旅行 / 旅居

2018/7/31 St Steven Green

呢幾日睇咗幾單新聞，突然間想了很多東面。

咁得閒係屋企睇新聞打發時間，係因為電話張 sim 咭壞咗，出街不能連接任何網絡，要揾地方連接街上面的 free wifi 咁樣嚟用個電話，所以無乜信心去偏遠的地方，只可以係市中心消磨時間等新的 sim 咭寄嚟。

又，市中心大多數地方都有着強勁的燒錢萬"誘"引力，行得多買得多，而且開始日日落雨，都唔想出去。

先先係睇到呢個新聞。

咁啱其實上星期肥鬼終於等到有三日的假，我地去咗附近旅行。由5月嚟到到依家，終於等到3日連假，之前的全部係得1日或2日，邊到都無去到。

肥鬼的同事，有個一嚟就有4日假，已經去咗 Berlin 同埋 蘇格蘭了。。。

我地係肥鬼放工之後就上4:30嘅機，6點到埗，搭輕鐵去酒店，食個晚飯，即刻瞓覺因為跟住兩日都報了一日團，然後第三日3點的機返嚟。

就咁睇，無乜野呀，好多短途旅行都係咁架。

但係返嚟之後加上睇到呢個新聞，令我諗好多野。

肥鬼個同事去蘇格蘭嘅旅程，係仲急過我地個旅程，佢係晨早6點機，到埗，參加上車落車巴士團(hop on hop off bus) ，住一晚就返嚟。

我去四日三夜都覺得睇唔到的乜野，佢會睇到的乜呢？

可能係我地已經老了，身體最誠實，四日三夜入面，日頭好似無事無幹咁，行得走得，因為都只係參加一日巴士團，就係到景點就落車咁樣之麻，但係咁多晚食完晚飯沖個涼之後，一掂到張床就瞓到昏迷咗不醒人士咁樣，最後返嚟就係一身疲累。

都不禁問自己，係為咗旅行而旅行？定係為咗唔好嘥嗰3日假而去旅行？定係只係為咗叫做去過嗰個地方而旅行？

初初嚟愛爾蘭，發現的餐廳會係下午 2pm-5pm 唔做食物，淨係賣飲野，我覺得好麻煩，完全就係亞洲人的 "顧客就是皇道" 嘅想法，係想深一層之後，我發覺愛爾蘭仍然保持到，沒有比旅遊業污染係好難得嘅。

好似上面隻北極熊咁樣，因為有旅遊業，有人要參觀，落得咁嘅下場，人類為咗自己可以去睇一的地方，會為呢個地方帶嚟幾多傷害？

尋日同肥鬼同事食飯，係一對年輕夫婦，調咗嚟呢邊就快兩年，比我看看佢個 inxxxgram 係兩年入面佢地去咗歐洲 20 幾個地方，全部都係3日假，4日假的"到此一遊"式旅行。

本來，肥鬼都好想調過嚟呢邊架，就係想好似佢地咁樣去勻歐洲嘅地方。。。

佢的相真係影得好靚啊！我都好配合的比咗好多讚嘆嘅反應，但係返嚟同肥鬼傾，係到自問，這就是我們真的想要的嗎？

就係咁樣到埗食個飯飲個啤酒，然後就可以話我去過世界好多地方，你又吹佢唔脹喎！

先唔好講肥鬼係一個好須要穩定的休息嘅人，比著佢一定無可能每個3日假，都咁樣走走笛笛然後返嚟又即刻返工。

而且人生去到中段，我地更多追求對歷史文化嘅認識，就好似嚟呢到，會好想知多的愛爾蘭獨立嘅經過，呢個國家係點樣發展到現在的樣子等等等

肥鬼嚟緊嘅週未，就係喺呢到嘅最後一個3日假，本來係好想去：

A 計劃
阿姆斯特丹 Amsterdam (經 比利時 Belgium 去 法國 去 Luxembourg 盧森堡 再過德國 Germany 咁樣4日3夜返嚟)  或
B 計劃
去 Czechia (czech republic)  經 奧地利 Austria 經 Hungary 經 Slovakia 共4日3夜 返嚟

但係呢幾個月肥鬼真係太 beat up (打殘) 了，邊到都唔想去，淨係想係屋企瞓番24-36小時。。。

因為愛爾蘭呢到8月第一個週未係長週未，所以無晒佢的同事嘅平機票 (例如€10飛倫敦) 所以另一個方案係去愛爾蘭西面玩幾日 (不過睇過的酒店都好 full )

就係咁諗多日，肥鬼給我短訊話唔洗諗喇，公司要佢返去 OT... 3日假變1日假。。。

雨絲

2018/7/31 4:30am

等咗幾個月嘅雨季終於嚟喇！
呢幾朝都凍到得十幾度，不過好奇怪，係正午又會出猛太陽，然後又落過。。。

前幾日個 blood moon 因為唔係呢到睇唔到，不過呢個日日望嘅景，係返歸之後都會長留低係心入面。

2018/7/30 4:30am

5月嚟嗰陣，朝早起身已經一天都光曬。
依家都未到8月就已經黑齊了。

海關大樓

曾經比大英帝國統治嘅愛爾蘭，係制度 / 建築 / 管治架構各樣都同香港 / Halifax 好相似。
其實跟本就係倒模咁樣去運作。

係愛爾蘭呢到，首都 "都柏林 Dublin " 中間打横有一條河叫 River Liffey 貫穿整個城市，由右至左間開咗個城市，變為城北面同城南面。

早期集中發展城車面先嘅，所以 Dublin Castle... City Hall... 同埋 Trinity College 都係位處城南的。到 Normans 打到嚟呢到將維京人趕走，佢地就搬到去城北面聚居。

River Liffey 呢條河係喺右邊(東面) 由都柏林灣 (Dublin Bay) 入嚟嘅。進入河道無耐，係右手邊，就係呢座海關大樓。

係大英帝國統治時期嘅1781年起嘅，作用就係商船入港口時收關稅呀。

鳥瞰圖

係鳥瞰圖呢到見到每隔一段嘅河就有橋相通城嘅南北兩面，係愛爾蘭語 (gaelic)  入面有個字 "quay" (佢地讀 kay)  我諗就係 "區" 一樣的解。

因為沿河行，每一段的街名就係 city quay... ormond quay... aston quay... 很神奇係地球上咁遠嘅地方，竟然有一個字，讀音同意思同中文咁似。。。

正門

呢座海關大樓，係1921年愛爾蘭獨立戰後不久再打內戰時 (為了放棄北面和不放棄北面) 因為對英軍的厭惡而比 IRA 一把火燒了。。。

係之後成立的愛爾蘭政府修復番呢座建築物的。

成日行過呢到好多嘅建築物，係外牆都會有的頭象，認真去睇，全都唔同樣架，今日比我發現原來佢地全都有名架。係愛爾蘭河道的神。

新朋友

今日 Mr.  Leo the lion 同佢一班朋友 say goodbye 跟咗我返屋企。

佢肚入面有幾滴墨水，所以打晒呔又著企領衫，執到正一正架。所以，我諗帶住佢去闖蕩江湖應該很有趣。

知道會嚟愛爾蘭，就好想帶隻愛爾蘭"出世"嘅羊返屋企呀，但係揾嚟揾去，都係得嗰的 big6 出世嘅假野。。。

到今日行入書店。。。
講真，依家仲邊有人買書吖，所以其實我行過呢間書店好多次架喇，好似就快 certify 咁款 (即係就執就執咁囉)  去旅行好少買書，特別係搭飛機的旅行，買幾本就已經超重，不過都入嚟打嗰轉睇吓可以有乜野貢獻啦。

見到呢兜動物園朋友，人手造的水準，不是很靚仔，但我就係鐘意佢地咁嘅樣，而唔係紅色工廠出世嘅背景。嗰兜的紙條話帶一個動物返屋企，會幫助到 ARC House (搜尋一吓，發現係幫癌症患者的慈善機構)  再去問清楚收銀哥哥，話係一個員工的嫲嫲織架，所以，原裝正版係愛爾蘭出世嘅 Mr.  Leo 就咁跟我返嚟屋企呀！

Mr.  Leo 同愛爾蘭劇作家 James Joyce 合照

係愛爾蘭旅行，第一大手信就係佢地嘅羊毛衫 Aran wool sweater 但撞著今年全世界都熱浪，連愛爾蘭呢到都旱災 (本來呢到係全年都唔熱架！) 咁仲點會買羊毛衫？？

第二樣就係羊毛頸巾囉。週街都係。
有幾個月時間比我諗，就逐間睇吓格下價喇！！！
花多眼亂，問吓員工先知，如果寫住 merino wool (來自 merino sheep 身上的毛) 咁多數就係嚟自紐西蘭嘅羊毛而唔係本地愛爾蘭羊毛，即係係入口羊毛跟住係呢到織出嚟，咁件貨嘅牌仔會寫 "woven in ireland" 而唔係 "made in ireland" 係有分別架。

Merino wool 嘅好處就係滑身的軟的同輕的。

高一級嘅就 Mohair 啦，佢就係用 goat (山羊) 嘅毛造嘅，暖的但係有的吉手。

仲有一個就係 cashmere (茄士咩) 就是來自 cashmere goat 身上的毛，以前呢個字串法係 kashmir (克什米爾) 即係印度北面一個地方。

唔識咁多資料，唔緊要，學我阿爺話齋，價錢識貨，睇價錢一定知道邊種最軟最暖。

我依家仲未諗掂，好大機會乜都唔買，因為屋企條大頸巾，據講都係茄士咩嚟嘅，不過染色時鑊咗嘅次貨，好暖，用咗成10年，無穿無爛，打算等佢退役先再嚟愛爾蘭買啦，哈哈哈哈！

反而可能買兩舊冷自己返屋企織，咁樣仲有意義。。。

陰謀論

比起很多的政治評論員，我呢的好明顯只係識條毛嘅無謂人。
而且大陸共產黨嘅野，已經去到一個講到口都臭埋嘅階段。。。

不過，唔知大家有無同我一樣 feel 到的野。。。

以往呢的咁嘅 毒奶粉，毒豬，毒豉油等等等等 case 最多都係話嚴查呀徹查呀咁樣之後就不了了之咁等佢 fade out。。。

今次好似係第一次咁激講到明要佢地"傾家蕩產"。。。

其實我根本唔會相信佢地唔知呢的黑心疫苗造假喇。。。不過依家"雜總"等錢洗要同人打貿易戰喎，的錢又比其他李江胡温派嗰的人運走晒，仲唔係時候揾呢的人嚟開刀？？

根本就唔係為咗你地的蟻民條命。。。
只係想括番的錢出嚟渣。。。

鬧鐘

住係海邊嘅城市，每日都有天然鬧鐘叫醒你！

就係佢 ↪↪↪

好很多嘅佢！！！

呢隻只係一隻BB

但係佢地嘅叫聲，同成年的有得揮。。。

成堆成堆的，係大街上横行無忌

佢地每日搶地盆，搶食物，由朝早4點幾就開始叫，仲成日打交就叫得更勁！！

日出的一刻

格仔酒店正面

對面係劇院

有興趣去睇番一兩場，

但係成日行過無乜吸引的劇目。

呢邊仲係好興著晒禮服咁去睇歌劇，

附近的餐廳全都有歌劇晚宴 (pre-theater menu)  就係早的開餐 (4pm - 6pm)

等你可以食完行過去睇劇。

可能會轉移去國家音樂廳，佢地有午間音樂會！

開大餐！！

今日食 pizza

個 pizza 係後面背囊人買的，

右邊地下仲見到隻紙碟，

佢放底幾秒時間，海老鼠即刻飛落嚟一野搶走。

格仔酒店遠景。

認識

嚟愛爾蘭之前，我對愛爾蘭嘅認識：

1. 美國東岸早期的黑幫 Irish Mob
(無辦法，睇得電視多)
Irish mob 同意大利黑手黨 (Italian Mafia) 曾經叮噹馬頭有得 fight ，所以愛爾蘭黑幫又叫白手黨，不過後勁不繼(自己人打自己人) 最後比黑手黨搶晒的地盆

2. 健力士黑啤

3. St Paddy Day
(一年一度肥鬼會由內到外，都著全綠色咁樣走出街嘅日子，嗰一千零一條好 ugly 嘅綠色底底，買嚟就係每年呢日著！)

肥鬼成日都好想嚟愛爾蘭，只因為佢有零點零零幾咁多嘅愛爾蘭血統。

不過今次嚟深度認識呢個地方之後，我對愛爾蘭呢個國家同愛爾蘭人，打從心底裏尊敬佢地 (盡管每日係街上面，真係無時無刻都見到好多酒鬼！！)

係到要拉開個話題一吓。
我其實係311嗰日開始，一怒之下無再玩飛時 book 嘅。
嗰日香港有補選，多得 飛時book 嘅克仔，同共產黨非常配合咁，將一整日嘅 post 都河蟹晒，真係連盲嘅都睇得到，全日補選的新聞，點票嘅狀況完全無碌過出嚟，我不停的F5 refresh 嗰螢光幕，都係出昨日前日的無聊嘢。。。

我都可以好肯定咁話你知，係有5毛每日係網上巡嘅，因為我呢個 blog 由始至終只得小貓幾隻，每篇嘅閱覽數字從來只係個位數，但係有其中一篇寫過"黑警"兩個字，個閱覽數係第二日去咗兩位數！！！

再加上之後梁天琦被判監，我對於香港的民主獨立係心死了。

直到我嚟咗愛爾蘭旅遊。

我見到呢位愛爾蘭劇作家嘅一句說話。

見到呢句說話嘅一刻，我真係想喊出嚟。
呢句說話，同我地依家香港人講嘅 "唔係見有希望先行落去，而係行落去先至會有希望" 有相類似嘅意思，但係我心死嗰刻，我係覺得沒有希望的可能了。。。

直至到我深入認識了愛爾蘭嘅歷史。

嚟愛爾蘭旅行，差不多每一個景點，都會同佢地嘅獨立歷史有關，就算只係最短嘅一日遊，你都會知道佢地嘅1916年獨立革命 Easter Rising。

現在嘅愛爾蘭，係1921年7月11日同英軍停火，簽下協議，接受英軍的要求(就是北愛爾蘭仍歸大英帝國擁有) 而獨立起來。

(Patrick Pearse 係呢間屋出世)

就咁睇好似好容易呀，短短幾年貨仔就獨立了。

其實，最早嘅獨立革命種子，係200年前種下嘅。

全靠1789-1799年嘅法國大革命，1765-1783年的美國革命及至1776年美國的獨立宣言，最終都係大英帝國手掌入面走出嚟獨立了，所以愛爾蘭係1798年5月-9月都有反抗者出嚟高叫要脱離大英帝國。可惜唔夠打，死咗大約30000人之後，繼續英軍統治。

這樣一統治，又百多年了。
中間有零零星星的革命反叛運動，其中一個係1848年的年輕愛爾蘭運動。

之前講過其中一個 1916年獨立革命領袖 Patrick Pearse, 佢阿爺就係 1848年輕愛爾蘭運動嘅一份子。

愛爾蘭係一個島國。去呢到嘅考古博物館，可以睇到呢到一萬年前已經有人住 (有化石有遺止) 不過歷史上，成日比人入侵，有維京人統治呢到 (約793年入侵) ，又有 Norman 係12世紀的入侵，之後又到大英帝國，但係每一次，佢地最終都能夠將呢的人打走晒！最後成功獨立。

以愛爾蘭人咁有經驗，都要百幾二百年，横誇爺孫三代先至成功獨立，香港的希望，好有可能不是我一生中會看到的了。

穴居人

見到呢個題目，你會即時想到話
"現今呢個世代仲有穴居人呢樣嘢" ？？？
調轉頭諗吓，依家的隱蔽青年，同穴居人又有好大差別咩？？？

點解突然之間會講穴居人呢樣嘢呢？

話說幾個星期之前，去咗 Pearse Museum
網址：Pearse Museum website

Patrick Pearse
( 或愛爾蘭文 Gaelic 的串法 Padraig )
Patrick_Pearse 資料
佢係其中一位帶領愛爾蘭獨立嘅領袖。
(愛爾蘭獨立係好長嘅故事，今日唔講住)
佢同佢細佬 William ( 或 Willie) Pearse 都係教師，係攪革命之前，佢地買咗一間大屋嚟做學校，而呢間學校就係現在的 Pearse 博物館。

嗰日去，本來淨係想知多的 Patrick Pearse 嘅歷史，想知道一個地方嘅本土方言，點樣可以令到一個10歲嘅細路，發誓要奉上一生，給愛爾蘭帶嚟獨立。
(有關 Patrick Pearse 都要另一篇再講，我依家就係住係佢出世嘅呢條街，條街依家以佢命名 叫做 Pearse Street)

咁嗰日我去到先知個博物館喺係個公園入面嘅，個公園叫做 St Enda's Park 無乜野吖，愛爾蘭呢到週圍都係公園，咁係學校出面連住公園球場真係唔奇喎！

行完博物館，好自然又行去咖啡室喇 (呢到週圍都係咖啡室！！！) 咁啱比我見到宣傳單張，原來係暑假的週未中午12點會有導賞遊，我望吓錶，仲有5分鐘，唔好嘥，又走去 join 埋一份。

夠鐘了，連埋我一共得5個鴨仔，導賞員就係呢個公園嘅員工呀！好鐘意呢的講歷史嘅導賞團，少少人，可以多的傾講。

St Enda's Park 原名叫做 The Hermitage...
Hermit 的意思就係隱君子 (好聽啲就叫隱士) 而 hermit crab (螃蟹) 就係肥鬼用嚟形容好自閉的同事的。。。咁點解個 50 英畝嘅公園會有個咁怪嘅名呢？

呢個50英畝嘅公園，第一手嘅主人係 Edward Hudson (1743 - 1821) 當年牙醫呢樣嘢都未普及嘅時候，佢就已經提出"口腔護理"嘅概念，所以成為了出名嘅牙醫，咁即係好有米啦。

佢平日住/工作，喺係城市入面嘅，即係 Dublin 都柏林入面，仲要係正市中心 St Steven Green 隔離 Grafton street 嗰到 (St Steven Green 好比紐約嘅中央公園，而Grafton Street 就依家都仲係最主要嘅購物地點) ，同現代人一樣，佢好快就唔鐘意城市嘅生活，要揾個地方整間渡假屋，好少意思啫，係1786年佢就出去城外買50英畝地嚟起渡假屋啦！呢間屋同塊地原名叫 The fields of odin

如果係我地偉大嘅 big 6 人，就梗係有咁大起咁大啦，好在，佢唔係 big 6 只係起咗間屋 (就係後嚟嘅 Pearse 學校) 其餘地方都係佢渡假屋嘅"後花園" 亦即係現在的 St Enda's Park

Edward Hudson 有兩個仔，
Henry Hudson 同 William Hudson
因為 Edward 係出名嘅牙醫，激發到佢個侄子 Robert Blake 成為了愛爾蘭第一任國家牙醫，而 Robert 又激發到 Henry 又成為牙醫。
(Henry 係 Dr Robert Blake 之後都成為了愛爾蘭國家牙醫)

咁 William 呢？？？佢無做到牙醫，但係佢同阿爸一樣好鐘意園藝，咁阿爸留咗50英畝嘅公園比佢，就有排玩囉！！！

佢係呢個公園到，起咗好多"奇怪"嘅野。嗰的奇怪嘅野(或建築物 monument ) 係18世紀或19世紀起嘅，英文名又叫 follies 或 grottos (石窟) 全部都係用石頭搭建嘅野，散落花園四周，沒有實際用途嘅，只係起嚟當作花園裝飾，有啲好似瞭望台，有的係石拱門，有一間堡壘 (估計係花王住嘅) 由天空望落嚟會見到係一粒5角星嘅形狀嘅，最奇怪的，就係佢砌咗個洞穴呀！！

/Garden_hermit 花園隱士
花園隱士(裝飾隱士) 就係18世紀有錢人係後園起個洞穴"請"個隱士嚟住，會提供食宿，導賞員仲話曾經有記錄有"招聘廣告"請花園隱士，會有糧出，不過條件就係唔可以剪指甲，唔可以剪頭髮，而你所需要做的就係住係洞穴入面，主人的朋友就可以來參觀穴居人呀！

>>>>>>>>>>

話說大約由15世紀開始，係法國就興隱士呢樣野。有錢人或君主等係後園會起一個小小的教堂同石洞，隱士就好清苦地住係呢的洞入面宗教修行，所以君主有時會就一的問題問佢意見架。

18世紀19世紀剛進入工業革命年代，的人開始覺得越嚟越忙，越嚟越無時間用(咁熟嘅？！) 越嚟越無空間感，所以開始想係後園放空一下或靜坐沉思，不過城市化帶嚟嘅，就係屋企地方越嚟越細，唔係人人屋企有花園呀，所以花園隱士呢樣嘢就戀得好似做表演咁呀。

就咁聽導賞員講以前的人會"請"人嚟做穴居人表演，然後會叫朋友嚟到訪參觀，展示比人睇，好似好變態。

直到我今晚睇到個節目廣告 keep up with the kxxxxxxxxx family 同埋嗰個 honey boo boo family... 等等等等，其實依家的人係電視到睇呢的人嘅 reality tv 同幾百年前有錢人睇穴居人，有乜分別？

一生中工作上遇過的人

有幾多仍然有聯絡？

馬騮小姐老遠的搭因航飛機順道來了探我
(皆因佢係員工一名嘛~)

如果你我是同路人，就會很明白我。
對於所有由香港來探我嘅朋友，我是非常感激流涕的 (因為嚟咗愛爾蘭鼻敏感囉，可是也有一大半是真的內心滾動架~)

係加拿大嗰時，同太太們茶聚傾過一樣嘢，非常有共嗚，特別因為其中一個太太係澳洲嚟嘅。什麼共嗚？

就是所有親戚朋友，無論點樣叫佢地過嚟旅行，都是左右言他不了了之。最親的家人也一樣如是。

我明嘅，長途機(亞洲飛美加) 很難頂吖麻，咁點解你又覺得不停叫我返嚟好 ok 呢？唔通我飛的話嗰程機會變得番幾個鐘？

然後就係嗰的無錢/無時間的理由，之後轉個頭就見佢飛日韓澳洲咁樣囉。

還有一堆係話照顧老公細路嗰的，不停叫我自己一個返嚟？？！！你做唔出自己一個嚟探我，又點解覺得我可以叫老公食自己幾個禮拜，等我可以返香港旅行？？？

要知道美加呢邊同香港最大分別係，呢邊無機票減價戰，每次我返嚟都最少要美金1000-1300 仲要返嚟屋企細，好大機會要比錢住酒店。

而佢地過嚟，我可以車出車入做跟班之餘，一定有大大間房你住，香港飛美加平機票兼唔使住宿支出，其實係好抵，不過都係無人嚟。

Anyway 今次有機會嚟愛爾蘭住幾個月，諗住歐洲會吸引到大家啦，特登租番呢間大的嘅兩房單位等朋友嚟可以 stay 點知都係無反應，算吧啦！
I gave up.

最後上釣的，就係我舊同事馬騮小姐囉！

佢帶住馬騮去旅行已經10年喇，連肥鬼都話咁有 determination & presistence (毅力恆心) 好勁！！

夜晚同佢傾偈，先發覺我地共事的時間，其實只係短短嘅一年。

講野陰聲細氣嘅馬騮小姐，給我的印象，仲係當年剛畢業嚟我公司做野咁，傻裏傻氣的，成日都驚佢做錯做漏，要時時提醒佢照顧佢。

所以淨係由機場嚟我酒店呢程路，我諗我傳咗50個短訊比佢，好驚佢唔識路，搭錯車落錯車，無諗過其實佢做咗空姐十幾年，去旅行擺明係老手嚟嘅。

佢係我心目中，仲係當年的細路女，所以我問佢有無 xx 歲時，佢答我話就嚟 xx 喇，原來佢只係細我幾年，哈哈哈哈。

時間過得非快的，曾經一度係工作上覺得好熟嘅朋友，會不再聯絡了，但淡淡的友誼，竟然會十多年之後還在地球某地方聚舊，很神奇。

因為佢只係得一日時間，我選了這兩個月以來，我去過的，覺得最靚嘅地方同佢去。

Howth,  Ireland (連肥鬼阿媽同表妹嚟都無帶佢地去，好明顯同佢地嘅旅行風格非常差天共地！！)

晨早搭31號巴士上到嚟山頂，再沿著山邊落山，一條初階行山路徑，遠望 Irish Sea 非常心擴神怡。

好好彩，天氣報告原先話陰天落雨架，點知早上仲出咗陣太陽，到落山之後先開始多雲。

落山之後我地仲去食個海鮮大餐！！肥鬼唔食海鮮嘅，自己一個食一的都唔過癮，今日終於可以同朋友一同分享美味海鮮，為我們的愛爾蘭旅程留下美好回憶！

呀！！仲有呀！馬騮小姐為我帶來好懷念嘅美食。

等我呢個大鄉里都可以試吓新潮嘅鹹蛋黃魚皮，佢仲好醒呀，我只係話想食尤魚絲，佢買埋後面大發嗰隻鱈魚絲！！！yeah!!!