Survey 問卷調查

唔知大家會唔會好似我咁，得閒無聊時 (貪心嗰時？) ，就會做吓呢的超級市場問卷調查。

係呢邊，任何購物的地方，快餐食肆，都會有呢的問卷調查可以做。

超級市場嗰的，會以每月抽獎形式引誘你去做問卷，獎品多數就係$500/$1000 的超市現金券 (從未見有人話贏過！！) 快餐食肆嗰的就實際啲，多數係做咗問卷就下次幫襯有九折或送你薯條汽水之類。

好老實講，以前我都無做呢的問卷嘅習慣，其實係真唔係真抽獎都無人知？依家咁流行 飛時book twit 喳 嗰的，都唔見佢地公怖過每月得獎的人。

不過，自己做過 walmxxt 之後，先至覺得要幫吓的零售業嘅朋友，所以先會耐唔使就去做呢的問卷。點解咁講呢？

係呢邊嘅零售業，用最低工時請人已經唔係新鮮事。以往還有星期日返工出工半糧，及一年之中有幾個大節日返工會出雙工，呢的津貼依家全部 cut 晒，淨番唯一一樣嘅野就係所謂每季獎金或年度獎金。

係每日嘅工作例會，經理會不停的要求每位同事都要做好工作，為求呢間店舖達到營業額目標，每間舖都有一個金額嘅目標業績，第一年，好似好簡單咁，只要金額達到目標，就會每人都有獎金。

好似好正常，跑到數就有獎金。

點知第二年，業績目標提高不在話下，佢話就算間舖賺錢，都要顧客滿意度達標先會有獎金(??)
顧客滿意度點嚟？咪就係呢的問卷囉。
好老實講，正正常常去超市買野，正正常常咁買完野返屋企嘅人，有幾多會咁神心去同你做個好好答案嘅問卷？多數九乘九嘅人，都係有不愉快經歷就會去做問卷煮你米(投訴你，比低分) 。

呢個顧客滿意度係拉curve 嘅，因為做問卷嘅客唔多，只要一個不滿意嘅問卷，條curve 即刻拉低咗，成個月就要不停乞求正常的客人做問卷務求條curve 上番嚟，唔係又無獎金囉。

試過好幾次，業績達標，但顧客滿意度未夠而沒有了獎金，即係努力工作了，公司是賺錢了，但又唔派獎金。下個月仲有邊個會好努力工作呢？

又要講吓，零售業係出晒名長期請唔夠人嘅。簡單嚟講即係一間舖基本要每個部門一人，十個部門十個人，佢長期只係得5-7個或更少，即係你一入去就已經係一個人做1.5或2個部門嘅工作，要做到間舖嘅業績達標，你係日日都要超級努力工作，即係差唔多一個人做3個部門嘅工作量咁上下。

這樣的一個環境，製造了很多野蠻的客。例如，明明呢邊出去整車，你係要book (預約) 嘅，睇吓你要整的乜，睇吓個師父係唔係到，睇吓要整幾耐，排到幾時整你架車，等等等等。

我做個間 walmxxt 係有車房嘅，價錢比出面車房平，但一般共識都知水準低，同埋只係能夠做基本野，因為唔係成日有生意，所以長期只安排一兩個同事，有個客揸架車入嚟，無預約，要等，等到佢之後又話換個幾條車呔裝得唔好，向經理投訴，最後一條車呔免費還要送佢$25現金券。呢的擺明嚟屈錢嘅人越嚟越多。

我自己都做過別人嘅上司，絕對相信員工係可以發揮小宇宙，但唔係日日囉，一個員工無可能日日都變的奇蹟出嚟架。久而久之，就係有心做的員工都會變 hea 做就算。

>>>>>>>>>>>>>>>>>>>>

另一方面，呢的問卷真係越嚟越煩。

已經不再是簡單的問你間舖乾淨嗎？員工親切嗎？係咪要買嘅野全都有貨？
原先呢的問卷應該全都係選擇題，依家攪到係，最好係10分和最差1分，佢差唔多每題都要你另外解釋點解比10分或點解比1分，最少要3句句子！係呀，限你字數呀，又問"如果你係經理，呢間舖要點做嚟提高水準？" 呢的我真係當廢話嘅問題，見到真係想打爆電腦，答咗你叫你請多的人，你又唔係照做，問嚟做乜先。

最攪笑係由呢的問題睇到依家的人，就算去食個快餐都當自己皇帝出巡咁樣。

因為有間快餐問卷係問"員工有無親切問候你？" "員工有無提議你買乜嘢食？" "員工有無嘗試同你傾偈？" (engaged a conversation) 我睇到呢到真係睇到眼都凸埋？

嚟食個快餐，最基本就係要快，另外我係因為的炸雞堅係好味而嚟，未入嚟已經知自己想要點邊嗰餐，很期望食呢個炸雞，所以好想個店員，咪咁多廢話，渣渣聲整的炸雞出嚟比我食就得，絕對唔想佢嘗試同我傾偈，因為我一心就係嚟食好味嘅炸雞。你仲想要求的乜呢？

但係依家的人可能心靈太苦悶了，又無朋友，所以去超市同個收銀傾偈，個收銀見到後面一條長嘅人龍，同你傾，跟住又會比人照肺話做乜咁慢，唔同你傾，又係比人投訴無禮貌唔熱情的同佢傾偈。

>>>>>>>>>>>>>>>>

如果你住我呢頭，介紹你去食 Mary Brown 炸雞，我覺得比 KFC 要好味好多好多。。。連嗰雞胸都非常 juicy 唔乾，好好味！

炸雞本來就係美國南部食物 (另一個超好味嘅係 chick-fil-a 塊雞大過個包，每次落去都要食過先會返屋企。肥鬼係"牛魔王"嚟嘅，但係佢都唔會放過食雞包嘅機會)!!!

而 Mary Brown 本身就係美國維珍尼亞州的人，有一個好好味嘅炸雞食譜，認識咗兩個 Newfoundland Canada (加拿大 紐芬蘭) 嘅人，佢地都覺得個炸雞好味就買咗佢個食譜係加拿大開咗 Mary Brown 炸雞！！！

我每次去都食四件炸雞餐，比起 KFC 佢係好明顯的將半隻雞斬開四件比你，連皮連骨，唔會令人以為佢養"奇怪的部件雞"...