副務

出去釣魚3日。
釣魚係實務。
睇日出係副務。

依家開始明，點解的男人咁鐘意釣魚。
晨早出嚟係碼頭一個人都無，淨係自己對住嗰海。

有幾個大叔，係日日都嚟，唔係日日釣魚嘅，淨係係度吹水。吹到悶又釣吓咁囉。日子好易過，一支竿，有平有貴(我嗰支都係CAD$15 + 個鉤$3)  有排你玩，釣到就開心死，就算釣唔到嗰過程都係好enjoy...

釣魚翁

日日出去晨運，都見到有人釣魚。
開始嘅時候人人都係無料到嘅。
之後魚季節開始了，見到佢地個個都釣到，以為好易啦。啦。啦。

的起心肝去買支竿

心諗有幾難？

再加上日日行嘅時候真係見到週圍都係魚

今日第三日。

第一日都係好奇的多，又要熟習一下支竿

同 拋出去嗰下動作嘅配合。

晨早5am 出去。

第二日同今日就係唔份氣！

對面嗰幾個大叔大嬸

一釣就4條，仲要好幾次都有。。。

好在我今日終於釣到一條。

阿爸阿媽同阿豆今日嚟。

可以清蒸馬交魚 (mackerel)

哈哈哈哈

Little guy

我係月頭見過呢個小朋友一次。
之後一路都唔見佢浦頭。

見到佢個刻真係好興奮，跟住佢沿住岸邊係咁走，

佢走下停下，見到我仲跟住佢就跳入水，

然後係前少少又走番出嚟。

然後係前日，我晏咗少少先出去，

點知鄰居 Y 話佢見到 3隻一齊係岸邊食魚大餐！

到今日我又出去啦，都不寄厚望架喇。。。

哈哈 佢真係游得好快呀！！

魚

成千上萬的魚。

呢的就係 F 大叔講嘅 herring 鯡魚

真係好多好多好多。。。

週圍都係

唔怪得呢幾日的鴨全部都出晒大海出面

淘金熱

當你以為幾十年前嘅淘金熱已經完滿結束，
你就真係大錯特錯喇！

其實依家係世界好幾個地方都仲有人淘緊金架。
其中一個係 devil canyon (魔鬼峽谷)  係加拿大嘅，叫得做魔鬼，即係恐怖啦，嗰到係一個好荒蕪嘅森林，當然係無公共交通工具喇，所有淘金嘅用品加上野外求生嘅用品要自己扛入去。仲要係全程用脚行啦！

而且每分每秒都可能有大黑熊或狼嚟食咗你，同一時間你又要淘金，又要去打獵務求有足夠食物捱到出番嚟(呢個森林一年得兩三個月係暖的，不過夜晚都仲係有可能凍到落雪，同一時間你要行山，又掘地又要揾水去淘金係非常消耗體能嘅)

好啦，的人形容為"淘金"呢程序其實係點嘅呢？

依家的人已經有好多先進嘅工具或機器去幫手做呢樣嘢，但係喺咁荒蕪嘅森林就好多野要原始化。

當你揾到一個你認為地底入面有金嘅位置，你就準備一個桶，然後就開始掘地，將的泥放入嗰桶到，然後你要有幾層唔同密度嘅篩，用水沖的泥，一路沖，一路用篩去篩走唔同大細嘅石頭，泥沙，篩到最後最細嘅就係的金碎片或好似沙咁細嘅金粉。

其實當的泥篩到去接近有金嘅時候，佢地係轉用一個淺兜，慢慢"湧"的水嚟令到的金沉係兜底同一時間"湧"走其他沙。

呢個兜佢地叫做"pan"

係英文點用呢個字呢：
當你間公司有個新計畫剛開始運行，同事就已經問你下一步點樣呀，你會答話"等一等，睇吓事情嘅發展係點再決定下一步"
就係呢個"睇吓事情發展係點"
佢地會話"we will see how it pan out"

呢個 pan out 嘅詞語，就係淘金呢到嚟嘅，因為佢地就係最後睇 pan out 呢到有幾多金 淨係個 pan 到。

印度鞋

近來潮流又興起印度平底鞋。
係網上見到呢個

我以前係跑馬地返工

食 lunch 嘅話除咗帶飯之外，得幾個地方可以去：

1. 去飯堂 (梗係留番糧尾嗰幾日去啦！)

2. 係行入跑馬地近養和入面嗰邊，通常懶行又想慳時間就要搭的士，

入面又唔係真係好多選擇，所以少去。

3. 係出去銅鑼灣時代廣場嗰邊，最熱門但亦最多人，所以要等位好耐

4. 就係去摩利臣山道嗰邊，穿泳池行經 VTC 出去灣仔道揾食

灣仔道由 328 行到去太源街以前有好多出入口舖頭專賣剪牌貨

對名牌嘅認識就係咁嚟嘅

同埋我係肥妹一族，係出入口舖買到的外國正常 size 好啱著

除咗出入口舖頭之外，

嗰條街成日有唔同人短期租個舖嚟賣嘢

印度鞋就係其中一樣

我記得的鞋真係平到爛

咁肯定嘅原因，因為買咗好多

大約係港紙$100兩對，當然會講價喇 (同印度人一定要講價，

連印度同事自己都係咁講架，仲要講價勁過大陸人好多，

可想而知佢地 mark up 幾勁) ，同幾個同學同事一齊買嘅話，

可以講到$500/12對，或者$120/3對咁上下

都係同上面嘅圖一模一樣

印度鞋出名係手工，所以最值錢嘅就係穿珠或鏽花嗰的，

上面圖嗰的得塊布 pattern 嘅款就真係唔值US$99/1對囉

如果你有著過，就知其實唔係好舒服嘅鞋嚟嘅，係靚多過實用好多，

因為佢大約係用一塊長方形嘅皮，打個8字咁樣前後包住(兜住)脚指同脚挣

所以隻鞋係有少少兜，唔係完全平貼係地上

係個脚山位 (脚入面中間) 其實係無野承住嘅

更加唔會有厚底，因為真係得塊皮做成隻鞋

所以真係唔可以著呢對鞋去行一日街

講開灣仔道

要講我以前好鐘意食海南雞飯

鐘意到一個點係一路食成個月都得架！

因為讀大學嗰時，讀酒店系的我，要去一間出名海南雞飯嘅酒店做實習，

嗰時係咖啡室日日係咁 serve 海南雞飯

攪到我自始就對海南雞飯上咗癮

以前灣仔道同活道有間泰妃雞

我自己就覺得好好味，可惜已經執咗。

太陽花

有無話你知？
我其實好鐘意太陽花。。。

好似全部都一樣
但又唔一樣

我用咗唔同 filter 去影

賴咁藝術 feel

魚嚟喇！

日日朝早去晨運
都見到的人係碼頭度釣魚
但係我朝朝早係到裝佢地，都無料到嘅

係水入面我淨係見到的細魚
好多好多細魚
我仲以為有排等佢地大啦

今早
又行嚟碼頭
呢位 F 大叔 同佢傾一陣就有魚上釣

佢話尋晚 6:30 有人釣到3桶魚

呢個桶係另一位大叔嘅

F 大叔嗰桶，係我同佢傾完偈嗰陣已經滿咗

佢話的細魚係 harring
而呢的上釣嘅係 mackerel
就係嚟食的 harring 嘅
佢釣到嗰幾條 mackerel 係口中同肚入面都係的細魚仔呀

就係咁細條嘅 harring 但真係好多好多

佢仲話今年的魚遲晒大到，上年早7星期前 (5月尾 6月頭)  就開始可以釣魚喇！

鄰居 Y 話我知，遲的多的 mackerel 嘅時候，的 seal 就會嚟食魚喇！
我要快的去準備個望遠鏡先！！！

買地

梗係唔係好似的香港大地產商咁樣團地啦！
係呢的

今日朝早晨運嗰陣撞到有幾日無見嘅 Y
佢話今日晏晝出去睇吓佢塊地
我又八卦跟埋去 (tag along)

原來係附近護老院門前花園
整咗呢的花圃
$50可以租一年
我見佢隔離呢個吉咗就租落嚟啦

不過依家已經七月中
落種子種係太遲了
所以成個晏晝，我地兩個揸車週圍去買的清貨大減價 (clearance)  嘅植物
因為係季尾，都係得番的蕃茄，矮瓜同節瓜類
就乜都買幾棵嚟種

哈哈！！
聽日又有世藝可以玩成個晏晝，yeah!

(7.19.2017)
今日晨早就過嚟將尋日買嘅植物種落土。
希望8月同9月共60日會有的收成。

淨係種晒係一邊，係因為呢到花圃規則，每年最遲6月1日大家就要開始種嘢，咁呢的吉咗無人租嘅花圃，佢地就會有員工放種子落去種，我呢個22號花圃，係種咗紅蘿蔔，所以我要留番的位，等的紅蘿蔔開始長大我就同佢地搬屋(依家表面就咁睇乜都無)

仙境

唔係毒霧呀。呀。呀。

好有山水畫嘅 feel 呀！！

想過霧景都可以咁靚？