今日下午五點鍾返工，仲未開始落雪，但間舖已經水静河飛，我仲要被分配去遙遠的一角摺衫，都好，因為好近園藝部，可以睇到出面風景！
睇住出面六點幾開始落，先頭都唔係好覺，七點幾發覺的雪已經係打橫亂飛，八點幾就成個地面都白晒囉。
手痕又得閒查下手機天氣，出面係18F（-7C）不過風速最高係34mph所以感覺就係2F（-16C）。
睇住出面個雪景，我就諗起以前係香港做野，個辦工室四面落地玻璃，對住個馬場景，最好睇就係打八號風球，橫風橫雨個景象，依家都係一樣，不過的雨變咗係雪囉！落大雨極，如果有好的渠道，的水都會走。但係依家落雪，的雪係會積聚嘅，只有等佢溶！！！
八點半，鄰居 Molly嚟入定貨（因為好大可能明天都係停課＋默許曠工），就係我地傾計嘅時侯，同事話我知可以提早收工喇。我同鄰居前後唔夠２０分鍾返屋企，但係地下已經唔見佢的車呔痕，可想而知有幾勁大雪。。。
肥鬼9.45pm打比我話依家開車返嚟，平時用1小時的車程，今晚用了兩個鐘！
＝＝＝＝＝＝＝＝
另外，真係要講呢間wally world真係把鬼！
我係九月開始係呢度返工，一入職無耐，就係美式足球U of M大戰MSU，日日都有人嚟問話要買球隊的衫，左問右問，問咗成個星期，都係無！有無攪錯呀！我係香港人都睇唔過眼，點答的客呀！係美國，講到咁普遍喜愛美式足球，而且人人都會著球隊衫去睇球賽，就算唔去現場睇而係屋企開party嘅都係咁著嘅，點可以成個星期都無貨架？！？！
後嚟？過晒的大賽成幾個星期，終於就成車成車咁嚟，仲要唔只美式足球，冰上曲棍球啦棒球啦都有呀，但係的比賽都過晒，搵鬼買咩，得個擺字都依家都無郁過。
以為咁大間跨國超市，唔會真係衰成咁？？？點知真係唔到係唔信！事實一一證明過你睇：
除咗今日呢個雪暴，早個月都有一個，個幾日，仲係聖誕附近時侯，好多細路仲放緊假唔使返學，咁出面成幾尺厚嘅雪，最好玩咪就係出去滑雪囉。
又唔係真係好pro個的，細路玩個的唶：
估佢唔到，咁大間超市，呢個膠蓋都無呀！！！！
何止呀？雪褲都無呀，日日比人問到口啞啞。點答呀！呢到邊度呀，michigan呀，年年都落雪架啦，天文台唔同香港個喎，早好耐就出到預報架喎，咁都可以無貨！
咁仲不突止。
今日。雪暴正日。無鹽賣。
呢的鹽係呢度生活必需品，一落大雪，家家都出去灑鹽灑到好似僵屍先生灑燸米咁樣，又唔會過期，都可以無貨。
據知咁大間舖，只得昨日有兩pallet（重型膠卡板）貨，昨日早上便賣晒，昨日＋今日＋聽日所有的生意都讓晒比對面。
呢間野真係無得救！！！
No comments:
Post a Comment