凳

嘩！無見幾日，突然間靈感到。哈！

你對坐的凳有要求嗎？

如果淨係講凳，我地香港人大多數即刻聯想到嘅，應該會係"摺凳" - 坐得又打得，哈哈。

香港居住環境稠密擠迫，屋企所有凳都係可以收起的或疊起的，細個從未聽過 sofa 呢會事。

我地嘅文化好其怪，就算係皇帝坐嗰張龍椅，都只係會講究的木要係上等酸枝，要雕龍雕鳳，又金又銀又要點點點，但係，坐上去的，一定只可以正襟危坐，從來無西方的想法 - 椅子就是要坐落去舒服呀！一坐落去 "啊！呀！"跟住就瞓著了的那樣的舒服，全身由頭到頸到背到腳，每根神經都放鬆的攤係張凳嗰到！

上次返去探肥鬼屋企人，佢阿媽裝修緊間尾房，將佢變做四季太陽房，所以想買張凳係入面睇書坐。

係美國的傢俱舖頭，全部都大大件嘅，同歐洲行簡約主義好大分別。不過，坐慣咗，你就會覺美國嘅 sofa 係好好坐嘅，好深嘅 sofa 可以成個人窩落去咁樣嘅。
唔知你鐘唔鐘意小睡/午睡？我鐘意到極點！！有張舒服嘅 sofa 係小睡嘅必須品，所以呢邊的 sofa 張張都會有張披 (throw) 做裝飾，隨時可以蓋上暖暖的就會瞓著。

肥鬼媽得佢一個人，所以佢想揾一人坐嘅 recliner (即係旁邊有個制，可以將下擺較起承托雙腳，另背部可以向後"埃" 變成半躺臥咁樣) 或 lounge chair (直釋叫大廳休息椅？總之就係又要靚又要坐落去舒服嘅凳！)

我嚟嗰年都買咗張 recliner (躺臥椅) 係肥鬼嘅。同下面呢張基本上一樣，約usd399 我已經覺得好貴，嗰時初初嚟，仲係會即刻係個心到諗，"哇，成3200港幣一張凳！好那貴吖！"

點知呢個死人頭坐咗唔夠幾個月，話張凳個角度唔好整到佢頸痛，又話個頭枕住嗰到的 cushion (軟墊)  太 bulky (太多太漲) 仲有承托腳部的唔夠長，而且凳入面的横枝 "eng" 到佢隻腳的骨 (好"eng"眼嗰個eng唔知點寫) ，總之就係唔鐘意，傳咗比我，就走去買過張！！！

之後佢買過一張再大的嘅 usd599 坐咗幾年之後我地搬屋，佢話嗰張開始坐扁咗，買多張就不停輪流坐到依家。

同肥鬼媽去睇凳，一睇就睇中一張咁樣嘅：

叫做無壓力凳，我地三個人輪流坐嚟坐去，張張都坐過晒，都覺得呢張德國手工製造的好掂，已經係超級特價，都要 usd1500!!!!!  我心諗，我成世女好似都未買過一樣野係港幣四位數的，家吓呢張凳要港幣萬二蚊！！！不過肥鬼媽係愛錫傢俱的人，全都好好打理，(佢廳嗰兩張真皮椅都最少15年了，又係好好坐嘅)  咁一件好嘅傢俬用上十年八載又真係抵番晒嘅。

講凳嘅原因係我呢張原來都坐咗10年！因為我地得兩丁友所以食飯都係坐呢張凳，除非大時大節佢的屋企人嚟食飯先坐飯枱食，所以呢張野係日日坐咁坐咗10年！！！終於的螺絲都開始甩甩地，咁又去 search 吓凳嘅市場價格。

嘩！一睇眼都凸。
呢邊近歐洲的，傢俬與屋企裝修都係歐洲風格，求其一個網站 click 入去凳嘅系列，第一張就已經係 cad8000!!!!
好似咁樣樣嘅：

仲有的正常的 cad6000!!!

呢的凳，我絕對相信佢地係投入咗好多人體力學，身體線條研究再加手工精緻打造的，但係咁樣嘅價錢，可以講話係藝術品要嚟擺係到睇嘅而唔係坐囉！
其實網站入面最貴的一張凳係 cad20,000 !!!!

我諗我呢張要坐多幾年先得。