講開 Time share 呢樣野，曾經都係香港風靡一時。
我最記得就係收到 marketing cold call 電話，話送你5日4夜遊輪旅行，但條件係要去佢office 聽講解兩個鐘。都唔記得有無去聽了。
不過，以香港人咁醒 (市儈) 都知唔會有咁大隻蛤乸隨街跳，多數都無上當。
其實 time share 同直銷 (direct sales) 一樣，係呢邊係好普通嘅野，而且多數都唔係呃人嘅，係好直接嘅你聽佢講完一大輪之後，願者上釣咁樣。但係唔知點解所有呢的野，一傳到去亞洲，就變咗偷呃拐騙嘅類別！！
What is time share
簡單講 Time share 係比一個價錢，買一間渡假屋的一間房，一年之中的固定嘅其中一星期。係呢個價錢比晒之後，你可以擁有呢一星期嘅酒店房25年。 預你分期5年比晒呢舊錢，即係你之後廿年去同一地方旅行嘅住宿係免費嘅。
其實認真想想，如果真係有信譽嘅公司，又真係無乜呃人嘅成份。
只不過，香港人嘅旅遊方式，同呢邊係在差太遠了：
1) 係香港 / 亞洲，飛5個鐘短途可以去到嘅國家有成十幾廿個，所以香港人興次次去唔同嘅地方。
而係美加呢邊，飛5個鐘好大可能仲係美國，所以呢邊首先就唔太興去旅行，就算去都係國內旅遊，大多數係北上或南下。
2) 係亞洲，咁多國家有非常不同嘅語言，而且交通水準參差不齊，所以亞洲呢邊興搭飛機旅行 (係未有GPS 之前，你敢揸車去印度？菲律賓？) 。
係美國，佢地多數係揸車旅行嗰隻，因為平好多，試想一家五口塞晒入一架車，幾缸油嘅價錢可以穿州過省(同樣價錢搭飛機只夠一個人) ，如果係揸RV (露營車) camping, 就酒店錢都慳埋。
3) 香港人旅行，係睇野，買野，係去玩，要刺激，要新鮮，要唔好蝕底，日日都好多行程，密密麻麻的填滿嗰三五七日，返嚟仲攰過未去之前。
但係呢邊的人去旅行，係balance of life, 係relax, 係充電， 係rejuvenate, 係屋企成家人一齊hea 幾日 bonding, make memory，所以佢地係會每年去同一地方旅行。
4) 仲有一樣最重要嘅係天氣問題。香港係亞熱帶天氣，冬天夏天沒有很大分別。
但係美國上下分開一半，上面的地方一年5個月都係凍到落雪的，所以一到冬天的人就好似snowbird (季候鳥) 咁要去南部旅行。加拿大就分別更大，差不多一到冬天的人就搬走，幾個月之後先搬番嚟。如果講暑假去旅行係leisure, 咁呢邊的人冬天去旅行係一個need(必須) 所以呢邊好多timeshare 都喺南部如 florida 或沿海 hilton head, myrtle beach...
以肥鬼媽為例，佢一共有三星期嘅 time share : 兩星期係夏威夷，一星期係墨西哥 Cancun (美國人去 Cancun 就好似香港人去泰國咁) . 不過佢又唔係年年去夏威夷嘅(因為遠，要飛12個鐘) 所以佢 join 埋另一個 club, 就係可以網上同其他 time share owner 交換嚟用，呢個 club cover 嘅渡假屋世界各地都有，總之你揾到available 嘅日期地點，比手續費就可以換。
肥鬼細個個時，佢就年年 spring break 都換一星期嘅渡假屋去 Hilton Head, SC 夾埋肥鬼阿姨一家去旅行。佢自己就年年第二星期去 Cancun 陽光與海灘。仲有一星期就睇吓暑假想去邊或者儲起佢，咁下年就可以去 Cancun 兩星期。
初初我搬嚟嗰年，肥鬼媽就請我地去 Cancun 渡蜜月。肥鬼仲叫我執幾本書去睇？？？我嗰時都仲係香港旅行mode, 問佢去旅行唔係日日出去玩嘅咩？係到依家人老了，先體會到旅行，就係瞓到自然醒，然後先諗今日做乜呀！！！再唔係就好似佢地咁，係泳池邊坐足一日，吸收維他命D...
我地依家去旅行，多數就係睇佢邊到有渡假屋就去嗰到。咁你 book 佢渡假屋呢，馮星期日佢都有早餐會嘅，係免費嘅，吸引你的人去麻，除咗早餐免費之外，你聽完佢講道，佢就會比番的附近旅遊景點入場券比你，或者係出名餐廳嘅現金券，總之你係無蝕底嘅，不過就係要你聽佢講耶穌囉。我同肥鬼去嗰幾次(如果係已婚的，佢會要你一齊去聽，費是之後你話伴侶唔知/唔同意而取消) 嗰幾個推銷員都幾好人，不是太夾硬來，始終日日都有新客仔嚟，呢個唔買就快快手去揾下個客。
直到今次呢個。係上面張相你都睇到邊間酒店。
其實上面講肥鬼媽買嗰隻固定兩星期timeshare 已婚係舊款了。肥鬼媽買墨西哥嗰個timeshare, 的錢係直接比墨西哥政府同個builder (建築商) 所以係直接擁有一星期的業權。無花無假。係市場上係可以當賣屋咁樣賣番出去嘅。
近幾年，我地發現一的 hotel chain 開始發展渡假屋生意，例如 hilton, wyndham resorts, holiday inn, 佢地開始係同樣地方起更多嘅渡假邨，什或買起一個運行緊嘅渡假邨 (肥鬼媽係夏威夷嗰渡假邨就係比 wyndham 買咗)
呢的 hotel chain 發覺timeshare owner 有兩星期業權實在係太抵了。所以佢地諗到另一個玩法 - 點數制。
一如其他生意，依家人人都玩會員制，然後又話入會好，入會勁，可以儲分，但最終儲埋的分都唔知有乜用，或者多數係無用。我地係michigan 嗰時，每年暑假北上旅行(肥鬼由細去到大嘅，以前佢阿公阿婆夏天係嗰度住，後來去世了就賣咗間屋) 都係住holiday inn, 因為得佢一間 (另外兩間係界乎motel / hotel 咁樣嘅) 咁你住得幾次佢就叫你做member 啦，話有member price 同儲分 咁啦，之後就收到宣傳單張話免費5日4夜渡假屋，咁啱嗰年肥鬼嗰妹生咗BB, 諗住就book 呢個可以一家人去探佢地當係family vacation.
點知 tricky (狡猾) 嘅事就開始喇。
明明係打宣傳單張嗰電話 book 嘅，去到williamsburg 渡假屋話我地 book 嘅係街口間 holiday inn express 酒店？？但係又要我地返去渡假屋嗰便聽銷售會，好啦，都去聽啦，因為始終酒店房係 free 嘅。
講到明聽兩個鐘講道，會比番$200現金(就係酒店的房錢) ，呢個 sales stephen 先生超級長氣，講咗多過兩個鐘，我地已經開到口，話佢已經過時了，我地無意買任何package, 請盡快收尾，同埋我地趕時間要走(想揸車出去1小時外嘅沙灘), 好啦，佢終於叫上司嚟喇 (通常呢的銷售會係要過三關嘅) 點知呢個女人上司又從頭嚟過，幾經搏鬥，終於去到第二間房，通常嚟到依度就已經係sign you off, 點知佢又揾另一位小姐，美其名問番個銷售會有乜意見，其實花你更多時間，去到呢度，肥鬼已經嬲到走咗出去，最終，我買了嗰個$999/5日4夜的先可以甩身。
咁佢個點數制係點玩嘅呢？
佢一開始，會問你好多生活習慣/生活態度等等問題，其實主旨都係要你承認，你有定期旅行嘅習慣，跟住再游說你次次旅行去book 酒店，價格有上落之餘又唔係次次都一定book 到，所以就 join 佢呢個點數制就最好喇。起首一嚟，佢會sell 你200,000點 $0.24/點 共US$48,000 不過，今日你嚟聽呢個講座，有特價，$0.21/點 共 US$42,000 今日落搭比 $8400 按金，之後分5年 每月供$833 就得喇。
咁嗰刻我地話唔買，到女人上司嚟就開始降價，sell 我地121,000點，$0.15/點，共$18,750 5年月供$304!!!!!!!
點數制問題係邊呢� 肥鬼舅母的哥哥就係買了點數制渡假屋，係成日 book 唔到嘅。而且，你買咗嘅點，係賣唔番出去架 (肥鬼媽嗰兩星期業權，係賣得出去嘅) 仲有，你去聽講座時，佢會show 比你睇book 同一酒店，唔同日期價錢唔同，但你用點數book 就一樣係40,000點 / 一星期，但係佢唔會話你知佢酒店係除時可以更改點數要求，即係你去開嗰度今年要40,000點一星期，下年要50,000點一星期你都咬佢唔入。
就係因為上次呢個超級不愉快的經驗，令我地本來對呢個package 嘅好感都無了。holiday inn 呢個點數制對我地唯一好處係，除咗渡假屋，佢係包晒全世界所有旗下酒店嘅，如共佢有月供$100嘅package, 我地倆個返香港探親就唔使煩住嘅問題。
今次去las vegas , 就係因為嗰$999 5日4夜到期要用咗佢，一入到去坐底聽講座，我就立即講明今次要嚟只係因為上次佢嘅同事的所作所為，好在今次遇上Greg 係一個好人，雖然都要坐足90分鐘，但至少可以相信只係上次嗰個唔好。
今次 Greg show 比我地睇嘅，係超級微型嘅package, 83,000點 月供$169 共10年
我聽到都打個突。
由200,000點到83,000點，我諗你要講好多次No 佢地先至會offer 呢個package 比人，但係，有邊個會為旅行而月供10年錢？？？去到人行呢個階段，再加上經濟低迷，誰都知cash is king 呀，講到尾，去旅行係 want 唔係 need 呀！！！
Anyway, 寫咁大篇，就係想大家知道係呢邊渡假屋講道係乜野一回事，記得say No!!!!
No comments:
Post a Comment