Sun Flower

可以講，係新屋呢到的泥土非常肥沃，乜都種得出。舊屋移植過來的都番生了。更誇的是在bird feeder下面都生出了栗米。

 

係舊屋都試過種太陽花，但都給松鼠食光光了。

 

今年試下係前園種（無咁多動物經過，但不是完全無，前園的一棵椰菜就試過給鹿成棵食咗）

的太陽花真係成個頭咁大架。

下年要搵第二個位種，因為佢地個花頭真係會追住的太陽光去架。

而且現在的位置影相因太暗影相都唔好睇

但就成日有蜜蜂來採蜜

影咁來張，終於影到清楚的蜜蜂

 

等都花兒也榭了。

終於可以展開太陽花第二期活動。

 

剪朵花頭落嚟。

近睇已經可以見到的sunflower seed個屁股

用湯匙或就咁反晒佢地出嚟

 

將的sunflower seeds浸鹽水一日（可加胡椒粉同辣椒粉）

隔走的水，300F焗45分鐘至開始爆開同變啡色

攤凍就食得

種菌

哈哈，唔係層壓式個的啦！

 

係呢邊其實見過好多次，個的一舊木頭咁樣嘅，就咁放係枱面就會生的姑出嚟嘅野。

次次見到（無論係網購還是實物）都要成US$30-$40一舊。唔知係咪一定種得出，唔成功的話會超肉痛，無買到。

 

但係，係呢邊，因為的人唔興食菌類，超市係有得賣，但都係貴。

 

佢地無cheap cheap個的街市草菇，全部都係有名堂的（即係唔會係cheap野啦）全部都話係shiitaki mushroom 或是 oyster mushroom 等等，一個小小的四方形膠兜（約10g-20g，你知啦，菇類好輕之麻），就要成US$5，就算我等就嚟夠期大減價，都要US$2一兜，想整蠔油炒菇，最少都要四五兜菇先炒到一小碟。但等得就嚟夠期大減價，就要即食。所以嚟咗呢到咁耐，真係好少食菇。勁覺得好唔健康，已經無乜菜食（綠葉類）仲要菇都無。唉！

 

咁啱，8月北上旅行個陣，回程時路經一個叫East Tawas嘅小鎮，路經當日就係鎮上暑期的Fresh Market Day，即係人人都拎自家種的 或 自家製的東西出嚟賣，有好多新鮮蔬菜，鮮果，自家製果醬，手工藝，自家製手工肥皂，自家蜂場的蜜糖 等等。

 

係呢個Fresh Market 有樣野的一見就兩眼發光，問下價錢：US$20，即買。

 

 

 

 

點解咁遲先介紹呢個寶物呢？

因為由8月買咗佢返嚟之後，跟據說明就放係陰暗地方好似養鬼仔咁日日供奉佢啦。

點知菇就無得出，蚊滋就大把，個的菇全都好似營養不良的，只是不停生長個長度，但全沒有菇頂生出來，仲要全都是勁瘦的（就好似上圖右上角的那些，只是比那些還要瘦）

 

10月尾時，我已經進入放棄狀態了，就將整個菌包丟出車房。

 

神奇的事就這樣發生了。

 

的菇可能係喜愛凍的天氣吧！出去瞓街幾日，就吧吧聲係咁生呀生。

 

 

那個賣菇的女人話可以出到3－4次菇架，我依家等緊第二輪，希望之後還會生多一次吧！

 

聖誕曲奇日

放心，聖誕仲未到。
但，今年有的唔同。
舍弟要結婚了。
所以，我。要。返。香。港。過。聖。誕。

有邊個會諗到我上一次係香港的聖誕係2007年12月呀！！！好興奮！！！

就係因為咁，我同肥鬼媽的聖誕曲奇日要提早囉！

聖誕曲奇日係乜東東？

呢邊的人過聖誕，咪就好似我地過新年囉。咁大時大節，就梗係要整的應節食品啦。

肥鬼媽嘅傳統係11月尾會有感恩節火雞大餐，跟住12月頭會整一次Pot Roast（烤牛肉）順便我地幫佢搭起棵聖誕樹，再嚟就係12月24號前一星期的週未，會去佢屋企整她家族曾祖母留下的曲奇食譜。其實就係一家大細的親子活動啦！過到去，男的睇球賽食小點，女的做曲奇。

今年其實唔單只因為我要返香港，肥鬼都因為要做清除盤骨骨刺手術面請了兩星期病假，我都請了四日假待在家服役服刑服侍佢，咁最好不過就叫肥鬼媽來做曲奇，有得食又可以玩成日。

本來想做”自私曲奇”的，即係靜雞雞唔比人知自己係屋企整，因為每次講咗比人知會做曲奇，就要分的比人，派下派下最後竟然自己屋企得番幾塊。好可憐！

點知肥鬼媽竟然唔記得帶個食譜嚟（真正陳年的1910年食譜，連張紙都發黃了）攪到最後我地要打電話比肥鬼舅父，要佢讀個食譜比我地！就咁我就無咗一大盤曲奇。

所以今次我發誓要將個食譜做紀錄，”表”係幅牆到以後都睇到！哈哈。

不過唔知點解，每之肥鬼媽嚟一齊整，好似有信心保證咁樣特別好食的，上年我都試過係佢屋企整完返嚟自己再整過，但就硬係覺得無咁好食？

曲奇食譜（美式軟曲奇，不是脆的）1 batch 可做約75件曲奇（視乎曲奇形狀大小）

材料：
3/4 cup sour milk (3/4 cup milk + 1 teaspoon vinegar)
1 cup unsalt butter or crisco (or half cup each, criscp help the cookie stay in shape)
1 cup Sugar
2 eggs
1 teaspoon salt
1 teaspoon baking soda
2 teaspoon baking powder
1 teaspoon vanilla
1 teaspoon almond extract
4 cup flour (another one cup ready on a side)

製作：
1. 先將3/4杯的全脂奶混合1茶匙的醋，靜置一旁約10分鐘。
2. 無鹽牛油豬油1杯（或淨無鹽牛油也可）加入1杯糖及兩隻蛋打勻一起直至變cream狀。
3. 另一大碗放入乾料過篩：4杯麵粉，蘇打粉，發粉，鹽，香草精及杏仁油
4. 將乾料混合牛油cream再放入發酵酸奶一起攪勻，此時粉團係略濕同黏手，第五杯的麵粉就係依家逐小加入，直到麵團可以碌開便可以了（太多的粉曲奇會好乾同硬）
5. 如枱面夠大可以一次碌開整個麵團最好。如不可以的話，麵團最多只可碌開三次（因為每次碌開粉團時，你會不停的加入手粉）所以碌開第四次的粉團整出來的曲奇會好硬。
6. 350F焗6-8分鐘，6分鐘時打開看看，反轉曲奇背面，如開始變啡色便可以拿出來了。

注意：
輕度發酵酸奶作用是另到曲奇入面更鬆。
本來用淨無鹽牛油也是可以的，但用牛油豬油混合呢，曲奇就不會變形太多。

 

好喇，呢到就係整整150塊曲奇。

 

 

我鐘意只係整某幾款的形狀，方便設計圖案同填色。

肥鬼媽就鍾意整好多唔同形狀嘅。

準備好開始畫畫。

 

肥鬼媽係都要影呢張全相，佢特別order要影埋後面掛係牆上個把鋸。呢把鋸大有來頭。

呢把鋸係肥鬼嘅 Great Great Grandfather John Wardell Jr嘅。

 

之前有一篇介紹佢嘅blog:

http://thepenguinsfamily.blogspot.com/2013/10/blog-post_26.html

 

佢係一個木工匠，生平當然有好多鋸，但留得落嚟的就得番五把。肥鬼媽好有心思，特登拎的鋸去番新，再搵畫匠畫Presque Isle上去，再分呢五把鋸比五個兄弟姊妹。Presque Isle係呢到北上一個小鎮，係佢地家族每年暑假渡假的地方。呢五把鋸就咁變成好有意義的聖誕禮物。而我地牆上呢把係本屬於肥鬼媽的，佢係我地入伙時就送咗比我地。

 

 

 

哈哈，介紹完歷史，話咁快就同曲奇填完色了。

上面呢的只見糖霜的就係肥鬼媽的傑作。

其實整兩批的曲奇（約150塊）

用兩磅糖粉（加少許奶，杏仁油，牛油打勻再加色）

對於我嚟講係絕對足夠的了。

但係你地都睇到，肥鬼媽簡直係一pat一pat咁將的糖霜塗滿個曲奇，

真係多多都唔够佢玩，結果用咗3磅糖粉，

仲要好多曲奇係我畫嘅，唔係的話佢會整夠4磅糖霜都似。

 

 

而呢的美麗設計的就係我嘅作品。

 

 

其實，我最鍾意啱啱焗出嚟的曲奇，乜都無，

少少甜，暧暧的最好味。加杯熱茶就prefect了。 

 

 

但，佢地呢邊的人點會識食呀！全部都要給糖霜蓋的滿滿的才食。

最後，肥鬼媽拎了兩盤曲奇返屋企，

 

可惡的是她拎走的全是我那些美美的少甜曲奇，

佢留低晒個的超甜曲奇比肥鬼呀，攪到我又再次得番幾塊渡日。

猛鬼Cup Cake Day

仲未有小朋友的我，適唔適合做人媽媽實是未知之數。
但，有一樣係已知的，我真係唔適合同小小朋友一齊做。勞。作。

本身有少少完美主義DNA的我，同小小朋友一齊做勞作，看見佢地攪到天一半地一半，又畫到烏呢單刀，實在係到攪亂檔，我就好想反枱。

已往出現過的情況是（因為以前係香港是帶童軍的）都是小朋友好有紀律的聽我命令，不可亂來（哈哈）但在這邊，講求不可握殺小朋友創意的年代，你要由得他們亂攪一通。

所以結果係我會回家再做一次美美的。

係呢邊，一到年尾就會有好多呢的親子活動。由萬聖節的整南瓜燈，整萬聖節服裝，到聖誕整曲奇，到裝飾聖誕樹等等，都係一樣的，同我們中國人新年整應節食品一樣，都係男的坐埋一邊看球賽，女的加小朋友就整野食。

我來的第一年都有去肥鬼阿姨屋企整南瓜燈
（http://thepenguinsfamily.blogspot.com/2008/10/blog-post_29.html）

但是，第二年開始返工之後，就懶了，不願開車那麼遠（其實只是40分鐘）而且，我還是過不了拿食物來玩的問題（大大的南瓜割去很多 － 都丟了，然後南瓜就擺出街幾日裝飾一下，最後還是丟了）所以，參加過一次之後就沒再去過了。

肥鬼媽是很想我去的啦（每年都打電話問我），但在整個家族中，我是唯一做零售的一個，也不能叫他們全就我而安排在星期一至五攪，相反要我在零售業第四季的週未放假也好像是辭職還要容易一點。

今年，肥鬼媽變陣，只是叫來表弟的兩個女，一同來做小蛋糕，還要是星期二，實在不好意思推，雖然那天是我唯一放假天，還是去了。

肥鬼表弟也是made in USA喇，但他的太太，是從三個月大由韓國收養過來的，所以他們的女兒全是mix喇。而造物主神奇的地方就係呢度：

呢個係大女 Lillian 金髮藍眼

 

呢個係二女 Mickayla 黑髮黑眼

其實還有一個小的Brianna，但太小了，未夠一歲，沒來。Brianna也是金髮藍眼的，看她們站在一起是很是趣怪的。

呢的就係佢地整嘅小蛋糕，其實所謂佢地整，就係把粉漿一匙一匙的放入小蛋糕紙杯中，然後一同看著肥鬼媽放入焗爐，焗完之後就一齊把糖霜塗滿個小蛋糕，再灑的糖係面。
本身個蛋糕已經係甜嘅，再加糖霜同裝飾糖，實在係恐。怖。

每一次呢的親子活動，都係預備了應節的袋或紙盒，等小朋友可以拎製成品返屋企。我不停咁想塞滿佢地個盒，務求我唔使帶返屋企（咁甜，真係唔會食 + 唔想食）但肥鬼媽好心水清，抽起六個叫我拎設嚟比肥鬼，有名你叫 － 肥鬼，仲食咁甜？我轉頭拎咗返公司比晒同事了。

係等焗蛋糕的時侯，我地就整米通（rice crispy）呢個甜嘅程度無咁嚇人，都幾好玩。做法係溶咗的綿花糖，放的米通入去等佢地痴埋一舊，放入造形模，壓實個形狀，再用兩支糖霜膏畫眼耳口鼻。

 

就係呢到，看到她們畫的烏呢單刀，慘不隱睹。

呢張好明顯係我畫了給她們，然後佢地又要畫，都塗滿了。

 

第二天，我的完美DNA發作，走去買番個盒米通手工，自己做一次，哈哈。

 

 

 
 
 



整”攪”子

上一次無無聊聊發神經係屋企試下整餃子，都唔知係N年前的事了。
應該是剛來美國又未開始做野個兩年？
日子過得真真快，唔經唔覺，搬來這邊的日子，已經要用”年”來計算，
不再是”1日”，”1星期”，”1個月”的了。

上一次手痕，因時差沒有打電話問（ 功課 ）阿媽調味的比例，
又白痴的沒上網找找食譜，仲要胆生毛的自己去揉麵糰，
結果的皮又厚，隻餃又無味（點豉油食都好淡）好彩只係小試牛刀，整咗十幾隻咁大把？還沒有做成嚴重經濟災害。

今次手痕，原於早前係KBS電視成日見到的韓國師奶整泡菜肉餅
（打碎泡菜＋碎牛＋調味，揑做一塊塊肉餅，點蛋漿再沾麵粉再煎熟）

但係咁啱屋企的泡菜都食完了，就惗住雪櫃入面乜菜都打碎一的放入去啦。
又咁啱打莞茜的時侯肥鬼聞到話好鬼香，仲話最鍾意莞茜的香味（佢話如果的家用空氣清新劑有莞茜味佢一定會買喎）所以我落重本，十幾廿棵莞茜打晒入去，食咗兩日肉餅，有的悶。又有兩日假，好！又試下整餃子啦！




今次再挑戰餃子，因為還有上一次失敗的陰影，所以都係唔敢自己搓麵糰，出去買餃皮好了。而且為了不能再失敗，我再上網看清楚對摺三角形／長方形之後係點樣屈成個餃樣出嚟。

樣樣都準備好了就坐低包呀包，包包下就發覺餃皮只淨下幾張但還有好多料，又要出去再買多的餃皮，最後一個下午聽著903完成了一共210隻餃。





包吓包吓，爆口或樣衰的都有十多隻，就先吃了吧。
其他的都雪冰櫃，100隻給了台灣太，100隻留番我地自己唔得閒無飯開就食餃子啦。

白切雞飯

其實點解白切雞會叫白切雞呢？

我記得我食過的所有切雞飯，的雞都係黃色個喎

直到呢一隻。。。。





雖然張相係樣衰的，但我嚟咗咁耐，都係第一次食白切雞飯，仲係自製的，算係咁啦！我嚟咗呢邊之後，其中一樣最掛住的食物　－　就係燒臘／燒味，但因為對呢邊的中餐係無期望的，所以基本上都係等返香港之時才一飽口福嘅。之但係唔知做乜鬼呢排突然間好想食，就整個最易架啦！

雞，當然係雪藏的啦。

好在我用蒸雞出嚟的汁嚟煲飯，都叫有的味咁囉。

而最重要係。。。我特登買葱整的。。。





滾油 + 葱 + 豉油作為襯托（定呢個先係主菜？），先可以給呢隻無嚟味道的白切雞一點風味。

話時話，一隻四磅的雞，比我蒸咗一小時，但係的雞胸肉一的都唔”鞋”，我唔係贊緊佢地，我係覺得咁樣係唔正常。我覺得係呢度的雞natural（天然方法養）極有限。而且我成日懷疑，係的人係雞的DNA做咗手腳。佢地鍾意食雞胸，就攪到的雞隻隻都大胸，仲要整埋的雞胸嘅texture。

係真架，我留意咗好耐架喇，我見到呢邊的女人，好多都真係淨係肥係個胸同個肚個度，對腳可以真係好不成比例咁幼架，邊有理由呀？仲唔係食得DNA轉化雞多，影响埋人的hormone（荷爾蒙）咩？！大家得閒留意下睇下同唔同意我個理論。

我本人基本上支持及同意飲食要平均，唔單只係菜／肉／飯的比例，還有五味（甜酸苦辣咸）同埋韓國人講的五色（黃紅青黑白）。

＝＝＝＝＝太陽報2010年1月10日

不單中國人擁有藥膳，韓國人也有「五色五味」的飲食規條，五色跟五味，對身體健康環環緊扣。
五色 五味 五福

原來韓國人把食材以黑、白、青、黃、紅五種顏色來分類，加上不同烹調方式帶出甜、酸、苦、辣、鹹五味；他們認為每餐只要食齊五色五味元素，便令金、木、水、火、土在體內平衡，美顏不特止，更可達至長壽、富裕、健康、德性和兒孫滿屋，是為「五福」。

＝＝＝＝＝

可惜呢邊的人完全沒有呢個概念，淨係鍾意一味食甜，仲要用唔天然嘅方法整走晒的唔好味嘅（或唔鍾意食嘅），所以要佢地食苦瓜係無可能的，更惶論要佢地食得出苦瓜的金味，所以佢地係唔會知道／享受到苦瓜的好處了。

＊＊＊＊＊＊＊

題外話一則

在我小學的時侯，我也忘記了是那一科的課本（好像是健康教育吧），其中一課的課後題目是叫學生想想一樣覺得最好食，又最少有機會有得食（最罕有的）食物。

好多同學的答案都是魚翅呀。。。燕窩呀。。鮑魚呀。。。等等貴野啦

而我。

我竟然畫了一隻雞。哈哈哈哈。

還要比阿媽發現了。哈哈哈哈。

阿媽仲話我”作死你呀！家下我虐待你咩！聽日你老師仲唔以為我屋企無飯開，雞都無得食。。。。　。。。。”

之後阿媽就問我做乜鬼畫隻雞。

我答案係：因為你係拜神個陣先會整雞囉！哈哈哈哈。

事實係：我阿媽梗係有整雞啦，但平時無啦啦，係唔會整一整隻的白切雞麻，最多咪雞翼呀咁囉，但我就係印象最深刻個隻金黃的白切雞麻！哈哈！

茶碗蒸

有名你叫茶碗蒸，係日本就用茶碗，係美國囉喎，就梗係用飯碗啦！哈哈！

今日咁啱係面書睇到一段日本人做的短片教整茶碗蒸，咁啱竟比我發現屋企有齊所有材料（除咗佢係片中好似係用味噌粉的物體，我就用咗雞粉）即刻整嚟食，仲要整（食）開有條隱，整咗兩日，四餐都係食飯碗蒸。





依家係Wally World返工，有個"5-kid lady" (J) 係同我最好朋友，人如其名（我認，係我改的）佢大我一年但有五個小朋友，初時聽到真係嚇我一跳，因為生五個小朋友好像是上一代先會發生的事了。而且佢仲話想要繼續努力（沒避孕，但近三年沒再有小朋友了），嚟返工的原因不為其他，而係想儲錢去領養，最令我驚嚇的，係佢屋企小朋友全都是家教的（即係小朋友不在公共教育機關返學而是在家中自己教）

未來美國之前聽到很多各式各樣的新閒，什至香港都開始出現有家長唔送仔女去返學比政府拉咗（下聞如可不知道）我自問對家教制度認識唔多，唔敢評論對錯。只係自己係平凡的人，要做不是常人（大多數人）做的事就覺得真係好大膽呀

還有就是未來美國之前，係香港睇電視(TLC??)一個真人記錄片，有一個美國家庭又係咁樣不停生（好似依家仲生緊）好似有唔知16定17個小朋友喇！而我本人係唔同意過度生育架，所以我第一日開始識得J的時侯，就只係聯想到呢兩樣野渣。。。

直到依家，每次J一見到小朋友就會兩眼發光不停贊的小朋友真係好可愛呀，好想有小朋友呀等等等等，我都會覺得毛管洞，有點怪怪的。。。（就算依家老友咗都係）

但識佢耐咗，佢一家都好正常架！（佢一家人成日嚟shopping，我地兩個差唔多日日都見到，佢的仔女一去到wally world唔見我就會係咁問我去咗邊，好似我駐守係呢度咁架）加上認識深咗，佢地家教小組都係好有制度，有晒課程大綱（syllabus）去跟住教，還有佢的家教小組好多組員係教師嚟架，大家諗唔諗到問題究竟係邊呢？依家呢邊的學校（特別係公校）好多都同香港一樣啦，又濫藥啦，時不時又槍戰呀，點睇都好似係屋企教好的咁囉！同埋，講到尾，個小朋友放學返嚟，你唔理佢的功課呀，温習呀，咁佢係現今嘅學校又學到幾多呢？

＝＝＝＝＝＝＝＝

講完一大輪題外話（介紹阿J），係時侯講番正題。

話說我地成日一齊返夜班的時侯，就一邊（扮）摺衫一邊傾計。

因為J的一家都係好有挑戰性的人，佢地會大胆嘗試各地美食，今天，我就簡單的講佢知呢個簡單的茶碗蒸做法。

講完一大輪，佢話："呢個係咩嚟架？？？"　"係主菜嚟架？？？"

我話："唔係呀，呢個係日本的前菜嚟架"

J話："吓！做咁多功夫整咁鬼耐，只係整咗個前菜渣？！？！"

我話："係呀！去食正宗日本餐嘅時候，會係成枱都係好多一小碟一小碟的前菜，由十幾碟到百幾碟咁囉，全部都好精致巧手架！"

J話："啊！唔怪之得的亞洲人全部都咁細粒啦！成日都攪完一大輪，都係得個小小野食！"

我：

Kimchi Pancake

暑假沿湖散步的時侯，有緣認識了一位台灣太太　－　Chin。

她平日是住在Farmington區的，只是週未才過來這邊的渡假屋，可是經過了差不多半年的時間，她現在是我最常見的亞洲朋友，時常分享我們的亞洲美食，所謂分享，其實好多時都是她煮了再打電話叫我去食，哈哈哈！
我在家中電視看的是Dish Network，而韓國的KBS Channel是包在基本套餐裏面的。韓劇可以說是現在我可以看到的最近似香港的電視劇的東西了。
在韓劇入面，常常見到一家人會整泡菜薄撐(Kimchi Pancake) ，成日睇得多，攪到我成日都好想食。
咁啱上次去阿Chin屋企，佢拎咗呢罐野出嚟下午茶，仲比咗一的我拎返屋企。

即刻整嚟食。。。

好easy : flour 2/3cup, corn starch 1/3cup, 2 eggs, water and shredded kimchi

好食到我叫阿Chin幫我買了一罐，唔夠一星期只得番一半。