我地中文叫"披" 嘅野，佢地英文叫做 throw / afghan / bedspread 多過叫 blanket 。
我地生活係亞熱帶地區，真係上床瞓覺先會要冚披，
然後呢，係床上冚嗰張野都唔係叫 blanket 而係叫 comforter 。
就好似呢張相入面，冚係最面頭嗰張靚靚嘅披就叫 comforter (下面會再詳盡的講吓呢套床上用品)
12 piece bedding set
12件床舖披席套裝
係呢邊你去床上用品百貨公司，
全部床都係咁款架，無花無假！
去人地屋企 (例如：肥鬼媽) 佢屋企睡房張床，
瞓醒執床就係變番咁樣樣嘅。
客房嗰張床就更加靚啦！
所以我地去佢屋企小住一吓嗰陣，
我諗佢見到我執床嘅水準真係反眼！哈哈哈！
有幾次佢仲忍唔住行過入去 touch up (輕輕執吓) 一吓！！！
唔係你以為係呢種就叫執床？
呢張 comforter 其實係裝飾作用多過實際作用，因為通常 comforter 放係最面層，下面會再有薄披 (bedspread / blanket) ，就好似你去酒店住嗰陣，最面嗰層裝飾用嘅披你會拎走佢一樣，佢地多數淨係冚第二層嗰張薄披嚟瞓嘅。
酒店擺係披面嗰塊裝飾用嘅野叫 duvet cover 通常係床尾長條型打橫的嗰塊，酒店的嗰塊就真係純裝飾用，或者有時的人會放個喼上床執行李會用嗰塊野墊吓，但係呢邊的人係屋企就會擺一張 decorative throw 係張 comforter 嘅上面，都係裝飾用的多。
Comforter 通常都係同床單枕頭套襯番一套靚靚的，要嚟showcase (展覽) 嘅，然後夜晚 comforter 拎開，裝飾用嘅枕頭都拎開，咁先瞓嘅。不過真係好凍嘅夜晚當然可以用埋佢啦！
>>>>>>>>>>>>>>>>>>
講番 throw 又叫 Afghan 佢地多數以 size 去分別，最普遍嘅大小係 50吋x60吋 另一個名叫 Lapghan (Lap throw) lap 係大脾，通常係老人家 (特別要坐輪椅的) 放係大脾到保暖，通常係 36吋x40吋大小。
咁點解"披" 又會叫 Afghan ???
呢個字係大約1700年代第一次係英語出現，意思就係 Afghanistan (阿富汗) 而當時呢個國家盛產紡織品，由其是色彩斑斕的地毯同埋羊毛，所以後嚟簡稱 afghan 就意指織或鈎嘅"披"
依家上網搜尋 "ghan" size 就會出現好多"披"嘅大小指引去比人跟住嚟織
手鈎披嘅大小指引
通常披嘅大小就係跟番床嘅大小去織。
呢到要留意 Twin size bed (38W x 75L) 唔係雙人床！其實係單人床嚟架！！我自己因為以前讀酒店系，有做過執房所以先識，通常就係大學生宿舍二人一間房，一左一右兩張床，嗰張就會係 twin size bed
另外呢邊都有 Twin XL (38W x 80L) 就係比高的嘅細路瞓嘅。
之後嘅 Double (英式/加拿大叫法) (美國叫 Full) (54W x 75L) 都唔可以正式話係雙人床，只可以話係闊的嘅單人床，或者比大人同細路孖鋪就ok 兩個大人就唔 ok 。我試過訂酒店時睇漏眼，間房唔係 queen size 只係 full size ( 迫你加錢訂貴價房) 兩個大人瞓真係好容易碌兩碌，就比肥鬼踢我落地。
跟住就係 女皇Queen size (60W x 80L) , 國皇King size (76W x 80L) 同埋 Cal King (72W x 84L) - 呢個全名係 California King 係比的勁高嘅人瞓嘅，上次去買枕頭嗰陣，售貨員話依家又唔興喇，所以去普通超市係買唔到呢種床單架，要去番床上用品店先得，不過如果你係求其的人(例如：我) 買 king size deep pocket 床單 (即係成16吋厚的床褥用嘅床單) 都會舖到落去架，不過的角就會縮咗位咁囉，哈哈哈！
你係呢張指引到會見到織比 BB 嘅披嘅大小。Stroller 就係BB手推車，呢邊的人唔興同 BB 著衫著到一舊糭咁架，因為都係車出車入之麻，所以佢地出出入入都帶披，放BB 入手推車，扣上安全帶就會冚披。
最新嘅安全指引係話bb 要除埋件外套先好扣安全帶，咁樣先能令到安全帶，係出意外時發揮最大功效。
而係 stroller 下面嘅 Crib 就係BB床的大小。
最後呢張指引其實都大同小異，不過係呢張指引，佢有 Bassinet / Cradle 係乜東東？就係搖籃。
最舊的最傳統的，真係手挽籃一個，
全"自"動的搖籃，自己手動搖。
後期的嘅，名符其實的可以搖嚟搖去的草籃一個。
搖籃係比剛出世至6個月嘅bb瞓係媽媽旁邊，通常6個月以後(bb開始識坐) 就會轉去瞓bb床同埋去番bb房自己瞓。
=======
好啦，講完披，又講番上面嗰套床上用品。
最面嗰張披叫 comforter 跟住下面一層披就叫 bedspread / blanket 咁再落一層就係床單。
係美國買床單，就係一套兩件，flat sheet and fitted sheet 係乜頭乜路？
Fitted sheet 床笠，係四邊有橡筋，用嚟笠住床褥嗰張。
Flat sheet 床單，就係相同顏色的一塊布，其中一邊有花邊為之頭，另一邊無花邊為之尾，頭向枕頭，尾向床尾。
呢到要留意，fitted sheet 床笠包住咗床褥之後，就放床單 flat sheet, 但係床單有花嗰面係向"下" 擺，之後冚上披，再冚上comforter
如果你曾經有住過好高級嘅酒店，佢地以前會有一樣叫 Turn down service 係乜東東？就係黃昏時份 (通常的人出晒去晚飯嗰時) 執房的員工會入嚟你間房，將 flat sheet 到 comforter 咁多層嘅野，向面摺到露出枕頭。(依家嗰的全部都係慳錢酒店，無呢支歌仔唱囉！) 佢地仲會將的燈較暗，等你地晚飯之後返嚟間房係一個瞓覺休息氣氛 (ambience)
所以 flat sheet 嘅花係向下擺嘅，因為要摺咗之後嗰花就會變咗向面，比客人睇到喇。
好似下面呢張相咁樣。
而嗰人呢，就係瞓係 fitted sheet 床笠 同 flat sheet 床單中間嘅，好多時的人會攪錯咗，瞓咗係 flat sheet 床單上面，即係同張披有直接接觸！咁樣有的危險，因為美國嘅呢種床上用品風格，張披唔係成日洗架！
我屋企的床舖披席係一星期換一次，係將所有枕頭套 + 床笠 fitted sheet + 床單 flat sheet 拎去洗，嗰的披係換季先洗一次架渣。
記住 flat sheet/ fitted sheet 呢個係美國嗰邊嘅風格。係加拿大呢邊呢，就同歐洲英國風格近的。
即係點？
佢地無乜 flat sheet 床單套裝，佢地多數係用 duvet cover set 即係披套(披袋) 套裝，就係一套套裝入面得兩個枕頭袋 + 床笠 + 披袋。
呢個風格，張披用披袋笠住，就咁直接冚住個人咁樣瞓覺，所以每星期清潔就要將個披袋拆出嚟，洗完，乾完再放番張披入去。
我睇過好多網上影片教點樣極速容易換披袋，不過我嗰張係 king size 披，我得嗰5呎4, 要成日咁樣"揚"張披，真係手都斷呀！所以我屋企全部都係美式床褥套裝，不過我都有兩個披袋，夏天用淺色的，冬天用深色的，換披袋嘅工序就一年做兩次咁大把。
========
唔停得落嚟，好長氣都一次過講埋佢。
枕頭。
上面呢張相叫做 12件床上用品套裝。
12件係點計出嚟呢。
Comforter 裝飾用面披一張
Flat sheet 床單 一張
Fitted sheet 床笠一張
Decorative pillows 裝飾用枕頭三個
(圓筒型一個 + 小的長方形的兩個)
圓筒型嗰個有時比人當頸枕，
長方形的有時可放小腿下面或坐起身時放背脊承托
Pillow sham 有圍邊的裝飾用枕頭套 兩個
(白色的，放最後排，最大的嗰兩個)
Pillow case (white) 白色枕頭套兩個
Pillow case (brown) 啡色枕頭套兩個
共12件
要留意，最後講嗰三對枕頭，淨係得枕頭套，枕頭要你自己買架。而三個裝飾用嘅枕頭，係買嘅時候就已經有埋棉塞滿咁嘅。
好啦，咁多枕頭(連大夾細9個) 真係瞓覺嗰時係用中間白色同啡色嗰四個架渣，其他嗰的全部都係得個靚字要嚟擺架！哈哈哈哈！再傳統嗰的，就白色嗰兩個都係裝飾的，淨係用啡色嗰兩個枕頭，不過依家多咗人瞓一個枕頭又攬住一個枕頭瞓覺，所以就用每人兩個枕頭共四個，其餘裝飾用。
最後面嗰對裝飾用枕袋 pillow sham 係四邊有圍邊 (flange) 嘅，同一般枕頭袋嘅分別，係呢個枕袋個開口係背後正中間，而不是在旁邊開口的。
>>>>>>>>>>
呢到有一個床舖披席嘅介紹(英文) 好詳盡咁講每一個物品的定義。
Bedding-guide
>>>>>>>>>>>>
上面呢張相入面，其實有一樣野係無包的。
就係深啡色圍住張床，包住床脚嘅裙邊 (bed skirt)
睇唔清楚可以睇下面呢張相，白色花邊包住床脚呢樣野就叫 bed skirt
以前的人床下底收埋的野，要靚靚咁遮住，所以有用 bed skirt 樣野，但佢係勁麻煩的，放係床褥下面同床架之間，你要洗佢的話，你就要每次抬起張床褥拎佢出嚟，依家的床褥全部都幾百斤咁重，點攪？清潔床下底又好麻煩，所以第一年就比我拆鬼咗。
>>>>>>>>>>
好啦，解釋完床上用品，咁你以為千幾二千蚊買張床會有晒係呢到全部野？？？
少年，你太年輕了。
仲記得十幾年前過嚟探肥鬼，嗰時已經有結婚嘅打算，就諗住喺我返香港之前，同肥鬼一齊去買張兩個都瞓得舒服嘅床啦。入去個舖頭，擺晒係到一行行，張張床都係咁上下樣嘅：
逐張試吓邊張舒服的啦，最後揾到一張舒服嘅，肥鬼去比錢約埋送貨。最後嚟到屋企。---->
攪完一大輪，嗰兩個人走咗，我就問肥鬼佢地幾時返嚟(???) 肥鬼望住我，一頭霧水！我再問佢，佢地係咪漏咗床頭床尾要第二論送貨，佢先明我問乜，再解釋話我地淨係買咗床褥 (mattress) 加床架 (bed frame) ，原來就係得咁多。
床頭床尾嗰兩塊 (head board foot board) 係另計架！！我真係非常之大鄉里！！哈哈哈哈！
不過除咗睇落好似怪怪哋咁之外，總之你張床係靠牆咁擺嘅就無乜問題吖！我地咁樣都照瞓咗成 5 / 6年直到搬屋先買番個床頭床尾！！！
===============
最後，講番張床係一個展品 (showcase) 呢樣野。
呢邊嘅人，去朋友屋企玩或者開派對，主人家見客人未嚟過佢屋企，會邀請你帶你"參觀"一吓佢屋企 yes, tour around the house / show you around ***** 所以有朋友嚟之前一定要執屋 (不過呢邊係絕對唔歡迎人地突發到訪嘅！) ******
而每間房對主人嚟講，就係一個展品去展覽比人睇。
例如肥鬼媽就係對自己嘅品味好有要求的人，佢點樣展現呢樣野出嚟呢？就係肥鬼媽間屋由大廳，睡房到厠所廚房，所有攬枕，梳化披，厠所毛巾，裝飾全部都係顏色或花紋配對好的，每季都替換 (例如春天就用鮮豔的橙黃色系或以花卉做主題裝飾，到冬天就用暖的色系如深紅深啡) 肥鬼阿姨，一屋四房，小朋友已經大晒搬咗出去住，每間房都執到好似張相咁架！
一間屋就係一個主人的展品。
一張床嘅配搭就展現了主人的品味/風格。
呢到申延咗另一樣好緊要嘅野出嚟。
亞洲人好多都唔明，肥鬼以前都唔明，就係點解亞洲咁多 Tee 恤會擺的無嚟啦更嘅字係上面，佢以前成日問我嗰件衫點解？點解嗰個人會著嗰件衫？？點解會擺個咁嘅字上去件衫度？佢以為我地係有特別的意思。
而我就要搭，唔係呀！佢地 9x9 係無意思架，嗰個人都未必知道嗰個乜字嚟架 (不過覺得靚就著囉) 更好大可能仲要係抄人嘅但又唔想比人告，就求 L 其改一個字母咁囉，大陸人/亞洲人好多都無個人身份呢個意識架！
西方人睇自己嘅身份 (identity) 係好認真，所以係佢地嘅衫上面，有字/有句子的話，就代表嗰個字/句子能夠代表佢，或者係一樣佢好認同嘅野。其餘時間佢地著好多都只係淨色衫 / 花紋衫。
所以你見美國人好多時都著，寫住自己嗰州份嘅恤衫或者係大學學校名嘅恤衫 (有好多人唔明，就覺得佢地咁樣好膚淺！) 其實呢的全部都係歸屬感與認同。佢地對自己長大嘅地方係感到非常光榮，會大大隻字寫係心口話比人知我係呢到嚟架！
肥鬼試過去到愛爾蘭，係街行過見到有個人戴住 Detroit Tiger 嘅帽 (底特律棒球隊) 跟住同佢興高采烈的傾咗成30分鐘，原來嗰個人曾經打棒球又好鐘意呢一隊。
又試過海外遇上著同一間大學的，行埋去叫了一聲大學口號，又識多個朋友。
同一道理，要表現自己嘅身份，最直接的就係自己間屋，自己間房。呢邊睇謀殺或失蹤嘅案件，探員第一件事，就係去受害人間房去睇，每一張相，每張海報，每個擺設，都有助探員去了解當事人係一個點樣嘅人。
原來要隔咗咁多年之後，
自己先明本土歸屬感呢的道理。
很長的一篇講吓東又講吓西嘅野，多謝收看。
No comments:
Post a Comment