天氣又凍，件雨褸一係要大件到可以著係我咁多件褸外面先得，一係就要揾件厚的嘅雨褸可以保暖同時防水，行完之後答案係 "無"!!!
有幾個運動牌字的，薄 it it 咁嘅雨褸，賣90蚊！！！而且全部都係短身嘅，好唔明的設計嘅人，乜佢隻腳會唔濕架咩？

其實我淨係想揾番細個時著嘅黃色膠雨褸啫！！

 就咁樣走嚟走去，4:30pm 返到嚟仲要即刻煮飯，寫埋呢到之後就要瞓囉。
5am 起身的生活。。。

海市蜃樓

雖然今朝明明喺到煲緊劇，見到出面又凍又濕又霧又雪又雨，但係我都決定一鼓作氣叫自己出去行咗先，咁樣返嚟懶成日都無咁內疚。

然後比我影到呢個美景。

海市蜃樓應該就係咁樣

完全無落任何 filter 無做調色

今日的顏色，就係咁樣灰濛濛的

呢支棍又結咗的冰，不過好得意，唔係一舊的，

係掛喺條棍到嘅

其實藍天就係後面

你一定要學識睇穿睇透

睇落就好似玄疑案的書嘅封面

原先以為搬嚟呢到第二年了，

無咗第一年嘅新鮮感，

好似乜都睇過了，每日出嚟散步會好悶，

其實，你再細心抬頭週圍睇

仍然有好多野有待發現

好似呢個水珠

好像在水珠裏有著另一個世界

雀都出來了

有無諗過我地人類就著襪著鞋

雀仔還是那雙腳係雪地到行

除咗日出的陽光，每朝早上令我覺得新一天來了，

就係雀仔的叫聲

因為仲係好早，無乜人，我企得近的佢都無飛走，

睇到佢下扒嗰舊肉喺到震蕩嚟發聲

連佢的頸毛都豎起埋

今日全部都好好唱口，好似雞啼咁樣，

好似就係到話 "春天就快嚟囉" 

係時候出嚟揾女友喇

出面好多蟲呀！！！開餐喇！