牙痛

尋日肥鬼係返工嘅，多數返工日子就會係屋企煮飯，點解會同肥鬼去食 chinese takeaway 

係因為佢要早走去睇牙醫。

嚟咗呢到之後 touch wood 沒乜大病痛。

要 touch wood 嘅原因，

係因為嚟咗咁耐都揾唔到家庭醫生！！！

咁講吓有乜分別先喇。

我地係香港，喺無乜家庭醫生嘅概念嘅，

有嘅，都只不過係你常常去開同一間診所，

睇開嗰個醫生睇熟咗，咁就算係架喇！

到出嚟做野，如果係大公司有醫療的，

就會要你去睇公司醫生，成個 list 咁多醫生任揀，

多數實係揀近屋企嘅或近公司嘅去睇。

我仲好記得，細個有唔舒服，就會落去荃灣工聯會診所睇醫生，佢有幾個醫生輪班嘅，你有病想睇番熟的嗰個都要睇你好唔好彩，再唔係就會去大窩口睇廖學能醫生，佢間診所白雪雪，因為係佢自己診所，得佢一個，所以成日坐滿人，攞咗籌仲要等好耐嘅，阿媽會同我一齊去攞籌，叫我坐低係到等，佢拿拿聲出去買餸(街市係正隔離) 然後返嚟一齊等，因為仲未輪到我。

到嚟咗美國，肥鬼真係同一個醫生 Dr.  D，同一個牙醫 Dr.  P，由細睇到大，真係佢邊到生條毛，邊到生粒瘡，幾時生嘅，都會知道，連佢阿媽阿婆都係睇呢個醫生嘅，所以家族有乜病都會知。
呢個醫生後嚟年老了，所以診所收咗個學徒 Dr.  S，就係到佢自己好老唔做嗰時，將診所的病人都過晒比佢跟。

睇 Dr.  S 係打電話去診所約時間，如果你有長期病嘅就會跟據病情每月或隔月覆診，有急病要約都基本上都可以約同一星期睇病，跟預約時間去到入房，護士做咗基本的量血壓，探熱，磅重等等之後醫生就會入嚟睇病，會好詳盡的睇今次係乜病，有乜其他問題等等，唔會3分鐘就叫你出去攞藥。

呢邊的人好着重 "我想睇邊嗰醫生的自由" 唔鐘意比錢供醫療保險，還要被保險公司制抓只可以睇某的醫生。
當你還是年輕時，你唔會覺唔方便，因為你可能只係一年得一次傷風感冒，但係當你開始老了，很多毛病開始浮現時，一個清楚知道你病歷嘅醫生，知道你有乜嘢敏感，食緊邊的藥，邊的又唔溝得一齊，唔使次次去到都要由頭講一次 (當你老了，口齒不清，記憶唔好，講到幾多？) 唔單止可以做到少少預防，還有幫助去推斷你究竟有乜病，而且真係有壞消息嘅話，你都想係一個熟嘅醫生同你講！或跟據你背景 / 你志願去安排醫療方案。

我地後嚟搬咗去另一個鎮，去睇 Dr.  S要揸成粒鐘，所以後嚟有一次勁 bronchitis (支氣管炎)  及喉嚨發炎 (strep throat) 想要一的抗生素(因為咳好耐都唔好) ，就近近地去咗附近嘅 urgent clinic (即係好似我地香港的診所囉) 好奇怪，去過幾間呢的診所個的醫生都係印度人，嚟呢的診所，你預咗就係少少傷風咳感冒，頭痛醫頭嗰的咁囉。
總之你有醫療保險比佢收費，咁即場現金要比的多數係 US$25 診金。然後攞藥單自己去藥房配藥。

很多人都投訴話應該提供全民公共醫療體制 (即係左翼人士好想有的)  依家係加拿大呢到係有嘅，攞咗張 health card 就去睇醫生唔洗比錢架，淨係自己去比配藥嘅錢，但係有乜問題呢？

我地嚟咗成年，都揾唔到家庭醫生，因為呢。到。無。足。夠。醫。生。
個個都話手頭上有太多病人了，唔再收新嘅。
呢到嘅醫生每睇一個病人政府會俾番的錢佢，但肯定唔多，變相係的醫生去晒第二到可以揾到錢嘅地方做。

反而可以收錢的牙醫就開到週街都係。淨係呢條街就有5間！！！

12月嗰時肥鬼野到感冒返嚟，隻菌都幾勁吓，真係好病咁樣，所以去呢到嘅 clinic 睇病，估佢會比的抗生素咁啦。

入到去同我細個係大窩口間診所無分別，仲要坐滿人，等咗成粒鐘，終於等到，點知個醫生話你唔夠嚴重，乜都無比叫我地返屋休息，有再嚴重先嚟過！！！！

呢個就係公共醫療嘅唔好處！

我地依家住呢到，同老人院無乜分別，全部鄰居都係老人家，個個都係話約唔到醫生睇，排期排到幾個月之後咁樣！
好多人等唔切，係比錢去美國做手術的。

所以對於呢邊嘅醫保問題，我覺得只要有政府開的保險公司，制衡市場上的保險公司，提供一的平嘅保險套餐就可以了。
你有錢想買貴的套餐住私院又得，無乜錢買最平的住普通房又得，你只要有選擇比市民，市場自然會跟住走，就係咁簡單。