從海地 看香港
2021年7月7日 星期三
海地總統摩依士 (Jovenel Moise) 在7號半夜1點，被外藉僱傭兵入屋刺殺死了。
我絕對無能力轉行寫政治啦，講政治野，我識條鐵咩！
不過我好努力咁扒咗十幾篇新聞同歷史 (好在海地同台灣係friend, 所以有好多正體中文字嘅新聞，唔洗睇殘體字洗腦新聞！) 覺得可以係到睇到一個香港縮影，什或少少未來！
點解會想講呢單嘢呢？
A) 因為自從甘迺迪總統 President John F Kennedy 係 1963年11月22日遇刺之後，我係唔會再相信任何政治人物嘅死，會係真的"單一偶然"發生嘅事件！有興趣就自己去揾甘迺迪總統遇刺嘅野嚟睇啦，海量資料誇到好似讀嗰 phd 咁架。
B) 覺得同樣係島一個嘅海地，同香港嘅歷史真。係。好。L 似！
>>>>>>>>>>>>>>>>>>
首先講吓海地呢個地方。
海地目前係全世界最L窮最L亂嘅地方。半邊島一個。面積 27,700 km² 人口 11,758,000 (2020數字)
同多明尼加共和國 Dominican Republic 分開嗰島一人一邊。位置就係古巴東面對出 50哩，而古巴就係佛羅里達州對出，所以同美國好近。(嗰受傷的總統夫人依家被送咗去邁阿密 Miami 嘅醫院留醫。)
海地 Haiti 同多明尼加共和國 Dominican Republic 共同分享嘅呢個島，本來叫做 Hispaniola / La Isla Espanola / Isla de La Espanola (簡單直釋：西班牙的島) 點解呢？好簡單，殖民囉！
呢個加勒比海第二大面積嘅島，本來住嘅就係加勒比海人 (Caribbean)
海地歷史>>>>>>>>>
海地原來主要有 Taino 同 Arawakan 兩種土人。('Taino' 呢個字係海地話就係解"群山"嘅意思) 用番佢地嘅土話，原本個島名係 Ayiti-Kiskeya-Bohio (係 Arawak 土話入面 "Ayti" 又係山地 mountainland 咁嘅意思) 因為呢個島 2/3 嘅面積都係山，大部份地方都係海拔1600呎以上。
(同香港山多地少又係一樣)
係1492年12月5日 歐洲航海家哥倫布 Christopher Columbus 發現並登陸咗呢個島 (winner takes all 嘅歷史書係咁講) ，事實係因為佢兩隻船係島嘅北面擱淺，返唔到西班牙，就地起咗個城堡 (La Navidad) 。到第二年1493年再返嚟嗰時，上年留低嘅人全部死晒，咁佢就"逆向擁有"咗呢個島(??) ，呢到就變咗"西班牙的島" Hispaniola
之後唔夠10年，到1502年西班牙正式殖民統治呢個島，所有土人的軍事反抗被粉碎，跟住的西班牙人係到發展咗15個城市，西班牙官兵將的土地分晒，又將的土人變晒做奴隸，係呢到發展咗好多種植園(種蔗) 同牧場(養牛) 。
好可惜，到咗1544年 ，因為感染天花病毒(Smallpox) Arawak 土人正式係呢到絕跡。
無啦啦的病毒點嚟呢？其中一個歷史論述，係話1500年代中期西班牙人攻佔墨西哥嗰時，帶埋的病毒(Spanish Diseases) 去，意外攪到墨西哥瑪亞人死晒一樣！而當時西班牙島當時就因奴隸人口少咗好多，西班牙人開始放棄的種植園抛棄呢個島，呢到開始變得荒蕪。
之後一段日子，就係英國/法國/荷蘭嘅海盜輪流係到佔據嘅日子。
係呢段日子中，法國人移民過嚟係最多嘅 (誰大誰惡誰正確！) 所以，1640年，法國就話自己擁有咗呢個島嘅西面 (即係依家嘅海地面積) 真係名符其實：剃人頭者，人亦剃其頭！到1665年法國直頭幫佢改埋名 Saint-Domingue 正式霸咗呢半邊島。直至1679年西班牙簽條約正式割咗呢半邊島比法國。
(係下面[A] 會講吓呢段時期歐洲個個國家打到飛起，路易14 的生平，點解西班牙會咁順攤話割就割)
之後的100年，越嚟越多法國人搬嚟呢到住，不停發展呢個島，種植園(蔗，咖啡豆，煙草，棉花) 養牛養豬，起石橋同埋鋪路，到17世紀，Saint Domingue 成美洲為最富庶的地方。1780年代，呢到供應歐洲40%嘅蔗糖 60%咖啡 仲有，呢到係西半球1/3嘅奴隸進口地方！！
係呀！同中共一樣，唔夠奴隸，除咗迫人去生的奴隸出嚟(生一個都唔夠，仲要人生夠三個) ，第二個辦法就係入口囉！就係咁樣，好多非洲黑人係呢個時候開始移殖入嚟。
(係下面[B] 又會講吓黑人，非洲黑人，海地人，多明尼加共和國人嘅一的野)
>>>>>>>>>>>>>>>
好啦！當家作主嘅時候到喇！
雖然1681年路易14 出咗法例要種植園主提供足夠的衣食住宿比的奴隸，但係，當時仍然容許對奴隸的酷刑，用咗100年去高速發展，去到1790年代，呢到有約50萬黑人奴隸。佢地見到1789年的法國大革命，全都"醒"來了，要反抗法國殖民統治。點樣反呢？
就係約好1791年8月22日半夜，約20萬住係島北部嘅黑奴，殺晒的種植園主人，女人同細路都唔放過，燒咗的蔗田同房屋(180個蔗田，900個咖啡同靛藍園) ，幾個星期就將北部變為廢墟，好快就佔據咗島嘅北部。組織起來反抗嘅白人去晒南面西面避啦。
點知亂事係會繼續嚟，因為黑白混血兒都走出嚟要求平等，然係又有的窮嘅白人要求同高級白人平等，有的白人支持歸殖，有的白人支持反殖，有的混血人支持黑人，有的混血人反黑人，什至最後係南面同北面嘅黑人都互相反對(!!!) 總之就係亂！亂！亂！
跟住有人希望法國派軍嚟攪掂佢啦，但係法國本土嗰時都因為大革命，有人想解放呢個島，講唔掂數。到1792年，法國諗咗成年決定派革命軍嚟解放呢個島，但係島上面嘅保皇黨就想回歸法國，所以又打過。要到1793年黑人奴隸+革命軍 對打保皇黨，黑人奴隸最後打嬴，法國宣佈解放Saint Domingue
但係嗰時附近的加勒比海島嶼宗主國，個個都驚呢個革命熱潮燒到埋身，又想派兵過嚟幫手攪掂佢。其中英國係1794年派兵攻入島南部。法國見你咁樣攪佢個島，就走去牙買加(英殖地) 提議的黑人攪革命，咁樣英國先決定撤兵。
領軍同英國對打嘅，係一名黑奴出身嘅軍人，叫 Toussaint LOuverture 杜桑，佢係英國撤兵後，決定攻佔島南面同西面，屠殺咗成萬個混血婦女及兒童，到1799年正式成為左半邊島嘅統治者。1801年，佢草議憲法，自己成為終身統治者。後來，佢唔聽拿破崙支笛，攻埋過去右邊，想攞埋西班牙控制嘅右半邊島(即依家嘅多明尼加共和國) 後來拿破崙派自己嗰細佬嚟同佢打過，引誘佢返法國(話同佢談判) 其實捉佢返法國收監，佢最後死係監獄入面。
杜桑嘅副手 Jean-Jacques Dessalines (戴沙林) 就咁冷手執嗰熱煎堆，繼續呢個獨立革命，係1804年打嬴，正式宣佈獨立脫離法國，係繼美國(1776年) 之後第二個脫離殖民嘅國家。呢個資料，係我搜尋海地歷史發現嘅第一樣野，真心驚訝，然係就係深深慨嘆，作為頭兩個與宗主國打仗獨立嘅國家，成200幾年之後，分別可以咁大！再睇番香港前途，究竟會向邊個方向走呢？
>>>>>>>>>>>>>>>>
1804年海地獨立後係點呢？
以為飲咗人頭馬，好事自然來？
錯！錯！錯！錯！錯！
暴力上場的戴沙林即刻做嘅事就係屠殺白人，之後自封為皇，土地改制，唔聽話嘅就軍事處置，好快兩年之後就比人暗殺咗。咁樣嘅循環係之後100年不停輪迴，到1915年之間，換過90幾個統治者！
其間海地試過一分為二，北面有廢嘅皇帝統治，不停起皇宮堡壘；南面想攪小型農耕地，攪到經濟出口大跌。之後嗰個統治者又將南北合一，但係又輪到法國追債 (法國波旁王朝話海地獨立嗰時趕走佢的白人，沒收咗佢的地，所以索賠3000萬美元) 海地要揾人(美國) 借錢了事！
1915到現在，統治者上場落場速度係慢咗，但係背面就係不停比其他大國暗黑勢力控制，所以一路都只係革命->推翻統治者->混戰->新獨裁上場->推出新政->又打過，不停係到内循環！再加上因為係島國，不停的地震海嘯天災，200年就咁過去了，換嚟嘅只係貪污腐敗獨裁政治黑幫勢力走私毒品。
>>>>>>>>>>>>>
今年今日
啱啱比人暗殺呢個摩依士，在位4年換咗7個總理，全都係佢親朋戚友，再加上佢同上一任總統有關係，所以選佢出嚟嗰時，其實已經有好多人唔信佢。2016年選舉舞弊咁樣選佢出嚟就應該2021玩完，佢就死雞撐飯蓋話自己2017年先就任，要玩到去2022年！佢將本來6月舉行嘅選舉，推到去9月；又想修憲廢除參議院，廢除總統任期兩年，仲要總統有武裝部隊控制權！(呢的野係咪好熟面口！！！)
好啦，依家佢比人暗殺咗啦！本來做臨時總統嘅，應該係高院大法官，但係個高院大法官Rene Sylvestre 又咁啱6月尾武漢肺炎死咗 (咦！ 又較啱時間理由比佢推遲選舉？) 依家海地"臨時總統"就係總理 Claude Joseph
之不過呢，最吊鬼嘅就係，呢個 Claude 係幾個鐘之前係比總統炒咗魷魚架！！！係暗殺發生前幾個鐘，總統摩依士係晚間聲明話炒咗佢，任命咗第二個 Ariel Henry 做新總理！咁即係點呢？用你無限想像力自己諗吓啦！
>>>>>>>>>>>>>>>>
好啦，由海地睇香港告一段落。會唔會相似嘅過去，就有一定一樣的將來？人人有自己意見。你可以話歷史不由你一人控制，但係我覺得我地每個人每一刻都係到制訂緊歷史，你唔知呢一段海地歷史會叫醒到幾多人，而佢地會唔會有其中一個會係未來的孫中山？
另一樣想講嘅係，美國民主黨上場半年，由海地嘅亂，到塔理班的亂，完全係行緊毛東金句"世界越亂越好！"究竟邊個係背後做緊野？
>>>>>>>>>>>>>>>
[A] 其實想要理解多的呢段歷史呢，要睇番同一時期歐洲發生緊乜事。係呢個時期，就係法國國王 路易14的強勢時期 (佢叫自己做太陽王 le Roi Soleil) 在位72年，係歐洲最長統治期嘅國王。做得強勢嘅國王，就梗係想擴張啦，週圍去撩交打人霸地，一的都唔出奇。
奇就奇在佢嘅生平，同好多中史入面嘅皇帝好鬼似。
1638年出世嘅路易14 ，4歲就死老豆。佢老豆路易13因患病42歲就瓜咗，所以佢4歲就登基，好自然，仲係咁細個人仔，阿媽 Anne of Austria 皇后咪攝政囉。嗰時佢阿媽仲有個 friend 底朋友幫手，主教 Cardinal Jules Mazarin 係到做輔政。
嗰陣時成個歐洲都因為新教同天主教嘅三十年戰爭 Thirty Years War (1618-1648, 打咗29年) 打到立立亂。呢的戰爭全部最後都有簽條約架，來來去去咪又係割地賠償咁囉。三十年戰爭入面，隔離嘅西班牙係支持天主教嘅，而法國就係支持新教嘅，導致後來又講唔掂數 (諗諗吓又唔服氣？) ，就再打 Franco-Spanish War (1635-1659, 打咗24年) 最後西班牙輸咗，就將嗰女嫁比路易14 。咁啱輔政大臣 Cardinal Mazarin 係1661年死咗，咁路易14就係24歲正式登上寶座。
路易14在位打仗5次(三大兩小)
三大戰
1678 法荷戰 France-Dutch War
1688-1697 大同盟戰 War of Grand Alliance (又叫九年戰爭 Nine years war)
1701-1714 西班牙皇位繼承戰 War of Spanish Succession
兩小戰
1667-1668 War of Devolution 遺產戰
1683-1684 War of the Reunions 重盟戰
乜野原因打仗都好啦，我淨係覺得生活係嗰個時期嘅法國人真係好攰！！！你睇吓，我地淨係經過2019年已經身心靈虛脫，你睇佢地年復一年都係咁樣經過成百年，所以，我全力支持覺得依家去煲吓 Error 同 Mirror 一啲都無問題！
>>>>>>>>>>>>>
[B] 肥鬼係工作上，遇過有同事係海地人(能操流利法文) ，也有多明尼加共和國人，係同一個工作地點，佢呢兩幫同事由第一日開始，就已經係勢成水火咁樣？無原因的你死我活嘅關係。
但係佢地有一個共通點，係唔鍾意人地叫佢 African American!!! 唔好信晒的左膠政治正確！真係對白 "I have nothing African in me" 係佢嘅答案 (完全可以理解，其實咪同我地唔鍾意比人認我地做強國人一樣囉！)
No comments:
Post a Comment