呢幾個月

早前為咗使我雙手"忙"的，唔比機會自己成日沉鬱係個電話到 (即係香港嘅新聞到) 我想到一個辦法-> 做織女。

唔講你唔知，呢的冷係三年前聖誕後大減價買落架 (係 michigan 搬過嚟，一直坐係衣櫃入面) ，即係又係嗰的有頭威無尾陣嘅project... 依家啱晒

今年所有屋企人嘅聖誕禮物都係呢的。

Headband 頭箍
頭箍比起帽更易織，好快就可以完成一個，好有成功感，又唔悶。我盡量織唔同嘅花，咁樣就可以逼自己一定要好專心咁織，數住每一行每一針。

呢的叫洗碗布 washcloth
係呀，呢邊的人用洗碗布架。唔係真正的洗碗用啦。呢邊家家戶戶有洗碗碟機，但係的餐具入洗碗碟機前通常都會沖一沖，過吓水，有的食物殘渣痴住嘅會係咁易卒吓，所以就用呢的細細的大約5吋x5吋正方形嘅洗碗布。全塊都係低針就攪點。係網上揾到個織法教織呢條花邊，好鬼容易。

唔想自己織的話，係呢邊網上好多人聖誕時節會賣cad$10/3條比人做聖誕禮物 (stocking stuffers 搭頭搭尾禮物，下面有解釋)

係呢邊的 1 蚊店有 made in canada 嘅棉冷，一個冷織到兩細塊或一大塊。

下面呢個 cushion (攬枕) 係睇到網上教學影片，教用超級粗冷就咁用手織嘅，唔洗用織針。又係一蚊店買冷，cad$4/一個冷，呢到要4個冷，兩個係入面打圈，兩個織外圍，實在太簡單易做，一個下午睇到影片，行出去買冷返嚟整完都唔洗3個鐘。

其實我個織女嘅 project 由8月就開始架喇，睇住香港嘅新聞每況越下真係心悒，所以要攪到自己雙手好忙，分散注意力，調節心情又可以比個腦清空一吓。咁啱嗰時仲未諗到侄仔侄女嘅聖誕禮物 (因為相隔很遠要郵寄，就要一早諗定) 又唔想買無聊無意思嘅玩具，所以織咗3張披比佢地。
對於大人嘅聖誕禮物真係覺得無乜意思，好多時都係買埋的無謂又唔等使嘅野，浪費地球資源。但係小朋友的禮物我還是很著重，始終對於小朋友嚟講有份禮物收係好開心嘅事。

織咗呢張 cable 粉紅/紫色比 4歲Abbi

織咗呢張 wave 粉藍色比 7歲 Anthony

呢兩個就係佢地啦，匿埋咗係披下面。

織咗呢張 waffle 啡色/藍色 比 3歲Vinny

會諗起織張披比佢地，係咁啱今年佢地有自己一間房瞓喇，披嘅顏色都同間房襯番，有排用，有意思。

呢個世界，係所有野都變得物質化之前，係好有意思架。我地中文叫"披" 的東西你會以為淨係翻譯叫 blanket 。而當我搜尋 blanket patterns (披的織花圖案) 嘅時候，就出了好多 "receiving blanket" 出嚟，係乜東東？
就係呢到當有 bb 出世嗰時，以往傳統係祖母/長輩會親手織一張20x20嘅小披，係 bb 出院嗰日包住bb返屋企，係祖母給bb的第一份可以用好耐嘅禮物，也是小朋友長大後可以珍藏的寶物 或者傳落去比孫用又得。依家真係無乜人織野，好多家庭都要阿媽都出去打工養家，仲邊有閒情嚟織野？

好彩呢邊今年8月尾9月已經開始轉涼，所以織咗3張披，好多頭箍同洗碗布，應該有排都唔織了。

>>>>>>>>>>>>>>>>>>>>

上面的題外話：stocking stuffers 係乜嚟呢？
呢邊聖誕送禮，基本上係至親的屋企人，先會認真的每人買一份有咁上下份量嘅禮物。但係同我地亞洲人一樣，除了至親的屋企人，仲有好多親戚朋友，都會準備小小心意禮物，糖果食物當然少不免，但係要有特色的，例如同事一大堆，就可以買呢的洗碗布再加舊聖誕朱古力，用小小禮物袋，袋住每人一塊洗碗布+朱古力。或者有的家長都會用呢個心思，大量製作聖誕禮物送比仔女學校的老師。
Stocking stuffers 仲有另一個意思呢，就係本身份禮物唔係好夠份量，咁就整多的呢的咁樣嘅野入落個袋到，整到好似好多禮物拆咁樣，簡單的講，直頭就係買菜搭條葱或者去斬料搭舊豬頭骨比你咁樣的搭頭搭尾禮物。