晒太陽

搬咗新屋之後，等咗好耐好耐，終於買咗一個可以遠距離對焦的相機。

 

 

就係為咗呢個樹枝。

係後園有棵大樹，其中一枝就係咁樣打橫生的。高度剛好就係正正我個sunroom對出。

依家凍咗，成日見到的肥雀係到晒太陽，仲會係度梳下毛，好攪笑。

 

感恩？

不經不覺，來了這邊五年快六年了。

在Wally World工作也三年有多了。

我是九月入職的，開工只是兩個月，便親眼目睹亞洲人可能一生都不會見到的，
一年一度”黑色星期五大特賣”。

每年呢兩三個月，也是美國零售業最瘋狂的日子。

以前係香港，我都做過酒店宴會部的營業員（Banquet Sales Assistant）工作一部份係需要為來年作市場計劃。內容大都係跟據每個月季節性的慣性常有飲宴，設計套餐及推廣計劃。例如係一至三月有春茗套餐，二月有情人節套餐，四月有復活節套餐等等等等。

但推廣還推廣，也只是客人打電話來查詢，我們提供相應套餐優惠。就算你Cold Call（致電客人找生意）他們也不會毫無原因的攪一大餐來整個幾十圍的宴會。

但係呢邊，一做咗零售業，就覺得很恐怖。

基本上整個社會裏的人都係比零售業牽著鼻子走。我係做服裝部的，每年的衫都同舊年的一模一樣（換湯不換藥咁樣啦）就不在話下，最要命係唔單只Wally World係咁，返屋企攤開所有Shopping Mall/Outlet嘅宣傳單張，入面的衫都係一模一樣架，就好似咁多間公司都用埋同一個供應商咁，只不過A公司今年賣紅色，B公司今年就賣藍色咁囉，好明顯睇到依家個模式係：佢地比的乜野你買，你就買個的野啦。你可以選擇的，不過只是係邊到買。

但係的人個個都好似比人催眠咗咁架。年年都係咁買。

如果大家有看新聞，應該都知道今年Wally World又再帶頭製造新聞：
將黑色星期五大特賣時間再向前推，第一輪銷售時間為感恩節正日晚上六時正。

本來，傳統上，是一家人，齊齊整整的聚首一堂過感恩節（十一月最後一個星期四），通常係起床了約十點或十一點，便回父母家，食小點，睇球賽，下午四五點一同晚飯開餐。

第二天，星期五”不”是假期，係要返工的，不過成家人都在一起了，周圍都有大減價，便一同去購買聖誕禮物吧。因為星期五個日係要返工的，所以就一大早清晨去購物再返工。既然時間有限，就梗係研究清楚咁多大減價入面最想買邊樣，所以同常都會係的Big Ticket Item（即係貴野）例如趁機會買部新電視（你唔會日日買電視唶？）咁為咗好想得到一部超大特價的貴電視機，就一大大早出去排隊囉。

這些我全都明白，其實就好像我們食完團年飯，夜晚要出去行下年宵市場，應下節咁囉。

但係呢邊的人病態在於，佢地排一大餐，再去搶購的不是什麼貴重野，講緊可以只是US$1條毛巾。

下面係我第一年”黑色星期五大特賣”返工實況，真係全都是人頭，密密麻麻的人頭。當日我返工時間晚上六時至凌晨三時。第一輪開售時間為晚上十時，但我返工時已見有人開始排緊電視機／電腦等等。而好多其他平價的如毛巾睡衣就會成板（用保鮮紙包實的）推出嚟放係路中間。我的工作就係企响到看貨。

有的師奶，企下埋的，企下埋的咁樣，最後全身挨埋板貨到，做乜呢？佢係到挖開的保鮮紙想拉的毛巾出嚟，我望住佢，佢就笑笑口話『啊！我想摸下睇下條毛巾滑唔滑唶？！』

阿姐，US$1條毛巾，會有幾滑呀？一分錢一分貨，唔用個腦都用個”C忽”諗下啦！

好喇！嚟到今年我諗感恩節團年飯都唔好食喇，因為六點鐘開售的東西，三四點便要去排隊架喇，大家一齊麥當當喇！

Sun Flower

可以講，係新屋呢到的泥土非常肥沃，乜都種得出。舊屋移植過來的都番生了。更誇的是在bird feeder下面都生出了栗米。

 

係舊屋都試過種太陽花，但都給松鼠食光光了。

 

今年試下係前園種（無咁多動物經過，但不是完全無，前園的一棵椰菜就試過給鹿成棵食咗）

的太陽花真係成個頭咁大架。

下年要搵第二個位種，因為佢地個花頭真係會追住的太陽光去架。

而且現在的位置影相因太暗影相都唔好睇

但就成日有蜜蜂來採蜜

影咁來張，終於影到清楚的蜜蜂

 

等都花兒也榭了。

終於可以展開太陽花第二期活動。

 

剪朵花頭落嚟。

近睇已經可以見到的sunflower seed個屁股

用湯匙或就咁反晒佢地出嚟

 

將的sunflower seeds浸鹽水一日（可加胡椒粉同辣椒粉）

隔走的水，300F焗45分鐘至開始爆開同變啡色

攤凍就食得

手痕

唔係賭錢。唔係打牌。唔係買野。
係堅手痕。

以下相片只作附助醫學用途，怕的不要看好了。

以前在香港，從來未試過有任何皮膚的問題！

是真的，是從來未試過有任何皮膚的問題。
很小很小的時侯出過水豆，可以說是平生唯一的一次了。
（而且出水豆都唔係因為皮膚的問題）

是真的，面沒有，手沒有，身沒有。週圍都沒有。（touch wood!)
無風疹，無濕疹，無生賴，無生癬。乜都無生過。（touch wood!）
什至可以說是粗生粗養，塗什麼化妝品或護膚品也可以。

但係嚟咗呢邊大約兩年之後（2010？），就第一次出現下面的徵狀：

就係咁樣喇！

 

係右手（淨係右手，兩次都係淨係右手）

 

係手掌中間川字紋個度，出了很多小小的點。

 

入面有水的。晚上會痕癢。掂水後都會。

問過朋友，佢話唔係主婦手。

 

 

上一次（即係第一次大約係2010年）我沒有看這邊的西醫，

因為他們都只係會說是皮膚敏感，

然後叫你買止痕膏（cortizone）便算。

所以我打電話給我的一名中醫友人，

她給我寄來了一支《芝芝 冰黃膚樂軟膏》塗了約一星期便好了。

 

 

今次的在10月尾開始，開始是痕癢，見有一兩粒，已知大鑊，

好在心裏好像早有預感會再發的，便一直將藥膏放枱頭，立刻塗了兩天，好像死去了一半。

因為已入冬，那天因整理東西，洗手好多次變得很乾便塗了手霜。

點知晚上睡覺時勁痕，第二天發現出了第二波。

所以今次要差不多兩星期才好番。

 

其實對比起我其他生癬或生濕疹的朋友，我呢的真係好小兒科。痕癢唶，唔會死。而且小病是福，忍耐一下都不是大問題。真問題係我覺得身體在告訴我一的信息，覺得好像是身體有的毒素想要發出來咁樣。

 

嚟咗呢邊咁耐，食物種類比起香港的食物少了（沒有咁多綠葉菜，沒有根部植物如蓮藕或荀，沒有海鮮，沒有菌類，生果都只是士多啤梨蘋果橙）究竟係因為長期食少咗某類以前有食的東西，導致無咗某種抵擴？定還是真的對某樣東西敏感？定係個人太濕熱？係生蛇？係太凍？係太熱？

 

好想知道個原因呀！兩年先發作一次也不是很恐怖啦，但係你唔會知道幾時會有下一次，以後可能會多的？再發得發一的？可以知道原因去根治當然就最好了。唔係的話，至少知道不因我可以嘗試避免用某的手霜？食番多的某類食物？定係唔好再食某東西？

最苦惱只是這邊沒有中醫呀！等得我回港時又沒有了！可以空郵一個中醫過來嗎？

今年第一片雪花 / 光棍節

我都係今年睇網上報章先知11月11日係亞洲係叫光棍節。

 

但係美國呢邊，11月11日係Veteran's Day (退伍軍人節)，係一個好有意義的節日。

特別係肥鬼的阿爸都係越戰服役過，幸好可以完好無缺的回來，但也有很多為國捐軀的軍人，他們無私的附出，很藉得我們用每年一日的時間，去記念他們為國家所作的犧牲。

 

肥鬼爸以前遞屬美國海軍陸戰隊 (U.S. Marine Corps)，現在網上搜尋，通常都出現 "The Few. The Proud"的形容。但以前的人都說美國海軍陸戰隊員是 "Lean Mean Fighting Machines"，前年剛好我們看見一張門口地毯寫著 "Not as Lean Not as Mean Still a Marine" 用來形容現在的肥鬼爸最好不過了，就買了給他作聖誕禮物。

 

有一樣要讚揚的，是美國Applebee's餐廳，每年都在退伍軍人節為退伍軍人提供免費一餐。係呢一日，你會見到很多退伍軍人（現在都是老人家了）有的會同家人來，有的會同以往戰友同來，有的還穿上製服呢（身材keep得好好，雖然要用手杖行得慢慢的）但真的也會見到很多身體不再完整的退伍軍人，斷手斷腳等等。

 

我們今年同肥鬼爸一同來午餐，攪笑的反而係肥鬼因剛做了手術而要用拐杖行路，肥鬼爸不但要揸車還要先入去攞位，哈哈。

 

午餐回來時正在下雨，我們還笑說下雨總好過下雪，肥鬼爸更說今晚如跌過30F便會變落雪了，點知轉個頭下午三時多便橫風橫雪了。

 

我就趁只是初開始落雪還未積聚時，出去後園池塘剪草。



 



 

雪呀！

 

 

 

晚上七時，已快把我的小樹都蓋過了。

 

 

 

 

呢個就係我地新屋呢到的後園加池塘。

 

見到池塘入面的草嗎？

只是一晚的時間，池塘面已結冰1cm厚了。

 

初來時沒有的。現在越生越多，快要蓋過了整個池塘。

現在只可清理池塘邊邊的，要等池塘都結冰了才可進去中間剪草。

種菌

哈哈，唔係層壓式個的啦！

 

係呢邊其實見過好多次，個的一舊木頭咁樣嘅，就咁放係枱面就會生的姑出嚟嘅野。

次次見到（無論係網購還是實物）都要成US$30-$40一舊。唔知係咪一定種得出，唔成功的話會超肉痛，無買到。

 

但係，係呢邊，因為的人唔興食菌類，超市係有得賣，但都係貴。

 

佢地無cheap cheap個的街市草菇，全部都係有名堂的（即係唔會係cheap野啦）全部都話係shiitaki mushroom 或是 oyster mushroom 等等，一個小小的四方形膠兜（約10g-20g，你知啦，菇類好輕之麻），就要成US$5，就算我等就嚟夠期大減價，都要US$2一兜，想整蠔油炒菇，最少都要四五兜菇先炒到一小碟。但等得就嚟夠期大減價，就要即食。所以嚟咗呢到咁耐，真係好少食菇。勁覺得好唔健康，已經無乜菜食（綠葉類）仲要菇都無。唉！

 

咁啱，8月北上旅行個陣，回程時路經一個叫East Tawas嘅小鎮，路經當日就係鎮上暑期的Fresh Market Day，即係人人都拎自家種的 或 自家製的東西出嚟賣，有好多新鮮蔬菜，鮮果，自家製果醬，手工藝，自家製手工肥皂，自家蜂場的蜜糖 等等。

 

係呢個Fresh Market 有樣野的一見就兩眼發光，問下價錢：US$20，即買。

 

 

 

 

點解咁遲先介紹呢個寶物呢？

因為由8月買咗佢返嚟之後，跟據說明就放係陰暗地方好似養鬼仔咁日日供奉佢啦。

點知菇就無得出，蚊滋就大把，個的菇全都好似營養不良的，只是不停生長個長度，但全沒有菇頂生出來，仲要全都是勁瘦的（就好似上圖右上角的那些，只是比那些還要瘦）

 

10月尾時，我已經進入放棄狀態了，就將整個菌包丟出車房。

 

神奇的事就這樣發生了。

 

的菇可能係喜愛凍的天氣吧！出去瞓街幾日，就吧吧聲係咁生呀生。

 

 

那個賣菇的女人話可以出到3－4次菇架，我依家等緊第二輪，希望之後還會生多一次吧！

 

聖誕曲奇日

放心，聖誕仲未到。
但，今年有的唔同。
舍弟要結婚了。
所以，我。要。返。香。港。過。聖。誕。

有邊個會諗到我上一次係香港的聖誕係2007年12月呀！！！好興奮！！！

就係因為咁，我同肥鬼媽的聖誕曲奇日要提早囉！

聖誕曲奇日係乜東東？

呢邊的人過聖誕，咪就好似我地過新年囉。咁大時大節，就梗係要整的應節食品啦。

肥鬼媽嘅傳統係11月尾會有感恩節火雞大餐，跟住12月頭會整一次Pot Roast（烤牛肉）順便我地幫佢搭起棵聖誕樹，再嚟就係12月24號前一星期的週未，會去佢屋企整她家族曾祖母留下的曲奇食譜。其實就係一家大細的親子活動啦！過到去，男的睇球賽食小點，女的做曲奇。

今年其實唔單只因為我要返香港，肥鬼都因為要做清除盤骨骨刺手術面請了兩星期病假，我都請了四日假待在家服役服刑服侍佢，咁最好不過就叫肥鬼媽來做曲奇，有得食又可以玩成日。

本來想做”自私曲奇”的，即係靜雞雞唔比人知自己係屋企整，因為每次講咗比人知會做曲奇，就要分的比人，派下派下最後竟然自己屋企得番幾塊。好可憐！

點知肥鬼媽竟然唔記得帶個食譜嚟（真正陳年的1910年食譜，連張紙都發黃了）攪到最後我地要打電話比肥鬼舅父，要佢讀個食譜比我地！就咁我就無咗一大盤曲奇。

所以今次我發誓要將個食譜做紀錄，”表”係幅牆到以後都睇到！哈哈。

不過唔知點解，每之肥鬼媽嚟一齊整，好似有信心保證咁樣特別好食的，上年我都試過係佢屋企整完返嚟自己再整過，但就硬係覺得無咁好食？

曲奇食譜（美式軟曲奇，不是脆的）1 batch 可做約75件曲奇（視乎曲奇形狀大小）

材料：
3/4 cup sour milk (3/4 cup milk + 1 teaspoon vinegar)
1 cup unsalt butter or crisco (or half cup each, criscp help the cookie stay in shape)
1 cup Sugar
2 eggs
1 teaspoon salt
1 teaspoon baking soda
2 teaspoon baking powder
1 teaspoon vanilla
1 teaspoon almond extract
4 cup flour (another one cup ready on a side)

製作：
1. 先將3/4杯的全脂奶混合1茶匙的醋，靜置一旁約10分鐘。
2. 無鹽牛油豬油1杯（或淨無鹽牛油也可）加入1杯糖及兩隻蛋打勻一起直至變cream狀。
3. 另一大碗放入乾料過篩：4杯麵粉，蘇打粉，發粉，鹽，香草精及杏仁油
4. 將乾料混合牛油cream再放入發酵酸奶一起攪勻，此時粉團係略濕同黏手，第五杯的麵粉就係依家逐小加入，直到麵團可以碌開便可以了（太多的粉曲奇會好乾同硬）
5. 如枱面夠大可以一次碌開整個麵團最好。如不可以的話，麵團最多只可碌開三次（因為每次碌開粉團時，你會不停的加入手粉）所以碌開第四次的粉團整出來的曲奇會好硬。
6. 350F焗6-8分鐘，6分鐘時打開看看，反轉曲奇背面，如開始變啡色便可以拿出來了。

注意：
輕度發酵酸奶作用是另到曲奇入面更鬆。
本來用淨無鹽牛油也是可以的，但用牛油豬油混合呢，曲奇就不會變形太多。

 

好喇，呢到就係整整150塊曲奇。

 

 

我鐘意只係整某幾款的形狀，方便設計圖案同填色。

肥鬼媽就鍾意整好多唔同形狀嘅。

準備好開始畫畫。

 

肥鬼媽係都要影呢張全相，佢特別order要影埋後面掛係牆上個把鋸。呢把鋸大有來頭。

呢把鋸係肥鬼嘅 Great Great Grandfather John Wardell Jr嘅。

 

之前有一篇介紹佢嘅blog:

http://thepenguinsfamily.blogspot.com/2013/10/blog-post_26.html

 

佢係一個木工匠，生平當然有好多鋸，但留得落嚟的就得番五把。肥鬼媽好有心思，特登拎的鋸去番新，再搵畫匠畫Presque Isle上去，再分呢五把鋸比五個兄弟姊妹。Presque Isle係呢到北上一個小鎮，係佢地家族每年暑假渡假的地方。呢五把鋸就咁變成好有意義的聖誕禮物。而我地牆上呢把係本屬於肥鬼媽的，佢係我地入伙時就送咗比我地。

 

 

 

哈哈，介紹完歷史，話咁快就同曲奇填完色了。

上面呢的只見糖霜的就係肥鬼媽的傑作。

其實整兩批的曲奇（約150塊）

用兩磅糖粉（加少許奶，杏仁油，牛油打勻再加色）

對於我嚟講係絕對足夠的了。

但係你地都睇到，肥鬼媽簡直係一pat一pat咁將的糖霜塗滿個曲奇，

真係多多都唔够佢玩，結果用咗3磅糖粉，

仲要好多曲奇係我畫嘅，唔係的話佢會整夠4磅糖霜都似。

 

 

而呢的美麗設計的就係我嘅作品。

 

 

其實，我最鍾意啱啱焗出嚟的曲奇，乜都無，

少少甜，暧暧的最好味。加杯熱茶就prefect了。 

 

 

但，佢地呢邊的人點會識食呀！全部都要給糖霜蓋的滿滿的才食。

最後，肥鬼媽拎了兩盤曲奇返屋企，

 

可惡的是她拎走的全是我那些美美的少甜曲奇，

佢留低晒個的超甜曲奇比肥鬼呀，攪到我又再次得番幾塊渡日。