-5℃ 落雪
講開我阿爸阿媽，令我想起一樣野。
有的女仔，成日都拍拖拍着的暴力男，
然後會係朋友間哭訴，咁初初梗係安慰佢啦，
然後就同佢諗辦法解決啦，
週而復始咁樣發生好多次之後，
你就會發覺呢個完全係佢嘅問題。
其實係佢性格專係吸咗呢類人一齊，
佢唔改變自己處事手法或性格，
我地做朋友嘅真係講多句都嘥口水。
其實我阿媽嘅性格同呢的女仔都幾似。
再加上的傳統嘅思想，因為阿爸係一家之主呀，
唔想成日家嘈屋閉呀，blah blah blah,
所以我地細個時佢選擇忍耐。
必須要澄清嘅係，我阿爸無動過手，
但語言暴力同家暴男都係一樣，
你忍咗，佢就會繼續。
其實，忍耐唔一定係美德嚟架。
所以咁多年嚟，阿媽係積積埋埋好多怨屈，
係阿爸退休之後，
就爆發出來了。
佢又爆得好奇怪嘅，
因為的怨屈係以前嘅事麻，
已發生嘅事邊個都改變唔到，
就算你要佢講十萬次對唔住，
佢都只係口講 (心裏咪又一樣) 你都無佢符。
所以，阿媽依家係樣樣都睇佢唔順眼。
由阿爸退休無做野之後，因為日對夜對，
就開始嚟料喇。
先嚟就話佢退休無做野都唔幫手做家務
(!!! 其實係你自己呢幾十年縱容佢架喎 !!! )
到佢幫手洗碗，就話佢的碗碟疊法，
沒有跟足佢要求咁樣疊起
(佢一定要跟大細去疊的！)
呢個只係例子之一，其餘有幾十萬樣。
我嚟咗呢邊咁耐，我很直接的問佢，
咁洗唔洗離婚？
佢又話唔洗！！！
咁你又唔肯放低，何必要咁唔開心咁過日子呢？
呢邊嘅形容係心裏有怨恨
hold a grudge / bear a grudge
我第二次嚟探肥鬼 (當時已決定結婚)
係一個朋友聚會上面，肥鬼一個朋友問我
You decided to put up with him?
我嗰時唔知咩叫 put up 我問番佢
佢解釋就係 - 接受佢的一切，好與唔好的
因為落雪，邊到都唔想去，
所以 dum 到 8am 先出嚟。
係石頭上面薄薄的一層雪。
然後同肥鬼結婚之後，成日會講笑咁講話，
結婚前你無講清楚你會成日放臭屁架喎
肥鬼就會答
Get over it 或 you will get over it
意思係 接受啦 或 認命啦你 咁上下
但係呢個翻譯 有的中國人的想法滲咗入去
其實 可以講話就係接受，就係咁簡單
沒有唔開心嘅感覺，就係接受呢個人就係咁架喇，然後番過一頁，就咁樣繼續落去。
我諗我阿媽當年無完全準備 put up with 呢個人
再加上佢自己，沒有 get over it 嘅想法
反而將唔開心的都留係心
咁樣攪到自己唔開心。
而且，佢成日都想改變阿爸。
佢覺得阿爸唔肯改變疊碗碟嘅做法，
係不肯接受改造，不肯接受再陪訓，
呢個係唔夠愛佢嘅表現，
佢認為阿爸係愛佢就會為佢改變(!!!)
想想吓，與其話我阿媽係傳統思想婦女，
不如話佢係一個天真得可憐的人。
世界上沒有任何一個人會為令一個人改變架！
本來我想講話傳統嘅思想令到佢咁慘
但係想深一層，個腦係你嘅，
你鐘意點諗都得。
你要決定繼續忍嘅，就要 get over it
唔係嘅，就堂堂正正兜口兜面話佢知，
以後唔好再咁樣同你講野。
我諗呢的好明顯都係一樣代溝。
或者我應該用家姐嘅處理手洗
"佢兩個一齊生活咗咁耐，佢兩個自己會拆掂佢"
大西洋嘅風不停向內陸吹
將海面上嘅冰打碎 (黃色嗰的全都係碎冰)
今日唔係霧呀！
係落好蓉嘅雪 係叫 white out
肥鬼阿爸阿媽係佢好細個就離咗婚嘅。
佢兩個成日都問候吓我父母點呀？生活好麻？
西方人形容我阿爸阿媽呢的，
仔女大晒，結晒婚，搬走晒嘅做 empty nest
我有時會係到諗，其實佢兩個成日哎交，
只係表面係一齊，同肥鬼阿爸阿媽有乜分別？
No comments:
Post a Comment