零售

講吓之前睇到嘅一個新聞！

其實我到依家都唔明點解所有人類，一旦當上了"顧客"呢個角色之後，就會理智盡失，好似完全無晒基本思考能力咁樣？

或者咁講，的人話"錢係萬惡之源"係有道理嘅。

因為很多人平時明明係正常人，但係當佢去比'錢'買野嗰一刻，佢就會突然間覺得我比錢買你嘅野，你應份去服務我，我係顧客，我係比錢嗰個，我係大晒嘅，全世界都欠咗我嘅。

依家個世界，已經無乜工廠工作了，市面上招聘嘅職位九成九都係零售業同服裝性行業，照計應該好多人已經做緊或做過呢行，點解仲會有呢的新聞嘅呢？

以我六年零售業工作經驗為例。
我係做服裝部門的，係 Walmxxt 這超市入面的服裝部，提供的包括基本的男裝，女裝，男仔，女仔，BB 衣服，睡衣，內衣。係咁多喇。

日日返工最常見的問題係乜？

就係的人同你挖開個膠袋，扯嗰條機器摺嘅底褲出嚟睇/摸/試，然後成 pack 野丢係地上面，掛番上去都費事。
有的會比人偷咗幾條架啦，有的人就會同你自動 mix and match 啦。即係一包入面有淨色有花花嘅，佢同你拆開換走晒的花花款，淨番兩包唔夠數嘅淨色底褲比你。
呢的比人挖開咗嘅 package 底褲 / 襪，無論我幾好心機包翻好佢，都唔會有人買。就算係挖開佢嚟睇嗰個人都唔會，佢會睇完就攞另一包新嘅嚟買。

所有人都覺得，我比"錢"嚟買野，梗係要買靚靚仔仔嗰件貨啦，呢的挖爛咗包番嘅無人會買。

所以呢的爛貨 (無少到架，一樣咁多條) 我地一般係要將佢特價咁嚟賣，之但係另一問題又出現喇，就係，聽日會有人走嚟，特登挖爛包底褲要求特價！仲會有人明明見佢係挖爛咗再包番嘅，佢都要再挖爛嘅嚟睇！！！

最初嗰時，同事話我知呢的比人挖開咗嘅 package 底褲，可以拎去退貨部？！
吓？件貨由 made in chi-na 運嚟美國，到去倉庫 再分發到嚟到呢一間舖，山長水遠，人力物力 + 車費油錢，因為比人挖開咗就退番比供應商？點講都係嘥錢嘥時間 (好明顯我係唔信佢呢個答案嘅，但係佢比咁低人工請我返嚟過日晨，我都費事同你傷腦筋去諗點解決) ！

同事答話唔係退到返去供應商，而係公司有一個集中處理嘅部門，專收集呢的比人挖開挖爛嘅貨品再"組裝"然後再賣。咁樣聽落都幾有理由，就信咗佢。

點知好快就發現唔係嗰回事。
退貨部同事好快就出嚟澄清，呢的咁樣嘅貨係要我地自己盡量再包好佢，再特價賣走佢。

無做過零售業嘅人類呀，知唔知每日呢的挖爛嘅 package 底褲/襪/bra，可以載滿一架超市購物車！！講緊唔係香港惠X 嗰的細細的購物車，係呢邊大大架嘅購物車。

底褲 / 襪只係其中一個例子。

依家好多衫褲係有包裝架！拉鍊外套，唔係掛起嚟賣嘅，係摺嘅，外面仲要用紙帶包住佢！！

好似呢個咁。的人咪成日撕爛張紙佢囉。
淨係一件外套還好，我摺好佢就 ok 好多時係一套嘅衫連褲，就咁用呢條紙帶包住，低能嘅都知擺出嚟唔夠一陣就會散晒。
所有一套一套咁賣嘅睡衣，的人買件大碼上身就會自行配個中碼褲，然後淨番一大堆唔同碼嘅上身同褲無人買。

講咁多同上面單新聞有乜關係呢？

的人係到 V嘩鬼叫 話佢包番好的化妝品嚟再賣係唔衛生！！其實咁樣有乜問題呢？咁多樣化妝品入面，我淨係諗到唇膏係會有直接皮膚接觸，而就算係唇膏，用紙巾抹下佢就已經 ok 啦，其餘所有膏狀或粉狀嘅化妝品，都係用咗就無嘅，試用嘅時候又唔見你話唔衛生而拒絕試用？

依家的人唔會認真去諗自己"需要"買乜嘢。
一切都係買咗先，唔啱就退 (仲要衰格到成日無單據去退) 當你成日有退貨嘅時候，作為商人係得一個方法 - 就係重新包裝然後再賣。

一切都係錢嘅問題。

你買咗支唇膏，覺得個粉紅色唔夠紅，用咗一次，唔想蝕錢就拎去退。你覺得商人就要同你食咗呢個'蝕錢'而就咁丢咗佢咩？
(你唔會諗吓佢成日要蝕錢，最終咪又係加你價？)

的人幾時先會明呢的全部係'共業' 嚟架！！地球上面嘅資源已經用咗喇，整咗呢支唇膏出嚟，因為你的一句'唔啱色'呢支唇膏變成垃圾，你拎去退，有無諗過跟住呢支唇膏會係乜嘢收場呢？佢再賣，你話佢咁樣係唔衛生，咁即係用地球嘅資源整支唇膏出嚟，隨即變番做垃圾，係地球可以消化的垃圾還好，只不過呢的多數係永遠都不能消化嘅膠。

其實，啱價錢嘅野永遠會有人買。
當一支名牌指甲油要$40一支，只係因為佢比人用過，之後特價$5 我會好開心咁買佢返屋企。

講到呢到，我真係又再諗起 Miranda 嗰首歌，入面有一句：
"If we drove
All the way to Dallas just to buy an Easter dress""Hey whatever happened to,
Waitin' your turn
Doing it all by hand,
'Cause when everything is handed to you
It's all only worth as much as the time you put in
In all just seems so good the way we had it
Back before everything became, automatic"

所以我現在買野 (例如我個蒸氣地拖) 我會要自己諗清諗楚，做好晒調查先會去買，唔會成日諗住唔啱就退，買咗返嚟我就想用到佢甩皮甩骨先丢。

我對上幾次返香港，都特登去行吓利源東西街 或 旺角女人街，嗰到的攤檔，係仲會見到'零'包裝嘅底褲，攤檔阿嬸將每款一條嘅底褲掛出嚟，鐘意就摸吓的質地，睇夠了決定要買，阿嬸就會係貨堆入面揾你要嘅比你。

無膠衣架，無牌子標籤，無盒，無垃圾。