講粗口的鸚鵡

(呢隻應該係 robin 唔係 鸚鵡！) 

同阿媽講咗一陣電話，

因為近日佢同阿爸去咗參加一個婚禮，

係一個遠房親戚的女兒，阿媽喺咁係到嘗試解釋，

喺邊嗰邊嗰親戚，我都仲係一頭霧水，

直到佢話，新年去拜年，

佢地屋企隻鸚鵡會講粗口嗰一家人呀，

啊！！！早講麻，原來係佢地。。。

對於兒時記憶，覺得真係好攪笑。
由其是新年跟阿爸阿媽去拜年，阿媽話叫人喇 (最好提供埋稱呼) 咁我地就叫人，逗利事，然後就係食糖，發呆同等走得未。。。

講真，嗰的親戚一年就係見嗰一次，仲要係同阿爸係到講鄉下話嘅，鬼記得咩。。。

唯獨是呢一家，嗰次去拜年，發現佢地屋企有養鸚鵡架！嗰時我地細個仲好窮又住廉租屋一家六口已經好迫，阿媽乜都唔比養 (就係養我地麻！) 所以對動物很好奇。
而且呢隻鸚鵡會講粗口架 (因為呢家親戚都係粗口横飛嘅人嚟嘅) 嗰時阿媽家教都好嚴，屋企無人講粗口嘅，所以聽到就覺得好好笑。

就係咁樣，呢隻鸚鵡係我腦海留下了深刻印象，阿媽每次要講邊嗰邊嗰親戚，一講粗口鸚鵡，我就知係呢一家人。

>>>>>>>>>>>

再講一個唔關事嘅故事。

大學的女同學們全都有小朋友。
每次聚會，都攪到一鑊泡。
原因？
大家好明顯係不同的家長制度。
有一位媽媽，嗰女15歲了，跟同學去麥記做project 佢都要坐係隔離枱跟足全程。
有一個就係 join 晒所有同學媽媽 whatsapp group 無蝕底嗰類。。。

最大分別係另一位媽媽，非常的放養孩子，報學校，是但最近屋企的就得，屋企無姐姐嘅，無報興趣班補習等等等等

問題來了。
新年要攪團拜，個個阿媽都帶小朋友 & 先生出席，唯獨是呢位阿媽單拖出嚟，其中一位攪手太上心了，回應佢單拖的決定話 "乜KK (嗰小朋友名)  覺得同我地一齊玩好悶咩？咁都唔肯出嚟？"

我心諗 "of course" 嗰細路覺得你班師奶悶，佢咁樣係正常架喎！！！你地帶晒的細路出嚟就以為佢地一定玩得埋，但係講緊呢的細路都係一年先見一次的，有幾熟？？？

係對面岸觀戰嘅我，只可以私底下各自同佢地解釋，不是友誼出問題了，而是母愛泛濫形 與 自由長大形 的教育理念，可惜係佢地很容易又會將事情混為政治意見的不同，能維繫友情多久，只能盡我能力，其他的隨緣吧。