Carpe diem
2021.7.23 星期五
Carpe diem (拉丁文) Seize the day (英文) 活在當下
>>>>>>>>>>>>>>>>>
好朋友終於比訊息我，佢離開香港了。
放心了。
>>>>>>>>>>>>>>>>>>
同兩個朋友傾計，佢地一的都唔明，覺得我只係一個過慮的黃C
佢地一個係中學同學，中七之後就已經嚟咗美國嘅；一個係中五的英文老師，佢嚟教嗰時只係剛大學畢業，所以只係大我地幾年，佢嫁了一個美國人，生咗兩個仔，大約2012年正式搬嚟美國。
言談間，佢地係完全唔覺香港有什麼大問題。只係等疫症完咗就可以返去探親旅行食雲吞麵啦！完全係"我無犯事，我無亂講野，唔洗驚"嘅心態。覺得我係一個過慮的黃C 或痴線的 MAGA 侵支持者。
>>>>>>>>>>>>>>>
我無同佢地講，我身邊親身的經歷。
我有直接的空姐朋友，就係嗰間講句"香港人加油"都無得撈嗰間。佢嗰 fxxbxxxk 係長期空置，因為比藍C 阿姐知道，會整死你。
我上面講的那個朋友，一同工作多年，大家都係動物比賽公司做HR，之後佢去咗生果報做，都唔撚洗係高層，半夜有狗上門抄家。正正常常奉公守法的人，一生人無同警察呢樣野有任何啦㨢，然後無端白事有狗半夜上門，家有小朋友，你驚唔驚呀？
>>>>>>>>>>>>
或者你可以形容，同我傾電話的朋友，佢地只係比較淡定！
我都廢事多口水講呢的 case 比佢知，嘥氣。明就明。
對於走，我睇法係，走到就走囉，走唔到，咪唔走囉，都係要生活下去呀。
唔走，都唔代表係支持中共呀。
當年納粹德國，都有好多城市，入面的人熱烈迎接聯軍殺到入去呀！
我不嬲都係"唔好理人點做，總之做好自己先算啦"咁樣嘅一個信念。
我呢個思想，以前會比人話我自私，不理別人死活咁樣，後嚟係美國，先發現其實我無錯。
Mind your own business 唔係自私，而係"我顧好咗我自己嗰部份， 就已經係為大局做咗好事
(即係唔會要人幫返轉頭，成為大隊拖後腿嗰個人)
而且 mind your own business 另一個層面意思係 keep your 2 cents to yourself (無人須要你比意見，你的意見可以吞番落肚)
依家就係太多人對別人一舉一動都有意見。
我同幾個正在離開的朋友都有一個共識：有小朋友的話，盡能力走。
依家去到 "河邊有隻羊" 嘅書都要拉，點住呀？
係咁嘅情形之下，你返屋企教小朋友真相，咁佢返學，就要從小學識，唔係每個人都可以講真話！講真話會唔安全。我覺得呢樣先係對小朋友最殘害嘅事。你一係就要接受學校對佢嘅洗腦。點揀？
No comments:
Post a Comment