壓力

剛同朋友通電話。
早係一月尾嗰時，佢發現自己不正常的甩頭髮，去驗血，證實不是什麼病，再轉介去第二到，證實係斑禿 alopecia areata 又叫鬼剃頭。

佢一向都係超級緊張嘅人，乜嘢都要安排得好好，早前因為工人姐姐的問題攪到頭昏腦脹，依家叫做解決了，身體一放鬆就壓力爆晒出嚟。

講壓力，佢都知佢自己只係甩頭髮已經唔算最慘，佢有朋友壓力大到隻眼凸咗出嚟 (係呢邊睇醫生會話你係眼壓有問題，咁咪即係又係壓力爆煲囉，肥鬼舅父都試過)

同埋我個朋友都知腎主頭髮，佢都有睇中醫嘅原因就係除咗甩頭髮之外佢嘅月經都亂晒。女人一大壓力，就係呢的地方爆發出嚟，另一款壓力爆煲就係日日頭痛眼痛胃痛一齊嚟。

現在佢中醫西醫內外一齊醫，睇吓有無得救，不過最少可以安慰自己，不是生命有危險。

佢嘅病情都幾急幾嚴重，因為仲係返緊工日日要見客 (做 sales)  所以醫生介紹佢去做假髮，初時做夾上去的，點知一兩次治療之後，夾都夾唔到要等個假髮到。

知唔知假髮好貴架？
佢話個假髮要 $6000港幣 再加睇西醫，每次都要$3000 唔怪得的人話"好死唔洗病" 很難想像如果我仲係香港，如果有咁嘅病，我的積蓄可以捱幾耐？？？

我諗佢訂造的應該係真髮所以咁貴，因為我係呢邊就咁 search  cad$50-100 就有交易，不過寫明係 synthetic (人造)

為咗紓緩一吓佢心情，都盡量講的唔好咁認真的事，就講比佢知，我以前係 walmxxt 有個老同事，很潮的，週不時會突然間戴個上面咁嘅紅色假髮返工，一講紅色我個朋友就驚了，以為係超級大紅色 (佢依家好怕人注意佢個頭，所以要揾黑色絲巾) 其實只係好似染髮咁黑底表面紅紅地。

Anyway, 依家決定快快手織完我張披，之後想揾線冷織頂帽比佢，因為佢話依家香港開始熱，的帽又熱，又只係揾到一條黑絲巾 (成日都係咁，要揾嗰時就無，唔要嗰時成日見到)

仲有，我決定要留長頭髮去捐！
donate-your-hair
呢個係加拿大癌症捐頭髮網址，雖然朋友唔係癌症，但係依家知道原來咁貴嘅，我都好想幫佢地，不過最少要8吋，同埋我早輪染咗一次，要等等佢生長番就去捐。