童年回憶
2021.7.6 (二)
通常的人講童年回憶，離唔開都係細個嗰時嘅零食，阿媽煮嘅餸，去過嘅地方，或者係玩過嘅玩具咁啦。而呢的回憶，多數都會係"享受"嘅回憶 (唔出奇吖!!) 係好野先會有深刻印象架嘛，痛苦嘅回憶，梗係想盡快忘記佢架啦！
但係今日，我同肥鬼一行入"車立"，撲鼻而來嗰陣味，令到我的一個奇怪嘅童年回憶即刻返晒嚟。
我企係到索咗兩野之後，肥鬼忍唔住問我係咪 short Q 咗!!!!!
(關於索野，我係超市做兼職嗰時，最鍾意去執香薰蠟燭嘅貨架(!!!) ，成晚慢慢執，每一罐都開嚟索吓，哈哈哈哈)
我跟住話佢知，細個嗰時我最鍾意做嘅一個家務就係抺野。
咁神奇，無人細個鍾意做家務架喎，點解我係怪人??
因為嗰時屋企有呢支野 ->
(唔係打呢篇野都唔知依家有百花香味囉，哈哈!)
就係呢支碧麗珠嘅"檸檬香味"令到我好鍾意抺野，抺個14吋電視機，得嗰幾cm² 嘅面積都狂噴好幾野，完全只係為咗個香味先會做嘅家務!!
(以前一家六口圍住睇咁樣size嘅電視，依家連laptop都唔止咁嘅size囉)
正當我以為呢個係我獨有的童年回憶，點知肥鬼一棍打埋嚟 - 話佢細個都一樣!!!
一樣的檸檬香味，一樣的家務。咁又係嘅!!! 碧麗珠係 美帝 johnson & johnson 嘅產品，佢點會唔識呀？
要講佢唔識嘅，竟然係呢舊番梘。
依家諗番，我好似無係美國見過呢舊番梘，係嚟咗加拿大先見番呢舊番梘。
(一般人會以為北美洲美國同相鄰的加拿大無乜分別，住落之後有比較，會發覺個分別係原來加拿大仲係 keep 咗好多英國野。1776年美國係要打仗脫離英國 vs. 1867年英國賜比加拿大獨立，而呢個獨立又唔係真嘅完全獨立，因為到依家加拿大都係跟緊英聯邦， 所以2018年G7嗰時英女皇見到小杜省長，係會問佢 "How is my subject? 意即"我嘅子民生活好嗎？")
見到舊梨牌番梘嗰陣即刻買番舊嚟索吓嗰陣氣味，跟住又比肥鬼索吓啦，我仲以為佢一定識架，點知佢話未見過，無用過，無聽過？！？！
除咗梨牌，另一個有記憶嘅番梘就係家信氏番梘。
細個嗰時屋企仲有一舊長方型黃色嘅勞工梘，洗衫用嘅。原來依家都仲有得賣，祖國出品，品質幾十年都無變。現在仍然係勞工梘一舊。
因為家信氏梘同呢個顏色有的似，所以嗰時我會覺得梨牌係高級的嘅野架，哈哈哈。
由碧麗珠嘅檸檬香味，到梨牌番梘嘅香味，仲有家信氏個梘嘅形狀，可以睇到點解市場學係咁緊要嘅一門學問，因為你個產品只要中 point 係可以成功令人記一世嘅！！！
對於氣味嘅童年回憶，仲有一個不能忘記的，係呢樣
嗰時佢主打係萬能"消毒"清潔劑，所以屋企乜野清潔都落幾滴。仲要佢本身啡色的藥水，溝落水到會變白色，明知呢個都只不過係化學反應，但就係呢個visual effect，覺得用呢個會乾潔啲 (!) 所以係我屋企抺乜野都用佢。
因為由細到大，我已經將呢個氣味同清潔消毒畫上等號 ，嚟咗美國之後發覺揾唔到呢個喎，想用'言語'去解釋呢個'氣味'比肥鬼聽，佢竟然又答我未聽過呢個牌子，仲要話佢呢到消毒係用漂白水架渣！
No comments:
Post a Comment