呢邊同香港唔同，唔洗特登去投注站買嘅，係所有超市入面，都會有counter, 無 counter 就會係客戶服務櫃位(退貨櫃位) 嗰到就可以買到。
呢邊的彩票五花八門，唔似香港淨係得六合彩，不過嚟嚟去去都係買 number 咁囉。
係個櫃位後面幅牆，多數有個顯示器(好似小巴上面顯示司機車速嗰舊野咁嘅) 上面會show 緊今期派彩係幾多百萬。
每次行過見到好多人就知梗係好耐無人中啦。不過一嚟我唔係好積極買六合彩嘅人，二嚟又唔鐘意排隊等，三嚟就係多人買咪即刻中獎機會變得仲低？ 所以我只係會耐唔時行過見無人心血來潮先會買張玩吓。
嗰日買咗兩張，一張叫 MAX 一張叫 649 大叔問我要唔要買埋 loaded ? 我仲要問番佢 loaded 係乜 ka 科？ 同埋即刻幾銀？
佢話 loaded 即刻加料咁囉 (即刻中獎機會高的的咁囉) 價錢就係每張飛 多兩蚊，最後我埋單係12蚊。
其中一張尋晚已經對咗-↪無料到。
另一張仲可以發吓夢多一日。
其實今日出嚟散步出猛太陽，已經係中咗安慰獎咁喇，冬天 -8°C 但係有陽光感覺非常正。。。
港灣今日又開始結冰了。
行到去公園嗰邊，見到天上的雲好特別
太陽在冰上的倒影
我暫時一生人只係中過一次六合彩。
你會話，中過嘅應該會好鐘意買六合彩吖？
我嘅情況就剛剛相反，因為我中嘅嗰一次，完美展示出"情場得意，賭場失意" -↪我正正就係分手嗰日中咗$320六合彩！！！
所以依家嘅我，好相信現在每日無風無浪嘅平凡日子就已經係我嘅人生中咗六合彩頭獎了。
人一生中耐唔時有的小缺失都係好架，生活得太美滿反而仲驚。
星期二買咗六合彩之後，星期三就嚟嗰大雪天，嗰日唔知點解突然間多愁善感，係到諗肥鬼今日揸車遇到意外死咗咁點算？其實梗多係諗咁我會點算？搬返香港？繼續住係呢邊？做的乜嘢好呢？
港灣結冰差不多去到右邊碼頭了，不過要睇吓呢幾日係會繼續凍落去？定係一大風的就會吹到的冰碎晒(大風->大浪->不停打埋岸->碎冰)
有的人會好忌諱，會話唔好亂諗嘢，但係我就相反，成日都諗定將來肥鬼死先我會點打算，現在係有個人生的伴，但無人能夠一世陪你呀，除非你自己死先咁就一了百了，唔係的話，每人最終都要學會獨立。
嗰日大雪諗吓諗吓仲流咗一陣眼淚，好在一陣之後就聽到鎖匙開門聲，然後就聽到有人大叫 "where is dinner beavis? "
No comments:
Post a Comment