今日又係肥鬼休息日，每到佢休息日，我就要"變節" ↪ 變換節奏。。。
所以遲咗出嚟
出到嚟已經日上三竿
上次同肥鬼的同事太太咖啡聚會(一齊去咖啡室飲杯咖啡談談近況) 佢地講開去超市。
不是一般的落樓下揸車去隔離街的超市。
佢地講緊揸7小時車返去最近的美國超市。
我唔係第一次聽到，但再次確定了佢地係定期咁做，我都係心裏打個突。好似係得我一個無呢個習慣。
好耐好耐之前，即係我細個嗰陣，我地係要每年聖誕暑假返大陸探親嘅。嗰時(開放之前) 大陸乜都缺乏，親戚又窮(有邊嗰唔窮？都唔見得我地係大富大貴人家！) 阿媽係會儲埋好多物資例如舊衣物及家庭電器，總之我地每個人抬得幾多都會抬返去。
嗰時仲細，阿媽話幫到人幾多就幫，一年兩次返大陸當係旅行。其實都知阿爸仲會比錢的親戚，阿媽又會買好多糖果分比的同鄉嘅細路，加上嗰時大陸真係窮，所以每次返去的親戚都會對我地好好招呼。
同一時期，阿媽嗰邊嘅親戚都係一樣。
不過，後來大陸開放了之後，事情就唔一樣了。
我地越嚟越少抬野返去阿爸鄉下，因為佢地都開始有米囉，有一個親戚做貪官嘅，起咗三棟三層嘅屋，我地住廉租屋都未有嘅熱水爐，佢間屋就有仲要個廳有埋大電視加音響組合。
反觀阿媽嗰邊，有一個姨媽，仲係成日話大陸乜都無，每次返上去探佢，都整個列表嚟叫我地帶野上去，已去世好耐嘅阿婆，因為內疚無帶埋呢個姨媽嚟香港，所以好努力滿足佢嘅要求，最記得阿媽講話要兩個阿姨抬部電視機上去比佢。
到後來，連洗頭水都話我地香港嗰的好用要我地帶比佢。你要知道，嗰時係80年代，唔係依家咁搭程火車就到 或者 有電腦㩒幾個制係淘X網購就送到上門 或 自由行自己落嚟托上去。
嗰時係我地人力物力金錢時間都貢獻比佢用"來佬貨" 所以後嚟阿媽都覺得唔對路話 "發神經！連洗頭水都要帶，帶得幾多？過幾日用完咪又係要用番國貨？" 咁之後先同的阿姨們決定唔再帶野比佢。
唔知點解呢件事喺我心中留有好深印象。
我自己都係由香港搬去美國又搬去"格勒底" 生活係需要時間適應嘅，但都真係無可能乜都要揾用開嘅所有野？
亦都係咁樣我覺得同事太太們要揸車7小時返去美國超市好誇張。
當然，呢個係個人習慣問題，佢覺得有需要每個月咁樣走一轉，其實同依家的自由行真係無分別。最緊要唔好麻煩到別人，佢用自己時間金錢，別人如我只是心裏打個突而已。
路上四周都掛上一層雪
其實只係枯枝，不過掛上雪之後，
同阿媽買的年花"串串金"好似樣
傾多一陣，佢地就講到返去美國超市買的乜。
佢地個個都話呢到沒有好的購物地方！
我真係唔明！其實好多美國有嘅牌子舖頭呢到都有啦，有乜咁特別嘅野要買呢！
亦不見得佢地係好有米的人，要買菇池 / L Lee / 飛甩雞毛嗰類 (如果係買呢的，係網購多數都因為係貴野會係免運費的)
再睇佢地衣著，都唔係潮人 (要講的話，亞洲嘅衣服堅係潮好多！我比佢地梗有藉口買。但係，真係識著衫嘅，就係普通tee 恤牛仔褲都可以著得好型)
尋日一場雪 加上今日假期好多細路出嚟玩
自整到個雪人出嚟！
再細心聽佢地講，其中一位係返去買厠紙！！！！
佢話佢淨係鐘意某一牌子嘅厠紙，而格勒底呢到無呢個牌子，所以佢要返去上倉。
聽到呢到我真係控制唔到我個下扒！直係 O 晒咀！
另外仲有一位係每次返去買好多肉類返嚟嘅。
我好想話佢知美國係好多 GMO 同激素，反而係格勒底呢邊嘅食物因為係跟歐洲要求所以天然好多，呢點我好肯定因為肥鬼好多年嘅胃酸倒流嚟咗呢邊之後好咗8成！
阿爸係前面引誘狗仔
阿媽係後面坐係雪橇拉著狗帶
好好玩
Anyway, 我每次都係聽佢地講野嘅多，好少發表意見。其實，我好配服佢地，佢地由細到大嘅訓練，係可以隨便發表意見，每個人都很主觀，亦好有信心，不怕別人有不同意見。有不同意見都可以和平的交流。
反觀我地亞洲人，係由細訓練唔好成日發表意見，什或係無乜主見，因為成日唔知下一刻吹乜嘢風，企錯邊就會好大鑊，所以練就咗我地做人要"知訂" 比人問有乜意見嘅時候，大多是唯唯諾諾，唔知呀，唔好問我啦，講第的野啦咁樣。
No comments:
Post a Comment