細個時，一年有兩三次要跟住阿婆同阿媽一齊去大埔墟靈谷園拜神。
靈谷園係一間細細的很清幽的寺廟，肯定唔係定慧寺嗰的咁樣嘅大陸女人入侵嘅投共寺廟。點解咁肯定，因為其中一個主持係同我家族有關嘅。
我太公 (阿媽的阿爸 [阿公] 嗰阿爸) 係大太太的第四子，太公阿爸 (即係我曾祖) 係有兩個太太嘅，第二個太太都有四子女，其中二太太嘅四女 (阿媽叫佢八姑婆) 據傳說一生人都很善良，常常救濟其他同鄉。
有一個傳說話，嗰時家族擁有同一條街的幾間屋。有一日有個流浪的露宿者走到嚟，週圍揾的吉嘅單位就走入去瞓，家家戶戶都趕佢走，因為佢好似病得好嚴重咁樣，人人都驚佢死係自己地方，係得八姑婆會比個瓦遮頭比佢。
八姑婆後嚟出家做咗尼姑，而靈谷園嘅主持係我地八姑婆嘅徒弟，我地好多親人都有靈位放係靈谷園。
嗰到呢尼姑個個都好老架喇，但係個個都好好人，就係個個都好和藹嘅感覺。每年佛誕會煮齋，阿婆同阿媽就會去幫手，我地細嘅就跟入去幫手食，唔知點解，只係好清好清嘅齋菜但真係好好味。
細個由荃灣去大埔墟係非常轉折嘅。搭小巴去地鐵站，之後搭地鐵再轉火車，就算後嚟有 73x 都係可以瞓幾勻都未到咁啦。
咁點解我都會咁神心跟埋去呢？
嗰時去靈谷園，出咗大埔墟火車站之後係要行多半個鐘先到嘅。
嗰時係巴士站 / 火車站出面，仲係有好多街邊小食賣嘅，其中一樣我最鐘意嘅就係煎釀三寶，煎釀三寶週圍都有，唯獨係呢檔嗰大叔，佢仲會賣臭豆腐同埋炸蘿蔔絲酥盒！！！！
(網上揾的相)
就係呢個炸蘿蔔絲酥盒令到我念念不忘，次次都山長水遠咁跟埋阿媽去拜神，就係為咗可以食佢！哈哈哈哈哈！
揾蘿蔔絲酥盒嘅資料時揾到呢篇文，真係講中我嘅感覺。
李碧華 - 蘿蔔絲酥盒文章
呢個大叔嘅蘿蔔絲酥盒，佢個蘿蔔絲係有落古月粉同五香粉嘅，所以對我嚟講，味道非常特別，有很深嘅記憶。
搬嚟呢邊之後梗係未食過喇。
不過。
凡事都有不過嘅。
呢邊的人好鐘意食脆嘅野 (鬼咁鐘意薯片就知啦！) 食乜都要有脆嘅野做配菜，飲湯要有 crackers (好似我地食粥會撕開的油炸鬼放落去咁樣) 食沙律要有 croutons (切粒麵飽炸脆) 食漢堡包又係配薯片，所以食中餐佢地都要配有脆嘅野。
但係又唔知點解，我地明明有好脆嘅春卷佢地唔食，佢地呢邊的美式中餐整咗樣 egg roll (蛋卷) 嘅野，嗰塊皮，比起春卷厚多了，多數係包芽菜，我唔鐘意食，淨係鐘意食我地嘅春卷。
我地香港嘅春卷多數係包蝦嘅，佢地美國呢邊 (michigan 我以前住嗰度) 中餐廳全部都好慳皮嘅 (你睇大多數幾十年都無翻新裝修就知) ，係唔會同你落重本去整蝦春卷嘅。
但係嚟到依家呢到，試過有一間嘅春卷，係包住五香粉味嘅蘿蔔絲同椰菜絲，即刻喚醒了我嘅記憶。
可惜嗰次食到呢個春卷，係喺我地仲住係酒店嗰陣，之後唔記得咗喺邊到食到嘅。
我話比肥鬼知好掛住呢個春卷，之後我地逐間食過的再食一次，今日比我地揾到喇！
喺呢到。
好神奇一個味道可以記得咁耐。
但係係入口嗰一刻，味蕾連繫住嘅記憶出番晒嚟。
雖然有的遠 (其實唔係好遠，不過呢到的路都煩嘅，好多條線炒埋一齊，上高速公路同出高速公路嗰的位鬼咁近，成日得好少時間就要轉線，轉唔切就會變相要上公路，揸一大個圈等下一個公路出口再兜返嚟咁囉) 如果下次又再好懷念我個蘿蔔絲酥盒，都可以自己去食番三五七條春卷嘅。。。
No comments:
Post a Comment