揼時間

不定期的每日一字 : Procrastinate
又解做拖拖拉拉，揼時間的人

上回講話我係屋企有幾十範嘅野同時攪緊，部份原因係我自己的選擇困難 + 零 專注力 + 又唔忍得悶，但係突然間挑起條筋又會痴咗線咁樣開行turbo，咁復雜嘅病情都唔知點診斷。。。

想起細個小學中學，有作文堂，通常係連堂，老師比題目你就用上堂時間嚟作，一般係落堂就收文架喇，人人都係求其作完就盎眼瞓或同其他已經作好嘅同學玩，我呢？次次都係發夢遊魂嘥時間，到得番30分鐘喇，無時間喇，就會零感到，上咗身咁係咁寫係咁寫，次次都係咁，每個坐我隔離嘅同學都知我有呢味習慣，哈哈哈哈。

仲有就係放學，人人都雞咁腳走，我就執書包執九世，我個friend 係隔離班嘅，次次都等到唔耐煩，要過嚟執埋我一齊走。

到出嚟做野呢個情況又好番的，因為老細比九十萬樣嘅你做，日日都話有 last minute 野，即係趕啦，無得你揼。。。

為咗準備呢個月每星期兩堂學琴，今日行路返嚟之後即刻衝出去買餸 (買零食；買肉類放冰格；菜類不能放太耐，一定要每隔幾日去行路5分鐘的超市買) ，希望呢個月都唔洗再去，要晨咁早衝出去因為聽日係復活日 (Easter Sunday) 所有人都鐘意最後一刻先去迫。

我係去 Costco 買野嘅，其實買嚟買去都係嗰幾樣，所有位置都記住了，本來個流程係好順暢嘅，唯獨是我的韓國紫菜，次次都搬了位置，要揾都唔難，但係人山人海的推住架超巨型購物車去揾就堅有難度。

行咗兩個圈都揾唔到，所以呢個月放棄了我的紫菜。

係香港去街市或超市，都係邊行邊睇再決定買乜嘢。有時間嘅時候，我都係咁樣嘅。或者話，初過嚟嗰時都係咁嘅，但係呢邊，更多時係人人手揸住一張紙，上面列明要購買的，跟單執藥咁樣買野嘅。
我初時唔信架。

最經典係阿姨喺英國嚟探我地，阿姨喺英國住咗好耐嘅，我地一齊去超市，佢都係跟單執藥咁買野架，肥鬼即刻話 "你睇吓，你阿姨都係咁架，唔係你次次行幾個鐘都未買齊要嘅野。。。"
咁多年之後，我都變埋執藥黨。

呢邊的超市 marketing 係在係强勁，你跟佢每一行每件貨嘅擺位咁去行去睇，實次次都破產出返嚟架。

食幾多

手痕。
係百忙之中，又揾咗套韓劇睇。
Let's eat 2 一起用餐吧 2

睇第一套嗰時，仲未轉生酮飲食，睇見佢地係咁食粥粉麵飯，好鬼吸引，然後走去煮個辛辣麵加芝士一路食一路睇，哈哈哈哈

話忙唔係講笑。
我依家又織緊一張披，係好肥嗰的冷，50針就一行(一針一吋) ，但係原來嗰支織針係無乜用的，係要用手指去"了"每一針出嚟，都幾花氣力，不過超快手又一舊冷，希望可以好快完成。

之後又因為過咗冬季，頸巾大減價，買咗兩條有毛毛的，返嚟拆佢出嚟再聯上去自己件外套嗰帽嗰到，的針紙工具拎晒出嚟就日日係到縫，要襯住自己撻着咗個摩打就快的整，唔係就下年冬天仲係原封不動。。。

經過差不多一年嘅生酮飲食，再睇呢套韓劇，真係好大分別，至少無受到引誘去食辛辣麵。

劇中女主角細個時係肥妹 (同我一樣！) 成日係餐廳外面對住的食物自言自語，真係我諗係所有肥人都試過咁做，嗰的要減肥乜都唔食得但係又好耐無食過嘢想比個理由比自己去食嘅內心掙扎，真係好中。

面對食物的引誘，就算生酮幾有功力都不敢輕視，只可以話係依家頭腦清醒咗好多，無咁容易啫。。。

講食。

我有一個四姑婆 (阿媽叫佢四姑媽，即係阿公嗰四家姐) 佢一生人都非常節儉，非常好人，以前係廣州打仗嗰時無得食，成日都自己唔食留番比的細佬妹食，後嚟老咗得了老人痴呆，就一日24小時都話肚餓未食飯要揾野食。

阿媽話做人一生著幾多食幾多係整定架，佢未食完 quota 所以老嚟係咁食。

我諗我的 quota 應該一早食晒，所以依家都唔係成日想食野。。。

學野

依家有的明白點解的人會話，幾老都無問題，

都可以揾的野去學吓！

前題係你要揾的你好想學嘅 或 有興趣學嘅，

唔係就咪喇，攞嚟攪，

我覺得係屋企百無了賴過日晨都無乜問題架，

嗰的成日話要過得充實呀乜乜物物呀，

係因為佢地自己鐘意忙啫。。。

我覺得呢一個月(3月) 過得好快呀！

去上堂時係有緊張，但更多嘅係興奮！

依家完全唔想嘥時間出去買餸 (好在冰格有存貨) 

我諗嚟緊4月我會一星期學兩堂，

因為嚟緊暑假好天氣會去旅行，就當依家還算容易嘅時候學密的，遲的就轉番一星期一堂。

我的 飛時book detox 進行得好順利，只是突然一日之間就無再入去，我淨係話咗比屋企人知我無玩 飛時book 了(真有事就打比我) ，其他朋友唔知，有幾個仲喺入面轉來短訊。

我其實很同意 飛時book 本來的宗旨 "connect people" (將人連接起來) 特別係我呢的離開屋企好遠嘅人。就算唔好理朋友圈子，淨係比我阿爸阿媽睇到我每日做的乜點樣過，或者比佢地睇到個孫嘅長大，淨係呢一點，佢地喺功得無量的。

但係另一方面睇，我地係唔係真的連繫起來了？就好似我 whatsapp 群組入面的小學同學，我們好似真係連繫起來了，但我們真的連繫起來了嗎？
真係同我有傾偈嘅其實都係那個會打電話嚟嘅人。

係飛時book detox 頭幾日我睇咗 twit喳 幾次，好快，我就醒覺了，唔睇飛時book 轉去睇 雀仔，咁有乜分別？咪又係睇人地分享的野然後心心然後再分享。。。跟住我就連雀仔都無睇 lu...

要打破呢個隔局，我想最好的方法都係用自己 website 我諗嚟緊我會從呢個方向走，呢到係會繼續嘅，我係諗緊我嗰幾萬張相，order 咗本相簿之後，依家諗緊用番 photo blog 嗰類都唔錯，要研究一吓。。。

呢到係凍的，但係今日咁樣嘅藍天白雲嘅日子，真係乜都抵番，係到要講，加拿大雖然係比較左嘅國家，但係佢地嘅環保真係做得好好 (當然還有好多可以做啦 eg 太陽能街燈 循環再用膠舖路)  呢到的水堅係好清。
睇過幾集講動物的，呢邊的水源曾經一度都污染得好勁，用咗成20年先至救番好的。

明明日日都行呢條路

明明尋日仲係陰天落雨勁凍

今日開花了

希望小黃花無較錯鬧鐘吧

人類同螞蟻真係相差無幾，早幾星期暖咗的的，嗰的螞蟻就走晒出嚟活動。今日暖番少少，出面沿海的長凳全都坐滿人了。。。

難以啟齒

今日陰天落雨但係暖咗好多，希望今次真的是春天來了。

我呢個 blog 的讀者長期徘徊於低位 (多謝嗰幾隻小貓呀！) ，其實我係驚訝有人睇多過希望有人睇，我當呢到係自己的日記，記錄一的自己對事情嘅睇法，我什至無特登比我屋企人知我呢個 blog 所以先能夠屋企人嘅野又講吓，以前男友嘅野又講吓。
有時仲諗死嗰時，好唔好話比我的屋企人知呢？
定係由得佢自然收檔？
點解我咁早就杞人憂天呢？話晒互聯網係如此虛無漂眇嘅野，到我死嗰時還係到嗎？

不久前睇到呢個日本出租大叔嘅訪問：
女記者親身實驗約會出租大叔

出租大叔話有男士會用出租大叔嘅服務，就係好似朋友咁飲酒傾吓計，然後個記者就話咁約朋友咪得囉，反而係出租大叔話 "就算係熟朋友，都有說不出口的事情！"

完全講中咗 呢個blog 就係我發吓噏風嘅地方。

食之日常

肥鬼今日放假最後一日。上星期因為牙痛而早走了，遇上長例假，可以話係聖誕後的一個小休 (成個禮拜，屋企錄影嘅電視都睇晒喇！)

晨早又去了超市 (因為嚟緊係復活節長週未，有三日會乜都唔開。)
之後見呢個星期成日出街食，諗住返屋企嘅，點知路經呢間，肥鬼話好耐無飲 thai tea 就走入嚟了。

11:30am 以為未開門就疊埋心水打道回府，點知啱啱開，還好即刻坐落叫野食，因為係我地入嚟之後度門不停開開合合，好多客，好快就坐滿咗。

肥鬼的例牌 thai tea

以前係 michigan 去嗰間 siam fusion 佢地嗰 thai tea 係涼粉水味，依度呢個睇顏色就知係 plum juice 味 (梅子水) 都係好甜嘅。

試過嚟呢到晚飯一次，就決定以後淨係嚟午餐算了，都係嗰的餐，但係午餐時段係咁樣嘅：

有飯有餸有春卷或米卷，份量啱啱好。
如果係晚餐就淨係得餸，飯同春卷都要另外落單計數。

呢個米卷係兩條切開4舊咁樣計嘅。

我已經唔再好食飯，叫咗青木瓜沙律加牛肉 (肚餓無影) 超好味。
之前試過叫燒牛肉沙律，但係無乜菜食。
又試過叫沙嗲串同湯都好好味。

我成日都有選擇困難，所以好多之嚟呢到都會叫春卷同米卷都叫晒，哈哈。

題外話：

服務的女生做野非常爽快 (有香港茶餐廳咁快，又醒目) ，

心裏有一刻還想係唔係香港嚟讀書嘅呢？我呢到好偏僻，好多都只去大城市，

埋單時多口問吓，是東莞長大的，也是講廣東話，但係我同佢傾計時，肥鬼話佢都聽得出的廣東話同我有的唔同 (??  堅定流，咁都聽到？) 

過關

今日係學琴第四堂。

老師話我勤力練習，下個月可以一星期兩堂，我仲考慮緊呀！因為依家一星期一堂，我係每日練少少咁樣嘅，如果 double 咗變兩堂，我真係要日日練喎，我唔想應承咗老師又做唔到。。。

其中幾個氣球畫咗公仔。

呢邊嘅人有個習俗，就係如果有親人去世，

佢地會做小型的記念會，

會放氦氣球代表將思念帶上去比天上的親人

只是無諗到呢的氣球咁樣半天吊

到無晒氣之後比風吹走

又係做成環境污染，由其是呢到近海邊，

每日睇到海邊嗰的垃圾真係慘不忍睹。

今日好天行過又見到海鷗食青口

啱啱好比我影到

上面呢張就係佢啱啱係地下揾到隻青口

下面呢張就係佢飛高擲佢落地

呢隻都要擲兩次先有得食，哈哈哈。

上年暑假阿爸阿媽嚟玩的相，整咗本相簿比佢地，電郵話4/2先到，點知今日阿媽就話收到。

阿媽係咁話成百蚊美金好貴，我覆佢話 "貴就日日揭日日睇，拉番勻佢平的啦！唔好柄埋一邊呀"
其實係佢地生鈎鈎時整比佢地，日日摸住睇住一齊旅行的時光，好過死咗先燒幾憶陰c紙比佢啦！

與時並進

Sometimes,  I really feel bad for my parents and their generation.

究竟要點做，做到乜嘢程度，先叫足夠的與時並進？點樣先至係以不變應萬變而不是恐龍化石一乘不變。

其實唔單止我阿爸阿媽，肥鬼的阿爸阿媽，仲有我所有老人家同事們都係。

幾經辛苦學識玩電腦，識得乜嘢叫做 "菇 gle 大神", 又再由普通電話學識去玩智能電話，跟住又要學嗰的社交網站，我個同事啱啱幾個月前先開始學用人生第一部的智能電話，相熟的同事立即幫佢(教佢) 玩飛時book 開咗個戶口個幾兩個月就比人hack 咗要再開另一個，還未學會 tag 人，post 野佢人地嗰到，什或係 飛時book messenger 等等等等

我阿媽嗰的仲要防 whatsapp 騙案 ( 扮朋友 send 短訊問你得唔得閒代收驗證碼) 睇嗰的洗腦長輩圖，玩飛時book 嗰的心理測驗，睇 youtube 嗰的八掛短片 (題目 xx 女星又要重出漿糊內幕真相)

你叫我點樣話佢知我依家連 飛時book 都唔玩喇 (呢樣最慘，因為係有時一張相一個post 可以比佢知道我係呢到每日嘅生活，對父母係好大的思念嘅安慰) ，因為飛時book佢會偷你大數據，就算佢明乜嘢係大數據，依家紙媒都灰飛湮滅了，今時今日佢仲可以睇乜過日晨？

講開又講，係我 whatsapp 入面，已經好少 group chat 有野都係單對單講的最好。有一堆小學同學開設了另一個 group chat 咁耐以黎我因為好耐無返過香港所以無見過 (有興趣見面嘅，但係返去得嗰幾星期見屋企人同 friend 嘅朋友已經無乜其他時間淨囉！) 竟然係呢個 group chat 入面最多人 send 長輩圖！！！

我唔知其他同學係咪真係咁 friend 有一日其中一個開設呢個 group chat 嘅同學 "好驚訝"的傳來短訊說某某退出群組了？！？！

我想話 "乜你日日去 check 住邊嗰係個 group 入面架？"
講真，我無係群組入面講過野，我唔覺得中秋節不停 send 嗰的 "中秋節快樂"的圖畫有是很有意思很有心意(?!)
係呢個群組入面我可以話係隱形人，有這樣一個群組又有乜意義呢？

(呢張相爭一隻船就有晒海陸空的運輸設備) 

(溶得通透的雪) 

初過嚟的頭幾年未返返工，成日去教肥鬼媽同佢阿爸用電腦。肥鬼阿爸仲買埋嗰聲控的軟件，其實比無用呢個軟件仲麻煩，但係又講唔明佢地。依家佢兩個都放棄了電腦淨係玩電話。

我想話，肥鬼媽到依家仲係靠佢本記事簿，我地的生日咭，結婚週年的咭同禮物，全部都一件不漏，準時到達。

或者我都應該用番古老的方法。

貴公子

肥鬼媽的電腦好似快要壽終正寢，肥鬼要幫佢睇睇 order 一部新嘅比佢。
想起了太太們入面其中一個 L太太。
(其實佢好似同肥鬼同事分開了，不過這是人地私事，而且佢很好人，開朗，攪笑，所以次次聚會都叫埋佢呀！) 不過唔係次次佢都得閒出嚟呀！點解？

佢有一個大約7歲的兒子，聚會幾次之後熟咗發現原來還有一個十幾廿歲嘅仔住係夏威夷佢家姐到，照顧一個7歲兒子應該唔係好忙吖！
錯了。
佢仲有一個 teen 女兒，好似係女兒男友都同佢一齊住的，而且，重點來了，佢仲有三個海外讀書嘅細路住係佢屋企 ( 一個來自日本，一個墨西哥，一個唔記得了， 即係佢做 host family 照顧呢的細路) 全都是中學生，所以每日接送返學放學，煮飯，課外活動，就已經係全日滿的行程。

聖誕之後嗰次聚會，講開佢的細路，佢話嗰的細路全都係嚟自有米的家庭，因為嗰個都有數之不盡嘅電子產品，全都追上最新的型號，其中墨西哥那個細路的爸爸給 L太太一家人都準備了昂貴的聖誕禮物。 而且佢係收費的 host family, 不是免費當交流的那種 (價錢好似都唔平架，所以對L太太住嘅地方都有一定要求嘅)

同 L太太傾完計之後，就想起了我唯一曾經的男朋友，佢都係由香港嚟美國讀書，住招待家庭。嗰時同男友還是熱戀呀，佢會將佢 send 比阿爸的 email 都比我睇。(原來我嗰時已經有超強控制慾，哈哈哈)

最有印象的一個，就係佢話要買電腦，佢阿爸叫佢去 Dxll 嗰 website 睇吓再傾睇吓佢需要邊的。佢地最後話睇啱嗰部電腦係 US$4000 係呀，我都以為我睇多咗個零頭，但係真架，佢地講緊買部 3萬2千港幣嘅電腦，佢仲要唔係讀 computer science 嗰的科架！！！嗰時係佢第一年過去讀，未入大學，讀 community college 一年之後先再考入大學。

嗰時我已經做緊野，人工好似係大約每月萬一或萬二咁上下。嗰部電腦係我兩個月人工。

同 L太太傾佢依家 house 嘅細路，完全諗起我那曾經一度的男友都係一模一樣的，很難想像原來我同這樣的一個人拍拖過。
都是過去的事了。

食

從來唔諗住做 food blogger (依家都唔係架！) 嘅我，嚟呢到 downtown 好多野食，我又老人痴呆，成日唔記得食過邊間，有乜好食，要寫低嗰記錄，睇吓呢幾年係呢到可唔可以食勻晒佢。

今日肥鬼揀咗嚟呢到食：

係結婚週年，所以肥鬼"隆而重之"咁揸車去 downtown 食！平時真係走火警都唔可以叫到佢嚟，因為揸車嚟 downtown 就好似揸車入中環同旺角咁樣，又多横街窄巷，又多人又多車，又要泊街邊，我自己嚟嘅話，都係直接泊海旁然後行入嚟。週未泊車係免費嘅，你揾到位就得架喇。

呢間係食墨西哥 tacos 嘅地方。英文讀法係 "and 他豪" (記住西班牙文 j 發音係 h) 揀呢到食係因為肥鬼的墨西哥同事食過話好味，咁即係堅料啦，所以我地又嚟試吓。

睇吓個地址 ↪ 係呀，同旺角一樣，亞皆老街！
上年第一日揸車到埗，又喺係呢條街食野，完全感受到英國殖民地嘅氣息，即刻覺得同呢到好熟絡咁樣！

美加人好鐘意熱帶地方嘅食物，

因為呢到長年類月都凍，

直頭好想搬去熱帶地區添，

紙水平嘅墨西哥係首選，

就好似我地香港人去泰國覺得乜都好平咁樣囉！

去墨西哥餐廳，坐低就會比 chips and salsa 比你

三種 salsa (醬) 用 chips (栗米脆片)  點嚟食

左邊 Pico de gallo : 蕃茄碎+洋蔥碎+青檸汁

辣辣哋，應該有的 habanero 碎 (青色的辣椒)

中間 salsa verde 綠醬：綠蕃茄+洋蔥打成蓉

右邊 salsa 醬：蕃茄莞茜洋蔥打成蓉

(網上圖片)

呢的就係 tacos 喇！！呢個應該係晚市時段嘅相。

我地今日嚟

(老人家，星期六晨早 11am 就來了！)

待應給我們的是 brunch menu (早午餐餐牌) 

入面沒有大大碟的晚餐食物，

很多都是小食類或份量較細的食物。

肥鬼叫了 beef short rib tacos

因為係早午餐時段，

所以不是上面的 3個 tacos 份量，

而且上菜時不是"安裝"好的，

係要自己動手的，大約係整到兩個 tacos 嘅份量。

墨西哥食物係要落手食嘅，

底下圓形嗰塊係 soft shell taco 麵粉做的，

亦都有 hard shell 用栗米粉做的。

簡單嚟講就係有層皮 (軟皮/硬殼) ，包住的肉類(牛/豬/雞/魚) ，加的配菜(蕃茄洋蔥碎/炒燈籠椒) ，加的醬汁，卷埋佢一齊食。

我今日叫嘅係 ceviches trio
Ceviches 係生的，只是用青檸汁"醃熟"佢的，同韓國的醬油蟹一樣。
Trio 即係 3 所以上面 3 杯係不同的材料。
左邊 吞拿魚 + 青瓜蕃茄碎
中間 蝦 + 牛油果醬 (guacamole)
右邊 八爪魚 同 帶子 + 蕃茄洋蔥碎

去過夏威夷的應該都試過 poke (吞拿魚切粒+麻油 豉油調味送飯咁食) 上面呢個同 poke 差唔多，只要魚係新鮮就會好味。

每次嚟 downtown 我都會去同一間餅店 (bakery) 買甜品比肥鬼 (下面講) ，所以無係到叫甜品。

但係墨西哥有一樣甜品要講吓。

呢個叫 churros 嘅野。
係做好粉漿，放入吱咀，直接吱去熱油炸熟佢，上面再落的糖粉+玉桂粉，佢地係會再點甜醬咁食。

呢個圖入面係朱古力醬同焦糖醬。

我覺得呢個嘢好似我地細個食嘅牛脷酥

分別係我地嘅牛脷酥係落咗酵母，麵團發漲再去炸，鬆軟的，而且我覺得牛脷酥嘅甜度已經好夠了，就算食 churros 我都唔會點醬，點醬食就太甜了。

係 downtown 有好幾間 bakery (餅店)

食過係好味嘅。

但係就以呢間最就腳

Barrington Street NS

上面講過，我揸車嚟都係泊海旁再行上嚟，認路白痴嘅我通常都係行熟一條路就淨係記住嗰一條 (如果我做介款的實比人攞嚟做目標) 

我次次都係買一樣嘅野

Key lime 青檸餅

肥鬼今次自己嚟揀，諗完一大輪都係揀呢塊，

比佢揀多一塊，佢都係揀酸酸哋嘅檸檬tart 好味！