Fishy

雖然今日肥鬼休息，但係好難得我又的起心肝，趁好天氣出去行咗幾日，唔想停，就晨早6點落去行。越嚟越近夏天，日出時間越嚟越早，差不多5:30am 就開始光，6am 已經光晒。

呢張影到好光咁，其實超多雲

不過就係多雲先影到真太陽

其實就係得嗰小小的一點

呢張睇到海邊的水位終於返到上嚟

係橙色 sir 滑梯前面個位置，

就係我平時行落一級，坐低去影水中大石個位，

今日睇到連嗰一級都比水蓋過了。

行行吓發現今日的鴨好奇怪

平時的鴨都係岸邊呢頭揾食 / 晒太陽，

但係今日全部都游晒出去，仲要係好大堆一齊

(平時係打散晒，各有各咁樣揾食架)

仲有，今日的鴨好似尼斯湖水怪咁樣，

得條頸同個頭係水面。

如果平時你多留意，

的鴨係晒太陽或悠閒咁樣游水嘅時候，

佢地個身喺浮係水面嘅，但係當佢地不停重覆潛入水去捉魚嗰時，就會將個身座咗落去水入面，離遠咁睇，就淨係見到頭頸，好似相入面咁樣。

上面呢幅係嗰到兩隻鴨啱啱潛咗落去。

佢地潛入水嗰陣，好得意架，

會向上申長條頸，再插水咁潛落去，

就好似泳手略略跳起再插入水咁樣，

有時係海邊見到的鴨潛咗入去，

我都會好好奇咁樣企係度等佢返上水，

你會發覺佢真係可以潛落去好耐，

然後係好遠嘅另一邊浦頭。。。

到我行到去沿岸嘅另一邊，我就見到的奇怪野。

係水中間見到的水嘅波動

企係度睇咗一陣就發覺原來係好多魚呀

佢地一齊游上水面

就出現上圖嘅景像

跟住我再留心睇

沿住岸一路都係魚群

(英文係 a school of fish)

之前幾星期開始見有人釣魚

同一位女士傾計，佢話今年的魚遲咗少少，

佢話遲的季節一到，就會有好多魚，乜野魚竿都釣到，依家我明佢講乜喇。

而且終於明白，

的鴨原來係出面食緊大餐呀。。。

係時候我都出去睇吓釣唔釣到晚餐返嚟。